Kejadian 47 - Eipomek

¹ Yusup birye Firaun dam binuka ayupu nyabuk. “Na ni ap, na du yapu ap arye, sik talinyak ning nirya ap, sik domba basam nirya ap, yuk kam un ning weinyak ning ayala-yala nirya ap bobuka Kanaan mutuku noutam arye nun mutuku tam Gosyen mutuku akunum yanmake,” nyabuk.

² Tonda Yusup birye el du yapu noutamak arye pamubarye nang wibuka Firaun dam bobiyuk.

³ Bobiyukba, Firaun birye anang pamubarye ati nyabuka asipdeyuk. “Anggunda yatato pil dolulum do?” nyabuka asipdeyukura, sikce, “Nunda an amu tam unyak nang atonun unyabe. Nunda nun apu yapu arye pil dolamik touk domba basam wein nang unyabe.

⁴ Kanaan mutuku noutamak babye, din ning yala nirya kumdasuka anya arye, nun weinyap ning nirya sik din ning babye kum kibuke. Ati ara, nunda, ‘Amutuku noutam tia karin ati unamap’ tenen, yanmabe. Ati na nio, ance, ‘Telebe,’ nyapsutumba, nunda Gosyen mutuku noutamak unamabe,” nyabik.

⁵ Nyabikopura, Firaun birye Yusup biti nyabuk. “An ni ap, an du yapu anye arye, ‘Yusup birye melinamsil’ tenen, an dam akunum yanmake.

⁶ Na talinun mutuku Mesir mutuku nirya aupmalba elilyama anya arye, nun mutuku noutam pia teleb sukumak wibuka an ni ap, an du yapu ap ati arepnulyame. Na kanye ara Gosyen mutuku noutam unamaka ara, teleb uka. Tonda an du yapu noutam, kam ning weina weik kelnye aulamyopura, anye ton wibuka aning weina deiyoknye una ati ereipminyeba, elda narye talinun kam ulye ning melibuka weinamnile,” nyabuk.

^7-8 Nyabukura, aminyan ara Yusup birye el li koprop bobuka Firaun dam bobiyuk. Bobiyukba, Yakub birye Firaun biti ‘Allah arye melinamnile’ tenen, teleb yupu nyapdeibukba, Firaun birye Yakub biti, “Anda keting tamun yata wiribuka deice wisi akunum dalum do?” nyabuka asipdeyuk.

⁹ Asipdeyukura, Yakub birye, “Nara tukwak mutuku noutam balamse talak ara, keting tamun yupa weik 130 tahun akunum ulamsirye, wisi deipse. Na ulamse talak ara ikin uk ulamnuk bukni, na apu yapu ara keting tamun yupa pia weik ulamik. Nara mitik tonun uka,” nyabuk.

¹⁰ Yakub birye Firaun biti teleb yupu ton nyabukce, anyaik batakuka biyuk.

¹¹ Firaun birye Yusup biti nyapdeiamuk touk, Yusup birye el li ap, el du yapu ap ati Mesir mutuku noutam bukni, tuku pia telebak wibuka, arebuk.

¹² Tonda Yusup birye el li ap, el du yapu ap, sik mapu silip nirya ap ati din ning ton arelamuk. Ara, sik mapu aulamik touk nukukabikce, sik patalamuk touk bokuka, sik nirya bukni, aik yuk-yuk bokuka arelamuk.

¹³ Sik nirya daulamika ani, Mesir tam noutam nirya ap, Kanaan tam noutam nirya ap ara ikine pia weik ulamuk. Ara, din ning ayala-yala nirya tuba-tuba kum dayukba, sik ning nirya kum danin balamuk.

¹⁴ Atalak noutamak ara amutuku noutam ulamik ninye arye sik yo bok ap, dekna ning nirya ap bobuka, Yusup birye min yuma talak orketeng tamun deice memebuka delilamuk din ning dekelyangalamik. Yo bok deice aning dekelyangalamik bukni, Yusup birye aning nirya bulubuka Firaun el aik dongolamuk.

¹⁵ Pia tuba-tuba dekelyangalamikba, Mesir tam nang ap, Kanaan tam nang ap taleamik yo bok nirya akunum kum dayukopura, Mesir tam noutam ulamik nang weik Yusup dam yangalamikce nyalamik. “Nun yo bok ap, yuk dekna ning ap ara akunum kum danmasile. Ati nun din ning talye urdemuk arepsilyame. Yata deiyok ati, an talye dilamsilamba, nunda dibinamap do?” nyabuka morolamik.

¹⁶ Nyabuka morolamikba, Yusup birye, “Ura, anggun dekna ning akunum kum danmala anya arye, anggun weilulum ning kam un ning aning-aning nirya boyanuka arepnumunyeba, aning pununa ati anggun din ning arenamsine,” nyalamuk.

¹⁷ Nyabuka ati, amutuku nang nirya arye sik weilamik ning, domba ap, kambing ap, kuda ap, sapi ap, keledai ap aning nirya bobuka arelamikba, aning pununa ati, Yusup el min arye, ‘Na’ tenen, dokola delilamuk noutam arye dobuka, sik din ning arelamuk. Winilamuka deice arye, Yusup meliamuka arye amutuku ulamik nang ara, aketing tamun tonok tonap teleb ubuka kam ulamik.

¹⁸ Ura, aketing tamun akunum winibukba, orketeng tamun noutam arye aninye nirya Yusup dam yayikce nyabik. “Se, nun nio. Nun ikin weik upsila ara kum dungnuptibye. Ance elisilyama anya arye an kele. Nun dekna ning nirya akunum kum dasuke. Tonda, nunce kam ning weilamupu ning ayala-yala nirya anti akunum areamkububa, ance akunum talilyame. Wini talak ara nunce talenyap ning ara, tuba aupmasil ning ara bitinye uk tuba usulule. Nun nong ap, nunce talenyap tuku ap anyuka. Yuk ton pia kume.

¹⁹ Nun kanye ara ani. Nun tuku nirya ap, nun ap, yata deiyok ati talye kum danamsil do? Ance dinmasilamba, talye urdemuk dipnamaba atia. Winipsilyak ati, nun tuku nirya ap, nun nong ap deksiminye deice arye ‘Nun din ning ton arepsutum’ tenen, nyapkiyabe. Nun nong ap, nun tuku nirya ap ara, Firaun birye tapu kouna atonun ubuka talipsiliba, el amu tam ninye uk unamabe. Winipsiminyopura, nun wa kouna ati, yala ning aning-aning nirya ton arepsutume. Ara, talye ati kume. Deiyok ara, dipna kumce kam tuba ulamepya ani, wa wibuka yala ning kouptibyopura, ‘Nun tuku nirya talyeuk kum unamle’ tenen, nyapkiyabe,” nyabuka morobik.

²⁰ Nyabuka morobika ati, Yusup birye Mesir tam uamuk tuku nirya dekukce, Firaun biti arebuk. Atalak noutamak ara, din ning nirya kum ulamuka anya arye, amutuku noutam ulamik nang nirya din dina kum, talye din patan asa ulamik ning ara, ikin pia weik anya arye, Mesir tam nang nirya sik taleamik tuku dekikopura, Firaun birye taleamukba, el ninguk uamuk.

²¹ Tonda Mesir tam noutamak mutuku-mutuku nirya ulamik nang ara, Yusup birye dekamukce, aninye bobuka Firaun el amu tam delilamukba, sik nirya Firaun taleamuk.

²² Ura, amutuku noutam isa si erena ati, mem pil talina deiyok nang ulamik ninye ara, Firaun birye sik melina ati el taleamuk talak din ning bokuka tuba-tuba arelamuk. Sik din ning ara, Firaun birye talye arelamuka arye, sik din awamukba, sik tuku kum deklamikce, Yusup birye kum dolamuk. Adeiyok ara, sik tuku kum dekdobik.

²³ Aning ara sik nirya akunum winibikopura, Yusup birye Mesir mutuku noutam ulamik nang ati nyabuk. “Winira anggun nong ap, anggun tuku ap, aning nirya na deiyoknye Firaun ati akunum dekdopsise. Winipsa ati, wini talak yala ning aning-aning nirya arepnusine. Arepsinyeba, anggun nirya arye aning koulbinamlulume.

²⁴ Koupmunye bukni, aminyan talak aning-aning akunum papliba, lipmunyopura, winipnamlulume. Alipnamlum ning bobuka pamubarye bokuka deipnamlulume. Winipmunce, apamubarye noutamak ara tonok ning dobuka Firaun ati tamubuka arenamsulume. Apamubarye deipnamlum noutam bokuka dumbarye ning ara anggun yala ning ap, anggun din ning ap, anggun mapu silip nirya anggun din ning ap ati dobuka dinamlulume.” Yusup birye amutuku nang ati nyabuk.

²⁵ Nyabukura, anang nirya kekebikce, “Se, nun nio, anda nun deiyoknye atonun ulyame. Nunda talyeuk akunum dipmatibye bukni, ance aning winipmasilama deice arye lyepmasilamba, kam unamabe. Ati telebe, nunda nun deiyoknye Firaun, el amu tamuk ubuka, el talye pil don nang unamap talak, elce ‘Kanye deipsutue’ tenen, patasulule,” nyabik.

²⁶ Ati ara, Yusup birye “Wininamlume,” nyabuka deice arye amutuku noutamak ulamik ninye aninguk winilamik. Tonda wininamak tenen, sekdeibik. Atalak winibik touk, ayupu sekmap talak ton tuba winilamike. Ara, sik kouamikce ning ap, dokamikce ning ap, ara bokukabikirye, pamubarye deibikcopura, tonok ning ara Firaun el ning ati arebikirye, dumbarye ning ara sik bidamnye dolonyake. Tuku dam nang ara, amutuku tuku nirya Firaun taleamuk bukni, amutuku isa si erena deiyok nang, sik tuku ara, kum dekdobik. Ati sik bidamnye tuba taleamik.

²⁷ Ura, Yakub birye deiamukba, dadeipdanin yangalamikce, dipnin balamik nang, Israel ninye ara, Mesir tam noutam bukni, mutuku si Gosyen mutuku noutam ulamik. Atuku talibuka ulamikce, sikce mapu weik deipnin balamikba, ninye yupa pia weik kipnin balamuk.

²⁸ Ura, Yakub bira, keting tamun yupa weik 17 tahun deice arye Mesir mutuku noutam ulamuka ani, elda keting tamun yupa weik 147 tahun wisi dayuk.

²⁹ Wisi akunum dayukba, ‘Dipnamnarya,’ tenebuk talak akunum dam ubukura, Yakub birye el mi Yusup biti yukubukba, yayukura, ayupu nyabuk. “Amio, ance nati kanye deipnulum do? Pia bico uk tenyamniminyopura, an taruk na keil amu tam deipmince nyalin yupu nyapdeipnunilame. Ara, nara an ni koprop ati, ‘Dauaplye’ tenena kum bukni, na weik arye patanilye ning winipnamnilame. Ara, talye yupu nyaltakna kum bukni, na moropnukin atonun bico tenepnimince, aninguk winipnamnilame. Na moropkin ning ara ani. Na dipnyopura, na nong bobuka Mesir mutuku noutam kum weipnamnilame.

³⁰ Aning kum bukni, na nong bobuka Mesir mutuku batakuka bobinimince, na apu yapu dibikba, tuku lukamikak uk, tuku luknamnilyame. Ara, na apu yapu akunum dibik touk, dipnamne talak ati nyapkine,” Yakub birye Yusup biti nyabuk. Nyabuka morobukba, Yusup birye el li biti, “Naie, anyapmalam touk winipnamkine,” nyabuk.

³¹ Nyabukura, Yakub birye tamubuka nyabuk. “Talya dem ati kum nyapnile. ‘Pia dipkoprob winipnamnile’ tenepnamkina ati ara, “Pia dipkoprob winipnamkine” nyapdeipnilyame,” nyabukura, Yusup birye, “Naie, pia dipkoprob aninguk winipnamkine,” nyapdeibuk. Nyapdeibukba, el li koproba Yakub birye (el si ton Israel nyalamik), kama kisok dipdongobuka tikukce, Allah el si erebuk.