Kejadian 43 - Eipomek

¹ Wini talak ara, amutuku Kanaan ap, yuk mutuku nirya ara, sik din ning pia kum dayukba, din si tebuka tuba ikin weik unmeke.

² Ati ara, Yakub el mapu arye, Mesir mutuku noutam dekik din ning nirya, akunum dibikopura, Yakub birye sikti, nyabuk. “Mesir mutuku tamubuka bimunce, nun din ning tonap deknamsululume,” nyabuk.

³ Nyabuk bukni, Yehuda birye, el li biti nyabuk. “Naie, nyapmasilam bukni, Mesir mutuku weiknye birye, mikip weika arye nyapdeipsuka ara, ‘Anggun weit koproba bobuka, na mutuku kum boyamunyopura, na ap dipkoprob kum epdanamabe,’ nyapdeipsuke, na nio.

⁴ Ati, nun weit koproba Benyamin dopdeipminyeba, nunce bobuka, el ap neika bitipyopura, nun din ning dekelbitibye.

⁵ Bukni, ance Benyamin el bana ati, ‘Kume’ nyapsiminyopura, nun kum dekelbinamabe. Deiyok ara, Mesir mutuku deiyoknye birye, ‘Anggun weit koproba ap kum yamunyopura, anggun urasin narye tonap tuba tamubuka kum eipnamsine,’ mince akunum nyapsuka atia,” Yehuda birye, el li biti nyabuk.

⁶ Nyabukba, sik ni Yakub birye tamubuka nyabuk. “Anggunce aMesir mutuku deiyoknye biti, ‘Nun weit koproba ton alulule,’ nyabuka laka nyapluma deice arye, ikin ning na nong deice deipnuluma ara, yata deiyok ati do?” nyabuk.

⁷ Nyabukba, sikce, “Kume, na nio, Mesir mutuku deiyoknye birye, nun ap, nun yala nang ap, nun aik neika unyap nang ap ati, weika arye asipdesuke. Elce, ‘Anggun ni kopraba ara, kam tuba ulul do? Anggun weit koproba ton daulul do?’ nyabuka asipdesukba, nunce el asipdenmasuk ninguk, talye laka nyabupu. Elce, ‘Anggun weit koproba, bobuka boyanamnululume,’ nyapdeipsuka ara, ‘Yata ati yapmasil do?’ tenen, bikamtibye do? Nun talye mangkau kanye bobuka nyabupe,” nyabik.

⁸ Nyabikopura, Yehuda birye, el li koproba Israel biti nyabuk. “Naie, an ap, nun ap, nunce deiamubu mapu ap, ‘Dina kumce nun nirya dibipyak’ tenen, an adiparyuk Benyamin arepnutumba, nun adiparyuk Mesir mutuku binuka, din ning dekelbinamabe.

⁹ Naryuk Benyamin biti, ‘Malye kipdeiplyak’ tenen, pia moubuka kalikinamne. El teleb una ara, na deiceuk upnamnile. Narye el bobuka, tuba tamubuka kum boyanirye, an dam kum boyakinyopura, deiyok ara, na deiceuk deipnamnilyame. Na kam tuba unamne talak nirya ara, ance nati, ‘Deiyok an uka,’ nyabuka, na nong deice ikin ning delinamnilyame.

¹⁰ Bukni, Mesir mutuku din dekelbana ati, kum batakmatibye toura, na binamtinye talak ara, akunum dekelbinmatibya ani, winira tamubuka yatibye bukni, min kum bolbipu arye.” Yehuda birye, el li Yakub biti nyabuk.

¹¹ Nyabukura, sik ni Israel birye nyabuk. “Yuk bisik ton kum upsila ati, winipnamlume. Nun mutuku ulye ning, pia teleb ning wibuka kintinipmunce, anggun sak pum bisik lipnamlulume. Ara, ‘Mesir mutuku deiyoknye, el talima teleb kina ati arelbinamlum’ tenen, nyapsine. Anggunce lipnamlum ning ara, ninye kwetena ati, likna obat, el si ara balsen ap, mong mek ap, ‘Din ning teleb upnamle’ tenen dongon ning, el si bumbu-bumbu ap, nintong teleb ning, el si ara damar ladam ap, dilamap yo duk yala bitinye ara, sik si ara, kemiri yo duk ap, badam yo duk ap, lipnamlulume.

¹² Tonda, anggun din ning dekmunye talak ara, Mesir mutuku nang arye, anggun sak pum bisik, sik dekna weik ning tamubuka arepsika ati, anggun din ning deknamlum atonun bukni, bitinye kibuka, perak kintinipnamlume. (Ara, like tonok talak bukni, bitinye kibuka, dekena ning arena ati nyabuk.) Ara, anggun deknamlum ning ap, sik tamubuka arepsikce ning ap, tabakuka arepnamlulume ati nyapsine. Nun walwal bukni, Mesir mutuku nang arye, talye mangkau tuba tamubuka, ‘Sik dekna ning tamubuka arepsik do?’ tenena atia.

¹³ Winira telebe nyapne. Anggun weit koproba bobuka, adiparyuk Mesir mutuku deiyoknye dam dekelbilulume.

¹⁴ Narye Allah ati, moropnamsin ning ara, ani. Ara, aning-aning deice tam ulirye, weik deiyoknye aning nirya talilul Allah arye, melipsilya deice arye, Mesir mutuku weiknye birye anggunti bico tenepnamsile. Bico tenepsilirye, anggun du koproba Simeon ap, anggun weit Benyamin ap lopdeiplyopura, anggun nirya neikak uk tamubuka yanamlume. Aning nirya ati Allah moronamsine. Na babye, aning imun upniliba, engena uk upnyopura, ikin kanye upnilyak ati dauplye.” Sik ni Israel birye nyabuk.

¹⁵ Nyabuka ati, el mapu nirya ara Benyamin ap, dekna weik ning perak weik tonap bitinye kibuka libikce, biyik. Bisik akak banmeka ani, Mesir mutuku biyikopura, adiparyuk Yusup el dam binuka tikik.

¹⁶ Tikilbiyikba, Yusup birye el weit koproba Benyamin eibukopura, adiparyuk el aik din dana deiyoknye biti nyabuk. “Anang nirya ap, na ap, keting duk-dukan ara, na aik neika kwaning dipnamap anya arye, ance adiparyuk domba basam obuka yulbilyame,” nyabuk.

¹⁷ Yusup birye anye biti nyapmok touk, Yusup el kwit capu nirya bobuka, Yusup aik bobiyukce, sik din ning ati yubuka kintinip deibuk.

¹⁸ Winibukura, anang ara, Yusup aik bobiyukopura, ilil weik ubuk. Deiyok ara, sikce utenebik. “Kume, el aik bobinmasila ara, deiyok ton aupmale. Ara, min yuma talak, nun dekna ning perak mangkau arye, tuba tamubuka arepsika ati boyanmasilade. Elce nunti opsilirye, malye kipsilyopura, nun unta basam ap, kuda basam ap, ubula dopdopsilirye, nunti tapu koupsilirye, el urdem pil melin nang kipdeipnamsile. Winipsilirye ikin pil weik dilamsilirye, kum lopdeipnamsile,” nyapdayik.

^19-21 Winibuka nyalanmeka ati ara, Yusup el aik din kintinina deiyoknye birye, sik bobuka Yusup aik bublan dam bobiyukopura, sikce elti, nyabik. “Kao, nun min yuma talak din dekuburye, nun mutuku tamubuka beipu talak ara, nun sak yokukabuburye, dililamubu anyak, nun dekmapu ning perak ara, tuba aupmok. Ara, adin ning dekna ati arepmapu touk, sikce tamubuka arepsikba, eibupe. Ati ara, anggun tamubuka arena ati, adekna ning perak ara, tamubuka boyanmasiyabe.

²² Tonda, wini talak, ‘Yuk din ning tonap deknamap’ tenen, perak ton tabakuka boyanmabe. Nun sak yuk-yuk bukni, apum bisik nirya, perak ton tuba duknubuka lipdongopsik nang ara, nun walwal bukni, nunce kume,” nyabik.

²³ Nyabikba, elce tamubuka nyabuk. “Anggunda ilil una kume. Anggun ni koprop Allah arye, el si erelul Allah ara, elce anggun dekne ning perak arepsukba, anggun sak pum bisik duknubuka lipdongopsike. Na babye, dobuka eipsa anya arye, anggun ilil una kume,” nyabuk. Nyabukce, anyaik wekuka Simeon dobuka boyayukce, sikti, arebuk.

^24-25 Anye birye, Yusup el du yapu nirya bobuka, Yusup aik pum bobiyukce, sik pera bisik arye yanmeka ati, sik yan mek likina ati arebuk. Tonda, sik kuda basam ati din ning arebukce, “Keting duk-dukan ara, sik ap, Yusup ap, anyaik neika kwaning dipnamalume,” nyabukba, kekebik. Kekepmeka anya arye ‘Yusup bira, keting duk-dukan yalyopura, elti, arepnamap’ tenen, boyayik ning kintinibik.

²⁶ Aminyan Yusup birye, el aik tamubuka yayuk talak ara, sikce el aik pum kintinipmik ning dobuka elti, arebikce, el kina ati, sik nirya arye, sik nong kanupdongobik.

²⁷ Winipmekba, elce sikti, “Teleb ululum do? Tonda, anggun ni koproba, pia wisinye, min arye laka nyapnulumnye bira, tuba kam ulul do, yata wiribuka ulul do?” nyabuka asipdeyuk.

²⁸ Nyabuka asipdeyukura, sikce, “Nun ni koproba babye, an melinanye bitonun ulule. Elda tuba telebuk ulule,” nyabukabikce, el kina ati, sik nong kanupdongobikce kibik.

²⁹ Yusup birye, sik nirya dipdeyukce, el lin koproba arye deiamuk mi, el weit koproba Benyamin eibukce, asipdeyuk. “Anggunce, ‘Nun weit koproba tonok ton alulule,’ nyabuka laka nyapnulumnye bira, anye do? Ati ara, na se tenepmane ara, ‘Allah arye anye biti, bico teneplirye, weika arye pia melinamle,’ se tenenune,” nyabuk.

³⁰ Nyabuka, Benyamin biti dipdeyukce, ‘Se,’ tenebuka anyaik batakuka, ‘Yuk nang kum eipnamniyak sukumak engepnaman’ tenen, yukak binuka epdeyuk. El aik koproba, el yuk malamuk aik binuka engebuk.

³¹ Engenmoka ani, akunum engebukopura, el urasin mek kekukabukce, asukum bukmek aikuk, tamubuka yayukce, el melin nang ati nyabuk. “Winira, nun din ning melibuka bokeipsululume,” nyabuk.

³² El aik melin nang arye, din nirya bokuka kintinipmikce, Yusup el tonok ati, yuk bukmokakuk, yuk ning bokuka arebik. Tonda, Yusup el kwit capu silip, sik yukak bukmikakuk, yuk ning bokuka, sik yuk arebik. Tonda, sik Mesir mutuku nang, anyaik pumuk bukni, sik yuk bukmikce dinmek. Deiyok ara, sik Mesir mutuku ninye arye utenelamik. ‘Kume, sik Ibrani ninye ap, nun Mesir mutuku ninye ap, nun neika dina ara, pia malyeuka,’ tenelamika anya arye neika kum dilamik.

³³ Sik nirya arye, ‘Dipnuyap’ tenen, bukmek talak ara, Mesir mutuku nang arye, ‘Winiplulume,’ nyapdeibikba, Yusup el du yape nirya, sik ni birye deiamuk touk bukik. Ura min yuma koprop arye deiamuknye bukmokba, anoutam lelebuka outam deiamuk mapu bukikba, anyapce nukuka, sirya talak deiamuk mi Benyamin otam sirya bukuk. Sik keting tamun ulamik touk nukuka otam arye ubuka, atam lelebuka bukmek. Winibuka bukmekce, sik babye sik yuk-yuk ati dilanmikce ‘Yata deiyok ati winipmasiyak do?’ tenen, teninmek.

³⁴ Sik dabunmek bukni, Mesir mutuku melina deiyok nang arye, sik din ning Yusup, el yolana deice arye bobuka, sik bukmikakuk delilyayikba, sik nirya ati ara, mitik weik aupmok bukni, Benyamin biti arepmik ning ara pia weik bokuka deipmek. Ati, sik nirya teninauk unmek. Wininmek bukni, sik nirya talye kanye bobuka, talye mangkau asa neika din dinmekce, mek ap dinmek.