Keluaran 36 - Eipomek

Israel nang, sik talilamik ning, pia weik tonun, bulubuka delilamik yupu

¹ Musa birye sik Israel nang nirya ati nyabuk. “Ura, Bezaleel ap, Aholiab ap, tonda, sik kayapu nang, aning-aning nirya pil dona ati kel weik nang arye, Allah el si eren tenda aik dona ati kintinibikirye, apil deiyok kipnamake. Anang nirya ara, nun ni Allah Yahweh arye, ‘Pia teleb pil donamakʼ tenen, pil dona deiyok ning ap, ‘Winibuka doptibyeʼ tenen, kel weik bikina deiyok ning ap, akunum weik tonun areamukba, kel weik nang unyake. Ati ara, anang aryuk Allah ap, ninye ap, elan tenda aik pil donamake. Allah Yahweh arye, ‘Winibuka, winibuka apil donamlume,’ nyabuka laka nyapdeipsuk touk, aninguk talibuka pil donamake,” Musa birye nyabuk.

² Ayupu akunum nyabukopura, Musa birye, Bezaleel ap, Aholiab ap, tonda, sik kayapu nang, sik pil dona ati kel weik nang nirya ati yukubukba, yayik. Ara, anang bitinye ap, tonda, yuk pil deiyok ning, kel weik nang ap, kanye deibukabikce, ‘Nun babye Allah el si eren aik melibuka donamabeʼ tenen, kintinibik nang ap yayik. Apil don nang nirya ara, Allah Yahweh arye, pia teleb pil dona deiyok ning ap, kel weik bikina deiyok ning ap, akunum areamuk nang ulamikce, apil deiyok koubik.

³ Apil deiyok koubik talak ara, Israel nang nirya, sikce, bulubuka delilamik ning, yuk-yuk ning nirya ara, Musa birye aning dobuka, sik kel weik nang deice deibuk. Ara, ‘Sikce, Yahweh el si eren ati doltakan tenda aik dopnamakʼ tenen, arebuk. Akunum kintinip deibik ning nirya ara, Musa birye arebuk bukni, Israel nang kum batakik. Asum arye deiyok kibikce, sik kanye aryuk, asum-asum nirya, sik talilamik ning nirya noutam arye, ‘Anyaik dona ati arepnuyap,’ tenelamikce, kanye deibukabikce, beren tam talak nirya, aning-aning nirya, boyanuka arelyangana uk ulamik.

⁴ Aning nirya boyanuka arelyangalamikba, sik kel weik nang arye, Allah el si eren tenda aik pil donmek nang ara, tia ati, apil batuka, Musa dam yanuka nyabik.

⁵ Sik apil don nang arye, Musa biti nyabik. “Naio, nun anyaik dona ati, Allah arye, ‘Winibuka arelyanganamnulume,’ nyapdeibuk ning, sik Israel nang nirya arye, bulubuka deiamik ning yala nirya ara, Allah arye nyapdeiamuk ning ara, akunum bisibukabukce, pia weik tonun kipmale,” nyabuka, Musa dam binuka laka nyabik.

⁶ Ayupu nyabikba, Musa kekebukce, “Ayupu nyalbilulume,” nyapdeibukba, el melin nang arye, Israel nang sik tenda aik dobuka ulamikak biyikce, sik kekena ati binuka nyabik. “Ara, anggunce Allah Yahweh el si erena ati, tia doltakne aik dona ati, bulupdeiplum ning, yuk-yuk ning nirya ara, pia weik tonun akunum deipmaluma anya arye, sal babye, kilapu babye, yuk ning ton bobuka, kum boyanganamlume,” nyabuka, laka nyabikba, Israel nang kekebik. Ati ara, atalak arye dipdongobuka, dotalak ara, aning-aning tonap kum boyangalamik.

⁷ Anyaik dona ati ara, sik Israel nang yala nirya arye, bulubuka arelyangalamik ning, yuk-yuk ning nirya ara, pia weik akunum ubuka anya arye, anyaik ara, aning aryuk dobuka, sirya dakmanto akunum ulamik anya arye, aning ton ap tabakuka kum boyangalamik.

Allah Yahweh el si erena ati tia doltakne tenda aik ati, pil dolamik ning ati, laka nyabuk yupu

⁸ Ura, sik kel weik bikamik nang kan-kan noutam arye, ninye ton, Allah el si eren aik tia doltakne aik dona ati, tenda wina ati kel weik nang wipdeipniba, adoltakne aik dona ati ara, pia teleb cang kain, el si lenan, sepuluh (10) wibuka kintinip deibik. Ara, pia teleb tenda win tapu, el si wol, warna biru ap, warna unggu tua ap, ining bi ning warna merah ap nirya arye, atenda deice gambar atonun ning wibuka kintinip deibik. Ara, acang kain deice ara, malaikat atonun ning, el si ara Kerub, urasin atonun wipdeibik.

⁹ Anyaik lapkwetepnamik lenan kain bola sekena ara, neiktoto atonun ubuka sekamik. Aning nirya, el cang ara, atonun duabelas (12) meter sirya nukik. Aning atonun, el pala ara, 2 meter uk dekuka sekamik.

¹⁰ Acang kain pamubarye (5) sekamik ning ara, tonok kipdeibikce, wibikba, el pala ara, tonok kibuk. Aning atonun ton pamubarye babye, wibikba, el pala ara, tonok kibuk.

¹¹ Apala cang kain dana tam sirya ara, teleb kain el bol warna biru arye, akain el siryak ara, kwaribuka talin ning moubuka wibukabikce, kintinip deibik.

¹² Ara, acang kain arye, pala yuk-yuk bitinye wibuka deibik ning, kup-kup ak arye, kwaribuka talena ati ara, ton tam ning lima puluh (50), ton tam babye, lima puluh (50) wibukabikce, memepdeibik. Ara, ‘Winipmeka arye ton ning ap, ton ning ap, dukdongobikba, tonok kipnamleʼ tenen, winibik.

¹³ Aning akunum winibikopura, dana-dana tam, cang tenda dukulongona ati, arekuka talen ning ati, dekna weik teleb kat ning, emas arye, lima puluh (50) ton puturubuka memebik. Aning akunum winipmekce, ‘Acang weik lenan kain pala bitinye ara, tonok atonun kipnulʼ tenen, el kup-kup talen ati, dukdongobikce, arekuka talin ning arye kitipdongobik.

¹⁴ Aning nirya akunum winibikopura, sik anang arye, adoltakne tenda aik, el duma dona ati ara, kambing potong arye wilamik kain, sebelas (11) sekikce, wibuka kintinip deibikce, wibik.

¹⁵ Atenda aik duma atonun ning ara, sekamik ning nirya ara, el dekna tonok atonun kiklipdebikce sekik. El cang ara, tiga belas (13) meter dekuka sekamik. Tonda el pala ara 2 meter uk kiklibuka sekamik.

¹⁶ Akambing potong arye wibik cang kain, anyaik duma dona ati, pamubarye (5) sekik ning ara, tonok kipdeibik. El cang ara, tonok kibuk. Atonun ton nakub barye (6) ton sekik ning babye, atonun wibuka tonok kipdeibik. Aning babye, el pala tonok kibuk.

¹⁷ Tonda, acang kain el kwaribuka talena ati ara, lima puluh (50) ton kisok bukuka bisik botolilamikce kintinilamikba, minop pala kain, el kup-kup kintinibuka deibik. Atonun, ton tam ning babye, kwaribuka talena ning lima puluh (50) ton, el kup-kup talena ati, kisok bukuka bisik botolilamikce, kintinibuka, memepdeibik.

¹⁸ Dana-dana tam kambing potong arye wibik kain, el tapu kwaribuka dona ati ara, teleb kat ning, el si perunggu arye, lima puluh (50) memebuka kintinip deibik. Winibika deice arye, apala kain bitinye ara, yanuka dukdongobika deice arye, anyaik ayukumna koproba dona ara, kintinibik.

¹⁹ Aning akunum winibikopura, Allah el si eren ati doltakne tenda aik lelilongona ati, yim domba basam bola kobuka wibikce, aning bola deice ining bi ning likdeibikba, ining bi uk ubuk. Aning boyanuka, anyaik aruma koproba atonun kina ati, deibik. Tonda, aning deice ara, tonok ning ton deibik. Aning ara, laut mekwen pum bisik ulye ning, el si lumba-lumba, el bola dobuka mememamikba, kain atonun ubukura, aning ton dobuka, anyaik aruma deice bitinye ning deibik. Ining bi ning ara, amu tam likuka deibik. Lumba-lumba bola arye kintinip deibik ning ara, ining bi ning deice tam kibuka deibik. Akintinibik ning ara, Allah si erena ati, doltakne tenda aik yanuka kalupdongobik.

²⁰ Apil akunum dobikopura, sik anang ara, Allah el si erena ati, el ap, ninye ap, elana aik, ‘El pung tiklirye, kat upnamleʼ tenen, Akasia yo arye, anyaik nirya ati, uapce talibuka tiknamuk yo ap, anyapce obarin yo ap, kintinip deibik.

²¹ Anyaik el cang ati tikilin yo cang ara, 4 meter dekuka sekukabikce, kintinip deibik. Tonda, anyaik tenda lalkwetena ati, kintinip deibik yo, el pala ara, 66 sentimeter dekuka kintinip deibik.

²² Anyaik ayukumna yo cang kintinip deibik yo nirya ara, ton tam ning babye, ton tam ning babye, bisik botobuka kintinip deibik. Kintinip deipmekce ton yo babye ton yo babye nirya ara anyaik ayukumna barin yo ton kintinibuka deibikce, dukdongobik.

²³ Adoltakne tenda aik, el abilinga atonun ning ati, cang kain lalkwetena ati ara, arah selatan tam dona ati, ikin yo, el si rangka ara, dua puluh (20) kintinibuka deibik.

²⁴ Anyaik el abilinga atonun ning ati ara, rangka yo dua puluh (20) kintinip deibik ning nirya, bisik yuk-yuk botopdeibik ning noutam dongona ati, yo lubuka deibik ning, abisik dongobuka, ton abilinga kain ap, ton abilinga kain ap, dukdongobuka delina ati talen ning ara, bita teleb namin ning, perak dobuka, ayukumna yo amu tam, el yangalina ati ara, 40 kintinibuka deibik. Ara, ayo ayukumna nirya baripmek yo amu tam ara, ‘Tuku bol piplyakʼ tenen, dekna weik ning, perak arye yangapdeibik.

²⁵ Aning atonun, atenda aik eitam ara, (bagian arah utara) babye, abilinga atonun ning ton deibik. Anyaik abilinga pina ati, kain lalkwetena ati, yo arye aning, el si rangka yo, dua puluh (20) ton, kintinibuka deibik. Tonda, anyaik eitam ara, (bagian arah selatan) ap, (bagian arah utara) utam ap, atonunuk kintinibuka deibik.

²⁶ Aning akunum winibikopura, arangka yo nirya ara, ‘Tuku bol piplyakʼ tenen, ayok nirya amu tam debuka, yangalina ati ara, teleb namin ning, perak arye, aning empat puluh (40) kintinibuka deibik. Winibikopura, tonok kain abilinga rangka yo amu tam ara, el yangalina ati ara, bitinye-bitinye kipdeibik. Ayukumna yo yuk-yuk bukni, arangka nirya amu tam ara, yangalina bitinye deibikce, ton yangalina ning ara, sirik tam, ton yangalina ning ara, kwanim tam deibik.

²⁷ Tonda, adoltakne tenda aik, el keting kumulban tam, dum dam ara, abilinga pina ati ara, abilinga atonun ning, el cang kain rangka ara, nakub barye (6) kintinibuka deibik. Sikce iklamik yo nirya, ‘El pung kibuka tiklirye, kat upnamleʼ tenen, akasia yo pung kibuka tikamuk yo ap, anirye otam wirikne yo ap, nakub barye (6) kintinibuka deibik. Ikamik yo amu tam ara, ‘Tuku bol piplyakʼ tenen, ayo kwanim tam babye, sirik tam babye, yangalina ati, yo bitinye yangapdeibik.

²⁸ Tonda, adoltakne tenda aik, el kup-kup ak utam ning ara, yo arye rangka bitinye ton kintinibuka deibik. Ton ning ara, dana tam bagian arah utara, ton ning ara, dana tam bagian arah selatan deibik.

²⁹ Anyaik kup-kup ak pina ati, yo rangka bitinye kintinip deibikce, anya rangka yo bitinye boyanuka, utam arye, deice tam nirya kum dukdongobuka deibik. Ara, rangka bitinye kintinibik bukni, ikik yo tuku tam ara, yuk-yuk ikdeibik. Bukni, ikik yo mouse tam ara, neikak ansinibuka kintinip dongobik. Winibikura, anya rangka yo mouse tam ara, tonok ning el si cincin, kisok bukuka bisik botolilamikce, memebuka deibik. Ayo bitinye, mouse tam ansinibuka kitibikce dukdongobik. Winibikce, rangka yo ara, anyaik kup-kup tam deibik. Rangka yo ara, anyaik keting kumulban tam bukni, ton rangka yo ara, eitam ton, rangka yo ara, outam deibik.

³⁰ Ati ara, ayo arye dobik rangka ara, pinbarye (8) nukuka kintinibik. Tonda, ayo amu tam ara, ‘Tuku bol piplyakʼ tenen, yangalina ati ara, teleb namin ning, perak dobuka, ayukumna yo yangalina 16 nukuka kintinip deibik. Tonok rangka amu tam ara, perak arye kintinip deibuka yangalin ning ati ara, bitinye-bitinye kibuka yangapdeibik. Ton ning ara kwanim tam, ton ning ara, sirik tam kibuka yangapdeibik.

³¹ Adoltakne tenda aik, anerye wirikilina ati ara, sik anang arye akasia yo ara, pamubarye (5) kintinibuka deibik. Akintinip deibik yo pamubarye ara, adoltakne tenda aik, tonok tamuk pamubarye wirikdeibik.

³² Ton pamubarye wirikilin yo ara, adoltakne tenda aik, anerye wirikilina ati ara, yali tam babye, ketingban tam babye, wirikdeibik. Awirikna yo nirya ara, nukuka lima belas (15) yo wirikdeibik.

³³ Allah el si erena ati doltakan tenda aik, el aruma erebuka talena ati, aik pum tam bukni, yali tam ap, ketingban tam noutam bisik wirikilin yo ara, dana-dana tam, aik abilinga noutamuk wirikdeibik.

³⁴ Allah el si erena ati, tia doltakne aik noutam, tikdeibikce welebik yo nirya ap, wirikilin yo nirya ap ara, ‘Urasin pia teleb upnamleʼ tenen, kat ning emas arye taplak deibik. Anyaik yo nirya, tikilin yo ap, anyapce wirikin yo ap, dukdongobuka talina ati, noutam nirya ara, urasin teleb kat ning, emas aryuk toupne dama wilamak touk, kisok bukuka bisik botolilamikce kintinilamikba, cincin atonun kipdeibikce, memepdongobik.

³⁵ Sik apil dona nang aryuk, atenda aik bublan dam lelilongona ati, cang kain pia teleb ning, el si kain lenan, namin ning wibuka, gorden kintinip deibik. Akain wina ati ara, urasin teleb wol tapu, warna biru ap, warna unggu tua ap, warna ining bi merah ap nirya arye, tenda wina kel weik nang arye, gorden deice, gambar atonun ning wibuka kintinip deibik. Ara, acang kain deice ara, malaikat urasin atonun ning, el si ara Kerub, wibuka deibik.

³⁶ Acang kain bublan, el si gorden, kirikilkwetena ati ara, akasia yo dumbarye kintinibuka deibik. Ayo deice ara, urasin teleb una ati, dekna weik kat ning, emas arye taplak deibik. Tonda, ayo deice tam ara, kwaribuka lalkwetena ati, arekuka talin ning ton, emas aryuk memepdeibik. Tonda, ayo dumbarye, ‘Tuku bol pilyakʼ tenen, el yangalina ati, teleb namin ning, el si perak arye, ayo amu tam delin ning dumbarye (4) ton puturubuka deibik.

³⁷ Winibikce, Allah el si erena ati, tia doltakne tenda aik pum tam wekelban bisik bublan dam, lelilongona ning ati, el si gorden ap kintineibik. Aning ara, kain lenan namin pia teleb ning boyanuka, wol tapu el bol ara, warna biru ap, warna unggu tua ap, ining bi ning warna merah ap deice arye, moubuka wibukabikce, acang kain gorden, el urasin bita, teleb kipdeibik.

³⁸ Bublan dam yo pamubarye (5) ikamik yo deice ara, kwaribuka talena ati, pamubarye kintinibuka deibik. Aikamik cang yo kum-kum sirya ara, kisok bukuka bisik botolilamikce kintinilamika atonun ning, el si cincin ton, emas arye puturubuka deibik. Tonda, ayo deice nirya ara, dekna weik kat ning, emas arye taplak deibik. Bukni, apamubarye cang yo ‘Tuku bol pilyakʼ tenen, ayo amu tam delina ati ara, teleb kat ning, perunggu arye, yangalin ning puturubuka deibik.