Hakim-Hakim 7 - Eipomek

Gideon birye, Midian mutuku nang obuka, sirya dakik yupu

¹ Gideon, el si ton Yeru-Bahal birye, el kiklilen ning morobukba, Allah arye arebuk. Aning nirya akunum winibukopura, Gideon ap, el yin talin nang ap, mapmeka beren tam arye bukuka, Harod mek pu dam binuka, doltakna aik tenda cang kain aik dobik. Sik dolina tenda aik dopmik sukum bukni, sik deice tam, mitik karinto ak ara, sik Midian yala nang arye, sik doltakna aik ton dopmek. Ara, mutuku si More mutuku dam unmek.

² Atalak ara, Allah el si Yahweh arye Gideon biti nyabuk. “An yin talin nang ara pia weik ati ara, narye anggunti melipsinyeba, Midian yala nang minop opnalame. Winipniba, Midian ninye opmunyopura, Israel ninye arye, ‘Kume, Gideon el yin talin nang weik ati ara, nun babye mikip deice arye obuka sirya dakmabe, tenebicak’ tenen ati, nyapsine. Winipmunya deice arye, ‘Na si Yahweh ati kum erepnicake. Sik si diamuk erebikcak’ tenen, ati nyapkine,” Allah arye nyabuk.

³ Nyabukabukce ayupu ton nyabuk. “Ati ara, an mapu nirya ati nyapnulyame. ‘Yatanye ton ilil uplinye bira, Gilead mutuku dam arye tamubuka aik damuk bindoplulume,’ nyapnulyame,” Allah el si Yahweh arye, Gideon biti nyabuk. Allah arye nyapmok touk, Gideon birye ayupu nyabukura, adiparyuk yupa weik dua puluh dua ribu (22.000) nang ton bindobik. Sik akunum bindobik bukni, yupa weik sepuluh ribu (10.000) nang ara tuba aunmek.

⁴ Winibik bukni, anang ati tonap Allah el si Yahweh arye Gideon biti nyabuk. “An yin talin nang pia weik tuba aunmak ati, bobuka mekinak bobilyame. Winibuka bobinuka deipmince, ‘Ton nang ara ninye kum olbinamak’ tenen, anang bataknirye, ‘Anang noutamak bukni, yuk nang arye olbinamak’ tenen, yuk nang wipdeipnamakine. Narye anti, ‘Anye bira an ap binamlume,’ nyapnyopura, el ap adiparyuk neika binamlum bukni, narye, ‘Anye bira an ap kum bitume,’ nyapnyopura, adiparyuk anye bataknamlyame,” Allah arye nyabuk.

⁵ Nyabukba, Gideon akunum kekebukce, el mapu nirya bobuka, mekinak bobiyuk. Bobinuka deibukopura, Allah el si Yahweh arye Gideon biti nyabuk. “Yatanye do, amek anyak, kam mek dinmalirye, lulyaklamle atonun winiplinye bira, ance wibuka yukak deipnulyame. Tonda yatanye gutam tuku dipdongobuka diplinye bira, sik yuk sukum wipdeipnulyame,” nyabuk.

⁶ Nyabukopura, mek dinmek talak Gideon birye dipdeyukura, yupa weik tiga ratus (300) nanguk, mek ara kam sitang arye lulaklamla atonun sik taruk deice mek kwebukabikce, si bam bol dam deibuka dinmek bukni, yuk nang nirya ara gutam tuku dipdongobuka talye urdem dibik.

⁷ Winibikopura, Allah el si Yahweh arye Gideon biti nyabuk. “Sik yupa tiga ratus (300) nang, sik taruk deice kam sitang arye lulaklamle atonun winipmak nang ara, narye melipsinya deice arye, lyepsilyeba, sik Midian yala ninye opnamalume. Sik gutam dipdongobuka talye urdem arye mek dinmek nang nirya ara, sikda bataknulyame. Ance nyapminba, sik mutuku koproba yuk-yuk tamubuka bindopnyake,” Allah arye nyabuk.

⁸ Ati, Gideon birye sik tiga ratus nang tonok ara, “Aunamalulume,” nyabukce, anggun yuk nang nirya ara, “Anggun babye tenda aling aik tamubuka bindoplulume,” nyabuk. Sik banuyik nang ara, sik binggong len ning terompet ap, din kwal ap nirya ara, sik tiga ratus nang (300) arye doprobik. Ara, sikce Midian mutuku tam ulamik ninye nirya olbinuyika atia. Gideon ap, el tiga ratus yin talin nang ap ara, sik mutuku yim deice unmek bukni, sik Midian tam nang ara, outam lyu noutam arye unmek.

⁹ Alukunyan noutamak ara, sik nirya mapmekbuk, Allah el si Yahweh arye Gideon biti nyabuk. “Gideon bukmince, Midian mutuku nang olbinulyame. Na mikip an deice deipkiniba, na mikip deice arye, Midian mutuku nang nirya opnulame.

¹⁰ Bukni, an ilil upkilyopura, an melin mapu el si ara Pura nyapminba, el ap anggun mal olan nang dam binudurume.

¹¹ Birumunyopura, sik nyanmakce yupu kekeprumunce, ‘Na yuk arye mikip kibuka olbinune,’ tenepnamalame,” Allah arye Gideon biti nyabuk. Ati, Gideon ap, el melinanye ap, sik mal olan nang dam, Midian yala ninye sik doltakna aik dam kup-kup tam duknubuka birik.

¹² Ura, sik Midian yala nang ap, Amalek yala nang ap, tonda yuk yala nang, keting panalyangalamle tam ulamik nang ap, mekinak, weik lyu noutamak akunum aik dobuka ulamik. Sik ninye ara, sul kwising pia weika arye amulamak tonun, nukmanto kum pia weik ulamik. Tonda sik unta basam ara, mek wininga yamulamla atonun, pia weik ubika ati, kum nukmanto kibuk. Ati sik ninye ap, unta basam ap ara, kum nukmanto ubuk.

¹³ Alukunyan noutamak ara, Gideon ap, Pura ap, sik mal olan nang asik dam birik talak ara, Midian mutuku tonoknye birye, el kwit biti, lengdar mapmok ning ati nukunmokak, Gideon kekebuk. Anye birye el kwit biti nyabuk. “Amio, na lengdar mapmanuba, weik roti pou bumang ning topsakurye, bongo yanganmoa ani, nun ulamupu doltakna tenda asik dam, mikip weik arye bongobuka poulyaurye, anyaik nirya dalubuka sakmale,” nyabuk.

¹⁴ Nyabukba, el kwit kekebukce nyabuk. “Se, amio, aning ara talye ati lengdar kum mapmalame. Alengdar deiyok ara, Yoas el mi Gideon, Israelnye winipnamsil ning ati, mapmalamce lengdar eipmalame. Aning ara, Allah arye mikip arepliba, Gideon birye Midian yala nang ap, nun yuk yala nang nirya ap, olyanamasila atia. El yalyopura, el parang ya arye, nun nirya opnamsile ati lengdar mapmalame.” Midianye birye el kwit biti nyabuk.

¹⁵ Gideon birye ayupu kekebukopura, el kanye pum tam arye, Allah el si ati erebuk. Winibukce, tuba tamubuka Israel nang sik babye dolina asik dam yayukce nyabuk. “Israel nang, buklulume. Tonda, kintiniplulume. Nun ni koproba, Allah el si Yahweh arye melipsilyeba, Midian yala nang ap, nun mal olan nang nirya ap, akunum opnamabe,” nyabuk.

¹⁶ Nyabukopura, el yin talin nang, tiga ratus nang nirya noutamak bokukabukce, yupa winilye, winilye kipdeibukce, anang ara binggong yupu len ning, terompet tonok-tonok ap, tonda weik ember atonun ning, kendi makau ap arebuk. Amakau pum bisik nirya ara, upna ton lipdongobuka arebuk.

¹⁷ Arebukopura, Gideon birye el yin talin nang ati nyabuk. “Na mapu, na winipnaman touk, anggun babye winipnamalulume. Ara, sik Midian yala ninye doltakna tenda aik dam bibirye, na winipnaman ning eipmunce na winipnye touk, anggun babye atonun winipnamalulume.

¹⁸ Tonda, na ap, na neika binupye nang ap, nun binggong yupu lena, terompet nyabipyopura, anggun babye nun nyabibye touk nyapmunce, yupu nirya tunim apmunce, ‘Allah ap, Gideon ap ati, anang opnuyabe’ nyabuka, weik yupu arye nyapnamalulume,” nyabuk.

¹⁹ Alukunyan bukni, sik Midian ninye kalikna nang wi talina ati, punulanmek talak, pia lukunyan duk-duk ara, Gideon ap, el neika banmek nang seratus nang ap, sik mal olan nang ulamik asik dam panalbiyik. Anyaik dam wekikce sik talipmik binggong yupu lena terompet nyabikce, kendi mek makau talipmika botobikba, aning pum bisik dongopmik weisa ara, uku buk laka pabuk.

²⁰ Sik Gideon ap winipmik touk, Israel ninye sik yupa bitinye ton ning ara, atonun winibikce, dana-dana tam arye yanganmekce, sik talipmik binggong yupu lena terompet pong-pong abikce, sik talipmik makau botobike. Sik kwanim taruk arye upna erebuka talipmikce, binggong nyana ara, sirik taruk tam arye bobuka ereptalibikce, nyabik. “Allah el si Yahweh ap, Gideon ap ati, ya dobuka anang opnamabe,” nyabuka yupu weik arye nyanmek.

²¹ Anang nirya ara, anyasik dana-dana tam nirya antanapdongobuka nukuka yuk-yuk tikamikak uk kanupdongobuka tikmekba, Midian yala nang eibikce, sik ilil ubukba, kwepdanuka ngalukra banmek.

²² Atalak ara Gideon ap, el mapu ap arye, winipmek touk, binggong yupu lena terompet weik lelim nyanmekce, Allah arye arebukba, sik Midian yala nang ap, ayuk yala nang ap opdayik. Ara, Allah arye anang ati, ‘Sik opdanuyak’ tenen, ilil ap, kanye walwal una ap arebukba, sik bidamnye bolamik ya dobukabikce, sik bidamang aniryuk opdayik. Ton nang ara, bikbik abuka biyikce, pera Bet-Sita mutuku biyik. Amutuku ara, Zerera mutuku balamik bisik bukni, anoutam ara Habel-Mehola tam sirya biyik. Tonda amutuku ara, Tabat mutuku noutamak ubuk. Anyaka uk bindobik.

²³ Winibikba, Gideon birye nyapdeibukba, laka nyalban nang nyalbiyikce, yuk Israel ninye bukni, Naftali yala nang ap, Asyer yala nang ap, tonda Manasye yala nang bukni, sik keting yangan tam nang ap, tonda sik keting wekelban tam nang ap, kekebikce bulubuka yayikce, sik Midian mutuku nang ati dobolbiyik.

²⁴ Aning atonun, Gideon birye Efraim mutuku dam nang nirya ati yupu dopdeibuk. Ayupu nyabuk, “Anggun kolukmunce, Midian yala nang ati, olbilulume. Tonda, sik taleamik mutuku yanuka alabuka dopropnanlulume. Tonda, Yordan mek balamuk damak bimunce, Midian nang ati opnamlulume. Ara, anyaka arye dipdongobuka, Yordan mekin deice tam nirya bukni, mutuku si Bet-Bara mutuku dam bimunce, sik bisik sekdongopnamalulume.” Nyabukopura, Efraim nang nirya kekebikce, el nyapmok touk winibik.

²⁵ Winibikopura, sikce Midian yala nang ninye deiyok nang bitinye, sik si Oreb ap, Zeep ap, tomobukabikce obik. Oreb obik ara, mutuku si Oreb keil deice obik. Tonda Zeep obik ara, anggur duk purubuka mek kwelamikak, Zeep el anggur duk purunak ati nyalamik mutuku deibuka obik. Tonda atalak ara, Efraim nang arye Midian nang dobona uk ulamikce, Oreb obikce, el kisok ap, Zeep obuka el kisok ap bobuka, Gideon ulamukak, Yordan mekin dam bobuka biyik.