Kejadian 40 - Eipomek

¹ Ura, sik nirya daulamika ani, aminyan talak ara, Mesir mutuku ninye deiyoknye, el mek din makau talina deiyoknye ap, el roti kwaning dana deiyoknye ap, sik bitinye arye, malye winiprikba, Mesir mutuku taleamuknye birye sikti, derebuk.

² Ara, Firaun birye, el pil don nang bitinye, el mek din makau talina deiyoknye ap, el din ning yuna deiyoknye ap ati, yu ubuk.

³ Yu ubuka anya arye, elce nyapdeibukba, abitinye nang, sik wenena ati, wenen aik yin talin nang, sik deiyoknye aik dongobukba, elce sik bitinye ati, kaliklamuk. Anyaik ara, Yusup dongamik wenen aik uka.

⁴ Wenen aik yin talin nang, sik deiyok nang arye, abitinye nang bobuka, ‘Yusup birye kalikuka melinamle’ tenen, el ulamuk aikuk dongobik. Dongobikura, sikda anyaikuk like yupa weik ulamrik.

⁵ Sik daulamrika ani, Mesir mutuku taleamuknye, el din mek makau talina deiyoknye ap, el din dana deiyoknye ap, sik yuk-yuk bukni, sik bitinye lengdar deice mapmarik. Sik bitinye alukunyanuk lengdar mapmarik bukni, sik yuk-yuk lengdar deice eipmarik ning ara, deiyok yuk-yuk ubuk.

⁶ Sik mapmarikba, berekukopura, Yusup birye sik dam yanuka dilamukak, sik ikin kanye bopmarika, eibuka bikuk.

⁷ Bikukce, Yusup birye, Firaun el amu tam pil dolamdik nang bukni, sik ap, el ap, awenen aik tonok noutam unmarik nang ati, asipdeyuk. “Arup anggunda, yata deiyok ati, malye kanye bobuka unmarum do?” nyabuka asipdeyuk.

⁸ Asipdeyukura, sikce, “Kume, nun bitinye ara, lengdar mapmanam bukni, lengdar deice arye eipmanam ning ara, ‘Deiyok ani’ tenen, laka nyapnamsutunye ton, kum ulula anya arye, nun ikin kanye bobuka unmaname,” nyaprik. Nyaprikba, Yusup birye, tuba tamubuka, sikti nyabuk. “Lengdar deice mapmapyeba, eilinyap ning, laka nyana deiyoknye bira, Allah eluk ulule. Aning ara, kum kel bikrum do? Ati ara, anggun lengdar deice eipmarum ning ara, laka nyapnururume,” nyabuk.

⁹ Nyabukura, Mesir mutuku taleamuknye, el mek din makau talina deiyoknye birye, el lengdar mapmokce, eipmok ning laka nyabukce, nyabuk. “Na lengdar mapmanu deice arye, anggur duk moulamle tapu, na urasin tam upmanuba, eipmanu nyabuk.

¹⁰ Atapu ara, taruk winilye upmoa deice arye, kwapu bongobukce, keita popmoe. Kita popmoa ani, aminyan ara, anggur duk moupmoe.

¹¹ Moupmoura, Firaun el mek din makau talinmanua anya arye, anggur tapu purubukapnurye, el mek din makau dikdongopmanurye, el Firaun biti arepmanuba, talipmoe,” nyabuk.

¹² Nyabukopura, Yusup birye nyabuk. “Ura, anyapmanilam yupu, el nong ara, laka nyapnune. Ara, taruk winilye eipmamu ara, like winilye.

¹³ Like winilye tonap akunum uplyopura, Firaun birye anti, kanye tonap deipkilirye, ance min dolamlum piluk arepkiliba, el mek din makau talina deiyoknye upmince, Firaun biti, el din makau arenamlame.

¹⁴ Bukni, anyapmakin touk, aning nirya teleb winipkilyopura, nati dib tenenamnilame. Ara, bico tenepnimince, Firaun biti na si ton nyapnamlame. Na si nyapniminyeba, Firaun birye, tuba tamubuka tonap tenepnilyopura, lopdeipniliba, awenen aik batakuka, talye karenak uptinye.

¹⁵ Aning ara, talye kum nyapkine. Minop talak ara, Ibrani ninye ulamik mutuku noutam arye, dalubuka mikip arye, dopdopnikce bobinikba, awenena aik dongopnike. Tonda, amutuku noutamak ulamse talak nirya ara, malye pia kum winipsirye, deiyok ton kum uamukbuk, awenena aik dongopnike. Ati na luba kum kipnamnilyame,” Yusup birye, mek din makau talina deiyoknye biti nyabuk.

¹⁶ Nyabukura, Mesir mutuku taleamuka deiyoknye, el din yuna deiyoknye kekebukce, ‘E, alengdar mapmok deice eipmok ning ati, teleb yupu uk nyanmale,’ tenebukce, Yusup biti nyabuk. “Na ton lengdar mapmanu deice eipmanu ning nyapnukine. Ara, na kisok deice kau aling winilye upmaue. Akau aling pum bisik ara, roti din ning dapmanu ning upmaue.

¹⁷ Winibuka upmau bukni, deice tam upmau kau aling pum bisik ara, Firaun elti, roti din ning yala-yala weik libuka deipmanu bukni, sik maka arye, talye ubula dilyanmangue,” nyabuk.

¹⁸ Nyabukura, Yusup birye nyabuk. “An lengdar mapmaumce, eipmamu ning deiyok ara laka nyapnukine. Amio winilye upmaua ara, like winilye.

¹⁹ Ati like winilye akunum uplyopura, Firaun birye dopropkilirye, ya arye ngang sekukapkilirye, an nong ara, yo deice koubuka, kirikdongopnamkile. Yo deice deipkilyopura, talye maka yakirye, an nong tup nirya dipnamkiyake,” nyabuka laka nyabuk.

²⁰ Yusup birye, ayupu nirya laka nyabukura, sik daunmeka ani, like winilye ton akunum ubukura, Firaun el deiamik talak akunum ubuk. Akunum ubukopura, Firaun birye, el amu tam pil dolamik nang nirya ati, weik kwalina arebuk. Kwalina kwalibuka dinmek talak noutamak ara, el pil dolamdik nang bitinye ati, yupu nyapdeibukba boyayik. El amu tam pil dolamik ninye kekenmik bukni, anang bitinye ati, yupu lipsisikdeibuk.

²¹ El mek din makau talina deiyoknye biti, tuba tamubuka, el pil arebukba, anye birye tonap, Firaun el mek din makau talina deiyoknye, pil dopnin balamuk.

²² Bukni, el din ning roti kwaning dana deiyoknye bira, ngang sekukabukce, yo deice piribuka dopkwetebuk. Ara Yusup birye, “Anggun lengdar mapmarumce, eipmarum ning ara, deiyok ani, ani,” nyapmok touk winibuk.

²³ Yusup birye nyabuk touk, Firaun birye winibukba, Firaun el mek din makau talina deiyoknye birye, Yusup biti, pia luba kibuk. Tuba tonap kum tenelamuk.