Kejadian 42 - Eipomek

¹ Mutuku-mutuku nirya ulamik ninye arye, ‘Mesir mutuku delilamik din ning deknamap’ tenen, Mesir mutuku yangalamikba, Yakub ton kekebukce, bikuk. Ara, ‘E, Mesir mutuku noutamak jagung duk do, terigu duk do, aning atonun ning ubuke’ tenen, bikukce, el mapu nirya ati nyabuk. “Anggunda, yata ati talye tikuka dilanmalum do?

² Yuk ninye arye, ‘Mesir mutuku noutamak din ning tuba ulule,’ nyanmekba, kekepsa ati, anggun nirya adiparyuk Mesir mutuku dekelbilulume. Nun din dina kum arye dibipyak tenen, ‘Kam tuba upnamap’ tenen, Mesir mutuku dekelbilulume,” nyapdeibuk.

³ Nyabukopura, Yusup el du yapu 10 nang arye, Mesir mutuku din dekelbana ati biyik.

⁴ Sik biyik bukni, Yakub birye, Yusup el weit koproba Benyamin bira, kum dopdeibukba, Mesir mutuku neika kum biyik. Deiyok ara, ‘Na sirya deipse mi ara, diplyak do, amutuku nang arye malye kipdeibicak do?’ tenen, ilil ubukba, Benyamin kum dopreibuk.

⁵ Atalak ara, Kanaan mutuku noutamak nirya babye, sik din ning kum dayukba, talye din si tebuka urdemuk ulamika ati, Yakub (el si ton Israel nyalamik) el mapu nirya arye, ‘Nun din ning deknamap’ tenen, Mesir mutuku dekelbiyik.

⁶ Ura, sik dekelbiyik talak noutamak ara, Yusup birye Mesir mutuku talina deiyoknye, Gubenur atonun ulamukce, amutuku noutamak ulamik ninye nirya ati, sik jagung duk do, gandum duk do, kedelai duk do, aning atonun ning nirya dekelamuk. Apil dolamuka anya arye, el du yapu talye mangkau kanye bobuka, el dam yayikopura, ‘Aweiknye biti kisal dopnuyap’ tenen, sik kisok tukwak tam kanupdongobikce, bulyayik.

⁷ Sik yayikopura, Yusup birye, ‘E, anang ara, na du yapu yanmake’ tenen, adiparyuk bikuk. Sik urasin kel kipmok bukni, ‘Sikce nati, talye yuk mutukunye tenepnamniyak’ tenen, mitik anun arye, yu asa arye, mikip yupu nyabuk. “Anggunda, yata mutuku arye yanmalum do?” nyabuka mikip arye asipdeyuk. Asipdeyukura, sikce, “Kume na nio, ‘Din ning deknamap’ tenen, Kanaan mutuku noutamak arye yanmabe,” nyabik.

⁸ Yusup birye, ‘E, anang ara, dipkoprob na du yape yanmake’ tenen, akunum kel kibuk bukni, sikce el urasin ara, kum bikmeka arye, ‘Nun weit koproba Yusup atia,’ kum tenebik.

⁹ Atalak aryuk Yusup birye, min arye lengdar deice mabukce, alengdar deice el du yapu ati eibuk ning ara, tuba tamubuka tonap tenibuk. Tenibukce, sikti nyabuk. “Yo! Anggunda, ‘Ninye opnuyap’ tenen, min yuma dilban nang ululumde! Nun Mesir mutuku noutamak teleb kibuka kum kalikilanyaba ati, ‘Dan do?’ tenen, dilyanmasulum do!” nyabuk.

^10-11 Nyabukura, sikce, “Kume na nio, nunda an amu tam unyak nang otonun unyabe. Nunda, din ning dekna ati yanmabe. Nunda diksukum un ninye, dib yupu uk nyan nang unyabe. Nun ni koproba, tonoknye birye deipsukba, nunda ninye ona ati, min yuma dilyangan nang kume,” nyabik.

¹² Nyabikba, Yusup birye tamubuka nyabuk. “Kume, nyapmanulum bukni, na kanye ara, nun Mesir mutuku noutamak teleb ubuka kum kalikilanayabe ati, opnamsutum ning ati dilyanmasulume,” nyabuk.

¹³ Nyabukopura, sikce, “Se, aning ara, kume. Nun ni koproba, tonok Kanaan tam noutamak ulirye, elce deiamsukba, nun nang du weituk 12 kiyamupu bukni, nun weit sirya deibuk mi ara, nun ni ap unmarake. Tonok mi nun weit ton ulamuk bukni, ami akunum dibuke,” nyabik.

¹⁴ Sikce nyabikba, Yusup birye tamubuka nyabuk. “Kume, na kanye ara, anggunda ninye ona ati, minop dilkirikne nanguk ululume.

¹⁵ Aning ati, asilen ning deipdenusine. Firaun dipkoprob tuba ulula anya arye, el si deice arye nyapsine. Anggun weit koproba, sirya mi ara, el ton nun mutuku kum yalyopura, nun mutuku batakuka, anggun mutuku tamubuka pia kum binamlume.

¹⁶ Anyapmasin anya arye, tonoknye dopdeipmunba, elce anggun weit koproba bolbinmalya ani, tamubuka anyaka boyanamle. El bilye talak ara, anggun yuk nang nirya ara, wenena aik dongopsiniba, asukumuk unamlume. Ara, urdem ati kume. Nun nirya arye, asum nyapmanulum yupu, ‘Dib nyapmak do, tilila do?’ tenen, dipdenamsiyabe. Dib kumopura, akunuma, adeice arye kel biknamabe. ‘Anggunda ninye ona ati, dilkirikne nanguk unyake’ tenen, biknamsiyabe. Firaun tuba ulula anya arye, aning ara talye ati kum nyapsine, dib ati nyapne,” Yusup birye nyabuk.

¹⁷ Nyabukopura, sik nirya bobuka wenen aik dongobukba, like winilye sum arye, anyaik pum mapmek.

¹⁸ Mapmekbuk, like winilye sum akunum ubukura, Yusup birye, anang ati nyabuk. “Nara, Allah el si erebuka elti, si erenuna anya arye, na nyapnusin yupu sunubuka winipmunyopura, kum opnamsine.

¹⁹ ‘Nunda diksukum nanguk unyabe,’ nyapmaluma ati, aning atonun dipkoprob winipmunyopura, na nyapman touk winipnamlulume. Anggun noutam arye, tonoknye wibuka deipmunyeba, elda awenena aik pum tuba unamal bukni, anggun yuk nang nirya ara, anggun mutuku tamubuka bimunce, anggun mapu silip nirya ati, din ning libuka arelbinamlume. Anggun mapu silip nirya ara, din pia kum dinmakce, ikin weik unmaka atia.

²⁰ Bukni, anggun weit koproba ara, tamubuka boyanamnulume. Winipmunyopura, kam tuba unamlum bukni, kumopura, opnamsine,” nyabuk. Yusup birye ayupu nyabuk touk, sik nirya arye aninguk kekebuka, deiyok koubuka wininmek.

²¹ Ura, atalak noutamak ara, Yusup el du yapu nirya arye nyapdanmek. “Se, ikin ning weik, nun nong deice upmasila ara, talye ati kum upmasile. Deiyok oubuk. Ara, minop ara, nun weit koproba Yusup biti, malye wamupu atia. Nun weit koproba dobuka, tuku pum bisik dongamupu talak ara, elce imun kanye bobuka engebukce, weika arye moropsuk bukni, nun nirya arye elti, bico tenen, kekana kum wamupe. Winibupu ati, winira ikin ning weik nun nong deice upnamsile,” nyabuka nyalanmek.

²² Nyabuka nyalanmikba, Ruben birye nyabuk. “Ura, atalak ara, narye anggun nirya ati, ‘Nun weit koproba talye ona kume,’ nyabuka, yupu seksise bukni, anggun nirya arye, na nyapse yupu kum kekepnulume. Nyamse do, kum do? Bukni wini talak ara, el obupa anya arye, el ining biyuka ara, nun ikin weik upsile. Allah arye nunti, kwang dakanmasile, tenepne,” nyabuk.

²³ Sikce ayupu nyabuka nyaldanmek talak ara, Yusup amining damuk tikmokce, kekenmok bukni, sik mangkau talyeuk unmekce, ‘Nun yupu kum kekepmasile’ tenen, nyanmek. Ara, Yusup birye, sik Ibrani yupu kel kibuk bukni, sik yupu deice arye, kum nyanmok. Elce Mesir yupu uk nyamukba, yuknye birye yupu wilildongonmokce, Ibrani yupu nyanmoka deice kekenmek.

²⁴ Wininmok bukni, Ruben birye ayupu nyanmok deice arye, Yusup kanye pum tam, se tenebukce, el donga ibuka otam dinmokce, engenmok. Engenmoka ani, ila tamubuka yayukce, yupu nyapdeibukura, el yin talin nang arye, sik noutamak el du si ara, Simeon dobuka, sik adinmekak aryuk, tapu koupdongobik.

²⁵ Yusup birye nyapdeibukba, el amu tam pil don nang arye, Mesir mutuku din ning dobuka, Yusup el du yapu nang, sik karum nirya lipdongobikce, sik dekna ning perak ara, tuba tamubuka, sik karum pum bisikuk duknubuka lipdongobik. Tonda sik mutuku tamubuka bana ati, ‘Bisik noutamak patapnamle’ tenen, din ning ton tabakuka urdem arebuk.

²⁶ Aning nirya, sik melina arye akunum arebikba, Yusup el du yapu arye, aning nirya bobuka, sik unta basam balye tam kitipdongobikce, amutuku batakuka bisik banmek.

²⁷ Bisik banmika ani, inipnubuk talak ara, sik nirya bisik noutamak, ‘Asukum mapnuyap’ tenen, bukmek. Sik abukmek talak ara, sik noutamak tonoknye birye, ‘Na unta basam ati, jagung duk arepnun’ tenen, tonok karum botobuka dipdeyukura, el dekna weik ning, perak asak pum bisik upmoka eibuk.

²⁸ Eibukce, el kwit capu nangak nyabuk. “Na kwit capu, na dekna weik ning perak ara, tamubuka arepmaniyaka atia. Na sak pum bisik aupmale,” nyabuk. Nyabukba, sik nirya kekebikce, tenilenmekba, ilil weik ubuk. Ilil weik ubukura, sik talima daksakukce, nyanmek. “Se, nun kanye imun upnusile. Winira Allah arye, yata ikin ning dobuka, nun nong deice deipmasil do?” nyanmek.

²⁹ Nyanmekce, mapmeka berekukopura, bisik mapnin banmeka ani, aminyan talak sik ni Yakub, el dam biyik. Ara, el asik Kanaan tam noutamak biyikce, Mesir mutuku noutamak winibuk ning nirya elti, laka nyabik.

³⁰ Na nie, Mesir mutuku nirya talibuka, deiyok ulinye birye, nunti derepsukce, wenepsuke. Elce nunti, ‘Anggunda ninye ona ati, minopce dilkirikne nang unyake,’ tenepsukce, wenepsukce ikin ning, nun nong deice deipsuke.

³¹ Winipsukba nunce, ‘Kume, nunda ninye ona ati, kum dilyanmabe. Nunda diksukum un nanguk unyabe.

³² Nun ni koproba, tonoknye birye deyamsukba, nunda du weit 12 nang ulamupu bukni, tonoknye dibuk. Tonda nun weit koproba mi tonok ara, nun ni koproba ap Kanaan tam noutamak tuba urudake,’ nyabupe.

³³ Nyabupeba, Mesir mutuku talilulnye birye nyapsuke. ‘Winira anggunda dipkoprob diksukum nang ululum do, tilila do?’ tenen, asilen ning deipdenusine. Anggun noutamak tonoknye wibuka deipmunyeba, na mutuku unamle bukni, anggun yuk nang nirya ara, anggun mapu silip nirya adina ati, din ning bobuka, anggun mutuku tamubuka arelbinamlume. Anggun mutuku koproba unyak mapu silip nirya babye, din dina kumce, ikin weik unmakce patan asa unmak atia.

³⁴ Bukni, ‘Anggunda diksukum nanguk,’ tenepnamsitinye ning ara, anggun weit koproba bobuka, anggun mutuku donirye, boyanamnulume. Winipmunyopura, ‘E, sikda ninye ona ati, kum dilyanmasiyake, dib nyapmake,’ tenepsitinye. Kumopura, kume. Anyapmasin touk, akunum winipmunyopura, na dam unamlanye, anggun du koproba tamubuka arepsiniba, nun mutuku noutamak din ning dektume. ‘Winibuka-winibuka,’ nyapsuke, nyabik.

³⁵ Nyabikopura, sik nirya arye, sik sak dobuka yokuka dipdeyikce, sik dekna weik ning perak eibik. Sik yuk-yuk bukni, asak-asak pum bisik nirya, sik dekna weik ning upmokak eibik. Sik ap sik ni asik Yakub ap, sik dekna weik ning eibikura, ilil weik ubukba, mambul kanye bobik.

³⁶ Winibikba, sik ni koproba Yakub birye sikti, nyabuk. “Anggunda, pia ikin kipdeipnulume. Na mapu Yusup ap, Simeon ap, wini talak kum unmaraka ara, deiyok anggun uka! Aninguk kum bukni, wini talak ara, na sirya deipse mi Benyamin, ‘El ton bobuka, Mesir mutuku bobinamabe,’ teninmalume. Se, aning-aning nirya ara, kanye malye upnile. Na pia ikin unulule!” nyabuka malye nyabuk.

³⁷ Malye nyanmokba, Ruben birye, el li koproba ati nyabuk. “Naie, an mi Benyamin bira, na deiceuk deipniminyopura, kalikuka bobinamnya ani, dipkoprob tamubuka boyanamkine. Benyamin tamubuka kum boyanyopura, na wenena ati, na deipse mapu bitinye ara, opnalame. Nyapmana ati, diba tenepnilyame,” nyabuk.

³⁸ Ruben birye nyabuk bukni, el li Yakub birye tamubuka nyabuk. “Na mitik mi ap, anggun ap, Mesir mutuku kum binamlume. El du koproba Yusup ara, akunum dibuk ati, na wisi dase talak arye deipse mi ara, tonok ulule. Anggun Mesir mutuku tamubuka binamlum talak ara, na mi Benyamin oplyopura, ikin pia weik upniliba, dipnamnarya. Na kul potong akunum tikmanil ati, pia imun kanye bobuka, engenauk unmanya ani, dipnamnarya. Ati kum bobitume,” Yakub birye nyabuk.