Keluaran 40 - Eipomek

Allah Yahweh ap, ninye ap, ansinibuka elan tenda aik dona ati, nyabuk yupu

¹ Allah Yahweh arye, Musa biti, nyabuk.

² An adiparyuk, na Allah Yahweh si erena ati, na ap, ninye ap, ansinibuka elan aik, cang kain bola arye, tenda aik dopnamlulume. Ara, wala tonok ning kiplye talak, awala uk nukna, tanggal tonok sum deice arye, anyapmakin tia tenda aikuk, akunum kintineiplumnye, asum deice aryuk dopnamnulume.

³ Na si erena ati, dopnamunye aik bukni, anyaik pia noutam, wilibuka bitinye deipmamumnye, el si ara, Pia Teleb Lengna Ati pum tam, na Allah Yahweh arye, sikti, “Aning ara wininamlume, aning ara, pia kum winipnamlume,” nyabuka, nyalin yupu deiyoknye nyapdeipsise ning, keil pala bitinye deice sekdeipsi ning ara, yo marikna el si Peti Perjanjian pum tam deipmunye ning ara, ance aning dopropmince, adopmamunye aik noutam, Pia Teleb Lengna Aik pum tamuk, binuka deipnulyame. Winipminyopura, anyaik wilina ati, ayupu deipmamumnye urasin tam ara, cang kain, el si gorden arye, biribuka dopkwetepminba, doloplirye ayo deice ara, lipdongopnamlule.

⁴ Tonda, na si erena ati, adeipmamumnye aik bukni, minopce wilibuka dopmum aik, el si Teleb Lengna Aik pum tam ara, roti kwaning delinak ati, tonok meja memebuka deiplum ning ap, narye nyapdeipsisiba, ameja deice deipnamlum ning ap, tonda upna lan ning ap, upna lana ati kintinip deiplum ning ap, aning nirya ara, na Teleb Lengna Aik pum tam binuka deipnulyame. Ara, ance nyalin yupu, marikna pum, el si Peti Perjanjian, libuka deiplumak bukni, cang kain el si gorden birip kwetepmaminyak, atam lilunuk binuka, dobuka deipnulyame.

⁵ Tonda, minopce wilibuka dopmamunye aik, Teleb Lengna Aik pum tam bukni, na Allah Yahweh arye, “Aning ara, wininamlume, aning ara, pia kum wininamlume,” nyabuka, pala keil bitinye deice sekeipsise yupu, libuka deiplum marikna, Peti Perjanjian dam bukni, el urasin tamuk, siltong pia teleb ning, uku dongonamlum ning, el si mesba deipnamlulume. Ara, ance yalin yupu bobuka, Peti Perjanjian libuka deipmalumak bukni, cang kain el si gorden birip kwetepmaminyak, atam minopce wilibuka dopmamunye aik, mitik mesba dobuka, agorden damakuk binuka deipnulyame. Tonda, amitik mesba, el urasin teleb una ati, dekna weik ning, emas arye dobuka, amesba nong deice, taplakuka deiplum ning ara, Musa ance biminyeura, dobuka, Teleb Lengna Aik pum tam deipnulyame. Ameja deice ara, na Allah arena ati, siltong pia teleb ning dobuka, uku dongonamlume. Winipminyopura, na si eren aik bukni, bai tam bisik bublan wekna ati, minopce anyaik wilibuka dopmamunye aik wekna ati, anyaik wilina ati, cang kain el si gorden arye, diripkwetepminba, lilipdongoplyopura, adeice arye, anyaik wilipdongopnamlule.

⁶ Na Allah Yahweh ap, ninye ap, epdanuka dukulongona aik, na si erena ati aik urasin tamuk, ‘Allah arye, nun malye wininyap ning, namin kipdeipsilirye, lyepnamsilʼ tenen, kam ning obuka boyakirye, uku dongona ati, kat ning el si perunggu arye, empat segi kintinibikce, aning noutam ton, kawat deipmek ning deice, ‘Uku seknuyapʼ tenen, kintineipmik mesba ara, asukumuk deipnulyame. Ara anyaik dam bukni, bai tamuk, el taram tam amesba deipnamake. Tonda, anyaik ara, pia teleb lek sukum ati, el wekelban bisik bublan dam, yuk cang kain arye, dirilkwetena ati, asukumuk dopmince, binuka deipnulyame.

⁷ Atonunuk tonda, anyaik bai tam bukni, na si erena ati, kam ning obuka boyakirye, uku danamakak ara, atam lilunbuk cang kain bol arye tenda aik otam, daupmalibuk, anoutamak, anyaik el urasin tamuk, mek makau, el si ara bak, ton binuka dopdeipnamlume. Amek makau arye, sik imam nang arye, sik yan ap, taruk ap, mek likna ati, anyaik dam mek kweyamunce, dikilongonamlume.

⁸ Winipmunyopura, na Allah Yahweh ap, ninye ap eldana ati, Pia Teleb Aik, urasin din tam bukni, anyaik dana-dana tam nirya ara, cang kain arye, poka ton dopnamlume. Acang kain gorden arye, antanabuka denepnalame. Tonda, ‘Talye nang arye, na Teleb Lek Aik dam wekikcakʼ tenen, anyaik dam wekelbana ati, apoka bublan wekelban bisik babye, cang kain arye lapkwetepminba, doloplirye, lipdongopnamlule.

⁹ Aning nirya akunum kupminyopura, na si erena ati, tenda aik akunum dopmaminye ning ap, tonda, atenda aik noutam deipmaminye ning ap, ayala nirya ara, ‘Aning nirya, Allah el ‘Naʼ tenen ninguk, unamle,’ tenena ati ara, laka kilina ati, adiparyuk minyak zaitun teleb ning dobuka, anyaik deice ap, anyaik pum tam ning deice nirya ap, minyak arye likuka deipnulyame. Winipnalam deice arye, na Allah arye aning-aning nirya, pia teleb updeipnamne. Winipnyopura, anyaik ap, anyaik pum tam upnamle ning, aning-aning nirya ap, pia teleb lek ninguk unamlule.

¹⁰ Awinipminye touk, na Allah arena ap, kam ning obuka uku dongona ati, kat ning el si perunggu arye, segi empat ubuka kintineipmikce, aning noutam ton, kawat deiamik deice, ‘Uku seknamapʼ tenen, memepdeipmalum mesba ap, tonda aning pil dona ati, kintinibuka deiplum pil don ning, aning-aning nirya ap, ance teleb minyak kwebuka, aning deice nirya likdeipnamlyame. Winipnalama deiyok ara, ‘Aning nirya ara, Allah el ‘Naʼ tenen ninguk unamle,’ tenena ati, apil dopnalame. Winipnalama deice arye, na Allah arye, aning-aning nirya, pia teleb ulinamne. Winipnyopura, amesba ap, amesba pil don ning, aning-aning nirya ap ara, pia teleb lek ninguk unamle.

¹¹ Tonda, anyaik bai tam deipmunye mek makau, el si bak, sik imam nang taruk ap, yan ap mek likna ati, bak dobuka deipmunye mek makau ap, el delinak deiyok ning babye, atonun ubuka, ‘Aning nirya ara, Allah el ‘Naʼ tenen ning unamleʼ tenena ati, teleb minyak kwebuka, aning deice likdeipnamlume. Winipnamluma deice arye, na Allah arye aning-aning nirya ara, pia teleb kipdeipniba, pia lek ninguk unamle.

¹² Apil nirya akunum dopminyopura, ance Harun ap, el mapu ap ati, “Allah Yahweh el si erena ati, anyaik pum tam wekna ati, bisik bublan dam bilulume,” nyapmenyeba, sikce asukumuk yakupura, ance kintinibuka deipmaminye mek makau, el si bak dam Yakub bira, Musa ance sik yan ap, taruk ap, mek kubuka deipnulyame.

¹³ Tonda, ance Harun biti ara, nyapnulyame. “Allah Yahweh el Teleb Lengna Aik pum tam, pil talibuka dona ati, imam-imam nang, sik deiyoknye, imam deiyoknye unamlame,” nyabuka wipnulyame. Winipminyopura, teleb minyak mek, Harun el kisok deice likdeipnulyame. Ara, ‘Allah aik pil dona deiyoknye unamla ati, Allah el ninguk unamle,’ tenena ati, el laka bikna ati, el kisok deice minyak mek likeipnalame. Winipminyopura, Harun elda, na aik pil talibuka donamle talak, ongonamle cang baju ara, pia telebnye, lengna ning dobuka, el nong deice ongopdeipnulyame.

¹⁴ Winipminyopura, ance Harun el mapu babye, imam pil don nang unamaka ati, “Anggun deiyoknye Harun dam bilulume,” nyapmenyeba, el dam yakcopura, ance sik anang babye, imam nang ongolamak cang baju el si juba, sik nong deice ongopdeipnulyame.

¹⁵ Harun el mapu nirya ati, kemeja, el si juba cang ning, akunum ongopdeipminyopura, anang sik deice babye, sik deiyoknye Harun, el kisok deice, minyak likdeipmaminye touk, el mapu nirya babye, sik kisok deice minyak likdeipnulyame. Winipminyeba, sik babye, na Allah si eren aik pum tam, pil don nang, imam unamake. Tonda, ance Harun ap, el mapu ap ati, minyak mek likuka, delin pil dopminyopura, sik anang arye deibikiba, dadeipdanin banamak Lewi yala nang nirya babye, na Allah si eren aik noutam ara, sikcuk talipnin banamaka ati, laka kilin ning ati winipdeipnalame.

¹⁶ Allah Yahweh arye, Musa biti, “Apil nirya ara, winibuka-winibuka dopnalame,” nyamuk ning nirya ara, Musa bira ayupu nyabuk touk ubuka, apil nirya dobuk.

Allah el si erena ati, cang kain aik dobik yupu

¹⁷ Aminyan talak ara, Israel ninye Mesir mutuku batakuka yanamikce anyapce, wala tonok tanggal satu deice arye, Musa birye nyapdeibukba, Israel ninye arye, cang kain aik, doltakna aik doprebik. Anyaik ara, Allah si eren aik ati, baju ap, yo ap dobukabikce, kintinip deibik. Atalak ara, Mesir mutuku batakuka, balameka ani, keting tamun bitinye akunum ubukopura, anyaik tikdeibik.

¹⁸ Musa birye Allah si eren aik, cang kain aik dopnamika ati, Musa birye nyapdeibukba apil domik. ‘Anyaik wirikilin yo deice lapkwetepnamle’ tenen, kat ning dobukabikce, aik wirikilin yo deiyok ning kintinibuka, tukwak deibik. Aning deice arye, aik abilinga yo ton, sirya kup-kup tam deibik. Tonda, ayo deice ara, anirye ortam delina yo ton deibikce, ayukumna yo ton ikdeibik. Ara, aminyan talak anyaik baju, aning deice lapkwetepnamika ati, aning ton kintinibik.

¹⁹ Aning nirya akunum kintinibikopura, akunum kintinipmek cang kain aik pum ning ara, dobukabikce, ayo deice kalupdeibik. Anyaik noutamak ap, bai tam ap, nirya dobik ning ara, Allah arye nyabuk touk, aning nirya deice tam, kat baju ton dobuka, kalupdongobik. Aning nirya ara, Allah arye Musa biti, “Aning ara winipnamlyame,” nyabuk touk winibuk.

²⁰ Winibukce, Allah arye, ‘Aning ara wininamlyame,’ nyapdeiamuk yupu bobuka, Allah yupu keil pala bitinye deibuka sekeiamuk ning ara, emas arye domik marikna pum bisik dongobuka, bublan tirikdongobuk. Abublan ara, ‘Allah arye nun malye ning kilipnamsil’ tenen, emas arye memamik ning ati nyapne. Amarikna akunum memebukopura, amarikna erena ati, dana-dana tam cang yo bukni, ayo deice emas deipmek ning ara, ketepdongobukce, erebuka Allah si kitipdongobuka aik, cang kain aik pum tam bobinuka deibuk.

²¹ Winibukopura, bublan dana-dana nirya, ‘Talya nang arye ton kum eipnamak’ tenen, laka kilin baju, cang baju, pia teleb ning lapkwetebukce, laka kipdeibuk. Aning nirya ara, Allah arye Musa biti, “Aning ara, winipnalyame,” nyapdeiamuk touk winibuk.

²² Allah si eren aik, cang kain aik pum tam bukni, laka kilina ati, cang baju lapkwetepmok baju buru tam ara, Musa birye meja tonok deibuk. Adeibuk ning ara, anyaik pum bukni, utam deibuk. Allah el si eren aik noutamak utam deiamik bon-bona dam, cang baju lapkwecamikak deibuk.

²³ Allah si eren aik noutam meja deibukce, ameja deice roti kwaning deibuk. Aning babye, Allah arye Musa biti nyabuk touk winibuk.

²⁴ Allah si eren aik pum tam meja deibuk ning ara, outam deibuk bukni, ameja atam ubukba, eitam ara dirin una ati, weisa delin ning deibuk. Aweisa deilinak ara, weisa weik, tekbarye aubuk.

²⁵ Weisa delinak akunum kintinibukce, Allah arye Musa biti, “Aning ara, winipnamlyame,” nyapdeibuk touk, weisa ton deibuk.

²⁶ Winibuk ning ara, ‘Allah arye nun morobibye yupu kekenamsil’ tenen, mitik marikna atonun bukni, aning deice ara, siltong teleb ning uku dalamik ning ara, aning ton anyaik pum tam deibuk. Amarikna ara, emas dekna weik ning arye memebik. Aning delinak ara, Allah si eren aik noutamak bukni, laka kilina ati, cang baju lapkwecamikak, bai tam asukumuk deibuk.

²⁷ Emas marikna deibukopura, aning deice uku sekuka Musa birye nintong teleb ning, uku dalamuk. Awinibuk ning ara, Allah arye nyabuk touk winibuk.

²⁸ Aning akunum winibukopura, Allah si eren aik, bai tam bukni, wekelban bisik ati, bublan dam ara, cang baju ton lapkwetebuk. Ara, ‘Talya nang arye anyaik pum tam kum eipnamak’ tenen ati, cang baju, bublan dam lapkwetebuk.

²⁹ Winibukopura, Allah si eren aik dam bukni, bai tam bisik bublan dam ara, tonok ning ton deibuk. Ara, ‘Malye winibibiba, nun namin kipnamsil’ tenen, ‘Kam ning obuka, dobukapna arye binuka, aning deice uku dapnamabe’ tenen, pala keil lelebuka yangapdeibuk. Tonda, aning deice arye, Allah arena ati, gandum din ning ton dobuka uku dalamuk. Aning nirya ara, Allah arye elti, ‘Aning ara winibuka pil dopnamlyame,’ nyapdeibuk touk winibuk.

³⁰ Tonda sik taruk ap, yan ap, mek likina ati, yangalin ning ton deibuk. Ayangalin ning deibukak ara, Allah si eren aik otam, kam ning obuka uku dapnamik ning ati, pala keil lelebuka dika deibukak, atam anoutam ara, taruk mek likina ati, yangalin ning deibuk.

³¹ Winyamik ning ara, Musa ap, Harun ap, Harun el mapu ap, sik taruk ap, yan ap, mek likna arye, anyaik wekelbana ati, amek delin ning asukum deibik.

³² Allah si eren aik, cang kain aik wekelbinuyik talak ap, tonda ‘Allah arye nun malye ning ati, namin kipsutue’ tenen, kam ning obuka uku dalamik ning ati, pala keil lelebuka yangapdeibuk dam binun talak ap, sik taruk ap, yan ap, mek liklamik. Aning winilamik ning nirya ara, Allah arye nyabuk touk winilamik.

³³ Allah si eren aik, cang kain aik ap, kam ning obuka uku dongona ati, pala keil lelebuka dika deibukak ap, aning-aning bai tam nirya ara, cang baju dobukabukce, poka atonun kibuka wilina ati, lapkwetebukce, wibuka ongopdeibuk. Winibukopura, apoka bublan dam ara, cang baju ton lapkwetebuk. Winibukopura, Musa birye pil dobuka sirya dakukce, tonap pil kum dolamuk. Aning nirya ara, Allah arye nyabuk touk pil dobuk.

Weik dua arye, Allah si eren aik nirya, teikuk yupu

³⁴ Allah si eren aik ap, anyaik pum tam ning ap, bai tam ubuk ning ap, pil nirya akunum dobukopura, weik dua koulukukce, anyaik nirya teikuk. Ton ning ara, anyaik noutamak ara, Allah arye wekukba, el dirin weik ubuk.

³⁵ Winibuk talak ara, Musa babye anyaik pum tam kum wekelbinmanto kibuk. Deiyok ara, weik dua anyaik libukba, Allah el dirina weik anyaik pum tam wekuka unmok.

³⁶ Atalak-atalak nirya, Israel ninye amutuku noutamak balamik talak nirya ara, Allah el si eren aik, cang kain aik deice arye, weik dua welena uk ubukba, sik Israel ninye anyaik dakukabikce, yukak binuka dobik.

³⁷ Bukni, weik dua anyaik deice kum welebuk talak ara, asukumuk tuba unmek. Yukak kum balamik. Adua welepne talak ara, ila tuba ton, anyaik dakukabikce, bobalamik.

³⁸ Ati ara, atalak Israel ninye balsusulamik talak nirya ara, keting noutam talak ara, Allah arye weik dua arebukba, anyaik deice tam tikamuk. Tonda, lukunyan noutamak ara, adua noutamak arye, weik uku buk dilamukce, dirina weik ulamuk. Aning nirya tuba ulamukba, Israel ninye nirya arye elilamik.