Keluaran 1 - Eipomek

Mesir mutuku noutamak, Israel nang ikin pil dolamik yupu

¹ Minop talak ara, Israel nang nirya, Mesir mutuku biyik. Ara, Yakub el mapu ap, Mesir mutuku biyik ninye si ara ani. El mapu nirya ara, sik kilapu ap, sik mapu ap, neika Mesir mutuku biyik.

² Sik si ara ani, Ruben ap, Simeon ap, Lewi ap, Yehuda ap,

³ Isakar ap, Zebulon ap, Benyamin ap,

⁴ Dan ap, Naftali ap, Gad ap, Aser ap

⁵ Sikda, Yakub el mapu ara, yupa bitinye kepropnye nakub dikin (70) ninye, Mesir mutuku biyik. Sik nirya Mesir mutuku biyik talak ara, Yusup minopce binuka ulamuk.

⁶ Sik nirya daulamika ani, Yusup el kiklip nang ap, Yusup nong koproba ap, sik atalak wisi akunum danamika anya arye, anang nirya dibik.

⁷ Bukni, sikce delilamik mapu ara, Israel ninye Mesir mutuku ulamik talak ara, mapu weik minopce deipunubikba, ninye weik ubuka ulamik. Israel ninye pia weik ulamika anya arye, Mesir mutuku noutamak nirya, ninye weik ubuk.

⁸ Ulamik talak ara, Mesir mutuku noutamak ninye deiyoknye tonok, Raja winiryuknye tikukce, Mesir mutuku nirya talibuk. Atikuknye bira, Yusup el si ap, nong ap, kel kum kiyamuk.

⁹ Anye birye, el amu tam ulamik ninye ati nyabuk. “Anggun ton dipdelulume, Israel ninye, yupa pia weik akunum upmaka ati ara, sik mikip weik ubikca deice arye, nun yanipnamsiyake.

¹⁰ Ati ara, nunce sik Israel ninye ati, ‘Yata wiriptibya deice arye, sik mitik kipdeiptibye do?’ tenen, pia moubuka tenenamabe. Ara, ‘Sik pia weik tonap ubikirye, aminyan olana talak uplyopura, anang oploptibye,’ tenesinyak ninye ara, Israel ninye arye, anang ap neika bulubikirye, nunti obuka, sirya daknamsiyake. ‘Obuka sirya daksikirye, sik nirya nun mutuku batakuka bindopsicak,’ tenepne. Ati ara, Israel ninye ati, moubuka tenebibirye, memepdanuka ilil asa unamabe,” nyabuk.

¹¹ Mesir mutuku winiryuk Raja, Firaun arye nyapdeibukba, el mapu arye, pil dona deiyok nang, yu nang dobuka kintinip deibik. Ara, ‘Sik Israel ninye kalikikirye, ikin ning, sik nong deice deipnamak’ tenen, wipdeibik. Winibikba, ayu nang arye, Israel ninye mikip arye talibukabikce, sik nong deice, ikin pil pia weik deibikba, ikin kanye bobuka, weik ikin piluk dolamik. Ara, Israel ninye arye, Firaun el ‘Na’ tenen ning delinak ati, kota si Piton mutuku ap, Ramses mutuku ap, pia ikin pil dolamika deice arye, akota bitinye pil dolamik.

¹² Mesir mutuku nang arye, ikin ning weik, Israel ninye nong deice deiamikba, ikin weik ulamik touk, Israel ninye arye, mapu weik deibuka, dadeipdanin biyik deice arye, amutuku noutamak binuka ulamikce, weik ubukba, Mesir mutuku ninye arye sikti, ilil weik ubuk.

¹³ Ati ara, Mesir mutuku ninye arye, Israel ninye ati, bico tenena kum deice arye, pia ikin pil weik tonap aruklamikba, pil weik dolamikce, mambul kanye bolamik.

¹⁴ Mesir mutuku nang arye, ‘Israel ninye, sik kanye imun kanye bobuka unamak’ tenen, wa pil aning-aning nirya ap, batu tehel memena ati, ikin pil weik tonap, sik nong deice delilamika deice arye, Israel ninye imun kanye bobuka ulamikce, weik engebuka ulamik. Winilamik bukni, Mesir mutuku ninye arye sikti, pia bico kum tenelamikce, “Ikin piluk doplulume,” nyabuka aruklamik.

¹⁵ Mesir mutuku talibuka ulamuk deiyoknye, Firaun arye, mi delin talak melibuka kweten kilapu bitinye, Israel kilapu sik si Sipra ap, Pua ap ati, nyabuk.

¹⁶ “Ura, anggunce melinamrum talak ara, Ibrani kilapu mi delin talak noutamak dipredumunce, sal mi deibikcopura, amapu adiparyuk oltakanamdurume. Kil mapu deibikcopura, ‘Batakanamdurume,’ kilmapu ara, kamuk unamake,” nyabuk.

¹⁷ Firaun birye nyabukopura, akilapu bitinye ara, Allah ati ilil ubukba, ‘Elda mambule’ tenelamika ati, Firaun birye, ‘Winipnamrurume,’ nyabuk ning batakuka, asal mapu deipnopura, kum olamdikce, bataklamdikba kamuk ulamik.

¹⁸ Winilamdikba, Firaun kel bikukce, akilapu bitinye ati, tamubuka nyabuk. “Yata ati, sal mapu nirya ara, batakarumunyeba, kam tuba unyak do?” nyabuk.

¹⁹ Firaun birye ayupu nyabuk buk, akilapu bitinye arye, tamubuka tenepce arye nyaprik. “Kume na nio, sik Ibrani kilapu ara, Mesir kilapu atonun kume. Sikda mikip weik anya arye, nun kum yanmanimye talak arye, minopce delilonyake,” nyaprik.

²⁰ Nyaprikba, Allah arye sik mapu delin ati, kwetena kilapu ati, kanye deibuka teleb kipdeibukopura, Israel yala ninye mapu weik deibuka, dadeipdanin balamika ani, ninye pia weik ubuk. Minop talak, weik aulamuk bukni, atalak diprongobuka otam ara, ninye pia weik upra balamik.

²¹ Tonda, sik kwetena kilapu Allah ati, ilil ubukba, ‘Elda mambule,’ tenelamrika ati, Allah arye akilapu ati melibukba, sik babye mi boprikce, mapu weik delilamdik.

²² Aminyan talak, Firaun birye, el amu tam Mesir mutuku ninye nirya ati, ayupu nyapdeibuk. “Ibrani kilapu arye, sal mi ton deibikcopura, adiparyuk anggunce, amapu dobuka weik mek si, Nil mek dongolbanamlulume. Kil mapu ara, ona meme, batakmunyeba, kamuk unamake,” Firaun birye nyapdeibuk.