Keluaran 3 - Eipomek

Allah arye, Musa wipdeiamuk yupu

¹ Musa bira, el yamal koproba si ara, Yitero ulamuk. Yitero bira, Midian mutuku ninye ati, Allah arena deiyoknye ulamuk. Atalak ara, Musa el yamal koproba melina ati, Yitero el domba basam, Midian mutuku noutamak weilamuk. Atonun ubuka, amutuku ninye kum ulamik mutuku otam binuka, mutuku si Horeb mutuku yana, domba basam weilbiyuk. Amutuku ara, Allah arye yupu nyapdeiamsuk mutuku dam nyalamik. Asukum binuka, domba basam weilamuk.

² Winibuka Allah, el si ara Yahweh, el im deice pil dona deiyoknye, amutuku dam yanatikmokbuk, yo mutmuta uku buk paklamla atonun unmokba, anye yo mutmuta noutam uku buk dinmoka noutamak tikmokak, Musa birye eibuk. Musa eibuk bukni, uku buk dem eibuk. Tonda, uku buk atonun unmok bukni, yo mutmuta ara, uku buk kum dinmalba, eibuk.

³ Musa birye, ‘Se awinipmal ning ara, kanye ikine. Uku dinmalibuk, yata deiyok arye yo mutmuta ara, kum dinmal do? Dam binirye dipdenune’ tenebuk.

⁴ Utenebukce, binuka dilbiyuk. Binuka dilbiyukbuk, Allah el si Yahweh arye, kel kibukce, yo mutmuta noutamak arye, Musa biti nyabuk. “Musa, Musao,” nyabuka yukubukba, Musa birye, “Na unune,” nyabuk.

⁵ Nyabukura, Allah arye Musa biti, “Asukumuk tiklyame. Dam aton kum yatume. An na dam kum yanapminye talak ara, an yan bol deice ning kwiriploplyame. Deiyok ara, antikmalamak arye, “Na unmanak ara, pia mambul sukum ati, kum yatume,” nyabuk.

⁶ Nyabukce, Allah arye Musa biti, ayupu ton nyabuk. “Nara, an apu yapu Abraham ap, Isak ap, Yakub ap ati, sik melipnin yangalamsinye bira, na akunume.” Nyabukura, Musa arye, ‘Se’ tenen, el urasin lelipdobuk. Winibuka deiyok ara, ‘Kume Allah ara, na ilil’ tenen, ‘Kum eiptinye’ tenen, lelipdobuk. El ilil weik ubuk.

⁷ Atalak ara, Allah el si Yahweh arye nyabuk. Na mapu Israel nang ara, Mesir mutuku noutamak, ikin weik unyaka ara, na elinunce, kel kinune. Ara, Mesir nang arye, ikin pil arukunyakbuk, donyak ning ara, akunum elinune. Israel ninye engenyaka ara, na kele. Tonda, ikin asa unyaka ati, na mambul kanye bonune.

⁸ Ati ara, Mesir mutuku nang arye talinyakba, sik ikin ulye ning ara, lyebuka dobukapnirye, amutuku noutamak arye lyebuka dopnamsine. Winipnirye, do bobuka pia teleb uplirye, lo weik ubuk mutuku, anggunti arepnamsine. Amutuku ati, “Se amutuku noutamak ara, susu ap, mong mek ap, weik pia aulule,” nyanyake. Nyanyaka deiyok ara, ani. Ara, aning-aning nirya, teleb ning nirya, amutuku noutamak weik ulula anya arye, nyanyake. Amutuku unyak nang, sik si ara ani. Kanaan nang ap, Het nang ap, Amuri nang ap, Peres nang ap, Hewi nang ap, Yebus nang ap, aninye-aninye nirya, amutuku noutamak unyake. Sik mutuku ara, pia teleb anya arye, amutuku uk arepnamsine.

⁹ Ura, atalak ara, na mapu Israel ninye arye, “Se, ikin pil donyabe,” nyabuka engenyaka ara, akunum kekenune. Tonda, sik Mesir mutuku nang arye, Israel ninye pia ikin ning weik, sik nong deice delinyaka ara, aning ton tuba elinune.

¹⁰ Wininyaka ati ara, narye dopreipkiniba, Musa ance, Mesir nang deiyoknye, Firaun, el dam bimince, “Allah el mapu, Israel nang bobuka binamne,” nyapnamlyame. Allah arye, Musa biti nyabuk.

¹¹ Nyabukura, Musa arye tamubuka Allah ati nyabuk. “Se, nara, yata tonye birye nyaptiniba, Mesir nang sik deiyoknye kekepturye bataktuba, bobuka bitinye do? Nara talinye binya,” nyabuk.

¹² Nyabukura, Allah arye, “Kume, na ap pia neika unamname. Pia kum bataknamkine. Anda, ‘E dipkoprop, Allah elcuk dopreipnuke’ tenen, ‘Kel biknamlam’ tenen, mambul ning tonok arepnamkine. Narye an melipkineba, Mesir mutuku noutamak arye, Israel nang bobuka, akunum bobiminyopura, atalak ara, Horeb mutuku, tonda amutuku si Sinai mutuku deice, na siuk erenamlume,” nyabuk.

¹³ Nyabukura, Musa arye Allah ati, tamubuka nyabuk. “Naio, narye Israel ninye dam binye, ‘Ura, anggun apu yapu nang meliamuk Allah arye, anggun melina ati, na ton dobuka, anggun dam dopdeipnuke,’ nyapnamne. Nyapnebuk, sikce nati, ‘Ura, Allah el si ara, yatanye do?’ nyabuka, nati asipdenikcopura, yata nyaptinye do?” Musa arye nyabuk.

¹⁴ Nyabukura, Allah arye, “Nara, aunune. Tonda pia unamne. Ati, na si ara, Yahweh. Asi deiyok ara, Na aunune. Na unamne ning ara, pia unamne. Nara, Allah uka. Ati ara, ance Israel ninye ati, nyapnamlyame. ‘Kume, Allah el si ara, Yahweh, ‘Na aunune,’ nyalul Allah arye, dopreipnuk deice arye, anggun dam yane,’ nyapnamlyame.” Allah arye, Musa biti nyabuk.

¹⁵ Nyabukopura, ayupu tonap nyabuk. Musa, anda Israel nang dam biminyopura, nyapnamlyame. “Nun ni Allah, el si ara Yahweh arye, na dopreipnukba, anggun dam yane. Nun apu yapu nang, Abraham ap, Isak ap, Yakub ap, kalikuka meliamukba, el si erelamik Allah ara, na dam yayukce nyapnuke. ‘Israel ninye dam bilyame,’ nyapdeipnuk.” Allah arye nyabukopura, ayupu ton nyabuk. “Kume, na si Yahweh nyapmakina ara, na siuka. Nati ara, asi uk tenebuka nyanamnululume, yuk si ton kume. Ati, dadeipdanin banamlum talak nirya ara, asi uk tenebuka erepnin banamniake.” Allah arye, Musa biti nyabuk.

¹⁶ Nyabukopura, ayupu ton nyabuk. “Ura, bimince, Israel nang wisi-wisi nang, deiyok nang nirya bulubuka deipmince, nyapnamlyame. Nun apu yapu pununa ninye, Abraham ap, Isak ap, Yakub ap, kalikuka meliamukba, el si erelamik Allah Yahweh arye, na dam yayukce nyapnuk. Ura, sik Mesir mutuku ninye arye, ikin ning weik, anggun nong deice delilamsikba, mambul kanye bomlum ning ara, na tuba elinun anya arye, na kele.

¹⁷ Tonda, na yupu akunum nyapdeipsine. Anggun kanye imun tenelulum ning ara, lyepropnamsine. Lyepropsinirye, teleb mutuku arepnamsine. Amutuku ati, ‘Se amutuku noutamak ara, susu ap, mong mek ap, weik pia aulule,’ nyanyake. Ara, aning-aning nirya, teleb ning ayala-yala nirya, amutuku noutamak weik ulula anya arye, nyanyak atia. Amutuku unyak nang, sik si, Kanaan nang ap, Het nang ap, Amuri nang ap, Peres nang ap, Hewi nang ap, Yebus nang ap, aninye-aninye nirya unyak mutuku arepnamsine. Sik mutuku ara, pia teleb anya arye, amutuku uk arepnamsine,” Allah arye nyabuk. Tonda, ayupu ton nyabuk.

¹⁸ “Yupu nyapminba, sik Israel wisi-wisi nang, yupu lipsisikuka bokolina deiyok nang ara, kekepnamkiyake. Kekebicopura, Israel wisi nang ap, an ap neika, Mesir ninye, sik deiyoknye dam binuka nyapnamlyame. ‘Allah el si Yahweh, Ibrani ninye, nun ni Allah yana nyapmasila ati, nun moropkiyabe. Ara, ance nunti bataksiminba, nun ni koproba Allah, el arelbana ati, like winilye deice arye, bisik mabuka bibirye, ninye una kumak noutamak binuka, Allah el si erena ati, kam ning obuka arenamabe.’ Ayupu nyapnamlyame,” Allah arye nyabukce, ayupu ton nyabuk.

¹⁹ Allah arye nyabuk. “Na kele, Mesir mutuku deiyoknye bira, adiparyuk, ‘Yo dabinlulume,’ nyapbuka, kum nyapnamasile. Kume, narye weik ikin ning, el nong deice kum deipnyopura, el kekeplirye, kum bataknamsile.

²⁰ Ati ara, na mikip weik deice arye wenena ap, ninye kum winipmanto ning ap, sik mutuku noutamak pil dopnamne deice arye, Mesir mutuku ninye wenebuka opnamne. Aning nirya akunum winipnyopura, atalak aryuk bataksiliba binamlume.” Allah arye nyabuk.

²¹ Nyabukopura, ayupu tonap nyabuk. “Narye sik talima pum tam pil dopneba, Mesir mutuku nang, sik Israel ninye nirya ati, sik kanye deibuka unamake. Winipnya deice arye, anggun bataksikiba binamlum talak ara, talye kum binamlume. Talin ning babye, talibuka bobinamlume.

²² Tonda, wininamlulume. Israel kilapu nirya arye, anggun dam unyak Mesir kilapu ati, ‘Ka kilo, baju ap, dekna weik ning perak ap, emas ap, aning-aning nirya arepnululume,’ nyabuka moropnamake. Tonda aning atonun, anyasik-anyasik unyak Mesir kilapu nirya ati, aning atonun moropnamake. Morobikcopura, aning-aning nirya akunum arepsikcopura, anggun mapu ap, anggun kilmapu ap ati arepnamlume. Arepmunyopura, sik karaknamake. Winipnamluma deice arye, sik Mesir mutuku ninye talinyak ning nirya ati, dalubuka bobinamlume. Aning nirya, anggun ning koproba ning upnamle. Bona weik ninye unamluma atia.” Allah arye, Musa biti nyabuk.