Ibrani 13 - Eipomek

Yuk nang ati, bico tenena ap, sik amu tam una ap ati, nyabuk yupu

¹ Wini talak akunum winimunye touk, yuk diba tenenyak ninye nirya ara, ‘Nun weit yapu atonun unyabe’ tenen, bico tenebuka, melilanauk tuba wininamlulume.

² Ura, ton nang ara, ‘E, aninye ara, malaikat unyake,’ kum tenyamik bukni, talye mankau kanye bobuka, ninye asik nang melilamik talak ara, dipkoprop im deice, pil don nang, malaikat ati yukulamikce, melilamik. Aning ati, luba kina kume. Ninye asik nang sik dam yacopura, “Telebe,” nyabuka yukulonamlulume.

³ Tonda, sik diba tenebika ati, tapu koubuka wenena aik dongobikura, wenena aik tuba daunyak ninye ati, luba kina kume. Aninye ati, tuba tenebuka melinamlulume. Aning atonun, yuk nang diba tenebika ati, malye nang arye ikin ning weik, sik nong deice delinyakba, malye kanye bobuka, ikin asa unyak ninye ara, tuba tenebuka melinamlulume. Atalak noutamak nirya ara, ‘Se, yu nang arye nun babye ati, tapu koubuka wenena aik dongopsicopura, anang sik kanye imun kanye bobuka unmak touk, nun babye atonun winipsicak’ tenen, wenen aik tuba daunyak nang ati, bico tenebuka melinamlulume.

⁴ Ura, kil dobuka una ati, yupu nyapnusine. Kilapu dobuka unamlum talak nirya ara, ‘Aning ara, weik mambul anya arye, malye kum wininamap’ tenen, yuk kilapu dobuka talye-talye neika kum manamlulume. Aning ara meme. “Winina meme,” nyapmasina ara, talye ati kum nyapsine. Kume. Kil akunum domlye bukni, yuk nang kilapu ubula neika malamak nang ap, tonda kam nang bukni, malye-malye winibikirye, talye kilapu ubula neika malamak nang nirya ap, Allah arye sikti, yupu lipsisikuka, wenebuka opnamle ati, nyapsine.

⁵ Allah arye nun diba tenenyap ninye nirya ati, el yupu deice arye nyapsuke. Ayupu ara ani. ‘Doyanamle talak nirya ara, anggun batakuka, yukak kum binamne. Na ap, anggun ap neikauk unamabe. Anggun patan ning nirya ati, pia kum bataknamsine. Melibuka arenauk unamsine. Allah arye nyabuk.’ (Ulangan 31:6)

⁶ Allah arye, ayupu nyapsuka ati, kanye teniltona kum arye, diba tenebuka, anyapnusin yupu talibuka unamabe. Ara, Mazmur noutam arye nyapdeiyamik yupu ani. ‘Na melinilinye ara, weik Ninye Deiyoknye Allah ulule. Ati, na ilil pia kum unamnile. Talye ninye arye, yata wiripnitingba, Allah arye kum melipnutu do? Kume, Allah arye nati, pia melinamnila anya arye, na ilil kum unamnile.’ (Mazmur 118:6-7)

⁷ Ura, sik ninye deiyok nang atonun ubuka, Allah el yupu peterelamsik nang ara, sik winilamik ning luba kina kume. Anang arye winilamik ning ara, tuba tenenauk unamlulume. Sikce diksukum ulamikce, teleb pil dolamika deice arye, nong kilamuk ning nirya ara, aning tuba tenenauk unamlulume. Anggun deiyok nang arye diba tenelamik touk, anggun babye atonun, diba tenebuka telebuk wininamlulume.

⁸ Yesus Kristus ara, minop talak pia teleb ulamuk touk, wini talak babye ulirye, aminyan doryanamle talak babye, atonun pia unamle. Yuk ton kum unamle.

⁹ Ura, sik yuk nang arye, urasin yuk peterenyak yupu, talye yupu yala-yala nirya peteresikceba, kekemunya deice arye, ‘Yuk malye bisik bobisicak’ tenen, sik yupu kekena kume. Allah bico tenesilirye, el kanye aniryuk melisilyeba, nun kanye talima mikip kilisilirye, talima kwa disulul ara, telebe uka. Aninguk talibuka unamlulume. Bukni, yuk nang arye, sik bidamang kanye aryuk, ‘Winina meme,’ nyabuka, din ning ati, mem nyabikirye, mem pil dolamaka deice arye, nun kanye talima mikip kum kilisulule. Din ning ati, “Aning ara dina meme,” nyabuka mem nyabikirye, mem pil donyak nang babye, wininyaka deice arye, dipkoprop kum melilanyake. Anang arye talye piluk donyake.

¹⁰ Nun talisilinye deiyoknye Yesus arye, nun pununa ati, dibuka deice arye lyepsukce, teleb ulisulul ning ara, Yesus ati, diba kum tenenyak ninye arye kum doproptinge. Sik Yahudi ninye ara, ‘Allah arye nun malye ning namin kipnamsil’ tenen, kam ning obuka, Allah arilamak aik pum, mem pil tuba donyak ninye ara, sik ton kum doproptinge.

¹¹ Ura, yuk yupu ton nyapnusine. Yahudi yala ninye Allah arena ati, weik deiyoknye bira, ‘Allah arye nun malye winin ning namin kipnamsil’ tenen, kam ning oplirye, aining dobuka, Allah arena aik, Pia Teleb Aik weklirye, Allah el si erena ati, ining likuka delilule. Apil nirya akunum uplirye, yuk nang ati, akam ning nong dobuka areplyopura, ninye unyakak batakuka bai tam bobikirye, uku sekuka dongobikiba, uku arye akam ning nong nirya dilolule.

¹² Aning winilamak atonun, Yesus babye atonun winilamuk. Ara, Yerusalem asik dolamikak batakuka, bai tamuk bobiyikce, ‘Yesus opnuyap’ tenen, Yesus dobuka wanwanun yo deice deibikba, donmoka ani, nun pununa ati dibuk. Nun dekna ati dipsuka deiyok ara, Yesus arye utenyamuk. ‘Na ining banamla deice arye, na wipdeiyamse ninye, sik malye winin ning kum daneipnirye, aninye teleb kibuka diksukum kipdeipnamne’ tenen, nun pununa ati dipsuke.

¹³ Yesus arye, winipsuka ati ara, sik Yahudi yala ninye arye, ‘Mem pil dobibya deice arye Allah arye lyepsitue’ tenen, wininyak ninye tam batakuka, yuk tam memeprobibirye, Yesus ati diba tenebibirye, eluk talibuka unamabe. Yahudi yala ninye kan-kan, ton nang arye, ‘Yesus ara, nun like’ tenen, elti, dopnilibuka lyek-lyek abuka, el nong deice ikin ning delilamik touk, nun diba tenenyap ninye ati, diba tenena kum ninye arye ikin ning nun nong deice deipsikirye, malye updeipsica babye, winibuka tenenamabe. ‘Kume, nun deiyoknye Yesus ati, ikin ning el nong deice delilamik touk, nun babye ati, nun nong deice ikin ning delinmasiyak bukni, aning ara telebe uka’ tenen, talye kanye bobuka unamabe.

¹⁴ Aning ara, talye ati kum nyapsine. Deiyok ara, tukwak mutuku im sirya, mutuku sirya nirya noutamak ara, nun aik pia unamsilak kum ulule. Aning kum bukni, ‘Nun pia unamap aik ara, aminyan talak yanamsil’ tenen, kintinibuka dinauk unyabe. Ati Yesus atibuk diba tenebibirye, eluk talibibirye, yuk ninye arye lyek-lyek nyabuka, ikin ning nun nong deice deipsica babye, ‘Aning ara telebe uka,’ tenebibirye unamabe.

¹⁵ Yesus arye nunti punupsukce, ninye lyena pil nirya dopsuka ati ara, elce melisilya deice arye, nun Ni Kopropa Allah ati, “Telebe,” nyabuka, el si pia erenamabe. Ara, Allah el si erena ati, kam ning obuka, Allah ati, arilamik ning atonun, wini talak ara nunce Allah ati, “Telebe,” nyabuka, el si pia erenamabe. Nunce Allah ati, arena atonun ning ara, ‘Yuk ninye ton kekebikirye, diba tenepnamak’ tenen, nunce, “Yesusuk diba tenebuka talinyabe,” nyabuka, lak kibuka, laka nyanamabe.

¹⁶ Tonda, luba kina meme. Yata teleb winin ning do nirya, yuk nang ati melibuka umunce, aupmasilye ning noutamak arye bokuka, melibuka arilanamlulume. Deiyok ara, ‘Allah el si erepnuyap’ tenen, yuk ninye ati, melibuka arepye ning nirya ati ara, Allah eipsilirye, kanye delisulula ati nyapsine.

¹⁷ Ura, Allah diba tenena ati, ninye deiyok nang atonun usinyak ninye arye, nyasinyak yupu moubuka kekepmunce, sik amu tam bukuka, dakeiyam asa arye unamlulume. Sikce, ‘Nun amu tam unyak ninye ara, diba tenebuka teleb unyak do, kum do?’ tenen, kalikuka disinyaka ara, urdem ati kum unyake. Aminyan talak Allah arye adeiyok nang ati, asipdeliba, sik pil nirya ati, “Winilamubu, winilamubu,” nyabuka laka nyabikiba, Allah arye anang ati, yupu lipsisikuka bokeipnamle. Kekena kumce mandipna dopmunyopura, anggun deiyok nang ikin kanye bobicopura, anggun babye anggun bidamang ati, malye winililanamlume. Ati, anggun deiyok nang arye melibuka dosinyak pil noutamak nirya ara, ‘Telebuk unyabe, nun deiyok nang arye, kanye deibuka unamak’ tenen, anggun deiyok nang arye nyasinyak touk, kekebuka dobolbanamlume. Sik yupu yanina meme.

¹⁸ Anggun diba tenelulum ninye nirya arye nunti, Allah moronamsululume. Yata winin ning do nirya, nunda, ‘Allah arye tenesilye touk, pia diksukumuk unamap’ tenen, patasiliba, diksukumuk unyabe. Tonda, nun kanye talima noutamak ara, malye winin ning duknubibirye, diksukum winin ninguk tenebuka unyabe.

¹⁹ Tonok mambul ning moronamnulum ning ara, nyapnusine. Ara, ‘Na ikin unilye ning kum uptuba, ila tuba tonap, anggun uruna ati, anggun dam, tamubuka dilyasitinye’ tenen, nyapsine. Ati ara, anggunce, ‘Nun ka birye, nun mutuku tamubuka dilyasutue’ tenen, Allah moronamnululume.

Allah ati, morobuk yupu

²⁰ Allah arye, ‘Ninye nirya, olana kum arye, teleb kanye bobuka, yuk ninye ap, neika teleb unamak’ tenen, teleb una ati deiyok ning arisululnye ulula anya arye, elcuk melisilyeba, yuk ninye ap teleb ubuka neika unamabe. Allah arye, “Na ap, ninye ap, teleb ubuka neika unamabe,” nyabuka nyalilamsuk yupu, ninye lyena yupu ara, Yesus el ining biyuka deice arye, sirya dakuka ansinipdeipsuke. Yesus obikba dibuk bukni, Allah arye Yesus tamubuka kam bukdeibukba, Yesus ara, kam tuba ulule. Allah arye nun lyena ati, nyalilamsuk yupu ara, kume kum danamle. Aning ara, pia aunamle. Winipmanto ara, sik domba weina deiyok nang arye, sik domba ati, teleb-teleb kibuka weilamak touk, Yesus arye nun diba tenenyap ninye ati, pia teleb kibuka melibuka kalikisulule.

²¹ Anggunti Allah morosunun ning ara, nyapnusine. Ara, ‘Yesus Kristus melisilya deice arye, anggun talima noutamak pil dosiliba, Allah arye, ‘Wininamake,’ tenyamsuk ning, el kanye delisulul ning nirya weika arye kipnamsile’ tenen, Allah morosunune. Yesus melisilyeba, aning nirya aupsilyopura, adeice arye Allah arye anggunti, ‘Wininamake,’ tenesilye touk, ‘Telebuk unamlulume’ tenen, Allah morosunune. Tonda, ‘Wini talak arye dipdongobuka, doryanamle talak nirya ara, ninye im sirya, mutuku sirya nirya arye, Yesus Kristus el siuk weik arye erenamak’ tenen, pataniliba, Allah moronune. ‘Dipkoprop pia telebuk wininamak’ tenen, “Amin,” nyabuka, Allah morosunune.

Sirya dakna yupu

²² Nun nirya diba tenenyaba ati, na weit yapu atonun ninyo. “Wininamlulume,” nyabuka sekeipmasin yupu ara, mitik tonun dem dopdeipmasina anya arye, ‘Asurat eipmunce, kanye deibuka kekenauk unamlulum’ tenen, moropsine.

²³ Ura, ‘Anggun kel kipnulum’ tenen, nyapnusine. Nun weit atonunye Timotius, tapu koubuka wenena aik dongobikura, daulamuka ani, winira sikce akunum lopdeipmake. Elce na dam minyuma yatopura, el ap, na ap, anggun dam neika dilyanamsiname.

²⁴ Sik Allah yupu peterena deiyok nang ap, Allah ati diba tenyamikba, Allah arye, ‘Na ninye unamak’ tenen, dololamuk ninye nirya ap ati, “Telebe,” nyanamlulume. Sik Italia mutuku diba tenenyak ninye arye, anggun nirya ati, “Telebe,” nyapsiyake.

²⁵ Ura, akunuma. ‘Allah bico tenesilirye, el kanye aniryuk melisilye ning arisiliba, telebuk unamlum’ tenen, telebe nyapsine. Telebe, na nyapsince, asukumuk sekuka deipsine.