Lukas 23 - Eipomek

Yesus dobuka Pilatus dam bobiyikura, yupu talipmek yupu

¹ Yahudi yala nang Allah arena ati, weik deiyok nang ap, Musa sekamuk yupu peterena deiyok nang ap, Yahudi yala nang, yuk deiyok nang wisi nang ap, sik yupu akunum nyabikopura, Yesus dobuka Pilatus dam bobiyik. Ara Yudea tam talyamuknye, ‘Pilatus arye yupu bokeipnul’ tenen, bobinuka arebik.

² Anang nirya ara, ‘Pilatus arye Yesus opnusil’ tenen, minina yupu arye ayupu nyabik. “Yesus ara, el malye ulya deice arye, nun mutuku noutamak unyak ninye nirya eibikirye sik nirya malye wininamake. Elce malye winilisulule. Tonda, nunce Kaisar yo bok arilamap ning ara, ‘Aning kum wininamabe,’ nyabuka yupu sekeldongosulule. Tonda, Allah arye dopreipliba ninye weik lyeplirye, talinamle deiyoknye, ‘Mesias ara, na unune,’ Yesus arye nyalule. Mesias ara, Raja atonye unamle ati, ayupu nyasilya deice arye, ‘Nara, weik ninye deiyoknye, Raja atonunye unune,’ nyasulula anye arye, aning ara, pia malye.” Sik anang arye minina yupu deice arye nyabik.

³ Nyanmeka ati, Pilatus arye Yesus ati asipdeyuk. “Yahudi yala nang sik weik deiyoknye, Raja atonun nyanyaknye bira, an akunum do?” nyabuka asipdeyuk. Asipdeyukura, Yesus arye tamubuka nyabuk. “Diba anyapmanilam touk unune,” nyabuk.

⁴ Nyabukura, Pilatus arye abulubuka wekmek nang nirya ap Allah arena deiyok nang ap ati nyabuk. “Nun Roma mutuku deiyok nang arye, ‘Wininamlulume,’ nyanyap yupu ara, dipkoprop malye winibuka deice arye yanipmasil ning ara, min kum nyapmanulum arye kum kekepmane. Anye malye winibuk deiyok ning ara, ton kum kekepmane,” nyabuk.

⁵ Nyabukura, Allah arena ati deiyok nang nirye arye, ‘Pilatus kekeplirye, diba tenepnamal’ tenen, tabakdongobuka mikip arye tonap ayupu nyabik. “Kume, Yesus el malye winilul ning ara, malye-malye peterelya deice arye, Yudea tam unyak Yahudi yala ninye nirya ati, malye ulisulule. Galilea mutuku arye malye-malye winipnin yangalamuka ani, amutuku babye, yanuka tuba malye winilisulule,” nyabuka weik arye nyanmek.

⁶ Sik nyabikura, Pilatus arye ayupu kekepmoka anye arye, “Yesus ara Galilea tamnye ulul do?” nyabuka asipdeyuk.

⁷ Asipdeyukura, sikce, “Yo, Galilea tamnye ulule,” nyabikura, kekebuka kel bikukopura, weik ninye deiyoknye Pilatus arye, utenebuk. ‘Aning ati ara, Galilea talibuka na amu tam ulul deiyoknye bira, Herodes anye arye, Herodes arye Yesus yupu lepsikra bokipnamle,’ tenebukce, Herodes Yerusalem mutuku tia yanuka unmokak Yesus dopkwetebuk.

⁸ Pilatus arye nyapdeibukura, yuk nang arye Yesus dobuka Herodes dam bobiyikopura, Raja Herodes arye Yesus eibukce kanye deibuk. Kanye deiamuknye bira, dorketing tamun, “Yesus arye ninye winipmanto kum pil dolule,” nyalamik ati, kekelamuka ati, ‘Na dinmatinyak ton apil doptopura na babye, eiptinye’ tenen, patalamuka ati, Yesus eibukce kanye deibuk.

⁹ Utenebuka ati, Herodes arye Yesus ati weik asinmok bukni, Yesus ara, yupu tonok babye, kum nyabukce, tunimanauk upmok.

¹⁰ Yesus Herodes dam unmok talak nirya ara, sik Musa sekamuk yupu peteren nang ap, Allah arena ati weik deiyok nang ap arye, yu ubukura, minin yupu arye, “Yesus el malye winilul ning ara ani,” mikip yupu deice arye nyanmek.

¹¹ Wininmek talak ara, Herodes ap, el yin talin nang ap arye, Yesus ati, derenmekce nalinmek. Sikce nalinmek talak nirya ara, sik weik nang ongolamak cang baju, el si juba atonun ongon baju, Yesus nong deice ongopdeibikce, nalinmek. Winibikce, tamubuka Pilatus dam dopkwetebik.

¹² Herodes ap, Pilatus ap ara, daulamrik talak nirya ara, kanye kum deipdanuka ulamrik bukni, Pilatus arye Yesus dobuka, Herodes dam dopkwetebuka deice arye, ‘Na kwit’ tenen, sik kanye deipdarik.

¹³ Pilatus dam dopkwetebikura, Pilatus arye Allah arena ati deiyok nang ap, Yahudi yala nang sik yuk deiyok nang ap, tonda yuk talye daunmek nang ap yukubuk ati, yayikopura, ayupu nyabuk.

¹⁴ “Anggunce Yesus dobuka na ak boyanmalumce, ‘Anye bira el malye winilya deice arye, amutuku talinyak nang Roma nang obisiptibye nyalule,’ nyapmanulum bukni, anggun tuba kekenmalum talak ara, asipdenmanubuk, anggun nyapmalum touk, el dipkoprop malye winilul ning ara, tonok babye ton kum kekepmanue.

¹⁵ Tonda, Herodes babye, ninye malye winibiceura, ‘Deiyok ara ani’ tenen, olamap ning ara, ‘Aning winipmo do?’ tenen, asipdenmo bukni, el babye, ayupu kum kekepmo ati, Herodes arye dobuka, nun dam tamubuka dopkwetepmasila ara, akunum eipmalume.

¹⁶ Aning ati ara, narye nyapnyeura, na yin talin nang arye talya kama arye el nong deice oplobiceura, Yesus lopdongopnune,” Pilatus arye, sik Yahudi yala deiyok nang ati nyabuk.

¹⁷ Ura, Yahudi yala nang Kaplina ati Kwalina talak noutamak arye, wenena aik dongolamik nang kan-kan bukni, ninye nirye arye, ‘Anye bira lopdongoplulume,’ nyapnanye uk, tonoknye wibuka loltakalamik.

¹⁸ Winilamika anye arye, Pilatus arye ayupu nyabukura, el dam ninye weike bulubuka wekmek nang nirye arye, “Kume, Barabas eluk ara lopdongopsilyame, nyaplulume,” nyabuka yupu dilanmek.

¹⁹ Barabas ara, ‘Yerusalem mutuku talinyak nang obuka daknamap’ tenen, olanmek talak ara, ‘Narye ton melibuka kwa dakuka opnun’ tenen, ninye tonok omuk ati, wenena aik dongamikba ulamuk.

²⁰ Pilatus arye, ‘Yesus loploptinye’ tenen, patabuka ati, awekmekce, ‘Yesus opsilyame,’ nyanmek nang ati, Pilatus arye, “Na kanye teleb ning ara, Yesus lopdongopnune,” nyabuka, awekmek nang nirya ati, yupu mikip deice arye nyanmok.

²¹ Nyanmok bukni, sik awekmek nang nirye arye, weik yupu nyanmek. “Ance nyapminyeura, Yesus dobuka wanwanun yo deice deibuka opnuyake,” nyabuka yupu weik arye nyanmek.

²² Nyanmek ati, Pilatus arye like winilye ton tamubuka nyabuk. “Yata ning deiyok ati opnuyak do? Nun amutuku talilamap nang arye, ‘Wininamlulume,’ nyanyap ning, dan ning ton yanisilya ati opnuyak do? Elce malye winilamtuura, optibye ning ara, dipkoprop ton kum kekepmana ati, narye nyapnyeura, talya wenebikirye kama arye kulabuka wenebiceura, lopdongopnune,” nyabuk.

²³ Pilatus arye nyabuk bukni, sik awekmek nang nirye arye, tuba tonap tapakdeibuka weik yupu arye tonap moronmek. “Ance nyapminyeura, wanwanun yo deice deibuka opnuyake,” nyanmek deice arye, Pilatus nyanmok yupu sekik.

²⁴ Pilatus el kanye ara, ‘Awekmek nang nirye arye, pia pi deibuka nyanmaniaka ati, Yesus dobuka anang arepnyopura opnuyake,’ tenebuk.

²⁵ Utenebukce, Barabas lopdongobukura, talye biyuk. Ara, Barabas arye, ‘Nun Israel mutuku nirya talisinyak nang, Roma nang obisiptibye’ tenen, pirildelamukce, ninye olamuknye ulamuk. Winilamuka ati, wenena aik pum dongamika anyak, Pilatus arye dobuka lopdongobukura, biyuk. Barabas ara talye biyuk bukni, Yesus ara, Pilatus arye, ‘Anang ara, Yesus dobuka opsitinge’ tenen, nyanmaniaka ara, ‘Dawinipnuyake,’ tenebukce, anang ati aribuk. Aribukura, yin talin nang arye, ‘Yesus dobuka wanwanun yo deice delilbinuyak’ tenen, arebik.

Yesus wanwanun yo deice deibuka, obik yupu

²⁶ Yesus wanwanun yo deice deipnameka ati, bisik banmek talak ara, tonoknye el si Simon Kirene mutukunye bai tam unmoka ani, bisik noutamak yangayuk karen eipdayik. Yin talin nang arye Yesus bobanmekura, Simon ap eipdayikopura, Yesus el wanwanun yo ikin ubuka ati, sik yin talin nang arye, Simon Kirene mutukunye ati mikip arye, “An adiparyuk awanwanun yo tomobuka bobilyam,” nyabuka arukikura, Yesus menekuka banmokura, Simon arye ayo tomobuka aminyan bobiyuk.

²⁷ Yesus menekuka banmokura, ninye weik ton aminyan banmek kan-kan arye, kilapu ton Yesus ati, bico tenebikce, kanye bobuka se tenebuka engepnin banmek.

²⁸ Engepnin banmek bukni, Yesus arye tamubuka akilapu dipdeyukce, ayupu nyabuk. Anggun Yerusalem ululum kilapu ara, nati engena meme. Anggun damang ap, anggun mapu ap ati, engenamlulume.

²⁹ Ara talye ati kum nyanmasine. Deiyok ara ani. Aminyan ikin upnamsil talak ara, ayupu nyanamlume. ‘Sik mapu kum deilikirye, you uk unyak kilapu ara, sikda telebe. Tonda, mapu moum dinina kum kilapu ap, sikda, teleb bukni, nun mapu akunum debupu kilapu ara, kum bik-bik abuka bitibye anye arye, ikin weik unyabe,’ nyanamlulume.

³⁰ Ayupu nyanamlum talak ara, aning ton upnamle. Yahudi yala ninye ara, kanye imun weik uplibuk, mutuku nirya ati, nyanamake. Mutuku dalupmince, ‘Nun yanuka siklipsilyame adiparyuk diptibye. Anggun mutuku dup nirya pakuka singnipsutumura, diptibye.’ (Hosea 10:8) nyabuka malye nyanamake. Yesus arye nyabuk.

³¹ Nyabukopura, domona yupu deice ayupu ton nyabuk. “Yo imbik tuba upmalye talak atonun ati ara, nati winipmaka ara, mitik kanam bukni, aminyan ara, yo koulupyle talak atonun upnamsil ning ara, pia ikine,” Yesus arye domon yupu deice arye nyabuk.

³² ‘Yesus wanwanun yo deice opnuyap’ tenen, bisik banmek talakuk, ninye bitinye malye ulamrik nang ton, Yesus ap ansinibuka bobanmek.

³³ Bisik banmeka ani, mutuku si Golgota mutuku biyik. Golgota nyalamik ning ara amutuku urasin ara, ninye gisok yok atonun uamuk mutuku ati nyalamik. Golgota mutuku deice biyikopura, wanwanun yo tuku deice deibuka, Yesus el nong ayo deice deibikura, tangaliptalibuka deibikce, taruk dana-dana ap, yan tonok ak ansinibuka deibikce, paku dakik. Winibikopura, Yesus el nong wanwanun yo deice deipmek yo ara, erebuka tuku palipmeka ak pum bisik erebuka dopkwetebikce ikik. Aning atonun ton, sik malye ulamrik nang bitinye, tonye bira sirik tam, tonye bira kwanim tam deibikce, yuk-yuk ikik.

³⁴ Anang nirye arye, ‘Yesus opnuyap’ tenen, wanwanun yo deice deipmek talak ara, Yesus arye el li Allah ati nyabuk. “Naio, aonmaniak nang ati, kum wenepnamlyame. Sikda, bita kum tenepmakce, wininmaniaka anye arye, sikti, namin kipnamlyame,” nyabuk. Tonda, sik ayin talin nang arye, Yesus deice ongopmok baju, ‘Yatanye birye dopropnul do?’ tenen, sik nomor undian donokik anyak ani, aning akunum laka kipne nanguk, aongon baju dolonmek.

³⁵ Atalye wekmek nang arye tuba dinmek talak, sik Allah ati arena deiyok nang ap, Musa sekamuk yupu peterena deiyok nang ap, sik anang arye, Yesus ati, nalinmekce, akutunmek. Sik nyanmek yupu ara ani. “Yesus arye yuk nang ati melibuka lyelamuk bukni, elce el damang kum lyepdatue. Allah arye wibuka dokwecamtu ura, ninye mutuku-mutuku nirya lyeplirye, talinamlanye, Ninye Lyena Deiyoknye ara, Mesiasnye ulamtu toura, wanwanun yo deice lyepdaturye, tukuak saktue,” nyabuka nalinmek.

^36-37 Anang arye nyanmek touk, sik yin talin nang arye ayupu nyabik. “Anda Yahudi yala nang, sik weik ninye deiyoknye, Rajanye ato ulamtumtoura, lyepdatumce saka yatume,” nyabuka nalinmek. Nalinmekce, ‘Uk diplyak’ tenen, uk sekelongona ati, anggur mek yu ning, Yesus ati arebik bukni, Yesus ara kum dibuk.

³⁸ Ninye arye, “Yesus el malye winilul ning ara ani,” nyalamik ning ara, yo lakase deice surat sekuka deibikce, Yesus el gisok deice tam deibik. Surat sekik ning ara, ani. ‘Yahudi yala nang sik weik ninye deiyoknye Raja ara ani,’ nyabuka sekdeibik.

³⁹ Sik anang nirya nalinmek touk, Yesus noutam dana-dana tam wanwanun yo deice deipmek nang, tonoknye birye Yesus ati, malye yupu weika arye nyanmok. “Anda Allah arye wibuka deiamkuk bukni, Ninye Lyena Deiyoknye, ara Mesias ulyam do? Mesias ulamtumopura, an bidamang arye lyepdatumce, nun ap lyepsutum bukni, aning ara, kum winiptume,” nyabuka malye yupu nyanmok.

⁴⁰ Nyanmok bukni, dana tam deipmeknye birye, “Sikce el opmak tok, nun babye, opmasiaka anye arye, Allah ati ilil kum unmakil do?

⁴¹ Nun dipkoprop malye wininyam anye arye, ur opnusiak bukni, anye bira, malye ning tonok babye, ton, malye kum winilamuknye bibabye, opnuyake,” nyabuk.

⁴² Nyabukopura, anyanmoknye aniryuk Yesus ati nyabuk. “Yesuso, ance ninye nirya ap, aning-aning nirya ap, talibuka unalamak, wekminyopura, nati tenepnamnilyame,” nyabuk.

⁴³ Nyabukopura, Yesus arye ateleb yupu nyanmoknye biti tamubuka nyabuk. “Na dipkoprop nyapkine. Arup aniryuk, na ni dam, pia teleb ak weknye talak ara, an ap na ap neika pia unaname,” Yesus arye nyabuk.

Yesus dibuk yupu

⁴⁴ Yesus wanwanun yo deice deibik ara, keting dukduk ara, beren tam toupne keting arye deibik. Beren tam toupne keting deice arye, Yesus wanwanun yo deice deipmekura, daupmoka ani, keting dukduk, an koprop ubukaura, amutuku nirya inibukce kunukuk. Uku weik kunukmoka ani, sintam winilye keting ubuk. Ara, sintam keting noutam tuba upmok bukni, keting dirina kum upmukce, kunuknauk upmok.

⁴⁵ Sintam winilye keting ubukura, Allah arilbalamik aik pum wilina ati, lapkwetamik cang kain ara, eitam arye kwilikuka sakukce, bitinye kibuk.

⁴⁶ Abaju bitinye kibuk talak ara, Yesus weik yupu arye erebuka, ayupu nyabuk. “Na ni Allah, na kanya ara, an taruk deice deipkine,” nyabukopura, adiparyuk isin dakdobukce dibuk.

⁴⁷ Yesus dibukopura, yin nang yupa weik, 100 nang talyamuknye, Yesus wanwanun yo deipmekak deice tam tikmoka anye arye, Yesus weik arye ngalukukce, el dibuk talak winibuk ning nirya eibukce, ayupu nyabuk. “Se, anye bira, dipkoprop diksukumnye ulamuke,” nyabuk.

⁴⁸ Ninye weik bulubuka dinmek talak, Yesus dibukura, wininmok ning nirya eibikce, weik kanye imun ubukura, gisok talibuka weik arye engenmekce, amutuku batakuka yukak biyik.

⁴⁹ Sik talye nang nirya biyik bukni, Yesus melibuka balamik nang ap, kilapu ap, Yesus wanwanun yo deice opmeka dam ara, mitikto yukak arye dinmek. Anirya dinmek ninye noutam arye, akilapu nirya ara, Yesus Galilea mutuku arye, Yerusalem yangalamuk talak ara, sik ap melibuka balamik.

Yesus nong dobuka, weibik yupu

⁵⁰ Yesus akunum dibukopura, tonoknye el si ara Yusuf, elda Arimatea mutukunye birye, ‘Yesus weilbinune,’ tenebuk. Yusuf Arimatea mutukunye bira, Yahudi yala nang, sik yupu bokolina deiyoknye ton ulamukce, teleb ubuka diksukumuk ulamuk.

⁵¹ Yusuf ara, Sandeheren nang ap ansinibuka pil dolamuk bukni sikce, ‘Yesus opnuyabe,’ tenebikce obik ning ara, elce ton, ‘Teleb dawinipnamake,’ kum tenebuk. Tonda, Yusuf el babye, diba tenebuka, ‘Allah arye ninye mutuku-mutuku nirya weik lyeplirye, sik talima talinamle talak yanamle’ tenen, kintinibuka dilamuk.

⁵² Yahudi yala nang ara, ninye dipnopura, keil deiya pum weilamik. Sik nirya winilamika ati, Yusuf Arimatea mutukunye bira, ‘Pilatus arye Yesus el nong arepnilyopura, keil deiya pum weilbinun’ tenen, ilil kum arye, Pilatus dam binuka morobuk.

⁵³ Morobukopura, Pilatus arye Yusuf ati, “Telebe Yesus nong dobuka daweilbilyame,” nyabuk. Nyabuka ati, Yusuf ara mitang teleb lyan baju dekukce, wanwanun yo deice arye Yesus nong dobuka namin cang baju arye kitibuka, keil lukamika pum dongobuk. Keil deiya pum, yuk nang ton dipne babye, asukum kum weilamik.

⁵⁴ Yusuf arye, Yesus el nong weilbiyuk sum ara, Yahudi yala nang Allah si erena ati, ‘Sabat sum deice pil kum dopnamap’ tenen, dikdik sen sum upnamoka ati, sik kintinibuka delilamik sum akunum ubuk. Kintinibuka delin sum akunum ubuka anye arye, ambusum ato kum pil dopmanto ati, inibukura, Yusuf arye Yesus el nong dobuka, asum aryuk keil deiya pum dongobuk.

⁵⁵ Yusuf arye, Yesus el nong dobuka weilbinmok talak ara, Yesus ap Galilea tam arye, melibuka Yerusalem mutuku yanmek kilapu arye, Yesus nong pakubuka weipmokak ara, sikce dinmek.

⁵⁶ Dinmeka ani, sik aik tamubuka biyikopura, ‘Yesus el nong deice deipnamap’ tenen, nintong teleb mek ap, nintong teleb ning babok atonun ning ap, kintinibuka deibik. Kintinipdeibik bukni, Allah arye nyapdeiyamukura, Musa arye sekiamuk atonun winibik. Ara, Yahudi yala nang arye, Allah si erena ati dikdik selamik sum, Sabat sum akunum ubuka ati, dikdik senmek.