Keluaran 14 - Eipomek

Firaun birye, ‘Israel ninye olbinun’ tenen, kintinip deibuk yupu

¹ Israel ninye bisik biyik talak ara, Allah el si Yahweh arye Musa biti nyabuk.

² “Ance Israel ninye ati nyapminba, winipnamake. Israel ninye tamubuka bikirye, mutuku si Pi-Hahirot mutuku binuka doltakna aik dopnamake. Ara, Mikdol mutuku atam, laut mekwen otam, anoutamak arye doltakna aik dopnamake. Ara, laut mekwen kup-kup bukni, mutuku si ton Bahal-Sepon mutuku otam, atam danoutam binuka domba bol cang kain aik dopnamake. Aning nyapminba winipnamake,” Allah arye Musa biti nyabuk.

³ Nyabukce, ayupu ton nyabuk. “Winibicopura, Mesir mutuku weik deiyoknye Firaun birye utenepnamale. Elda, ‘Ura, Israel ninye arye, ‘Dan bisik bitibye do?’ tenen, teniltona upliba, laut mekwen otam, ninye kum unyakak atam, danoutam ara, bisik ati enmakirye, obinapna, ayanapna kinmakirye, wininmake,’ tenepnamle.

⁴ Winibice talak ara, na Allah arye kintinip deipnyopura, Firaun talima malye uplirye, anggunti dobolyanamsile. Bukni narye weiknye Firaun ap, Mesir ninye nirya ap, sik nong deice weik ikin ning deipnamne. Tonda, Firaun el yin talin nang weik, na mikip deice arye opnyopura, ninye nirya arye na Yahweh ati, ‘Se weik mambulnye ulule’ tenen, kel kipnamake.” Allah el si Yahweh arye nyabukopura, sik Israel nang arye aning nyabuk touk winibuka bindobik.

⁵ Firaun el mutuku nang arye, “Israel ninye binmake,” nyabikba, Firaun ap, el mapu ap kekebikce, malye kanye bobukabikce, ila tuba tonap tenibukabikce, ayupu nyabik, “Kume, nun yata wiripmap do? Nunce yata ati batakmapba, nun pil talye dona ninye, Israel ninye nirya bindopmak do? Wini talak ara yata wiripnuyap do?” nyabik.

⁶ Nyabikopura, Firaun birye nyapdeibukba, el mapu arye, el kuda basam libuka tuku deice ban ning kintinip deibuk. Tonda, el yin talin deiyok nang ap, el mapu sik yin nang ap, kintinibuka tabakukabukce, bobiyuk.

⁷ Winibikce sik kuda basam libuka tuku deice bana ati, bun ning pia teleb ning enam ratus kereta (600) kintinibik. Tonda, aninguk bukni, Mesir mutuku tuku deice ban ning yuk ning ap nirya kintinibik. Tonda, aning deiyok nang ton kintinibikba, bobiyuk.

⁸ Winibika babye, Israel ninye ‘Amutuku batakuka bisik noutamakuk binuka seknamap’ tenen, ilil kum diparyuk banmeke. Sik banmek talak ara, Allah el si Yahweh arye arebukba, Firaun el talima tam malye kanye dongobukce, ‘Israel nang kum bataknune’ tenebukce, kanye imun uamuk ning nirya tenibuka kum kel kibukce, ‘Israel nang tomopnun’ tenen, dobolbiyuk.

⁹ Ati ara, Firaun ap, Mesir mutuku yin talin nang ap, sik kuda ap, tonda bukna arye tuku deice ban ning kereta ap, tonda kuda balye tam bukuka balamak ning nang ap, kintinibuka Israel ninye aminyan tam arye dobolbiyik. Banmeka ani, Israel ninye laut mekwen kup-kup ak, mutuku si Pi-Hahirot mutuku dam bukni, diksukum Bahal-Sepon mutuku binuka, doltakna aik dobuka wekmekak eibik.

¹⁰ Dobolbanmekopura, Israel ninye ara Firaun ap, el yin talin nang weika arye aminyan tam yangayikba eibikce, ilil weik ubukba, weika arye, “Se, Nun Ni Allah, Yahweh lyepsilyame,” nyabuka ngalukunmek.

¹¹ Sik ilil weik ubuka ati, Israel ninye arye, Musa biti nyabik. “Yata ati, Mesir mutuku noutamak arye dobuka, ninye kum unyak mutuku noutamak boyanmasilam do? Yanmapce amutuku dipnuyap do? Mesir mutuku ara dipmatibyeba, Mesir mutuku noutamakuk kum weipsitinga ati do? Ninye weinak lo kum uamuka ati, amutuku boyanmasilam do? Ati ance boyanamsulumba, yangapya ani amutuku dipnuyabe. Ara, an nyalamsuluma deice arye yanuka dipnuyap do? Yata wiripnamsil do? nyapkiabe,” nyabuka ngalukunmek. Nyabukabikce ayupu ton nyabik.

¹² “Minop talak, nun Mesir mutuku ulamupu talak arye nyabupu ning ara akunuma. “Akunum uple, nun malye kanye bobabe. Ati, an nun tonap nyena kume. Mesir ninye sik pil melin nanguk uptibye, dauplye,” nyabupu. Teleb ning ara, Mesir ninye sik talye pil don nang unmatibye bukni, ance boyanmasilamba, ninye kum unyak mutuku noutamak dipnamaba ara, ikin weik upsile. Se, yata ati do?” nyabik.

¹³ Nyabikba, Musa birye tamubuka sikti, nyabuk. “Anggun ilil una kum asa, anggun tikmunce dinululume. Arup ara, Allah el si Yahweh arye anggun lyena ati winipnul ning eibuka kel biknamalume. Ati ara, anggunce Mesir ninye arup eipnamaluma ara, anggunce yuk talak tonap kum eipnamlume. Nirya dipnamake,” nyabuk.

¹⁴ “Allah el si Yahweh arye sikti, Mesir ninye nirya obuka malye kipnamale. Elcuk aning nirya winilisulula ati, anggunce yata tenebuka winiptum do? Kum ati ara, anggunce kanye lamapdongobuka dinauk unamalulume.” Musa birye Israel ninye ati nyabuk.

Weik laut mekwen koubuka, biyik yupu

¹⁵ Allah el si Yahweh arye Musa biti nyabuk. “An yata ati, yupu weik arye nati nyanmanilam do? Ance Israel ninye ati nyapminba, bana uk unamake.

¹⁶ Ati ara, an boplum kama dobuka, mek deice pukminba, laut mekwen cebuka dana-dana kiproplirye, tuku mikuka laka upliba, aninye atuku laka uplye deice bindopnamake.

¹⁷ Winipyopura, ‘Mesir ninye malye kiplirye, Israel ninye binukce bisikuk aminyan binuyap’ tenen, na Allah arye arepneba, sik talima kat upliba, kum kel kibikirye, laut mekwen noutam bisikuk binuyake. Sik bikcopura, narye wenebuka oplopnamane. Ara, narye weiknye Firaun ap, el yin talin nang ap, el kuda libuka tuku deice ban ning, kereta kuda ap, aning deice bukuka yanmak nang ap, na mikip deice arye opnamne. Akunum opnyopura, aminyan talak yuk ninye nirya kekebikirye, na si erebuka, ‘Se Allah ara pia mambule,’ nyapnamake,” Allah arye nyabuk.

¹⁸ “Firaun ap, el yin talin nang ap, el kuda libuka tuku deice balamak ning, kereta ap, kuda deice bukuka yanmak nang ap, nirya opnamane. Anang nirya opnaman deice arye, Mesir ninye nirya eibikirye, ‘Se, Allah el si Yahweh ara, weik deiyoknye dipkoproba ulule,’ tenepnamniyake,” Allah arye nyabuk.

¹⁹ Aning akunum nyabukopura, Israel ninye ban bisik menekuka balamuk malaikat, Allah arye dopreiamuk malaikat ara, memeprobuk. Allah el malaikat memeprobukce, Israel ninye banmeka aminyan tam kipromokba, sik menekuka banmek. Aning atonun, weik dua sik urasin tam menekuka balamuk ning ara, kisikdobukce sik aminyan tam kibuka banmok. Ati, Allah el malaikat ap, weik dua ap ara, Israel ninye sik aminyan tam yan talbalibuka tikrikce, banmeke. Winibukba, Israel ninye menekuka banmeke.

²⁰ Ati ara, Mesir mutuku yin talin nang otam banmek bukni, adua ap, amalaikat ap, noutamak tikmarikba banmika ati, Israel ninye atam banmik nang ara, Mesir ninye aminyan tam yanganmik nang kum eipmik. Alukunyan noutamak nirya ara, Israel nang babye, Mesir nang babye balamik bukni, kum epdanmanto ulamik. Mesir mutuku nang balamik tam ara, inibuka kunukukba, kum epdanmanto ulamik bukni, Israel ninye banmek tam ara, dirin weik ubukba, dinmekce banmeke. Alukunyan noutamak nirya ara, kum epdayik.

²¹ Ura, Musa birye el taruk laut mekwen deice pukukba, Allah el si Yahweh arye, el mikip deice, weik kumanya arebukba, mikip weik keting yangan tam arye pukuka laut mekwen deice yayuk. Yayukce alukunyan noutamak arye pukukba, amekwen eitam kilon, outam kilon kibuk. Laut mekwen noutam bisik ara mekwen ceprobukce tuku mikrobuk.

²² Winibukce weik laut mekwen noutamak arye bokuka dana-danatikilbinmokce. Winibuk talak ara, tuku mikrobuka deice Israel ninye yanibuka biyik.

²³ Wininmokba, Mesir mutuku yin talin nang nirya, kuda buna ning deice bukukabikce, Israel ninye dobolyanganmek. Ara, Firaun el kuda deice bukuka banmek nang ap, kuda arye libuka tuku deice ban kereta, adeice bukuka banmek nang ap, el kuda deice bukuka yanganmek nang ap, aninye nirya ara, laut mekwen ceprobuk bisikuk yana wekikce, ‘Israel ninye tomobuka opnuyap’ tenen, dobolbiyik.

²⁴ Akunum bereknuyuk talak ara, Allah el si Yahweh arye weik uku buk ap, dua ap noutamak arye, Mesir mutuku mal olan nang banmekak eibukce, kanye walwal una deiyok ning arebukba, sik nirya kanye walwal ubukba, kanye teniltona uk unmek.

²⁵ Tonda Allah arye arebukba, Mesir ninye sik kuda basam deice bukuka balamik ning yan nirya bental pum bisik wekukce, ben arye bibukba, yane kwinipman kum kibuk. Bibukopura, sik tuku deice bana ning nirya ikin kibukce, kum binmanto ubukba, Mesir ninye arye nyabik. “Nun kanye imun upsile. Allah el si Yahweh arye ‘Na mapu arye Mesir ninye obuka sirya daknamak’ tenen, Israel ninye ati melipmale. Ati, Israel nang binmakak batakuka, pia yukak bitibye. Anang asukumuk batakuka bindoptibye,” nyabuka ngalukunmek.

²⁶ Atalak Allah el si Yahweh arye Musa biti nyabuk. “An taruk arye laut mekwen deice pukminba, mekwen dana-dana kipmala tamubuka deiplirye, Mesir mutuku yin talin nang ap, kuda deice bukuka yanganmak nang ap, kuda libuka tuku deice banmak ning ap, anirya ansinibuka opnule,” nyabuk.

²⁷ Nyabukura, Musa el taruk laut mekwen deice pukukba, berekeltakne talak arye, Mesir ninye wekmeka, alaut mekwen nirya tamubuka noutam bisikuk yayuk. Yayukce Mesir ninye amekwen noutamak bikbik abuka bayikbuk, Allah el si Yahweh arye mekwen noutamak arye siknibuka obuk.

²⁸ Atalak uk weik laut mekwen tamubukce, Mesir mutuku yin talin nang ap, kuda deice bukuka yanganmek nang ap, Mesir mutuku weiknye, Firaun ap, el mapu yin talin nang ap arye, Israel nang ati, dobolbanmek nang nirya, laut mekwen noutamak dibik. Mekwen noutamak arye siknibuka obukba, tonoknye babye kam kum bukuk. Nirya dibik.

²⁹ Bukni, Allah el mikip arye arebukba, weik laut mekwen dana-dana kibuka deibuka ceprobukce, tuku mikmok deice Israel ninye anoutam bisikuk biyik.

³⁰ Asum noutamak ara, Allah el si Yahweh arye Israel ninye lyeprobuk. Ara, Mesir ninye talibuka ulamika noutamak ap, tonda Mesir mutuku yin talin nang arye, ‘Israel ninye tomobuk opnuyap,’ tenebik ning ap, noutamak arye lyeprobuk. Tonda Mesir ninye laut mekwen noutamak dipmikba, sik nong laut mekwen kup-kup upmokak ara, Israel ninye arye eibik.

³¹ Ati ara, Allah el si Yahweh arye, el mikip weik deice arye Mesir ninye opmok ning ara, Israel ninye arye eibik. Eibika deice arye, ‘Se, dipkoprob Allah elda mikip weiknye’ tenen, kel bikikce, Yahweh ati ilil weik ubuk. Ilil weik ubukba, Allah el si Yahweh ap, Allah el pil dona deiyoknye Musa ap ati, diba tenebikce si erebik.