Keluaran 20 - Eipomek

Allah arye ‘Wininamlulume, aning ara kum wininamlulume,’ nyabuka, deiyok tagu barye ning, arebuk yupu

¹ Allah el bidamnye ati, nyabuk yupu nirya ara ani.

² “Nara anggun ni koproba Allah, na si ara, Yahweh unune. Mesir mutuku ninye arye ikin pil dobuka, sik nong deice delilamsikba, kanye imun kibuka ulamlumak, Mesir mutuku noutamak arye dobuka boyanamsisinye bira, na unune,” nyabuk.

³ “Allah yuk ulula nyabuka, yuk-yuk ning si erena pia meme. Allah na uk ununa ati, natibuk kibuka, na siuk erenamnulume.” Allah arye nyabuk.

⁴ “Im deice ubuk ning ap, tukwak ubuk ning ap, mek amu ubuk ning ap, aning nirya ara, sik urasin atonun puturubuka kintinipmunce, ‘Aning si erenamabe’ tenena pia meme. Yuk talye ning si erena ati, yuk-yuk ning urasin atonun kilina kume,” nyabuk.

⁵ “Yata ning do nirya, urasin atonun puturubuka, aning ati kisal dobuka, gutam tuku dipdongobuka si erena meme. Anggun ni Allah ara na Yahweh uka. Ati yuk talye ning si erena meme. Na mapu arye yuk ning nirya ati, ‘Nun ni’ tenen, si erebikcopura, na malye kanye bobuka pia yu unune. Nati, ‘Nun like’ tenen, malye-malye nyaninyak nang ara, sik wenepnirye, sikce deipnamak mapu ap, sik mapu deipnamak mapu ap, amapu babye deipnamak mapu ap ara, sik deipkirikdop nang ninye dika bitinye do, winilye do nirya ara, tuba wenenamne,” Allah arye nyabuk.

⁶ “Yata nang do nirya, sikce, ‘Allah elda nun like,’ tenenyak nang, pia wenenamne bukni, nati kanye deibuka, narye sikti, ‘Aning ara, wininamlulume. Aning ara, kum wininamlulume,’ nyabuka, nyanye yupu diba tenebuka kekebikirye, ayupu talibuka dobolbanyak nang ati ara, bico tenepnirye, pia melinamsine. Ato ninye ara, pia kum bataknamne. Pia melinauk unamsine,” Allah arye nyabuk.

⁷ “Anggun ni koproba Allah, na si Yahweh ati ara, na si talye-talye si nyana meme. Yatanye do, na si talye-talye si nyalamlinye biti ara, ‘Dauaplye’ kum tenenamne. Na si talye nyaplobikce nang ara, dipkoprob pia weika arye wenepnamne,” Allah arye nyabuk.

⁸ “Narye anggun dikdik sen sum arepsise ning ara luba kina meme. ‘Asum ara, Allah el si Yahweh, el mambul sum’ tenen, asum noutamak talye una kum bukni, asum yuk wibuka deipmunce, na Allah ati moubuka tenepmunce, diksukumuk unamlulume,” Allah arye nyabuk.

⁹ “Like nakub barye sum arepsise talak ara, anggun pil dobuka unamlume.

¹⁰ Bukni, tekbarye sum ara, el si ara Sabat sum. Asum ara, Allah na mem sum anya arye, asum deice arye na Yahweh atibuk tenenanululume. Ati ara, yata pil do nirya, asum deice talye pil dona meme. Ara, anggun babye, anggun mapu babye, anggun kilmapu babye, anggun pil don nang ap, pil don kilapu ap babye, anggun weilulum ning keledai basam do, sapi do, aning babye, pil kum donamake. Tonda, yuk mutuku arye, anggun mutuku noutamak tikilyangan nang babye, pil arukmunye pil kum donamake. Anang sik bidamang pil ton kum donamake. Asum, Sabat sum ara, talye pil aning-aning nirya ara pil dona meme,” Allah arye nyabuk.

¹¹ “Na Allah arye nyapne. Na sum deice pil kum donamluma deiyok ara ani. Ara, like nakub barye sum deice arye, narye im ap, tuku ap, laut mekwen ap, aning noutamak ulamle ning ayala-yala nirya ap kwepdeipse. Winipsa ati, like tekbarye sum ara, na dikdik semse. Winipsa ati ara, Na Yahweh arye asum ati, teleb kipdeipsirye, ‘Asum ara ‘Naʼ tenen, weik mambul sum,’ nyabuka asum wibuka yuk deipse,” Allah el si Yahweh arye nyabuk.

¹² “Anggun ni yapu ap, anggun nin yapu ap, ‘Sikda mambule’ tenen, sik yupu moubuka kekemunya deice arye, teleb winipmunyopura, keting tamun weika arye tonap arepnamsine. Pia teleb mutuku arepsinyopura, kam tuba unamlume,” Allah el si Yahweh arye nyabuk.

¹³ “Anggun kanye aniryuk yu kibuka ninye talye ona meme,” Allah arye nyabuk.

¹⁴ “Sal do, kilapu do akunum dopramunyopura, yuk kilapu do, yuk nang do, ubula yolana meme. Aning atonun yata ninye do nirya, talye-talye yolana pia meme,” Allah arye nyabuk.

¹⁵ “Ubula dona meme,” Allah arye nyabuk.

¹⁶ ‘Yuk nang arye, anye malye winibuke, tenepnamak’ tenen, anggun kwit capu ati, tilila yupu nyana meme. Allah arye nyabuk.

¹⁷ “Yuk nang sik ning nirya ati, ‘Se, na uk doproptinye,’ tenena meme. Ara sik aik ap, sik kilapu ap, sik pil melina nang ap, pil melina kilapu ap, el sapi basam ap, el keledai basam ap, el weilul ning yuk ning ap, tonda, yata ning do, el talilye ning nirya ati, ‘Na doproptinye,’ tenena meme,” Allah arye nyabuk.

Israel nang Allah ati, ilil ulamuk yupu

¹⁸ Atalak ara, bebeya lakukce, liman weik ning ap, bilkong lena weik arye lelim nyabuk ning ap, tonda Sinai mutuku deice arye weik tulum koulukukce yan inibuk. Aning nirya Israel ninye eibikce, ilil weik ubukba, sirim talibuk. Wininmokba, ilil ati yuk-yuk tikmikce Musa biti nyabik.

¹⁹ “Ancuk nun dam nyapsiminba, kekepnamabe. Bukni, Allah arye nun dam sisikna ara kume. Elce nyapsilyopura, ‘Nun dibipyak’ tenen, ilil unamsile,” nyabik.

²⁰ Nyabikba, Musa birye tamubuka nyabuk. “Anggun ilil una kume. Aning nirya winipmala deiyok ara, Allah arye asilen ning winipsiliba, ilil tenepmunce, malye ning kum wininamlulume. Allah arye, ‘Na ti ilil upliba, malye kum upnamake,’ tenepmasila ati, unmale,” Musa birye nyabuk.

²¹ Israel ninye nirya ara yukak arye binuka tikuka dinmik bukni, Musa bira, weik dua kunukmokak noutamak, Allah dam biyuk.

Allah Yahweh ati, arin ning uku dongonak, keil yangabuka kintinilina ati, nyabuk yupu

²² Allah Yahweh arye Musa biti, “Israel ninye sik nirya kekena ati, ayupu nyapnulyame. Nyapnulam yupu ara ani. Ara, na Allah Yahweh im deice tam unirye, sikti, yupu nyalinun ning ara, anggun babye akunum kekebuka kel kiamlume.

²³ Ati ara, anggun kanye aryuk tenebuka, Aning ara, nun ni koprop unamle ati, el si erenamap tenen, urasin teleb ning memebuka pia kum delinamlulume. Ara, urasin teleb dekna weik ning, el si ara emas ap, tonda urasin teleb dekna ning, el si ara perak ap deice arye, ninye urasin atonun do, tonda, talye kam ulamle ning urasin atonun do, Aning ton kintinibuka deibipyeura, nun ni Allah ap, aning ap ansinibuka, si erebuka kinamabe tenenʼ pia kum si erenanumlume. Na Allah Yahweh, na tonok ati kibuka si erenamnulume.” Allah arye, sik Israel ninye nirya kekenamak tenen, Musa biti ayupu nyapdeibuk.

²⁴ Nyabukce, ayupu tonap dukdongobuka nyabuk. Na Allah, na si erena ati, kam ning obuka uku dongonamlume. Wininamlumak ati, anggun minopce tuku dobuka, taplak deipmunyeura, na si erena ati, kam ning obuka arenak kintinipnamlume. Winipmunyak ara anggunce, domba basam ap, sapi basam ap, obuka boyamunyeura, ‘Nun malye wininyap ning ara, Allah arye namin kipsilirye, teleb kilinamsil tenen, uku dongolyanamlume. Tonda, ‘Allah ap, nun ap teleb kibuka neika uberye, el uk melinamsil tenen, kam ning obuka, tuku arye kintinepnamlum ning deice uku dongopmunba, uku diplirye siltong teleb ning na damak welebiliba kekepnirye, anggunti, na kanye delinamsine. Ara, narye anggunti, ‘Aning ara, anggunce na si erena ati, kintinip deipnalumak ara, aninguk deipnamlume,’ nyapnyeura, amutuku nirya ara, na siuk tuba teninamnulume. Anyapmasin touk akunum winipmunyeura, nara, anggun damuk yanganirye, anggunti teleb kilinamsine.

²⁵ Ura, anggunce, na Allah arena ati, kam ning obuka uku dongonak ara, keil yangabuka kintineipnamlumak ara, ninye taruk deice arye keil pum ning deibuka dongopnamak keil ara, dobuka pia kum delinamlume. Talya auplye pala keilak bobuka yamunce, yangapnamlulume. Aning wininamluma deiyok ara, ani. Ara, keil telen ning arye teikuka deiamice keil anyak dobuka, aknapdeipmunce kintineipmunyeura, akunum malye kipdeipnamlume. Ara, ninye taruk deice arye, keil teikne ning deibuka onmace deice arye, akeil akunum malye ulinyake. Ati ara, ato keil ara, na si erena ati, uku dongon ning ara, pia kum kintipnamlulume. Ato keil deice, kam ning obuka, na arena ati, uku kum dongolyanamlulume.

²⁶ Tonda, na Allah si erena ati, kam ning obuka keil deice do, tuku deice do, uku dongonak ara, weik cang arye, kum donamlume. Deiyok ara ani, cang arye deibuka domunyeura, el itam welena ati morona yo doplumce, ayo welemunya deice arye, yuk nang arye, anggun nong amu tam ton, alye upmanto ning ara eipsicak tenen ati, nyapsine. Ati, na si erena ati uku dongon damak moron yo deipmunyeura, moron yo deice welena pia kume nyapsine. Allah arye, sik Israel ninye kekenamak tenen, Musa biti nyabuk.