Hosea 1 - Eipomek

Allah Yahweh arye, el yupu lak nyana deiyoknye, nabi Hosea biti, nyabuk yupu

¹ Yehuda yala ninye ulamik mutuku talibuka ulamik ninye deiyok nang, sik si ara, Uzia ap, Yotam ap, Ahaz ap, Hizkia ap, sik anang arye, Yehuda mutuku noutam ulamik nang nirya taleamik talak ara, Allah Yahweh arye, nabi Hosea biti yanuka, yupu nyalilamuk. Atalak noutamuk, Israel ninye talina ati, sik ninye deiyoknye bira, Yoas el mi Yorebeam birye, Israel yala ninye taleamuk. Winibuka taleamuk talak ara, Allah Yahweh arye, ninye si Beri, el mi Hosea biti nyalilyangalamuk. Israel ninye ap, Yehuda tam ulamik ninye ap arye, Allah el yupu nyapdeiamuk atonun, kum winilamik ati, Allah Yahweh arye, Hosea biti anyuk nyabuk.

Hosea el kil ap, el mapu ap ati, nyabuk yupu

² Allah Yahweh arye, minopce deiyok koubuka, ‘Israel yala ninye kekenamak’ tenen, nabi Hosea biti, ayupu nyabuk. “Hosea anda Israel ninye noutamak bimince, amutuku talye-talye yoltanyak kil, binuka dopnulyame. Akil binuka dopmince, akil arye deipnamle mapu nirya ara, an mapu kopropba kum unamake. Yuk nang arye, an dopnalam kil ap neika ukirye, talye yoldakiba, akil arye, sik yuk nang mapu ton deipnamle. Amapu ara, talye yoltanyak kilapu arye delinyak ninye, sik yala ton unamake. Wininamluma deiyok ara, ani. Ara, winipmantonye wininamlama atia. Deiyok ara, malye kilapu arye, sik minop dolamik nang batakuka, yuk talye daunyak nang ap, talye-talye yoldalamak touk, na mapu koprop, Israel ninye arye, nati batakaninyake. Batakaninyakce, yuk talye ning ati, ‘Nun ni koprop ani,’ nyabuka, Isa Mutuku Dongonye, si erenyake. Wininyaka deice arye, na Allah ati batakaninyake. Tonda, aisa si erenyaka deice arye, sal ap, kilapu ap, talye yoldalamak touk wininyake. Israel nang babye, atonun wininyake. Sikda diksukum teleb kibuka una kumce, malye-malyeuk wininyakce, nara sik ni koprop Allah Yahweh ati, batakuka bindopnike.” Allah arye, Hosea biti nyabuk.

³ Nyabuka ati ara, nabi Hosea adiparyuk biyukce, ninye si Diblaim, el kilmu si ara, Gomer binuka dobuk. Dobukce, neika daulamdika ani, el akil mi bomuka ani, sal mi deibuk.

⁴ Akunum deibukopura, Allah Yahweh arye, Hosea biti nyabuk. “An mi si ara, Yisreel nyapnulyame. Israel ninye, sik ninye deiyoknye, el si ara Raja Yehu, elce taleamuk ninye ati, wenebuka opnamne. Elce taleamuk ning ara, kum daneipnamne. Winipnamna deiyok ara, minop talak deiyok kum upmokbuk, Raja Yehu birye nyabukba, el yin talin nang arye, Yisreel mutuku noutam weik nang, talye oplobika ati, Raja Yehu birye taleamuk ning nirya, kum daneipnamne. Winipnamna deice arye, Israel nang ninye deiyok kinyak nang nirya babye, obuka sirya daknamne. Tonda, anye Yehu birye deibukba, dadeipdanin yangalamik nang babye, wenepnamne. Ati ara, an kil arye deibuk sal mi, el si ara Yisreel nyabuka, si dopnamlyame.” Allah arye, Hosea biti nyabuk.

⁵ Nyabukce, ayupu ton dukdongobuka nyabuk. “Atalak ara, Israel ninye sik yin ap, mal ap talinyakce, mikip weik unyak ninye nirya ara, obuka sirya daknamne. Ara, mutuku si Yisreel mutuku, lyu noutam arye, malye kibuka opnirye, bataknamne. Winipnamna deice arye, Israel ninye arye, ‘Nun Israel ninye ara, weik mikip ninye unyaba anya arye, Allah arye melibuka kaliknamsil’ tenen, kum patasulule. Utenenyak bukni, sik mikip nirya kum kipdeipniba, sik mikip ara, mitang ninye uk unamake,” Allah arye, Hosea biti nyabuk.

⁶ Hosea el kil Gomer, tuba tonap mi bomuka ani, kilmu deibuk. Akunum deibukopura, Allah Yahweh arye, Hosea biti nyabuk. “Akilmu el si ara, Lo-Ruhama si dopnamlyame. Ibrani yupu deice arye, asi Lo-Ruhama nyanyaka deiyok ara, ‘Bico tenebuka melina kume,’ tenena ati nyanyabe. Ara, na Allah arye, anggun Israel ninye ati, bico tenebuka, ton kum melinamsina ati, asi nyapnulyame. Tonda, sik malye wininyak ning, namin kipnirye, kum lyepnamna ati, an kilmu si ara, Lo-Ruhama nyapnulyame, nyapkine.” Allah arye, Hosea biti nyabuk.

⁷ “Na Allah arye, Israel yala ninye ati, bico tenebuka kum melinamne bukni, sik Yehuda mutuku unyak ninye ara, bico tenebuka lyelonamne. Nara, anggun ni koproba, Allah Yahweh arye nyapne. Sik Yehuda tam unyak ninye arye, sik mal oldan ninye ati, malye kipnamake. Ara, kuda basam deice bukuka binarye mal oldana ap, parang ya arye ona ap, yuk mutuku yin talin nang arye melibuka, on deice arye kume. Na Allah mikip arye sikti, melipnamna deice aryuk, anggun oldan ninye nirya, malye kipnamne.” Allah arye nyabuk.

⁸ Akil el si Gomer birye, sik kilmu Lo-Ruhama akunum deibukba, akilmu nebukura, akunum moum dakeibuk talak ara, akil Gomer, tuba tamubuka mi bomuka ani, mi tonok ton deibuk.

⁹ Ami bitinyanye akunum deibukopura, Allah Yahweh arye Hosea biti, yanuka nyabuk. “Ami el si ara, Lo-Ami nyapnulyame. (Ibrani yupu deice arye, ami el si ara, Lo-Ami nyalamaka deiyok ara, ‘Na tenena ninye kuma’ tenen ati, nyalamik.) An mi el si ara, Lo-Ami nyapnaluma deiyok ara, sik Israel ninye ara, na mapu koprop tuba kum unyake. Tonda, ‘Nara, anggun ni koprop Allah, ton tuba kum unune,’ tenena ati, asiuk, nyanalyame,” Allah arye, Hosea biti nyabuk.

Allah arye, “Israel ninye malye wininyak ning ara, kum kipdeipnirye, aninye lyepnamsine,” nyabuk yupu

¹⁰ Allah arye, Hosea biti nyabuk. “Dipkoprop Israel ninye ati, weik arye wenepnamne bukni, doupnin banamak talak ara, narye tuba tamubuka tonap melipniba, Israel ninye yupa pia weik, nukmanto kum upnin banamake. Winipmanto ara, laut mekwen kup-kup, mek wininga delilyangalamle atonun ning, ninye arye nukmanto kum ulamak touk, Israel ninye babye, ninye yupa pia weik upnin banamake. Sik wininamak ning nirya ara, teleb unamle. Winipliba, yuk mutuku ninye arye, ‘Se, Israel ninye ara, mambul weik ninye unyake,’ tenebuka nyanamake. Ati dounamle talak ara, minop talak Allah arye, Israel ninye ati, ‘Anggunda, na mapu kum ululume,’ nyapdeiamuk ning ara, bataklirye, teleb kipdeiplyopura, tonap tuba tamubuka, el mapu koprobauk ukiba, ninye nirya arye, Israel ninye ati, ‘Se, sik Israel yala ninye ara, dipkoprob Allah el mapu kopropa unyake. Wininyakba, Allah ara, Pia Kam Ululnye birye, Israel ninye talilule,’ nyanamsiake.

¹¹ Aning nirya, na Allah arye akunum wipnyopura, Yehuda tam unyak ninye ap, Israel yala ninye ap ati, yuk mutuku ninye arye, bisibuka, pia pera mutuku bobikiba, unamakak ara, batakikirye, tamubuka amutuku uk yakirye, unamake. Winibikirye, sik tonok ansinibuka ukirye, sik ninye deiyoknye una ati, tonoknye ton wipdeibikiba, anye biryuk, sik amutuku unamak ninye nirya ati, taliplibuk neikauk teleb unamake. Aning nirya akunum wipnyopura, ninye nirya arye, ‘Se, wini talak ara, Yisreel el weik sum akunum upmale,’ nyapnamke. Ayupu nyapnamak talak ara, Allah arye, el ‘Naʼ tenen ninye, Yehuda yala ninye ap, Israel yala ninye ap, tuba dobukaplirye, sik mutuku anoutamuk, tamubuka deipliba, apia unamake.” Allah arye, nabi Hosea biti nyabuk.