Ibrani 10 - Eipomek

“Kristus arye, nun malye winin ning kum kilina ati, el bidamnye el bidamang nong dobuka, Allah ati arepdayukce, nun punupsuke,” nyabuk yupu

¹ Ura, yuk yupu ton nyapnusine. Allah arye nyapdeibukba, Musa arye sekamuk yupu, mem yupu ara, winipmanto ninguk, keting kukia atonun ulamuk. Aminyan talak nong dipkoprop yanamle ning, el urasin yuk ulule. Minop talak mem yupu ara, mitik anun keting kukia atonun ulamuk bukni, aminyan talak nong dipkoprop yanamle ning ara, minop talak uamuk yupu atonun kume. Aminop yupu ara, keting kukia atonun ulamuka ati ara, sik Allah ati, arilamik deiyok nang arye aketing tamun, aketing tamun nirya, weik deice arye, sik arilamik ning uk, tuba-tuba arilyangalamik. Winilamika deice arye, ‘Allah el si erepnuyap’ tenen, el si erena aik dam weklamik ninye ati, sik malye winin ning nirya kum kipdeipnarye, diksukumuk kum daneipmanto winilamik.

² Aning nirya arilamika deice arye, atalak ulamik ninye ati, diksukumuk kipdeipmatopura, sikce aning tuba-tuba kum arilamtinge. Akunum apil sirya dakuka dopmatingce, batakmatinge. Ara, talye ati kume. Deiyok ara, aning arilamik ning deice, sikti, like tonok talak deice aryuk akunum teleb kiptopura, aminyan talak nirya ara, sik kanye talima noutamak arye, ‘Se, nun malye unmabe’ tenen, malye kanye tuba kum bolamtinge.

³ Bukni, aketing tamun ap, ila tuba orketing tamun ap deice arye, aning-aning arilamik ning deice ara, keting tamun nirya noutamak arye, sikce, ‘Se, nunda tuba malye unyabe’ tenen, kel kilamik. Sik malye winilamik ning ara, tuba tenenauk ulamik.

⁴ Ura, sapi basam ap, kambing basam ap obikirye, aning ining kwebuka likililnyaka deice arye, ninye malye winin ning ara, pia dipkoprop kum kiliptue. Ati, aning arilamika deice arye keting tamun nirya ila tuba tonap, sik malye winin ning ara, tuba tenenauk ulamik.

⁵ Ninye arye arilamikce ning deice arye, sik malye winin ning kum danaeipmanto kum unyake. Aning ati ara, Kristus arye tukwak mutuku yayuk talak ara, Allah yupu noutamak uamuk yupu dobuka nyabuk. ‘Allah anda, ninye arye sik malye winin ning kum kilina ati, kam ning obuka arinyak ning ap, tonda an si erena ati, talye arinyak ning ap, aning-aning nirya ara patakilyeba, kanye kum delilyame. Bukni, tukwak ninye unyak touk, ninye nong kintinipdeipmaniminyebuk, aning dobuka arenamkine.’

⁶ ‘Kam ning obuka uku danyak ning ap, sik malye wininyak ning kilina ati, arikinyak ning ap, tuba-tuba arikinyak bukni, aning-aning nirya ati, kanye kum delilyame.’

⁷ ‘Ati narye nyapkise, “Nara, akunum kintinibuka aunune.” An yupu noutamak arye, nati sekamnik yupu deice arye nyanulule. “Na ni Allah, ance tenyamnulum touk, ‘Apiluk donamne’ tenen, akunum kintinibuka yanmane.” Kristus arye nyabuk.’ (Mazmur 40:6-8)

⁸ Anyapmasin yupu noutamak arye, minyuma ara, Kristus arye nyabuk. “Ninye arye, sik malye winin ning kum kilina ati, kam ning obuka, arikinyak ning ap, an si erena ati, talye arikinyak ning ap, kam ning obuka uku danyak ning ap, sik malye wininyak ning kilina ati, arikinyak ning ap, aning-aning nirya kum patapkiliba, aning ati, an kanye kum delilyame,” nyabuk. Ura, dipkoprop minop talak ara, Musa sekamuk yupu deice arye, apil adiparyuk dolamik bukni, Kristus arye aminyan talak arye, arup nyapmasin yupu nyabuk.

⁹ Nyabukce, aminyan talak ton, “Nara, akunum kintinibuka unune. ‘Ance tenyamnulum touk, apiluk donamne’ tenen, yanmane,” nyabuk. Ayupu nyabuka deice arye, minop talak uamuk yupu, Musa sekamukba, Allah ati, arilamik ning ati, akunum batakuke. Ayupu batakuka, punubukce, aminyan talak yupu bitinye ning ara, elce el bidamang ati nyabuk yupu, winiryuk ning nyapdeipsuke. Wini talak nyalin yupu nyapsuka deice arye, minop talak nyalilamuk ning ara, akunum punubuk.

¹⁰ Tonda, Kristus arye, “Allah ance tenyamnulum touk, apiluk donamne,” nyabuk touk, Allah arye Yesus ati, tenyamuk pil dipkoprop dobuka deice arye, nun malye winin ning nirya kum kipdeipsukce, diksukumuk kipdeipsuke. Diksukum kipdeipsuka ara, Yesus Kristus el nong obikba, nun malye winin ning kilibuka lyena ati dipsuke. Nun pununa ati dibukce, lyepsuke. Nun lyena ati, pil akunum sirya dakeipsuka deice arye, akunum diksukum kipdeipsuke.

¹¹ Ura, talye tukwak ninye bukni, Allah ap, ninye ap, dana-dana ansinilina deiyok nang arye, asum-asum nirya tikikirye, Allah arena ati, pil donyake. Ninye malye wininyak ning kum kilina ati, sirya talak, kam ning obuka arinyake. Tuba-tuba aninguk pia arinyak bukni, arinyak ning deice arye, ninye malye winin ning pia kum kilipmanto unyake.

¹² Sik tukwak ninye arye winibuka pil donyak bukni, anye Yesus ara, sik pil dolamak touk kum winibuke. Aning ara kume. Elda, dipkoprop Allah ap, ninye ap, dana-dana ansinilina weik deiyoknye ulula anya arye, minop talak ara, ninye malye winin ning kum kilina ati, tonok ninguk aribuk. Aning like tonok talak arye, aribuka deice arye, akunuma. Ninye malye winin ning minop ning babye, wini talak ning babye, aminyan doryanamle talak ning babye, amalye winin ning nirya ati, akunum kum daneipsukce sirya daksuke. Winibukce, adiparyuk Allah el taruk sirik tam bukukce, el ap Allah ap, aning-aning nirya talinamrake.

¹³ Atalak arye bukukba, daulamlyani, Allah arye Yesus ati, ‘Nun like,’ tenenyak ninye nirya, malye kibuka, Yesus el amu tam delilulbuk, Yesus arye aninye ati yanilule.

¹⁴ Ura, Kristus arye el bidamang nong dobuka, atonok ninguk aribuka deice arye, nun malye winina deiyok ning ati, kum daneipsukce, apil sirya daksuka anya arye, akunuma, diksukum atonun kipdeipsuke. Winipsuka ati, Allah el kanye ara, ‘Yesus ati diba tenenyak ninye ara, diksukum ninyeuk unyake,’ tenesulule. Yesus arye, nunti diksukum kipdeipsuka anya arye, telebuk unamabe. Winipsuka deice arye, el pil sirya daksuka ati, Allah el taruk sirik tam binuka bukuk. Diksukum kipdeipsuk ninye ara, Allah arye nun talima pil melisilya deice arye, malye winin ning kum kipdeipribasilirye, teleb ulisulule.

¹⁵ Ura, Allah arye teleb ulisulul ara, Allah El Dib Kanye babye, ayupu ati, tonap nyasulule. Yeremia sekamuk yupu deice arye, minyuma nyasilye yupu ara ani.

¹⁶ ‘Allah arye nyabuk. “Amenyan talak noutamak arye, ninye ap, na ap neika una ati, ‘Wininamsine,’ nyabuka nyalinamsin yupu ara ani. Ninye teleb una ati, ‘Wininamlulume,’ nyasinye yupu ara, anggun kanye tenen ning noutamak dongopnamsine. Anggun kanye talima noutamak sekeipnamsine,” nyabuk.’ (Yeremia 31:33)

¹⁷ Ayupu nyabukce, ayupu tonap nyapdeibukba, Yeremia arye sekamuk. Ayupu ara ani. ‘Sik malye-malye wininyak ning ap, na yupu yanibikirye, sik kanye aryuk malye wininyak ning ap, namin kipnirye, ila tuba tonap tuba-tuba kum tenenamne. Aning nirya kum daneipnamsine. Allah arye nyabuk.’ (Yeremia 31:34)

¹⁸ Ayupu akunum nyapsuka ati, nun kele. Ninye arye sik malye wininyak ning nirya ara, Allah akunum namin kipsilirye, kum daneipsilyopura, akunuma. Ila tuba tonap, ‘Nun malye winin ning kilipsutua’ tenen, yuk arin ning dobuka, adiparyuk kum arilyanganamnyabe. Aning nirya ara, akunum sirya dakeipsuk atia.

“Batakna kum arye, pia pi dobuka, telebuk wininamlulume,” nyabuk yupu

¹⁹ Aning ati ara, na kayapo. Arup nyapmasin yupu nirya aupmasila ati, ayupu ton nyapnusine. Yesus el ining arepsuka deice arye, nun kanye teniltona ap, ilil una ap kum diparyuk, Pia Teleb Aik atonun, Allah el un dam, talye kanye deibuka weknamabe.

²⁰ Yesus el ining aribuka deice arye, winiryuk bisik, kam una bisik akunum yabdeipsuke. Ara, minop talak ara, ‘Talya nang arye, Pia Teleb Aik wekicak’ tenen, buplan bisik baju wililamikba, Allah arena deiyok nang arye, ining ning dobuka anyaik weklamik touk, Yesus arye el bidamang nong dobuka Allah ati, aribuka deice arye, teleb bisik yapdeipsukba, Allah el dam wekenyabe.

²¹ Tonda, Yesus ara Allah ap, ninye ap, dana-dana ansinilina weik deiyoknye akunum winipsilirye, Allah el ululak, el aik atonun, talina deiyoknye akunum usulule.

²² Aning ati ara, tenepce nyana kum bukni, pia diksukumuk ubuka, nun kanye talima noutam, teniltona kum diparyuk, weik arye diba tenebibirye, ‘Allah ap talima dukdongobuka unamap’ tenen, elti, tenenauk unamabe. Tonda, sik minop talak Allah arena deiyok nang arye, malye winin ning kilina ati, ining dobuka likuka delilamik touk, nunce Allah talibuka, el amu tam unyaba, elce, nun kanye talima noutamak ‘Se, nunda malyeuka,’ tenenyap ning kilibuka, diksukumuk kipdeipnamsile. Winisulula ati, el ap neika talima dukdongobuka unamabe. Tonda, sik minop talak Allah arena deiyok nang arye, pil dopnuyik talak, sik nong nirya teleb kibuka mek liklamik touk, nun babye atonun, Allah arye nun kanye talima noutamak, malye ning usilye ning nirya kilipsilirye, teleb kipdeipsilyopura, el dam wekelbinamabe. Wini talak ara, el ap talima dukdongobuka unamabe.

²³ Elce, “Wininamsine,” nyabuka nyalilamsuknye, Allah ara, tilila kum nyalule. Elce nyasilye touk dipkoprop ulula ati, nunce, ‘Allah ara, dipkoprop lyenamsil’ tenen, diba tenebuka dinauk unamabe. Winibuka winibirye, laka arye nyanyap yupu ara, yuk bisik kirikuka bana kum, el yupu uk talibuka pia batakna kumce, pia talibuka unamabe.

²⁴ Winibuka unamap talak noutamak nirya ara, nunce nun kayapo nang nirya ati, ‘E, na yata teleb pil doptinyeba, na kayapo nirya arye, bico tenelana ap, melilana ap, teleb una ap wininamak do?’ tenenamabe. Winibuka, tenepdabirye, talima kwa dibuka, melilanauk unamabe.

²⁵ Ura, ton nang arye ara, ‘Allah yupu kekena ati, neika bulunyaba ara, nun like,’ tenekirye, Allah yupu aik kum wekenyak bukni, nunda, batakna kum arye, neika bulubuka wekelbanauk unamabe. Tonda, nun nirya arye, yuk nang nirya ati, talima kwa dibuka, melilanauk unamabe. Winibuka ulamibya ani, Yesus dolyanamsil talak, Weik Sum dam yaliba, kel kibibyopura, weika arye tonap, talima kwa baribuka melilanauk unamabe.

²⁶ Ura, yuk yupu ton nyapnusine. Yata ninye do nirya, Allah el dipkoprop yupu akunum peteresikceba, kekebikirye, moubuka kel kinyak bukni, ‘Dawaplye’ tenen, sik kanye aryuk tuba-tuba malye winibikcopura, akunuma. Aning ara, kum lipsisikmantoe. Ara, sik malye winin ning kum kilina ati, yuk ning ton areptinga babye, diksukum kibuka kum kipdeipdatinge.

²⁷ Allah ati, diba tenebik ning ara, ila tuba tamubuka bataktingopura, aning ara, min kum kum danaeipmanto anya arye, sikda weik arye ilil asauk unamake. Ilil asa unamaka deiyok ara, ani. Anang ati ara, Allah arye yupu bokuka weneplirye, opnamle ning ati, ilil weik unamake. Tonda, sikce Allah elti, ‘Nun like’ tenen, lik ulul ninye ati, uku buk weik arye dinamle ning ap ara, ‘Sirya daknamsil’ tenen, ilil weik unamake.

²⁸ Ura, aning ara, talye kum nyapsine. Anggun ton teneipdelulume. Minop talak ara, Musa sekamuk yupu yaniltalamik ninye ati ara, yuk nang eipnarye bitinye do, winilye do, sikce tabakuka, “Dipkoprop ayupu yanipmake,” nyabuka, laka nyalamika deice arye, adiparyuk amalye winin nang ati oltakalamik. ‘Se, anang ara, nun kayapo nang anya arye, dawaplye,’ tenena pia kum ulamik. Allah yupu yaniltalamik ninye ara, adiparyuk oltakana uk ulamik.

²⁹ Musa sekamuk yupu yanilamik nang oltakalamik ning ara, mitik ikin uamuk bukni, Allah el Mi Kopropa ati, yaniltanyak ninye ati, Allah arye wenebuka onamle ning ara, ikin weik kum unamle do? Kume, na kayapo, anggun ton teneipdelulume. Allah arye, “Wininamsine,” nyabuka, nyalilamsuk yupu deice, diksukum ulisilye ning, ‘Nong unamle’ tenen, Yesus el ining arepsukba, biyuke. Aning ara, weik mambul bukni, sik malye nang arye, ‘Kume, aining ara, talye ninguk ulule. Malye ning uka,’ tenenyak ninye ara, Allah arye aninye ati, weik arye weneplirye, kum onamle do? Tonda, Allah El Dib Kanye arye, bico tenesilirye, el kanye aryuk melisilye Dib Kanye ati, el nong deice malye yupu nyabuka, lyek-lyek alamak ninye ara, weik arye wenebuka kum onamle do? Kume, weika arye opliba, aninye ara ikin weik unamake.

³⁰ “Weik arye onamle,” nyapmasina ara, talye ati kum nyapsine. Deiyok ara ani. Nun kele. Allah arye ayupu nyabuk. ‘Malye un ninye arye, nati malye winipnicopura, kwa dakuka sik nong deice ikin ning deipnamle deiyoknye bira, na aunune. Sikce malye unyak touk, narye sikti, weik arye wenebuka opnamne.’ (Ulangan 32:35) Tonda, ayupu tonap nyabuk. ‘Aning-aning nirya deice tam talibuka, weik Ninye Deiyoknye arye, el mapu nirya ati, yupu lipsisikuka bokeipsilirye, wenepnamsile.’ (Ulangan 32:36) Ayupu nirya nyabuknye bira, nun kele anya arye, elti, yaninyak ninye ara, weik arye opnamle.

³¹ Se, na kayapo, malye winibikiba, Pia Kam Una Deiyoknye, Allah, el taruk arye talibuka, aninye ati wenepnamle ning ara, mambul weike. Ati, ‘Allah arye wenebuka opsilyak’ tenen, ilil weik asa unamabe.

³² Bukni, na kayapo, sikce peterepsikba, Allah el yupu kekeplumce, Allah el dirina arepsukba, doproplum talak ara, ila tuba tonap tenenamlume. Malye nang arye, ikin ning weik anggun nong deice delilamsika deice arye, pia winilelamsik bukni, ikin ulamsuka babye, pia batakna kumce talibuka diba tenenauk unamlulume.

³³ Atalak noutamak ara, ton talak ara, ninye nirya kekenmek akuk, anggunti, malye yupu nyabuka dopnilibuka lyek-lyek nyalamsike. Ton talak ara, anggun diba tenelamlum ning ati, ikin ning weik anggun nong deice delilamsike. Ton talak ara, sik malye nang arye, yuk nang ati, aning atonun ikin ning ap, malye ning ap, sik nong deice delilamik bukni, anggunce aninye ati, bico tenebuka, sik talima kwa baribuka melilanamlulume. Anang ati, kum batakalanamlulume.

³⁴ Ton talak ara, sik malye nang arye, yuk diba tenyamik nang ati, dobukabikce tapu koubuka, wenena aik dongobik bukni, anang ati bico tenebuka melilamlume. Tonda, malye nang arye, anggun talilamlum ning ubula dolamikba, anggunce engena kum aryuk, ‘Dawaplye, dadopropnyake’ tenen, kanye deibuka ulamlume. Winibuka ulamluma deiyok ara, anggunce, ‘Kume, nun dipkoprop talinyap ning ara, ubula dopropmasiak ninguk kume. Pia teleb talinyap ning ara, kum kum danmanto. Pia unamle ning atia,’ tenelamlumce, kanye deibuka ulamlume.

³⁵ Aning ati ara, na kayapo, anggun kanye bokoltona kum arye, pia diba tenelulum ning ara, batakana kume. Aning kum batakmunyopura, aminyan ara, Allah weika arye bokuka, mambul weik dekna ning weik arye arenamsile. Ati, ‘Diba’ tenenauk unamlulume.

³⁶ Ikin ning awabsilya babye, batakna kum arye, pia pi dobuka, ‘Diba,’ tenenauk ulamunyopura, aminyan talak Allah arye tenyamsuk touk, akunum winipmunyopura, elce, “Winibuka, winibuka arenamsine,” nyabuka nyalilamsuk touk dekna ning arepsiliba, ‘Aning dolonamlume’ tenen, nyapsine.

³⁷ “Pia batakna kumce, talibuka unamlume,” nyapmasin yupu ara, Allah yupu noutamak nyabik deiyok ning ton ani. ‘Aminyan yanamlanye bira, daulamlya ani, sik arye kum yanamle. Dipkoprop tenebuk talakuk tamubuka pola yanamle.

³⁸ Bukni, el min kum yanmalye talak ara, sik diksukum unyak ninye ara, sik diba tenebica deice aryuk unamake. Diba tenebikiryuk, ilil ati, ila tuba tonap, sik diba tenenyak ning batakicopura, narye aninye ati, kanye kum delinamne. Allah arye nyabuk.’ (Habakuk 2:3-4)

³⁹ Ayupu aupmal bukni, na kayapo, nun nirya ara, ilil arye ila tuba tonap batakikiba, Allah arye wenebuka oplopnamle ninye atonun kum unyabe. Nunda, diba tenenauk ubikiba, Allah arye lyenamsil ninye unyabe.