Markus 13 - Eipomek

Yesus arye, aning-aning nirya kum danamle talak, dam uplyopura, lak kina ati, Allah arye pitin kin ning winipnamle ati, laka lebuk yupu

¹ Yesus arye ayupu akunum nyabukopura, elce wipdeiamuk nang 12 ap, Yahudi yala nang arye Allah ati arilbalamik aik pum arye, buru tam bayik talak ara, Yesus el mapu tonoknye birye, anyaik domika dipdeyukce, ayupu nyabuk. “Naio, dipdelyame. Anyaik ara, jang pala weik keil arye domike. Anyaik-anyaik nirya domik ning ara, urasin pia telebe,” nyabuk.

² Nyabuk ati, Yesus arye ayupu nyapmoknye ati tamubuka nyabuk. “Weik aik dobika nirya ara dipdelyame. Weik cang keil pala arye deipra welebikce, domik keil aik nirya ara, aminyan talak ara, yu nang arye uluplobikiba, keil tonok ning babye, kum bataknamake. Anirya ulubuka daklobikirye, atu kibuka sung-sunga atonun deiplopnamake,” nyabuk.

³ Nyabukura, anyaik batakuka kulukikce, lu ak biyikopura, Zaitun mutuku deice welebuka, abinuka bukikce, yanmek ak, Yahudi yala nang arye Allah ati arilbalamik aik otam upmokak tamubuka dinmek. Yuk nang ap, tabakuka kum bukmeka anya arye, Allah arilbalamik aik dinmek talak arye, Peterus ap, Yakobus ap, Yohanes ap, Anderias ap, sik nirya arye Yesus ati asipdeyik.

⁴ “Naio, laka nyapsilyame. Anyaik ara, dan talak arye daklopnamak do? Yata ning winiptua deice arye, ‘Anyaik daklopnamaka ati, dam uple,’ teneptibye do?” nyabuka asipdeyik.

⁵ Asipdeyikura, Yesus arye ayupu tamubuka nyabuk. Sirya talak ara, yuk nang anggun dam yakirye tilila yupu nyapsikiba, ‘Mangkau kanye bobuka atilila yupu diba tenebibyak’ tenen, pia kanye darapdongo unamlulume, nyapsine.

⁶ Ara, ninye weik yakirye na si sisibuka nyabikirye ayupu nyanamake. “ ‘Ninye lyena ati, Mesias yanamle,’ nyalimiknye bira na uka. Na akunum yanmana atia,” nyanamak deice arye, ninye weik atilila yupu kekebikirye mangkau kanye bobuka, diba tenenamake. Atilila nang nyanamsiaka deice arye, anggun kanye talima nirya libuka, yuk tam dobanamsiaka ati, ‘Mankau asa arye tilila yupu diba tenebibyak’ tenen, anggun kanye talima moubuka unamlulume nyapsine.

⁷ Tonda, deiyok kum upmalibuk, kum yupu arye ayupu nyabikiba kekenamlume. “Ton tam yala nang ap, ton tam yala nang ap, mal olanmak,” nyabuka laka nyalamikbuk kekenamlume. Tonda, dipkoprop akunum mal olanmace talak elinamlum ning ap, kum yupu nyanamak ning ap, yanuka nyabikiba, kekepmunyopura, ilil kum unamsulule. Allah arye, ‘Ato ning wininamle,’ akunum tenelamuka ati, wininamle bukni, aning nirya winiplye talak ara, ‘Sirya dakna talak ara, min kum upmale,’ tenenamlulume.

⁸ Tonda, sirya talak wininamle ning ara, ton pia weik mutuku nang arye, ton weik mutuku nang ati, binuka olanamake. Ara negara nyalamak ninye arye opdanamaka ati, nyapsine. Tonda, ton tam weik ninye deiyoknye birye talilul ninye ap, yuk tam weik ninye deiyoknye birye talilul ninye ap olanamake. Winilamice ani, mutuku yuk-yuk weika arye lulukunamle. Tonda, wa wibuka kouamice ning babye, nong kum upliba, din pia patanauk unamle. Anyapmasin ning nirya kel bikna ati, winipmanto ning ara, kilapu mi deipnuce talak mi deiyok uk din malye ani, mi delilamak touk, na laka nyanmasin ning nirya akunum uplyopura, ‘Sirya daknamle talak akunum dam uple,’ tenenamlume.

⁹ Ati ara, aning-aning winipnamle ning ara, moubuka dimunce, tenenamlulume. Yu nang arye, anggunti, ‘Yupu lipsisikuka bokolina deiyok nang arye wenebuka opnamak’ tenen, tapu koubuka arilbanamsiyake. Tonda, Yahudi yala nang arye Allah yupu peterena aik noutamak arye anggunti tapu koubuka bobisicopura, nati diba tenemunye ninye anggun wenena ati, kama arye weik kulabuka onamsiyake. Nati, dib tenepmanuluma ati, ‘Anang arye opnamak’ tenen, weik ninye deiyok nang, Gubernur nang ap, sisinanye weik ninye deiyok nang, sisin nang Raja nang ap, sik dam bobisiceura, anang kekena ati, na si deice arye pil domunye ning ara, lakak kibuka yupu laka nyanamlulume.

¹⁰ Aning-aning nirya sirya dakne ning min kum sirya upmalye talak ara, na laka teleb yupu, ninye lyena yupu dobuka, mutuku sirya, im sirya peterelbanamake. Peterebikiba ninye mutuku-mutuku nirya na yupu akunum kekebicopura, aning akunum winibicopura, sirya dakne talak akunum dam upmala ati ara, na tamubuka yanamnarya.

¹¹ Dan talak do nirya, dib tenena kum nang arye, nati diba tenelulum ninye ati, tapu koubukapsikirye, yupu lipsisikuka bokolina deiyok nang dam bobisicopura, yupu min kum nyapmamunye talak ara, ‘Se, yata wiribuka nyapnuyap do?’ tenen, ikin kanye kum bonamlulume. Allah El Dib Kanye arye, anggun talima pum tam atalak arye nyapsilye yupu uk nyanamlulume. Allah El Dib Kanye anggun talima pum tam atalak aryuk nyapsilye yupu uk nyanamlulume. Ara, Allah El Dib Kanye mikip arepsilya deice arye nyanamluma ati nyapsine.

¹² Sik tonok du weit yapu bukni, ‘Adeiyok nang arye opnamak’ tenen, inibuka tapu koubikirye bobindaknamake. Atouk ton, sik ni yapu koprop arye, sik mining mapu ak inibuka, tapu koubikirye bobinamake. Aning atonun, sik mining mapu arye, sik nin yapu koprop ap, sik ni yapu koprop ap ati, ‘Sik yupu ara, nun kum kekenamabe,’ nyabuka, yuk nang ati, ‘Nun ni yapu ap, nun nin yapu ap, opdeipsululume,’ nyabikcopura, onamake.

¹³ Nati, dib teneluluma ati, yuk dib tenena kum ninye nirya arye, anggunti, ‘Aninye ara, pia nun lik,’ tenebuka, malye yupu nyabuka, anggun nong deice ikin ning weik delinamsiake. Bukni, yatanye do nirya, na batakna kumce, dib tenyamlirye, pia kanye lamabuka ulamlinye bira, malye nang arye obica babye, Allah arye anye biti dipkoprop lyepnamle. Lyeplirye, im deice bobinamle. Yesus arye el mapu winilye nang ati nyabuk.

¹⁴ Nyabukce ayupu ton dukdongobuka nyabuk. Allah arye elda, ‘Pia na lik,’ teneptu ura, “Anye bira, asukum kum tikilyatue,” nyabuka yupu sekamuk akuk, ‘Allah ap, el wininul ning nirya ap, bisipnamne,’ tenelulnye birye, yanuka tiklyopura, Allah el si erena ati arilbalamak aik, Allah arye pia bataknamle. Allah elti, arilbalamak aik, Allah arye batakuka bilye talak ara, anggun Yudea tam unamlum nang arye, Yudea tam arye batakuka, adiparyuk bik-bik abuka, yuk mutuku damuk banamlume. Yesus arye nyabuk. (Na Lukas arye nyapsine. Abuku sekamik yupu yinilulum nang ara, ‘Deiyok ani’ tenen, moubuka kekeplulume.) Yesus arye ayupu ton nyabuk.

¹⁵ Aning winipnamle talak ara, anggun aik pum kum unamlum nang ara, aik pum batakmamunye ning tamubuka kum dolbinamlulume.

¹⁶ Atalak ara, anggun wa win dam unmamunye nang ara, anggun nong deice ongon cang baju, alip ning kwiribuka, aik deipmamunye ning ara, tamubuka aik pum deipmamunyak kum dolbinamlume. Adip aryuk aning nirya batakuka, pera mutuku ak, minopce bik-bik abuka benamlume.

¹⁷ Atalak mi bomice kilapu ap, mi moum dinilamice kilapu ap, akilapu ara minopce bik-bik abuka pera mutuku tam kum binmanto ati, pia imun kanye bobuka, ikin weik unamle.

¹⁸ Kapye deiplye talak mok weik celamliba, pera mutuku kum binmanto ulamle touk, sirya talak ayanamle ikin ning ara, ‘Arukna li do, kapye deiplye talak do, aning yaliba, nun binmanto kum kipsilyak’ tenen, Allah moronamlume.

¹⁹ Anyapmasin yupu deiyok ara ani. Allah arye aning-aning nirya kwepdeiamuk talak arye ubuka, wini talak babye, yuk talak babye, ikin ning ulamuk bukni, anirya ap, aminyan talak ikin upnamle ning ara, ikin ara, mitik tonunuka. Bukni, sirya daknamle talak ara, pia weik ikin upnamle.

²⁰ Sirya talak ikin unamle talak ara, Allah arye, ‘Ikin ning weika arye deipniba, tukwak ninye nirya dibicak’ tenen, Allah arye ikin ning unamle talak mitik atonun arepnamsile. Deiyok ara, Allah arye ikin ning delinamle talak ara, mitikto karen talak arye min deiptu ura, tukwak ninye kan-kan tonoknya babye kum kam uptue. Ninye nirya diptingba sirya daktue. Bukni, Allah arye, ‘Tukwak ninye kan-kan ton ninye akunum wibuka deiyamsa ati, aninye ara, na mapu kam unamake,’ tenyamuk. Utenyamuka ati, Allah arye ‘Ikin unamle talak weik arye deipnyopura, na wibuka deiyamse nang na tenen ninye nirya dibicak’ tenen, ‘Sirya dakne talak ati, ikin ning weik unamle talak mitikto karen aryuk delinamne,’ akunum tenelamuk.

²¹ Atalak noutamak arye ton nang ara, tilila yupu deice arye, ‘Ninye nirya lyeplirye, talinamle, nyanyaknye bira, nara Kristus akunum yanmane,’ nyalyanganamake. Ton nang arye, ‘Amapo dipdelulume. Kristus akunum yanmalbuk nun dam akunum unmale’ nyanamake. Ton nang arye, ‘Omutuku unmala ati ara, dilbinuyabe,’ nyanamake. Tilila yupu arye ayupu nyalyanamsiak bukni, anggun na mapu ara, atilila nyan nang yupu diba tenebuka kum kekenamlulume.

²² ‘Anang ati, diba kum tenenamlulume,’ nyapmasina ara, urdem ati kum nyapmasine. Deiyok ara ani. Aminyak talak yanamak nang ton nang arye, ‘Nunda Kristus unyabe,’ nyanamake. Ton nang arye, ‘Kume, nunda Allah el yupu ap, aminyan winipnamle ning ap ati, lake nyana deiyok nang unyabe,’ tilila ati nyanameke. Aning ara, ‘Sik yuk nang arye, nun mambul pil eipsikirye, dib tenebuka melipnamsiak’ tenen, ninye arye winipmanto kum pil donamake. Aninye ara, isa mikip deice arye, ninye arye kum winipmanto pil donamake. Ton nang ara, ‘Apil dolamipyeba yuk nang eipsikirye, ‘E, anang ara, dipkoprop Allah el mikip deice aryuk apil donyake,’ tenepnamsiak’ tenen, mambul pil ton donamake. Apil-afil nirya dopnamak ning ara, Allah el min arye wipdeiamuk ninye ara, ‘Allah batakuka, nunuk melipnamsiak’ tenen, yanuka pil donamake. Sikti lila yupu nyan nang arye wininamak bukni, Allah wipdeiamuk ninye arye, atilila ning dib kum tenenamake. Aninye ara, Allah el ‘Na’ tenen, ninye unyaka anya arye, tilila ning ap, tilila yupu ap ati dib kum tenenamake.

²³ Aning nirya wininamle ati, anggun pia kanye moubuka umunce, kintinilinamlulume. Aning nirya min kum winiplye talak arye, winipnamle ning akunum laka nyapmasine, Yesus arye nyabuk.

²⁴ Aikin noutamak talak bukni, anyapmasin ning kanye imun ning akunum uplyopura, “Aning winipnamle,” nyabuka, Allah el yupu laka nyalamuknye nabi Yesaya birye sekamuk yupu atonun winipnamle. Ati, nabi Yesaya sekamuk yupu deice nyapnusine. Ara, ‘Keting kunuknamle. Tonda, wala dirina kum danamle.

²⁵ Tonda, kurya nirya ara, im deice arye tukwak saknamle. Tonda, im deice ulul ning nirya lulukdakirye bindaknamle.’ (Yesaya 13:10) Ayupu ara, nabi Yesaya birye sekamuk yupu nyapsine. Yesus arye nyabuk. Nyabukce, ayupu tonap, nyabuk.

²⁶ Im deice aubuk ning akunum winiplyopura, nara Ninye Mi Koprop Atonunye, weik mikip ap, weik dirina ap, urasin teleb una ap, adeice nirya arye dua kan-kan yaniba, ninye im sirya, mutuku sirya nirya arye eipnamniake.

²⁷ Na yanamne talak ara, na im deice pil don nang, malaikat dopdeipniba, im sirya, mutuku sirya dana-dana nirya, Allah minop arye ‘Na mapu unamak’ tenen, wipdeiamuk nang bulubuka delilyanganamake.

²⁸ Ati ara, kapye yo kita moulamle li tenepmunce kel bikilulume. Kapye yo kita diklyopura, kapye talak ati, ‘Mok cepnamle,’ tenelulume.

²⁹ Aning tenelamlum atonun, alaka nyapmasin ning nirya eipmunyopura, ‘Sirya daknamle talak akunum dam uple,’ tenenamlume. Aik buplan dam, tikilyakirye peten-peten ubikiba, anggunce, ‘E na kwit bira na aik dam akunum yanmale,’ tenelamlum touk, anyapmasin ning akunum uplyopura, ‘Sirya daknamle talak akunum dam uple,’ tenepnamlume.

³⁰ Na dipkoprop nyapsine. Wini talak umunye nang min kum dipmamunyebuk, alaka nyapmasin ning nirya winipnamle.

³¹ Im deice ubuk ning ap, tukwak ubuk ning ap, anirya ara, kum danamle bukni, na yupu ara, tonok ning babye, kume kum danamle. Ayupu nyapmasin touk, dipkoprop nong unamle. Yesus arye ayupu nyabuk.

Yesus arye, “Na tukwak mutuku tamubuka yanamne talak ara, ‘Asum ani, atanggal ani,’ tenebuka anggun kum biktume,” nyabuk yupu

³² Yesus nyabukopura, ayupu tonap, nyabuk. Yata nang do nirya, ‘Yesus tamubuka yanamle sum ara, asum yanamle, asum noutam ara, beren tam yanamle, sintam yanamle’ tenen, kum kel bikmanto unyaka anya arye, lak kum nyaptinge. Allah el im deice pil don nang, malaikat babye, kum kel bikamika ati kum nyaptinge. Tonda, Allah el Mi Koprop, na babye kum bikse. Na ni Allah eluk kele. Elcuk, ‘Atalak ani,’ tenelamuk touk tamubuka yanamne.

³³ Na yanamne talak ara, kum bikiluluma ati, ‘Nun tuba malye wininyap noutam talak, nun ni minpola yalirye, wenepsilyak’ tenen, anggun kanye pia moubuka unamlulume. Tonda mankau asa unmamunyak, ‘Talye karin arye yalyak’ tenen, tonda ‘Dan talak yanamsil do?’ tenen, kintinibuka dinamlulume.

³⁴ Na yanamne talak anggun walwal usilye ning ati, winipmanto yupu nyapnusine. Aik deiyoknye tonok arye, yuk mutuku binulye talak ara, el pil don nang ati, ‘Pil winibuka donamlulume,’ nyabuka bokdeiplirye, tonoknye biti, “Na ni, ‘El minopce yanamle’ tenen, buplan dam kalekuka dinamnilyame,” nyalule.

³⁵ Nyalamle touk, na babye, anggunti nyapsine. Anyaik pil don nang sik deiyoknye aweik aik talilulnye tamubuka yanamalye talak kum bikinyak atonun, anggun babye, na tukwak mutuku tamubuka yanamne talak kel kum biknuluma ati, ‘Nun deiyoknye Yesus dan talak yanamle do?’ tenen, kintinibuka dinamnulume.

³⁶ ‘Ayam gamulamle talak do, bereklamle talak do, sintam talak do, pia lukunyan noutam talak yanamle do?’ pia kum teneluluma anya arye, kanye pia moubuka umunce kintinibuka dinauk unamlulume. Winibuka datalye unmamunya talak arye, ‘Na talye karin yanyak’ tenen, pia kintinibuka dinamnulume.

³⁷ Ayupu anyapmasin touk, ninye mutuku-mutuku nirya ati, atonun nyapsine. Pia kanye moubuka kintinibuka dinauk unamnulume, nyapsine. Yesus arye el mapu ati nyabuk.