Ibrani 2 - Eipomek

“Ninye lyena ati, ‘Dawaplye’ tenen, batakna pia meme,” nyabuk yupu

¹ Arup akunum nyapmasin yupu nirya aupmala ati ara, peteren nang arye peterelamsikba, kekelamubu yupu ara, pia kanye moubuka tenenamabe. Ara, ‘Mangkau kanye bobuka, walwal arye, Allah arye nyapdeipsuk bisik batakuka, yuk malye bisik kirikuka bipyak’ tenen, nyapsine.

² ‘Tuba kanye moupnamabe,’ nyapmasina ara, deiyok ning ton nyapnusine. Ara, malaikat ara, mitik mambul unyak bukni, Allah arye nyapdeibukba, sik malaikat arye tukwak ninye ati, nyalamik yupu nirya, adiparyuk kekebuka ulamik bukni, ayupu yaniltalamik ninye nirya ati, sik yanilamikce malye winilamik touk Allah arye, wenebuka olamuk. ‘Dauplye’ tenen, batakalongona kumce, adiparyuk aninye nirya ati wenebuka olamuke.

³ Malaikat arye, nyalamik yupu mitik mambul bukni, ayupu yanilamik ninye ati, ‘Dauplye,’ tenena kum arye, wenebuka olamuk. Anang olamuka anya arye, wini talak weik mambul lyena ning kintinipsuk ning ara, ‘Mambul kume’ tenen, batakipyopura, Allah arye nunti, ‘Dawaplye. Sikti kum wenepnamne,’ tenepnamsil do, kum do? Kume, aning kum winipmanto ati, Allah arye ninye lyena ati kintinipsuk ning batakipyopura, dipkoprop opnamsile. Ayupu nyapmasina ara, nun Deiyoknye Yesus arye, ninye lyena ati, kai teleb yupu deiyok koubuka minyuma arye laka nyalamukba, el yupu kekelamik nang arye, nun dam yangalamikce nunti, “Yesus arye nyalamuk yupu ara, ani-ani,” nyabuka, nun dam laka nyabuka lak koprop peterelamsike.

⁴ Tonda, Allah arye nunti, ‘Na yupu, ninye lyena ati kai teleb yupu ara, tukwak ninye diba tenepnamak’ tenen, sik peterelamsik talak ara, mambul pil weik dolamsuke. Ara, ‘Allah aryuk apil donmasile, tenepnamniting’ tenen, talye nang arye kum winipmanto ning ap, weik mambul pil ap, ninye kum winipmanto pil ap dolamsukba, ninye weika arye, ‘Se, aning ara dipkoprop Allah elca,’ tenelamubu. Tonda, elce tenelamsuk touk, Allah El Dib Kanye arye el mikip deice arye arisilye pil dona deiyok ning ton, bokuka areamsuke.

Yesus arye, nun diba tenenyap ninye ati, “Na weit yapu ululume,” nyasulul yupu

⁵ Sirya talak, ninye unamabak ap, aning-aning nirya ap, Allah arye winiryuk ning deipnamsil ning ati, ‘Malaikat arye aning nirya talibuka ninye deiyok nang unamak’ tenen, kum wipdeibuk. Ara, ‘Tukwak mutuku ap, aning-aning nirya ap, winiryuk ning kwepdeipnamle,’ nyapmap yupu ati, nyapsine.

⁶ Bukni, Allah yupu noutamak ara, tonye birye ayupu sekamuk. ‘Allah ance tenesiminya deiyok ara, ninye ara pia teleb unyak ati, tuba-tuba tenesilyam do? Kume. Tonda, ninye arye delilamak mapu tenesiminya deiyok ara, sik mapu ara pia teleb unyak ati, melisilyam do? Kume.

⁷ Malaikat mitik deice tam unyakba, Ninye Mi Koprop Atonunye bira, tia talak ati, sik amu tam deiplume. Winiplumce, anye bira, weik mambul updeiplumce, elti, si eryamlume.

⁸ Winibuka wiplumce, talye tukwak ning ap, yuk ulul ning nirya ap dobuka, Ninye Mi Koprop Atonunye, el amu tam deiplumba, aning-aning nirya ati, deice tam talibuka weik ninye deiyoknye ulule.’ (Mazmur 8:4-6) Allah arye, aning-aning nirya dobuka Ninye Mi Koprop Atonunye, el amu tam deibuk ning ara, tonok ning babye kum batakuke. Aning nirya dobuka, anye el amu tam deibukba, anye birye aning nirya talibuka weik ninye deiyoknye ulule. Bukni, wini talak ara, ton ning ara, el amu tam ulul bukni, ton yuk ning ara el amu tam min kum ulula ati, elce aning-aning nirya talibuka, weik ninye deiyok nang dipkoprop min kum ulule.

⁹ Aning ara, min kum ululba kum dibinyap bukni, Yesus elda akunum kel bikupe. Allah arye tia talak ati, malaikat deice tam deibukba, daulamika ani, Yesus dobuka, mitik anun sik amu tam deibuk. Min arye, mitik anun arye amutamto deiyamuk bukni, Yesus dibuka anya arye, wini talak ara Allah arye Yesus ati, ‘Weik mambulnye unamle’ tenen, erepdeibukba, ninye nirya arye, elti, weik arye si erenamake. Yesus dibuk ning deiyok ara ani. Ara, Allah el kanye aryuk ninye ati, bico tenyamsukce melipsuka deice arye, ‘Ninye nirya dibikceba kum dakcak’ tenen, nun pununa ati, Allah arye Yesus arepsukba, Yesus arye nun malye winin ning ati kilipsukce, dibuka deice arye lyepsuke.

¹⁰ Yata ning do nirya, aulul ning nirya ara, Allah el si erena ap, el kina ap, ati ulule. Tonda, Allah arye aning-aning nirya kwepdeibukba, el mikip deice aryuk ulule. Allah arye, ‘Na mapu weika arye lyepnirye, na pia teleb ununak neika unamap’ tenen, kintinina ati, pil dolamuk ning ara, pia teleb piluk dolamuk. Ara, Allah el mapu lyena ati, Ninye Lyena Deiyoknye Yesus ara, el nong deice ikin ning weik deibukba, kanye imun kanye bobuka ulamuk. Ulamuka deice arye, Yesus el talima wisibukba, Allah arye Yesus ati, pia teleb kipdeibuk.

¹¹ Ninye nirya, sik malye winin ning ati, kum daneiplirye, teleb winilisulula deiyoknye Yesus ap, elce nun malye winin ning kum kipdeipsilirye, teleb kilisulul ninye babye, nun Ni Kopropa Allah, el tonok ulule. Yesus ap, nun ap, nun Ni Kopropa Allah tonok ululba, nun yala tonok unyaba anya arye, Yesus el ap, nun diba tenenyap ninye ap, nun du weit atonun unyabe. Yesus ap, elce lyepsuk ninye nun ap, nun du weit atonun unyaba anya arye, Yesus arye nunti, alye una kum diparyuk, “Anggunda, na weit yapu ululume,” nyasulule.

¹² Mazmur deice sekamik yupu noutamak ara, Yesus arye nyalule. Ayupu ara ani. ‘Yesus arye Allah ati nyabuk. “Na weit yapu ati, an si ap, an uminye ning ap ati, laka nyanamne. ‘Anti diba tenebikce ninye kekenamak’ tenen, sik bulubikce talak noutamak ara, an si erena ati an uminye ning tenepnirye mot nyabuka, si erekinirye, an si erenamkine,” nyabuk.’ (Mazmur 22:22)

¹³ Ayupu Atonun ton ani. ‘Allah ati diba tenepnirye, el deiceuk na kanye delinamne, nyabuk.’ (Yesaya 8:17) Tonda ayupu nyabuk ani. ‘Na ap, Allah arye areamnuk mapu sik ap, neika unyabe, nyabuk.’ (Yesaya 8:18)

¹⁴ Elce, “Na mapu,” nyabuk ninye ara, tukwak ninye unyakba, nong kalina ap, ining ap, ululba unyaba anya arye, Yesus el babye, ninye nong atonun dayukce, nun kan-kan ulamuk. Ninye nong dayukce ulamuka deiyok ara ani. Ara, Yesus arye, ‘Ninye lyena ati, na dipnyopura, adeice arye, ninye dipna deiyok ning talibuka mikip ululnye, Isa Mutuku Dongonye biti, malye kipnirye oplopnamne’ tenen, Yesus arye ninye atonun dayuk.

¹⁵ Tonda, yata tukwak ninye nirya do nirya, ‘Aminyan talak, nun dibibyak’ tenen, ilil asa unyak ninye ara, Isa Mutuku Dongonye arye, aninye nirya tapu koubuka talyamukba, el amu tam ulamik. El amu tam ulamik ninye nirya ara, Yesus arye, ‘Aninye loplopnirye lyepnamne’ tenen, ninye atonun dayukce lyepsuke.

¹⁶ Ayupu ara talye kum nyapsine. Yesus arye melilul ninye ara, Allah el im deice pil don nang malaikat ati, kum melilule. Aning ara kume. Aning kum bukni, nun apu kopropa Abraham arye deibukba, dadeipdanin yangalamika ani, dadelisinyak ninye, nun tukwak ninye ati, melibuka lyesulule.

¹⁷ Arup nyapmasin yupu nirya aning ati ara, Allah arye Yesus ati, ninye atonun ubuka deibukba, Yesus ara el weit yapu atonun ninye, tukwak ninye atonun dayuk. Ninye atonun dayuk ning deiyok ton ani. Ara, ninye malye un nang ati, bico tenyamsukce, Allah ap, ninye ap, ansinilina pil dona deiyoknye upsuke. Nun malye winin ning ati, talye luparabuka oplopsutu bukni, bico tenyamsukce, ‘Batakna kum arye, teleb ubuka lyena pil donamsin’ tenen, ninye nong atonun dayuk. Ton deiyok ara ani. Ara, Allah arye Yesus ati, ‘Ninye atonun uplirye, tukwak ninye sik malye winin ning kum kipdeiplirye, sik pununa ati, dipnamle,’ tenyamuka ati, Yesus ara, ninye nong atonun dayuk.

¹⁸ Ura, Yesus tukwak mutuku ulamuk talak ara, Isa Mutuku Dongonye arye Yesus ati, ‘Malye winiptue’ tenen, el talima ikin ulamukba, Yesus el ikin kanye bobuka ulamuk. Isa Mutuku Dongonye arye, ‘Malye winiptue’ tenen, asilelamukba, el babye ikin kanye bobuka ulamuk. Yesus babye ikin kanye bobuka ulamuka anya arye, Isa Mutuku Dongonye arye, nun tukwak ninye ati, ‘Malye winipting’ tenen, talima lilosululba, ikin asa unyap talak ara, Yesus weik kelnye anya arye, nun talima kwa daksilirye, melisulule.