Imamat 6 - Eipomek

Ninye arye tilila yupu nyabikceba, amalye winin ning pununa ati, nyabuk yupu

¹ Allah Yahweh arye, Musa biti, “Aninguk kekepmince, Israel nang nirya ati, ‘Winibuka-winibuka unamabe,’ nyabuka, laka nyapnamlyame. Ayupu ara, ani,” nyabuk.

² Yatanye do nirya, malye winibikceura, amalye winin ning kilina ati, wininamlame. Ura, ninye tonok-tonok nang arye, malye winibikirye, sik kwitcapu ati, tenepce arye, tilila yupu nyabikcopura, dipkoprob sik ni koproba Allah Yahweh ati, malye winipmanyake. Winipmanto ara, ani. Tonok aik deiyoknye biti, el kwitcapu, sik ‘Naʼ tenen ning dobuka deibikirye, “Na kwit, an aik ara, na ning tiaya ati deipnutume,” nyabikiba, binuka deipmalirye, el kwitcapu sik ning ati, “Anggun ning tia bopmakinya ani, tamubuka arepnamsine,” nyaplirye, aminyan talak elce ubula pia dololul do, yuk nang arye, el aik pum tam arye, aning ubula dolonyak bukni, elce aning deiyok nang ati, “Yo, na walwale, aning ara, talye tunim apmasilba, na walwale,” nyabuka, tilila yupu uk nyaplyopura, anye dipkoprob malye winilule. Yata ning do nirya, aning atonun, tenepce arye tilila yupu nyabikirye, sik dam unyak nang ati, malye winibikcopura, Allah el kanye ara, ‘Sik dipkoprob malye wininyake,’ tenelule.

³ Tonda, aning atonun, yuk nang, sik ning wangapmekba, aminyan talak anye birye, bisik talye balamnak, aning epdanuka bukmalye bukni, pia doproplirye, el ning koproba atonun kibuka, “Nara, kum dopropmanue. Dipkoprob nyapne,” nyabuka, kwinisa doplyeura, el babye dipkoprob pia malye winilule. Elda, tilila yupu nyaplya deice arye, aning babye, malye winilule. Aning atonun winin ning nirya ara, Allah arye, “Aning ara, kum wininamlume,” nyapdeibuk ning, akunum yaniplye ati, anye bira kwinisa dolula ati, pia malye akunum winilule. Amalye winin ning ap tenebuka arye, tilila yupu nyana ap deice arye, Allah Yahweh ati akunum yanilule.

⁴ Aning atonun ning akunum winipmalce, aminyan talak, ‘Se, na dipkoprob malye winipseʼ tenen, kel biklyopura, el kwit birye, el aik tia ati, deipmalye bukni, ubula dolul ning ap, tonda “Tia ati bopnamakine,” nyaplobuka, pia dolul ning ap, tonda yuk nang ning wangapmikba, bukmalye bukni, dipkoprob katak arye, “Dopropmanue,” nyana pia kum aryuk, aning dobuka, el babye kilolul ning ap, nirya ara, yuk nang ning ubula dolul ning ap deice arye, malye winilamle ning ara, tamubuka arenamlule.

⁵ Tonda, yata ning do nirya, dungnubuka ubula dololul bukni, na kume, dipkoprob na kum dopropmane,” nyapliba, yuk nang arye aubula dopropmalye ning akunum bikikirye, “Kume, anye birye, el ubula dopromukce, duknyamuk,” nyabikiba, anirya bikikcopura, aubula domlye ning nirya ara, tamubuka aning deiyoknye binyuk arenamlule. Bukni, pia malye winibuka ati, tonap dua puluh persen (20%) tabakuka weik tonun aning deiyoknye binyuk arenamlule. Ara, yuk sum kume, elce ubula dololul ning nirya tamubuka, arepnamle sumuk, el malye winipmalye ning pununa ap, dekna ap ati, Allah el aren ning ton arelyanganamle. Ara, ‘Na malye winipse ning punubuka dekna ati, Allah dam teleb aren ning boyanuka deiplyeura, Allah namin kipnilirye, lyepropnamnilʼ tenen, arelyanamle. Anye birye, asum apil bitinye donamle.

⁶ Malye wininyamlinye birye, ‘Diba, nara malye winipsa ati, na ning arepniba, na malye winipse ning namin kipnamnil,’ teneplirye, malye winyamlye ning pununa ati ara, domba basam bol pia teleb ning, dekna teleb ning bobuka, arelyanganamle. Ara, domba basam bol malye ning pia kum bukni, bol pia teleb ning bobuka, Allah Yahweh ap, ninye ap, elan aik pum tam pil talibuka, dona deiyok imamnye biti arepnamle. Winiplyopura, ara, Allah Yahweh elti, arena atonun ati, winibuka arepnamle. Tonda, mince, Allah arye, “Na arena ati, sik malye winin ning pununa ati ara, dekna ning winibuka-winibuka boyanuka, nati arelyanganamnulume,” nyapdeiamuk ning atonun, dekna weik yim domba basam bobuka, Allah ati arelyanganamle.

⁷ Amalye winyamlinye birye, teleb yim domba basam boyanuka, Allah ap, ninye ap ansinilina aik pum tam pil talibuka, deiyok kibuka pil donanye, imam el dam yanuka arepliba, aning dobuka, Allah ati arena atonun ati, aning areplyopura, adeice arye, anye el malye winyamlye ning ara, Allah Yahweh eiplirye, anye el malye winilamuk ning nirya ati, namin kibuka teleb kilinamle.

Allah arena ati, kam ning obuka, uku dongon pil ati, nyabuk yupu

⁸ Allah Yahweh arye, Musa biti, nyabuk.

⁹ Anyapdeipkin yupu nirya ara, Musa ance, Harun ap, elce deiamuk nang nirya ap, sikti, laka nyapnulyame. ‘Allah arye, nun malye winin ning namin kibuka kilipsilirye, lyepdopnamsilʼ tenen, kam ning obikirye, keil pala yangabuka, kintinyamik sukumuk u sekuka dongonamak ning pil ati, ‘Winamlume,’ nyapdeipnusine. Ayupu nyapdeipnye ninguk, talibuka ukirye, pia wininamnyake. Ara ani. Imamnye elce, kam ning opmace ning bobuka, Allah arena ati, moubuka kintinibik ning, el si mesba deice yanuka deipnarye, uku dongonamlule. Akam ning obuka, uku dongopmalye ning ara, uku arye dipnamle bukni, lukunyan nirya babye, adiparyuk uku dinauk unamle. Tonda auku ara, kum tangapnamle. Alukunyan nirya ara, uku buk dinauk unamle.

¹⁰ Daupmalya ani, bereklyopura, beren tam talak arye, imamnye birye, sik imam-imam nang arye, Allah si eren aik dam ap, pum tam ap, pil dona ati, ongolamak baju ongonamle. Ara, imamnye birye, el pia teleb namin cang baju, el si lenan, ongonamle. Lenan baju arye wiamice ning, nong bol dam bumang celana ap, nong deice bai tam cang ning ap ongopliba, el nong nirya lelipliba, apil donamlule. Min yuma ara, el adiparyuk kam ning akunum uku dipmalirye, sice buklopmalye ning buppu ikiplyopura, Imam elcuk, asice lubuka, akeil pala yangabuka kintinip deiamikak, el si mesba dam deipnamle. Ara, ining ning obuka, uku dongonak ati, memepnamak ning, el si mesba deice tam arye, asice lubuka, amesba deiyok dam yamubuka delinamlule.

¹¹ Winibuka atu akunum luplyopura, arup beren tam ongopmok lenan baju ara, kwiribuka deiplirye, yuk baju punubuka ongolyopura, atu lubukaplirye, Israel nang unyakak batakuka, bai tam mutuku binuka deiplopnamle. Atu bobuka, bai tam bilirye, mince ‘Atu lubuka delinamapʼ tenen, memebuka, malye winin ning pia kumak, pia telebakuk binuka, yamubuka delinamle.

¹² Beren tam talak nirya ara, imam adiparyuk kam ning oyakceba, uku dongona ati, keil taplakikirye, yangabuka memepdeibikak, mesba deice uku sekmaliba, dinmalye ning ara, moubuka kalikmalirye, dinmalibuk, uku dinamle. Moubuka kalikna kumce, batakmaliba, auku ara, kum tangapnamle. Beren tam talak nirya, uku dan yo boyanuka, amesba deice deiplirye, uku seklyopura, auku tuba dinauk unamle. Ati, anyaik pil donanye, imamnye, el weik deiyoknye bira, tuba-tuba beren tam talak nirya ara, ‘Allah ap, ninye ap, teleb kibuka neika unamapʼ tenen, uku dongona ati, kam ning oplirye, anoutam arye meta ap, kop ap, uku dan yo ap bobinuka, amesba deiceuk memebuka delinamlule. Winipmalya arye, ‘Israel nang, sik malye upmace nang ati, Allah namin kiplirye, teleb kipdeipnamsilʼ tenen, boyanmakce ining ning obuka, meta dobukaplirye, uku dongonamle.

¹³ Ining ning obuka, uku dongona ati, el si mesba memepdeibikak, moubuka kalikmaliba, pia ati uku dinamle. Tonda, elce batakliba, auku ara kum tanganamle.

Allah arenamak din ning, yakong do, tepung do, kintinibuka delina ati, nyabuk yupu

¹⁴ Allah arye, Musa ati nyabuk. Aning ara, na Allah Yahweh arena ati, yakong do, terigu do, beras atonun din ning do, ayala ning nirya arelyanganamak din ning bobinuka deilinak ara, “Aninguk winibuka-winibuka wininamlume,” nyapsiniba, aning pia wininamlume. Ara, Harun ap, elce deiamlye ning ap, sikcuk, adin ning bobuka, Allah Yahweh ati, yanuka arenamak ning ara, bobuka uku dongona ati, keil pala yangabuka kintinip deibik ning, el si mesba dam bukni, urasin tam bobanamake.

¹⁵ Sik imam-imam nang noutam bukni, ‘Atalak ara, anye pil donamsilʼ tenen, wipdeibiknye, el aimam deiyoknye, adiparyuk roti kwaning deiyok ning, el si tepung, pia teleb atu atonun, noutam arye tonok taruk deice mitik tonun boyalirye, tonda minyak mek ap, tonda siltong teleb nyan ning, el si kemenyan ap, kam ning obuka, uku dongonak arye, yanuka uku dongonamlule. Deiyok ara, ‘Auku dongon din ning nirya ara, Allah Yahweh ati arepne. Aning nirya ara, el ning ukaʼ tenen, lake bikilina ati, wininamlule. Uku dongopliba, uku diplirye, siltong teleb ning ara, Allah Yahweh el dam welepliba, kekeplirye, el kanye teleb unamle.

¹⁶ Bikilin ning akunum areplyopura, roti kwaning din ning deiyok ning, tepung ton tuba upmalye ning ara, Harun ap, el mapu ap, dobukabikirye, aminyan talak dinamnyake. Aroti kwaning deiyok ning, tepung ap, minyak ap, dipnamak bukni, roti nena deiyok ning, el si ragi ton, pia kum tabaknamake. Tonda, aning dapmakce ning ara, talye sukumuk kum diptinge. Anyaik pil don nang, Harun ap, elce deiamuk nang ap, sik din ati, dabuka deibikcopura, sik adiparyuk bobinuka, pia teleb menenga ak bobikirye, dinamnyake. Ara, Allah ap, ninye ap, ansinilina ati, sapi bol arye doltakne tenda aik dam bukni, urasin tam bikirye, asukumuk binuka dinamnyake.

¹⁷ Arup nyapman touk, aroti kwaning dana ara, roti nena deiyok ning ara, el si ragi, aning tabakuka, dana pia meme. Kume, nena kum ninguk, danamlume. Auku dongona ati, boyanuka arepnamak din ning tuba aupmale ning ara, na Allah arye, sik imam-imam nang dina ati, akunum arepnamne. Aning nirya ara, na dokola, ning ati, na kanye ara, adin ara, lek ning atonun, pia teleb din ninguk ulule. Ara, ‘Malye ning pia kum upmalye ninguk, pia teleb ning ulule,’ tenepne. Ati, adin ning ara, sik malye winin ning kilipnirye, teleb ulin ning atonun ulule. Tonda, ninye arye, malye upmakce buk, amalye ning wenena ati, ikin ning, sik dam yanmanto ning, pununa ati atonun ulule. Anya arye, aning ara, nati arelamniak ning atonun ulule. Aning ara, na ning koproba uk ulule ati, pia lek ning atonun ulule nyapne.

¹⁸ Adin ara, pia ati, Harun ap, elce deiplyeba, dadeipdanin banamak nanguk nirya bukni, aroti din ning arepnamak noutam arye, Allah ap, ninye ap, ansinilina ati, doltakna aik pum tam pil dopra banamak nang ati ning ara, Allah Yahweh ati, yanuka arebikiba, uku dongobikceura, ton tuba aupmalyopura, Harun el yala nang, sik dina atia ati, aning dobuka dinamnyake. Ara, Harun el yala nanguk, aning-aning nirya, pia ati winipra banamake. Allah el kanye ara, ‘Aning ara, pia teleb ning, na ning,’ tenelule. Ati ara, anyaik pil dona kum, talye nang arye, Allah ati, arepmace ning noutam ara, dobuka dina pia meme. Allah ati arepnamak ning ara, yatanye birye do nirya, aning sik bolpibikcopura, Allah el kanye ara, ‘Sik anang adiparyuk telebuk wininamake,’ tenelule. Deiyok ara, Allah el kanye ara, ‘Aning ara, ‘Naʼ tenen ning, pia teleb ulule ati, adina deice ara, pia mikip weik ulule.

¹⁹ Allah Yahweh arye, Musa ati, “Aninguk winibuka-winibuka unamlume,” nyabuka, arebuk yupu ara, ani.

²⁰ Ura, sik Israel nang arye, ‘Nun malye winipmap ning, Allah arye namin kipnamsilʼ tenen, ‘Imam-iman nang wibuka deibipyeura, sikcuk, Allah arena pil dopra banamsiake,’ tenebikirye, Harun wibuka deipnamak talak ara, winipra banamake. Ara, Harun ap, elce deiamlye nang, el mapu ap, Allah ap, ninye ap, ansinilina ati, doltakna aik pum tam pil dona ati, deiyok nang unamaka ati, sikce, na Allah Yahweh ati, aning bobuka arepnamninyake. Ara, imam Harun wibuka deipnalam sum ara, Harun ap, el mapu ap arye, anyapdeipne touk ubikirye, na Allah Yahweh ati, bobuka arelyanganamniake. Harun ap, el mapu ap, sikce boyanganamak ning ara, ani. Ara, roti kwaning dana deiyok ning, el si tepung ap, gandum pia teleb ning, 1 kilo ap bobuka, Allah Yahweh ati, arelyanganamake. Aning ara, noutam arye bokuka ton ning ara, beren tam talak arye, Allah arenamake. Ton ning noutam bokuka, deipmace ning ara, dobuka sin tam arye ton, na Allah Yahweh ati, arepnamniake.

²¹ Aroti kwaning deiyok ning, pia teleb sice atonun tepung ara, minyak mek ap, tapaknamlume. Tapakmunce, adiparyuk roti kwaning dan ning, kuali atonun deice, likuka deipmunce, dapnamlulume. Akunum dabuka deiplum ning ara, aroti kwaning tobuka deipmunce, dobuka Allah ati arepnamlume. Awinipmunye ning ara, nintong teleb ning weleplya ati, Allah Yahweh kekeplirye, el kanye teleb unamle.

²² Awininamlum ning ara, atalak-atalak nirya wininamlume. Bukni, aminyan talak ara, Harun birye deiamlye nang, sik kan-kan noutam bukni, el pununa ati, tonoknye wipnamlume. Ara, ‘Atalak Allah arena pil talibuka dolulnye, Harun el pununa ati, elce deiamuk mi tonok wipminba, anye Imam nang, sik deiyoknye unamleʼ tenen, anye wibuka deipnamlume. Anye wibuka deipnalum sum ara, anye diamuk, ateleb roti din deiyok ning, tepung kintiniplirye, elcuk Allah ati, arepnamle. Aning pia ati, arepra banamniake. Ara, Allah Yahweh, el ‘Naʼ tenen ning ati, el arena ning ati nirya ara, aning kintinipmince, bobuka winibuka uku dongobikirye, arenamnyake. Uku buk arye, aning nirya dipnamle.

²³ Aning nyapmakin touk, atalak-atalak nirya, imamnye birye, Allah ati, din ning arenamnil ning nirya ara, uku deice arye dabuka arenamle. Aning nirya ara, uku arye aning nirya dipnamle. Tonda, Allah ati uku deice arye dabuka, areplya ning ara, mitik ning babye, dobuka kum dinamnyake.

Malye upmace nang kilibuka lyeplirye, teleb kilina ati, nyabuk yupu

²⁴ Allah arye, Musa biti, “Ance ayupu nyalbinulyame,” nyabuk.

²⁵ Musa ance, Harun ap, elce deiamlye nang ap, sik kekenak binuka nyapnulyame. Ara, Israel ninye sik malye winipmakirye, ‘Nun malye wininyap ning kilipsilirye, teleb kipdeipsutueʼ tenen, sikce kam ning bobuka, arelyanganamaka ati, opnumunye ura, anyapmasin touk, aning nirya winipmunce, onamlume. Ara, talye sukum arye kum onamlume. Min arye, akam ning bobuka yakce ning ara, ‘Allah Yahweh, el damuk opnuyapʼ tenen, Allah arena ati, keil pala yangabuka memebuka deiamunye sukum, mesba deice, uku dongolamlumak, asukum aryuk binuka, aning ton onamlume. Anya arye, uku dongonamlum ning ap, ninye arye malye winibikce ning, kilina ati, arelyanganamlum ning ap ara, asukumuk onamlume. Tonda, aboyanuka arelyanganamak kam ning ara, Allah el kanye ara, ‘Aning ara, ‘Naʼ tenen ning ati, pia teleb lek ninguk ulule,’ tenelule.

²⁶ Ura, ‘Allah arye nun malye wininyap ning, namin kipsilirye, lyepdopnamsilʼ tenen, uku dongonamak ning, kam ning ara, sik imam nang aryuk arenamake. Ara, Allah ap, ninye ap ansinilina ati, doltakne tenda aik pum tam pil dona nang, sik deiyoknye birye, aboyanuka yanmace kam ning obukaplirye, ‘Aninguk dongonamapʼ tenen, memepdeibikak aryuk, bobuka bilirye, uku dongonamlule. Tonda, aopmace ning, el tup tuba awamlye ning ara, aimam deiyoknye, elcuk aning dobuka bobilirye, dinamlule. Aning dina ati, yuk pia telebak, lek sukum memepdeiamikcak aryuk, binuka dinamlule. Ara, talye sukum kume. Allah ap, ninye ap ansinilina ati, sapi bol arye doltakne tenda aik dam bukni, anyaik urasin tam arye binuka dinamle.

²⁷ Tonda, yatanye birye do, yata ning do nirya arye, aobuka deipmakce kam ning, el tup dobuka deipmakce ning deice, bol piplyopura, abol piplya ning do, aning piplinye do, Allah el kanye ara, ‘Aning bolpipmalye ning ara, adiparyuk pia telebuk upmale. Aning ara, na ‘Naʼ tenen ning ati, wini talak ara, pia lek ning ulule,’ tenenamle. Winipnamla deiyok ara, adin ning ara, Allah el ninguk ulula ati, aning deice ara, weik teleb lek ning, mikip weik ning ulule. Tonda, winipmanto ara, aopmace ning, el ining burubuka, purupdonoklyeba, anye el ongopmalye baju deice, aining duplirye, taplaklyopura, mek kwebuka, abaju mek liknamle. Bukni, talye sukumuk kum mek liknamle. Atonun winiplye ning ara, pia telebuk, lek sukumuk mek likinamle. Ati, ‘Wininamleʼ tenen, kintinibuka deiamunye sukumuk bilirye, mek likinamle. Talye sukum arye pia meme.

²⁸ Tonda, tuku arye dobuka memamlum makau, weik din ning yun makau, el si periuk ara, akam ning obikirye, ‘El tup ara, aweik makau arye yunamakʼ tenen, memebuka deiamlum ning ara, cobuka batakanamlume. Ara, akam ning, el tup dobuka, amek makau pum tam akunum yubicopura, adiparyuk aweik makau cobuka, batakanamlume. Bukni amakau, periuk makau, teleb kat ning, el si tembaka arye, memebuka deiamica pum tam yubicopura, amakau ara, kum cobuka batakmanto ning ulule ati, atup ap, aining ap, amakau deice sakuka bol pipmalye ning ara, aining sakuka aweik tembaka makau deice doulbinmalyak nirya ara, cubuka pia teleb kibuka deipmunce, mek wininga ap, mek ap arye, pia teleb kibuka, mek likinamlume.

²⁹ Imam-imam nang, sik mapu nang nirya ara, ayanuka arepnamak ning, pia teleb lek din ning ara, sik ap dobuka, dina telebe. Bukni, talye nang nirya ara, aning pia kum dinamnyake.

³⁰ Bukni, Israel nang malye winipmakirye, ‘Allah arye lyebuka, teleb kipdeipsutueʼ tenen, kam ning boyakiba, imamnye birye, opmalye kam ning, el ining ara, ton noutam arye bokuka doproplirye, bobinuka Allah el arena ati, Pia Teleb Lek Aik noutam bobanamle ning ara, akam ning tuba aupmalye ning ara, bokuka kum dinamnyake. Ining bobinuka anyaik pum tam bobilyopura, akam ning tup tuba aupmalye ning ara, pia kum dinamnyake. Aning ara, dina ati kum bukni, anirya ara, winiryuk dongopliba, uku buk arye dibuka, sirya dakanamle.