Kejadian 44 - Eipomek

¹ Din dibukabikce mapmeka, berekukopura, sik binukce talak ara, Yusup birye, el aik deiyoknye biti nyabuk. “Winipnulyame. Anang sik boyanmek tas ara, din ning weika arye dongopminyeba, langdipnulule. Anang nirya arye, boyanmek touk weika arye arepmince, sik tas nirya yuk-yuk bukni, sik tas pum bisik deice tam ara, sik dekna ning perak ara, ila tamubuka lipdongopnulyame.

² Winipminyopura, na mek din makau, pia teleb ning perak arye, puturubuka memepnik ning ara, dobuka sik weit koproba, el tas pum bisik duknubuka lipdongopnulyame. Tonda, el din ning dekna perak babye, el tas pum bisik lipdongopnulyame,” nyapdeibuk. Yusup birye nyabuk touk, el melinanye birye winibuk.

³ Mapmeka ani, beren tam koprop ara, anang ap, sik kuda basam ap, bisik banmek.

⁴ Banmek bukni, mutuku weik min kum binmek talak ara, Yusup birye, el pil don nang ati nyabuk. “Winiryuk binmangu nang dam bikbik abuka bilyame. Epdamunyopura, ayupu nyapnulyame. ‘Nun ni koprop arye, telebuk winipdeipmasil bukni, anggunce elti, yata deiyok arye malye winipdeipmalum do?

⁵ Anggun tas pum bisik upmal mek makau, perak arye puturubuka memebik ning ara, na deiyoknye, Yusup birye talilul ning do, kum do? Tonda, elce amek makau noutam dipdelirye, aminyan winipnamle ning ‘Ani’ tenen, kel bikilule. Anggunce aning ubula dopdopmalum ning ara, pia malye winipmalume.’ Ayupu nyapnamlyame,” Yusup birye, el pil melinanye biti nyabuk.

⁶ Nyabukura, anye bikbik abuka biyukce, Yusup el du yapu bisik noutam epdayikce, anye birye ayupu nirya nyabuk. Ara, Yusup birye, ‘Ayupu nyaplyame,’ nyapdeibuk touk nyabuk.

⁷ Nyabuka wenebukopura, sikce tamubuka, “Kume, nun nio, yata deiyok ati, ayupu atonun yupu nyapmasilam do? Nunda, anggun amu tam unyak ninye atonun unyaba anya arye, anyapmasilam touk ara, nun dipkoprob kum winiptibye.

⁸ Tonda, aninguk kum bukni, min arye Kanaan mutuku tam noutam biburye, nun tas pum bisik eibupu dekna ning perak ara, tuba tamubuka anggun mutuku yanuka arepsupu. Winibupu ati ara, tonap teneipdelyame, nun yata deiyok ati, an ni koproba, aik pum danirye, perak babye, emas babye, ubula doproptibye do? Nunce kume.

⁹ Bukni, nun ning pum bisik nirya dipdemince, eipminyopura, anye bira optumba diptue. Nun talye yuk nang nirya ara, anggun talye pil melina nang kipdeipsutumce, anggun amu tam kibuka, anggun piluk donamabe. Anda, nun deiyoknye atonun ulama atia,” nyabik.

¹⁰ Nyabikopura, anye birye nyabuk. “Telebe, anyapmalum touk unamabe. Na kanye ara, aning ubula dopropmoknye, na talye pil melinanye diamuk unamnile. Anggun yuk nang nirya ati ara, ‘Malye winipmake,’ nyabuka, anggun nong deice malye yupu kum nyapdeipnamsiyabe,” nyabuk.

¹¹ Nyabukopura, sik yuk-yuk bukni, sik nirya minopce, sik kuda basam balye tam arye, sik tas dobuka tukwak yokuka deiplobik.

¹² Yokeibikopura, Yusup el pil donanye birye, sik tas yuk-yuk bukni, tonok-tonok dipre banmok. Ara, min yuma dunye, el ning arye ubuka, na kapye noutam unang, sik ning anyapce, sirya ara sik weit koproba Benyamin, el ning ton dipdeyuk. Dipdeyuk buk, Benyamin el tas pum bisik ara, Yusup el mek din makau perak ning bopmukak eibuk.

¹³ Eibukopura, Yusup el du yape nirya arye, ikin kanye weik bobikce, ‘Se, yata wiripnuyap do?’ tenen, sik baju nirya kwilikukabikce, sik bona nirya tuba tonap, kuda balye tam deice deibukabikce, tuba tamubuka Yusup dam, el aik biyik.

¹⁴ Tamubuka anyasik biyikce, Yusup el aik pum tuba bukmokba, Yehuda ap, el kwit capu silip nirya ap, Yusup el dam yayikce, malye kanye bobuka, el urasin dam, yanuka tuku deice bukik.

¹⁵ Winibikba, Yusup birye anang ati nyabuk. “Anggunda, amalye winipmanulum ning arando? Yata deiyok ati winipmanulum do? Anggun ton kum kel kiplum do? Nato nang arye mem pil dobibirye, aning-aning nirya aminyan winipnamsil ning babye, wini talak usilye ning babye, dipdongobuka kel kinyabe. Aning ara, kum tenipmanulum do?” nyabuka wenebuk.

¹⁶ Wenebukba, Yehuda birye nyabuk. “Se, nun nio, nun yata yupu nyaptibye do kume? Nun yatato ning winiptibya deice arye, ‘Anang ara, dib nyanmake, malye kum nyanmake,’ tenepsutun do? Nunda an amu tam nang unyabe. Allah arye nun malye wininyap ning ati, deiyok akunum laka kipdeipmasile. Wini talak ara, nun nirya an urdem pil don nang unamabe. Tapu koupsikirye, an amu tamuk pia unamabe. Ara, nun nirya babye, an perak mek makau dopropmoknye babye, nun nirya ati nyapkine,” Yehuda birye, Yusup biti nyabuk.

¹⁷ Nyabukura, Yusup birye tamubuka nyabuk. “Kumde. Narye anyapmalam touk kum winiptinye. Aning kum bukni, na perak mek makau doprobuknye, el tonok ara, na amu tam ubuka, na talye pil donanye unamle. Anggun yuk nang nirya ara, talye kanye bobuka, ilil una kum aniryuk, anggun ni dam tamubuka bilulume,” nyabuk.

¹⁸ Nyabukopura, Yehuda birye tikuka, Yusup bukmok dam binuka nyabuk. Se nio, yupu tonok tonap nyapkitinye do? Anda ninye deiyoknye, Firaun el ulye touk ulyame. Na tonok ara, mambul pia kumnye, an amu tam unun bukni, ‘Kum derepnunilam’ tenen, moropmakine. Yupu mitik anun nyapkitinye do?

¹⁹ Na nie, min talak ara ance nunti, “Anggun ni koproba, tuba ulul do? Anggun weit koproba, ton ulul do?” nyabuka asipdesulume.

²⁰ Asipdesulumba nunce, “Diba, nun ni koproba, tuba kam ulule. Tonda, el pia wisi ulamuk talak noutamak ara, nun weit koproba, tonok ton deibuk. Ami ara, el lin koproba arye, min yuma talak deiamuk mi, el du koproba ara, akunum dibuka ati, akil el deiamuk mapu ton kum, ami tonokuk ulule. El li koprop arye elti, pia bico tenebuka kanye delilule,” nyabupu.

^21-22 Nyabupuba, ance nun deiyoknye arye nunti, nyapsulume. “Anggun mutuku koproba bimunce, anggun weit koproba dobuka, na dam boyanamnulume. Na asing aryuk eipnamne,” nyapsulumba, nunce, “Se, nun weit koproba ara, el li koprop batakuka bilyopura, el li dipnamlarya,” nyakubu.

²³ Nyapkupu bukni, ance nunti, “Kume, anggun weit koproba dobuka, kum boyamunyopura, na ton kum eipnamnulume,” nyapsulume.

²⁴ Nyapsulum yupu kekebuburye, nun ni dam tamubuka biburye, na ni ance nyapdeipsulum touk, laka nyabupu.

²⁵ Nyabupuba, aminyan talak, elce nyapsuke. “Winira Mesir mutuku tonap bimunce, nun din ning ton dekelbisululume,” nyabuk.

²⁶ Nyabuk bukni, nunce nyabupe, “Kume, na nio kum binamabe. Nun weit koproba ap, kum bibyopura, Mesir mutuku deiyoknye ap, kum epdanamabe,” nyabuka laka nyabupu.

²⁷ Nyabupuba, nun ni koprop arye nunti nyapsuke. “Anggun kele. Na kil arye, sal mapu bitinyeuk deiamnuke.

²⁸ Ton mi ara, minop talak arye, aik batakuka bai tam biyuk bukni, tuba tamubuka ton kum eilinyap anya arye, ‘Bai tam ulye yu kam arye obuka dibuk do?’ tenelamse. Atalak arye dipdongobuka, wini talak noutamak babye, ami pia kum elinyabe.

²⁹ Ati ara, na sirya talak arye deipse mi ton, dobuka bobimunba, el ton kum eipnyopura, atalak arye dipdongobuka, oyanamla talak nirya ara, pia ikin kanye bobuka, engenauk unmanya ani, aminyan talak, na kul potong akunum tiknuka anye arye, akunum dipnamnarya. Ati winira ikin kanyeuk bobuka unamneca,” nun ni koprop arye nyapsuke.

^30-31 Ati na nio, na ni koprop dam tamubuka binamne talak, na weit koproba ap, neika kum binimnyopura, na ni birye, el sirya koprop deiamuk mi kum eiplyopura, el dipkoprob dipnamale. Talya ati kum nyapkine. Deiyok ara, na ni koprop arye ami ati, weik kanye delilulce, pia tenenauk ulula anya arye, el kum eiplyopura, nun ni dipnamale. Ara, nun weit neika bana kum arye, talye nun diamuk bibyopura, nun ni dipnamale.

³² Tonda, nara an amu tam ululnye bitonye birye nyapkine. Na ni biti nyapse. “Kume, naryuk nun weit pia kalikinamane. El teleb una ati, na deiceuk upnamnile. El bobuka an dam tamubuka kum boyanyopura, ikin ning na nong deiceuk delinamnilame. Nun weit kum bobinyopura, na kam unamne talak nirya ara, adeiyok arye, na deiceuk ikin weik unamnile,” nyapse.

³³ Ati, anda na deiyoknye upniminyeba, amutuku noutamakuk an amu tamuk unamne. An talye pil donanye pia unamne, kum loplopnamnilame. Ara, “Telebe,” nyapsutumba, ‘Nun weit koproba ap, ara, el du yapu ap, nun ni dam tamubuka bitinge’ tenen, moropmakine na nio.

³⁴ Na weit koproba ap, kum bitinimnyopura, na yata ati tuba tamubuka, na ni dam tamubuka bitinye do? Kume. Na winipnyopura, na ni ikin kanye weik boplirye, pia imun kanye bobuka unamla ara, kum dipnamne. Ara, pia kum winiptinye, na nio. Yehuda birye Yusup biti, ayupu nirya nyabuka morobuk.