Kejadian 48 - Eipomek

¹ Ura, sik nirya daulamika ani, aminyan talak ton nang arye Yusup biti, “An ni koprop uk weik dinmale,” nyabuka laka nyabikba, Yusup kekebukce elce deiamuk mapu bitinye ara, Manasye ap, Epraim ap bobuka el li dam biyik.

² Biyikopura, aunmek nang arye Yakub biti, “An mi Yusup dilyanmakile,” nyabikba, kekebukopura, uk weik dilamukba, mikip pia kumce mitang asa ulamuk bukni, pia piribukabukce, el malamukak arye bukuk.

^3-4 Bukabukce Yakub birye Yusup biti nyabuk. “Minop talak Kanaan mutuku tam bukni mutuku si Lus mutuku dam ara, aning-aning weik ulirye aning nirya deice tam ulul Allah ara, na lengdar mapsa deice arye na dam yanuka nyapnuke. “Narye meliamkiniba, ance mapu deipminyeba, dadeipdanin balamica ani aminyan talak upnamak ninye ara pia weik upnin banamake. Ance deipminyeba, donirye dadeipdanin binamak ninye ayala-ayala weik unamake. Tonda sik aminyan talak unamak ninye, sik arena ati, Kanaan mutuku tam nirya arepneba, talinamake. Ara, ance deipminyeba, dotalak deipdanin banamak ninye arye Kanaan mutuku tam pia talinamaka ati nyapkine,” Allah arye nyabuka nyalin yupu nyapdeipnuke.” Yakub birye nyabuk.

⁵ Nyabukce ayupu ton dukdongobuka nyabuk. “Winira Yusupo, nara an dam min kum yanamse talak ara, ance Mesir mutuku noutam deiplum mapu bitinye sik si ara, Manasye ap, Epraim ap ara, yuk ninye arye sikti, ara, na mapu atonun tenenamake. Ara, narye Ruben ap, Simeon ap deiamse touk, yuk nang arye an mapu bitinye ati ara, ‘Amapu ara, Yakub el mapu atonun urudake’ tenen, nyanamake.

⁶ Wini talak arye dipdongobuka oyanamla talak noutam ara, ance mapu tonap deipminyopura, sikda an mapu uk unamake. Aminyan talak sik ni yapu deibikcopura, anyapce sik tuku dopropnamaka ara, sik du yapu si deice arye dopropnamake.

⁷ Minop talak Mesopotamia (atau Padan-Aram) mutuku batakuka Kanaan mutuku tam tamubuka yanganmapu talak ara, bisik noutam tuba banmapu talak ara, na kil Rahel dibukba, na ikin kanye bobuka engepse. Rahel dibukak ara, Kanaan mutuku tam noutam bukni, mutuku si Eperat mutuku dam dibuk. Dibukba, asukumuk el nong dobuka tuku lukse. Ara, Eperat mutuku bisik kup-kup na kil Rahel tuku lukse.” (Amutuku tonok bukni, si bitinye nyalamik ara, Betlehem mutuku ton nyalamik.)

⁸ Ayupu nyabuk talak ara Israel birye Yusup el mapu bitinye eibukce, “Amapu ara yatanye birye deiamuk do?” nyabuka asipdeyuk.

⁹ Asipdeyukura, Yusup birye tamubuka nyabuk. “Kume nio, amapu bitinye ara, Allah arye meliamnukba, narye Mesir mutuku noutam, amutuku deipse mapu bitinye atia,” nyabuk. Nyabukopura, Israel birye, “Ati Allah arye amapu bitinye ati meliplirye, ‘Pia teleb updeipnamle’ tenen, na dam deipniminba, sik deice ara teleb yupu nyapdeipnune,” nyabuk.

¹⁰ Ura, atalak ara Israel el asing akunum malye upnin balamuka anya arye, teleb ubuka kum eipmanto ubuka ati, Yusup birye el mapu bitinye dobuka Israel el dam koprop deibukba, el li koprop arye amapu mutubukce iribuk.

¹¹ Iribukce, Yusup biti nyabuk. “Se, na ni mio Yusupo, minop talak ara an urasin tuba tonap pia kum eipnamne tenyamse bukni, wini talak ara an uk kum bukni, ance deiplum mapu ton eipmane. Ara, Allah arye telebe tenyamukce, lo arepmanila atia,” nyabuk.

¹² Nyabukura, Yusup birye el mapu bitinye Israel el keil deice bukmarikak arye dobuka, Israel el urasin tam deibukce, Yusup el nong kanupdongobuka, ‘Na ni kipnun’ tenen, el urasin ara tuku tam luknupdongobuk.

¹³ Winibukopura, Yusup birye el mapu bitinye dobukabukce, Epraim bira el sirik tam taruk arye talibuk, Manasye bira el kwanim tam taruk arye talibukce, el li Israel dabukmokbuk, Epraim bira Israel el kwanim tam deibuk. Manasye bira, Israel el sirik tam deibuk. (Ara Epraim bira el weit koproba ubuka anya arye kwanim tam deibukce, Manasye dunye biti sirik tam deibuk.)

¹⁴ Winibuk bukni, Israel birye el sirik tam taruk el weit Epraim el kisok deice deibuka talibuk. Tonda, Manasye bira, dunye ulamuk bukni, Israel el kwanim tam taruk Manasye el kisok deice deibuka talibuk. Winibuka ara, el sirik taruk ap kwanim tam taruk deice deibukce, amapu talibuk.

¹⁵ Israel birye amapu bitinye tuba talinmok talak ara, el mi Yusup biti teleb yupu nyapdeibuk. Ara, ‘Allah arye Yusup melinamla deice arye teleb updeipnamnil’ tenen, ayupu nyapdeibuk. “Winira Allah arye amapu bitinye ati, ‘Weika arye melipliba, pia teleb updeipnamle’ tenen, Allah moropne. Ara, na ni yapu Abraham ap, Isak ap sikce el siuk erelamdikba, sikti, melilamuk Allah ati nyapne. Nunce nun domba basam ati pia melibuka kaliklamak touk, Allah arye na kam ulamse talak nirya ap, wini talak ap tuba melibuka kalikinulul Allah ati nyapne.

¹⁶ Na ikin ulamnuk ning nirya noutam arye lolamnuk Allah arye, ‘An mapu bitinye ati melibuka pia teleb updeipnamle’ tenen, nyapne. Tonda amapu bitinye ara, yuk ninye arye sikti, ‘E, amapu ara Israel birye deiamuk mapu ururake. Sik apu yapu ara Abraham ap, Isak ap ulamrik. Sikda ayala nang arye deibik,’ nyabuka ‘Pia nyanamake’ tenen, Allah moropne.” Israel birye nyabuk.

¹⁷ Israel birye el sirik taruk dobuka Epraim kisok deice deibuka talipmokba, Yusup eibukce, malye kanye bobuk. Malye kanye bobuka anya arye, ‘El sirik taruk dobuka Manasye el kisok deice deiptue’ tenen, Yusup birye el li taruk talibuka ‘Odeipnun’ tenen, pirinmok.

¹⁸ Pirinmok talak ara nyabuk. “Naie, an kanye walwalapmalame. Atam mi ara minop deipse mi anya arye, an sirik taruk ara, el kisok deice uk delina telebe. El kisok deice taliplyame,” nyabuk.

¹⁹ Yusup birye nyabuka piripdeyuk. Bukni, el li koprop arye nyabuk. “Kume, na ni mio. Na kele. Na mangkau kanye bobuka kum winipne. Min yuma deiplum mi Manasye ara el ton weiknye uplirye, mapu dadeipliba, dadeipdanin balamikca ani, dotalak unamak ninye ara, weik upnin banamake. Winiplirye mitikto mambul unamle bukni, el weit koproba Epraim bira, mambul weiknye unamle. El du koproba, deice tam atonun uplirye, elce deipliba, dadeipdanin balamikca ani, doupnamak ninye ara, ayala-ayala weik upnin banamake.

²⁰ Na ni Allah, an si deice arye anyapman yupu nirya nyapdeipne. Yusup anti ara, Allah melipkilirye, Epraim ap, Manasye ap ati pia teleb ubuka deipnamle touk, ‘Teleb ubuka melipkutue’ tenen, Allah moropne.” Israel birye ayupu nirya nyapdeibuk. Israel birye ayupu nyabuka deice arye, Epraim dobuka deice tamto erepdeibuk bukni, Manasye ati ara, mitik anun amu tamto dobuka deibuk.

²¹ Winibukopura, Israel birye Yusup biti nyabuk. “Ura, na ni mio, nara dipmanto akunum upman ati, dipnaman bukni, anti ara, Allah weika arye melinamkile. Tonda, aminyan talak an apu yapu ulamik mutuku Allah arye anti dobuka bobinamkile.

²² Tonda anda, an du yapu sik deice tam ubuka ninye deiyoknye ulyama anya arye, narye anti tonok mutuku ton arepkine. Ara, minop talak, na yin ap, parang ya ap dobuka, sik Amorit ninye obuka sirya daksirye, dopropse mutuku kon ap, mutuku lu ap, arepkine,” Israel birye Yusup biti, ayupu nirya nyapdeibuk.