Kejadian 30 - Eipomek

¹ Ura, Rahel bira, mapu pia kum deiamuka anya arye, el du kul Lea biti, malye kanye bobukce, kanye talima bintinip dayukce, Yakub binyak nyabuk. “Se, ance mi ton arepnilyame. Ara, nun bitinye arye, mi ton kum deipnimyopura, na dipnamnarya,” nyabuk.

² Nyabukura, Yakub bira, el kil ati, yu weik ubukba, tamubuka nyabuk. “Anyapmalam ning ara, yata deiyok ati do? Nara, Allah ununa ati nyapnilam do? Allah elcuk melipkutuba, mi deiptume,” nyabuk.

³ Nyabukura, Rahel birye tamubuka nyabuk. “Ati ara, na pil melina kil Bila ap, neika mapturumba, na mapu ati, elcuk deipnutue,” nyabuk.

⁴ Nyabuka ati, Rahel birye, ‘Yakub el kil atonun upnamal’ tenen, Bila dobuka, Yakub arebukba, Yakub ap, Bila ap, neika maprik.

⁵ Maprik anye, aminyan ara, Bila mi bobukce, daulamuka ani, sal mi tonok deibuk.

⁶ Sal mi deibukura, Rahel birye, “Ami el si ara, Dan,” nyabuka sisibuk. Ara, Rahel birye, “Winira narye, Allah ati morolamse ning akunum kekepmanile, ‘Akil moropmanil ning ara, teleb uka,’ tenepnukce, sal mi akunum arepmanile ati, ami el si ara, Dan,” nyabuk.

⁷ Sik neikakuk daulamika ani, aminyan talak ara, Bila mi bobukce, sal mi bitinye ning ton deibuk.

⁸ Mi deibukura, Rahel birye, “Ami el si ara, Naftali,” nyabuka sisibuk. Ara Rahel birye, “Kume, na du kul biti, ikin kanye bobuka ulamse bukni, wini talak ara, na malye kina atonun winipnamane ati, ‘Ami el si ara, Naftali nyapne,’ nyabuk.

⁹ Atalak noutamak ara, Lea birye, ‘Se, nara tuba tamubuka ton mi kum bonune. Mi tonap kum delinune’ tenen, bikdayukce, el pil melin kil, Silpa dobuka, ‘Yakub el kil atonun unamle’ tenen, Yakub arebuk.

¹⁰ Arebukura, Yakub dobukce, neika ulamrika ani, Silpa birye mi bobukce, aminyan talak sal mi deibuk.

¹¹ Deibukura, Lea birye, ‘Winira teleb upnile,’ tenebukce, “Ami el si ara, Kat,” nyabuka sisibuk.

^12-13 Aminyan talak ara, Silpa birye, sal mi bitinye ning ton deibukura, Lea birye, ‘Se, na weik arye kanye deipne. Yuk kilapu nirya arye nati, Lea bira dipkoprob kanye delilul kil, tenenamake,’ tenebuk. Utenebuka anya arye, “Ami el si ara, Aser,” nyabuka sisibuk.

¹⁴ Ura, sik nirya daulamika ani, tonok talak ara, sik koulamik ning, el si ara gandum, akunum wisibukura, nong lilbanmek talak, tonok sum ara, Ruben birye, tonok ning eibuk. Ruben birye mandrak yo duk eibukce, dakuka, el lin Lea biti arelbiyuk. Arebukura, Rahel eibukce, Lea biti, “Se, dukulo, na ton arepnutume,” nyabuka, malye yupu nyabuka morobuk.

¹⁵ Morobuk bukni, Lea bira yu ubukba, tamubuka nyabuk. “Se, anda yata ati do? Minopa ara, na domsinye ubula dopropnuluma ara, ikin weik kipdeipnulumce, ‘Akunum,’ tenyamlum bukni, wini talak babye, na mi arye arepmanil mandrak yo duk babye, ubula dopropnunilam ning ara, tuba tonap malye kipdeipnamnilam do?” nyabuk. Nyabukura, Rahel birye tamubuka nyabuk. “Kume, mandrak yo duk arepnamanilamopura, narye, ‘Telebe,’ nyapniba, alukunyan Yakub an dam yaliba, anggun neika mapnamarume,” nyabuk.

¹⁶ Nyapmarika ati, ainilongon talak, Yakub bira, el wa win dam arye, tamubuka aik yanganmok talak ara, Lea bisik noutamak binuka eipdarikce, nyabuk. “Yakubo, na mi Ruben birye, mandrak yo duk arepmanil ning dobuka, Rahel biti arepmanue. Aning deice arye, anti dekna atonun arepmanu anya arye, alukunyan an ap, neika mapnamanane,” nyabuk. Nyabukura, alukunyan Yakub ap, Lea ap, neika mapmarik.

¹⁷ Mapmarikba, Allah arye, Lea morolamuk ning kekebukce, melibukba, Lea mi bobuk. Mi bomuka ani, aminyan talak ara, el mi pamubaryenye deibuk.

¹⁸ Deibukura, nyabuk. “Na akanye Yakub, el kil dopnamla ati, na melin kil arepse anya arye, winira Allah melipmanile,” nyabukce, “Asal mi el si ara, Isakar,” nyabuka sisibuk.

¹⁹ Aning atonun, aminyan talak ton mi bomuka ani, sal mi ton deibuk.

²⁰ Elce tekbarye deibuk sal mi, el si ara, ‘Zebulon,’ nyabuka sisibuk. Ton nyabuk. “Allah arye meliamnukba, na akanye biti, teleb ning arenune anya arye, winira elce nati kibuka kanye deipnamnile. Narye el mapu nakub barye akunum deipse atia,” nyabuk.

²¹ Yuk talak ara, Lea birye, kilmu tonok deibukce, el si ara, ‘Dina,’ nyabuka sisibuk.

²² Aminyan talak ara, Rahel mitik anun you kil atonun ulamuka ani, Allah tenebukce, Rahel morolamuk ning kekebukce, melibukba, mi bobuk.

²³ Rahel bira, mi bomuka ani, sal mi deibuk. Deibukura, nyabuk, “Winira, na mapu delina kum ati, alye ulamnuka ara, Allah arye akunum kum kipdeipnile,” nyabuk.

²⁴ Nyabukce, ami el si ara, ‘Yusup,’ nyabuka sisibuk. Ara, ‘Allah el si Yahweh arye, tuba tamubuka tonap melipnutuba, sal mi ton deiptinye’ tenen, ami si ara, ‘Yusup,’ nyabuk.

²⁵ Rahel birye, Yusup deibuk talak bukni, mitik anun daunmeka ani, Yakub birye, Laban biti nyabuk. “Na mutuku koproba, ‘Tamubuka bitinye,’ tenepne.

²⁶ Aning ‘Se,’ tenepne ati, ance, “Telebe,” nyapnutumba, na kilapu ap, na mapu ap bopropnirye, bisik binamne. Sik dopnamse ati ara, anti pil weik dolamkise. Apil weik dolamkisa deice arye, an kele, sik dekna atonun, weika arye areamkise,” nyabuka morobuk.

²⁷ Morobukba, Laban birye, tamubuka nyabuk. “Se, ‘Binamane,’ tenepmalama ara, bataklyame, amio. Anda na mutuku noutamak unmalama ara, Allah el si Yahweh arye, weika arye melisilyeba, na babye ance pia teleb kilinilyame.

²⁸ Ati aning ara, ance, ‘Winibuka arepnutue,’ tenepmalam ninguk, laka nyapniminyeba, weik uptua babye, adiparyuk talye mangkau asa arepnamakine. Yata wiribuka patapkil do? Nyapnilyame,” nyabuk.

²⁹ Nyabukura, Yakub birye, tamubuka nyabuk. “Mamo, an kele. Aketing tamun nirya, yupa weik noutam, batakna pia kume arye, pia teleb ubuka, an pil dolamkiseba, an domba basam ap, an unta basam ap, pia weik upra balamike.

³⁰ Na min kum yanamse talak ara, ance taleamlum ning ara, mitik tonun uamuk bukni, na yasirye amutuku pil dolamse deice arye, wini talak ance talilyam ning ara, pia weik upnin balule. Na pil dobuka winilamne deice arye, Allah el si Yahweh arye anti, pia teleb kilikulule. Bukni, wini talak ara, dan do? Yata talak arye deiyok kouptinirye, na babye na mapu silip ati, pil dolonamne do?” Yakub birye nyabuk.

³¹ Nyabuk ati, Laban birye, Yakub biti nyabuk. “An pil dolaluma pununa ati, yatato ning arepnukin do?” nyapdeyukura, Yakub birye, “Kume, aning-aning arena kum bukni, na tenepman ning ara, ‘Telebe,’ nyapnutumura, an kambing ap, domba ap, tuba melibuka weinamkine. Tonda, ‘Malye uplyak’ tenen, akambing ap, adomba nirya ap, tuba kalikinamne.

³² Na tenepman ning ara, ani. Atalak noutam ara, an domba ap, an kambing ap, dipdenirye, kikipna uplye ning ap, mirin potong tikamlye ning ap, eipnyopura, dopropnamane, Tonda dipdenirye, mirin domba basam mi ton eipnyopura, aning nirya ton dopropnamane. Adomba ap, akambing ap, asum nyapkin touk dopropyopura, ara na pil dolamkise ning pununa ati, menenga dolona atonun ning upnamnile.

³³ Akunum uplyopura, aminyan doyanamle talak noutamak arye, na weinamne domba ap, kambing ap, dipdeniminyopura, kikipna ulye kambing ap, mirin potong palye kambing ap, kum bukni, yuk yala atonun ning awaplyopura, ‘E, akambing ara ubula dopropnuke,’ tenenamnilyame. Aning atonun, na weinamne domba basam nirya dipdeniminyopura, mirin domba kum bukni, kurun yala ning do, yuk urasin uplye ning do auplyeba, eipminyopura, ‘E, adomba ara, ubula dopropnuke’ tenepnamnilyame. Ato kambing ap, domba ap, eipminyopura, ‘Elda tilila yupu nyalulnye,’ tenepnamnilyame. Bukni, na nyapmakin touk, ayalauk eipminyopura, ‘E, elda dipkoprob nyalulnye,’ tenepnamnilyame.” Yakub birye, Laban biti nyabuk.

³⁴ Nyabukopura, Laban birye, “Aning ara, teleb uka,” nyabuk.

³⁵ Laban birye, “Telebe” nyabuk bukni, atalak aryuk, el kambing nirya ap, el domba nirya ap, binuka dipdeyukce, yim kambing ap, kil kambing ap, kikipna uamuk ning ton, mirin potong tikamuk ning ton, tonda mirin domba mapu nirya ton, anirya doprobuk. Laban dobukabukce, el mapu koproba ati, duknubuka arebukba, sikce yukak weilbiyik.

³⁶ Akambing ap, adomba mapu ap, dungnubukabikce, bikbik abuka, adiparyuk yuk pera mutuku banmoka ani, atam mutuku bukni, otam mutuku like winilye mabuka biyuk. Aning malye winibuk talak ara, Yakub birye talye mangkau kanye bobuka, Laban el kam un ning, yuk ning talye weinmoke.

³⁷ Bukni, aminyan talak Yakub birye, winibuk. Bol kurun yo atonun yo webukabukce, ayo taruk sekuka deibuk. Ton ning ara, kwilim yo atonun ara, kurun akunum ubuk bukni, ton ning ara, dang yo atonun ning ara, deice bol kobukba, yo nonguk deibukba, kurubuk.

³⁸ Winibukce, abol kurun yo taruk bobuka, kambing ap, domba ap, mek dilbalamika dam deibuk. Ara, ‘Mek dilyanganamak talak ara, akurun yo taruk laka upliba, eipnamak’ tenen, deibuk.

³⁹ Winibukopura, aminyan talak akambing ap, adomba ap, mek dilyanganmik talak ara, kil basam burum kwaklamuk talak ara, akurun yo taruk dinmance anyuk lamakalalamik. Winilamika ati, aminyan talak, sik mapu ara, kikipna ulye ning ap, mirin potong ulye ning ap, sirablu potong ulye ning ap, delilamik.

⁴⁰ Winilamikba, Yakub birye adomba mapu ap, akambing mapu ap, nirya dobuka elce, ‘Na’ tenen ning ati, sik yukak delilamuk bukni, akunum nebuk ning ara, yukak delilamuk. Weik ning yuk delilamuk bukni, sik burum kwaklamuk talak ara, kil domba ap, kil kambing ap dobuka, Laban el yim domba dam delilamuk. Ara, talye ning ati kum bukni, botbotokna ning ap, mirin potong ning dam delilamukba, neika malamikba, sik mapu deipra balamik ning ara, dobukabukce, el ning yukak delilamuk. Laban el yala ning yukak delilamuk. Winilamuka deice arye, Yakub el domba basam ap, el kambing basam ap, pia weik upra balamik.

⁴¹ Tonda, kil basam ara, mikip weik ap, nong teleb ap, ubuk ning burum kwaklamuk talak ara, akurun yo taruk sik urasin dam, mek dilamikak delilamukba, akurun ning eibuka lamakalalamik.

⁴² Bukni, kil basam ara, nong mikip una ap, nong bol malye ning ap, sik burum kwaklamuk talak ara, akurun yo taruk kum delilamuk. Ati ara, Yakub apil nirya dopra balamuka deice arye, domba ap, kambing ap, nong bol malye basam, mikip kumce mitang basam ara, Laban el tam delilamuk bukni, mikip weik ning ara, Yakub el bidamnye ati delilolamuk.

⁴³ Winilamuka deice arye, Yakub el weilamuk ning ayala-ayala nirya, pia weik dayukba, bona talinanye ulamuk. Tonda el pil melin nang ap, el pil melin kilapu ap, el unta basam ap, el keledai basam ap, el domba basam ap, el kambing basam ap ara, anirya weik upnin balamik.