Imamat 1 - Eipomek

Allah arye, “Israel nang nirya, sik malye wininyak ning ara, ‘Allah arye namin kibuka kilipnamsil’ tenen, kam ning obuka uku dongona ati, nyabuk yupu

¹ Allah Yahweh ap, ninye ap, ansinilina ati, sapi bol arye doltakne tenda aik noutam ara, Allah arye Musa biti, “Na dam yanulyame,” nyabuka,” yukubukba, yayuk. Yayukopura, Allah arye, ‘Na arena ati ara, wininamlame, wininamlame,” nyabuka, laka nyapdeibukce, Musa biti winilamuk.

² Nyabukopura, ayupu ton dukdongobuka nyabuk. Anyapdeipne yupu nirya ara, sik Israel nang nirya arye, moubuka talibikirye, na nyapsinye touk wininamnyake. Dan talak do nirya, Israel nang kan-kan noutam ara, tonok-tonok nang arye, na Allah Yahweh arena ati, “Kam ning bobinuka arepniba, obuka uku danyakce, uku dongolamyak,’ teneplinye bira, el weilamlye ning noutam aryuk, sapi basam do, domba basam do, kambing basam do, maka do, boyanuka arelyanganamlule.

³ Tonda winipmanto, ‘Tonoknye bira, ‘Allah arye, na malye wininye ning kilipnamnilʼ tenen, kam ning obuka arepniba, imamnye birye, uku dongopnamle,’ teneplyopura, yim sapi basam bobinuka, arepnulyopura, moubuka dipdelirye, pia bol teleb nemlye sapi uk boyanamlule. Bol malye ning ton, boyangana pia kume. Asapi basam ara, bol teleb ninguk boyanuka, Allah Yahweh ap, ninye ap ansinilina ati, sapi bol arye domik doltakne tenda aik wekelbana ati, bisik bublan damuk, boyanuka delinamlule. Winiplya ati ara, elce bobinuka deipnamle ning ati ara, Allah Yahweh arye, aning deipnamlanye ati, kanye delinamle.

⁴ Tonda, wininamake. Nati, arenamniak ning boyanuka deiplyopura, anye el taruk ara, dobuka akam ning, el kisok deice deiplyopura, na Allah eipnirye, ‘Telebe, ayanuka arepnamnil ning ara, anye el pununa ati, dopropne. Ara, anye el malye winilye ning wenena ati, talye optinye bukni, el kilina ati, anye el pununa ara, akam ning dopropne,’ tenenamne. Na Allah arye, kanye deibuka akam ning dolonamne. Winipnyopura, anye el malye winilamlye ning ara, adiparyuk kiliptinirye, anye biti, teleb kipdeipnamne.

⁵ Winipnyopura, anye birye el sapi basam adiparyuk onamlule. Ara, na Allah Yahweh arye elinamne ati, na dam atonun akam ning opnamlule. Oplyopura, asapi basam, el ining dobuka, Harun birye deiplyeba, dadeipdanin banamak nang, sik imam-imam nang ara, Harun birye deiamuk mapu arye aining bobikirye, na Allah Yahweh ati arenamninyake. Ara, Allah ap, ninye ap, ansilinina ati, tenda bol domik aik, el urasin dam tamuk, arepnamninyake. Aning ara ani, sik imam nang arye, akam ning ining ara, dobukabikirye, atouk kam ning obuka, uku dongona ati, keil yangabuka kintinip deiamunyak, akeil el kup-kup dam dana-dana tam binuka dikilongonamnyake. Akeil yangabuka kintiniamunye ning ara, Allah ap, ninye ap ansilinina ati, adolina aik, el urasin dam tamuk dikilongonamnyake.

⁶ Akam ning bobuka yalinye bira, el bidamnye aryuk oplirye, abasam bol kopra deiplyopura, asapi basam el nong ara, sekuka, yuk-yuk kalebuka, kintinipnamlule.

⁷ Winiplyopura, akam ning opmace ning uku dongona ati, apil dona deiyok nang, Harun birye deiamuk nang, sik Imam-imam nang arye, ‘Allah arena ati, kam ning obuka, uku dongonamakʼ tenen, keil pala taplakuka yangabuka, kintinip deibik sukumuk binuka, adiparyuk, yo lelebuka deibikirye, aning ara, uku sekenamake.

⁸ Uku sekikiba, dilyopura, akeil deice uku buk arye, aning ara dilonamle. Ara, aopmalye kam ning libuka, yuk-yuk deipmalye ning ara, abasam kisok ap, tonda, el meta ap nirya ara, sik anang aryuk dobuka, uku buk paplirye, dinmalye deice binuka, deibuka danamnyake.

⁹ Wininamnimak bukni, aopmalye basam el yan tup ap, deisuruk deice palilamle meta ap ara, el anye biryuk, dobukaplirye, mek likukaplirye, teleb kibuka kintinilinamlule. Apil dobuka kintiniplyopura, Allah ap, ninye ap, ansililina ati, sapi bol arye domik doltakne tenda aik noutam pil donyak nang, sik imam nang aryuk, akintinip deipmalye ning dobuka, keil pala taplakuka yangabuka kintinip deibik sukumuk binuka, uku dongopliba, aning nirya uku diplirye, siltong teleb ning ara, Allah Yahweh dam welepliba, kekeplirye, el kanye teleb unamle. Aning ara, Israel nang arye, ‘Nun malye wininyap ning nirya, Allah arye namin kipnamsil’ tenen, kam ning obuka, nong nirya boyanuka, uku dongonamak ning ara, Allah elti, aning arebikiba, elcuk kanye delinamle.

¹⁰ Yatanye do, elce, ‘Allah Yahweh ati, na malye wininye ning kilipnamnilʼ tenen, Allah el arena ati, ‘Sapi basam do, kambing basam do, arepnunʼ teneplyopura, yim ning bol, pia teleb ninguk arenamlule. Atonun, bol malye bomlye domba basam do, kambing basam do, arena ara, pia meme.

¹¹ Aning akunum boyalyopura, anye adiparyuk, Allah Yahweh, el damakuk, abasam onamlule. Abasam opnamalye talak ara, ‘Kam ning obuka dana ati, keil pala taplakikirye yangabuka kintinip deiamikak, el si ara mesba bukni, utam arye, binuka onamlule. Oplye talak ara, na Allah arye elinamne. Na dinye talak, abasam akunum oplyopura, na Allah ap, ninye ap, ansililina aik pil dona deiyok nang, sik imam-imam nang arye, abasam ining balye ning dobuka, ining ning uku dongona ati, memepdeiamunyak, kup-kup dam dumbarye dana-dana binuka, dikilongonamnyake. Winibikcopura, aining binuka, akeil pala deice dulbinamle.

¹² Harun arye deibukba, dadeipdanin yangalamik nang, sik imam nang arye, aning akunum winibikcopura, akam ning obuka akunum sekuka deiplyopura, tonoknye arye, ‘Aning ton doropnune,’ teneplye touk doproplirye, yuk kintinip deipnamlule. Akintinip deipnamlak ara, ani. Akam ning, el kisok ap, tonda el meta ap, el nong nirya ara, kintinip deipliba, Allah Yahweh ap, ninye ap ansinilin aik pil dona deiyok nang, sikce ining ning obikirye, dobuka bobikirye, keil pala taplakikirye yangabuka kintinip deibikakuk bikirye, aning dana ati, uku sekikiba, uku buk dinmalye deice binuka delinamake.

¹³ Bukni, akam ning opmalinye biryuk, abasam el yan tup nirya ap, el deisuruk nirya ap ara, el anye biryuk, aning nirya dobukaplirye, mek likukaplirye, teleb kibuka kintinilinamlule. Winibuka aning nirya akunum pil dobuka, kintinip deiplyopura, Allah Yahweh ap, ninye ap ansilina ati, cang sapi bol arye domik doltakne tenda aik noutam pil don nang, imam-imam nang, sik deiyoknye biryuk, akintinip deipmalye ning dobuka, uku dongopliba, aning nirya, uku diplirye, siltong teleb ning ara, Allah Yahweh el dam welepliba, kekeplirye, Allah el kanye teleb unamle.

¹⁴ Tonda winipmanto, tonoknye birye, ‘Kam ning obuka arepniba, Allah arye na malye wininye ning kilipnamnilʼ teneplyopura, kam ning yala bukni, ‘Maka boyanuka, Allah Yahweh ati, arelyanune,’ teneplirye, maka boyanulinye bira, Bik maka do, yal maka atonun maka do, mi winiryuk deipmalye ning, winiryuk ninguk boyanuka, arelyanganamlule. Ara, pia bol teleb ulamle ninguk arelyanganamlule.

¹⁵ Winipliba, Allah ap, ninye ap, ansilina aik pum tam pil dona deiyok nang, sik imam-imam nang kan-kan, tonoknye biryuk, maka obukaplirye, boyanuka, kam ning obuka. Allah arena ati, keil pala yangabuka kintinip deipluma dam, binamlule. Bobilyopura, maka ngang talipnurupmalirye, bubatik talibikirye, ngang yok kotokliba, dipnamlule. Amaka el kisok ara, ining ning dana ati, kintinip deiamikak aryuk, mesba deiceuk, uku dongonamlule. Tonda, maka el ining balyopura, Allah arena ati, kam ning obuka uku dongona ati, keil pala yangabuka kintinip deiplumak, el si mesba dam binuka, maka asukumuk deipmunba, maka ining saklirye, keil yangabuka kintinip deialumak, el kup-kup damuk, dana-dana tam binuka, adeiceuk dikeipbikiba, dupnamlule.

¹⁶ Maka kisok uku dipmalya, el nong akunum dam delilamle ning ap, tonda el deisuruk ap, potong ap, aning nirya ara, adiparyuk dobuka, Allah Yahweh el arena ati, keil pala yangabuka kintinip deiplumak, el si mesba dam bukni, atu lubuka dolkwetelulumak, keting panalyangan tamuk binuka donokamnyake.

¹⁷ Tonda, imamnye birye, maka talibuka, el pol potong sirik ning dana-dana tam taliplirye, delonamlule. Bukni, el potong den talak ara, mitang asa arye, moubuka denamlule. Mikip arye dinmalirye, ‘Potong tuba batakna ap, dila una ap uplyak,’ tenena ati, wininamlule. Imamnye winiplyopura, maka el nong ara, adiparyuk ining ning dana ati, keil pala yangabuka kintinip deiamlumakuk, mesba deiceuk danamlule. Winipliba, el nintong teleb ning ara, Yahweh kekeplirye, kanye teleb unamle. Aning pil donamaka nirya ara, ‘Allah arye, nun malye winin ning kilipnamsilʼ tenen, uku dongobikiba, aning nirya uku diplirye, siltong teleb ning ara, Allah Yahweh el dam welepliba, kekeplirye, el kanye pia telebuk unamle.