Hakim-Hakim 6 - Eipomek

Israel ninye melina ati, Allah arye wipdeiamuknye, Gideon biti, nyabuk yupu

¹ Minop talak winilamik atonun, tuba tamubuka tonap, Israel ninye arye malye ning weik winilamikba, Allah elilamukce, lik ubukba, ‘Aning ara na like,’ tenebukce, aninye nirya bobuka, Midian tam nang, sik amu tam deibuk. Winibukopura, Midian nang arye Israel ninye obisibikce, sik nong deice ikin ning weik delilamik. Ara, keting tamun tekbarye deice arye Israel ninye taleamik.

² Midian nang arye Israel ninye taleamik talak ara, yu weik arye ikin ning weik, sik nong deice delilamik ati, Israel nang arye Midian mutuku nang ati ilil weik ulamuk. Ati, buru tam sakukabikce, tia talak una ati, keil deiya pum bisik ap, mutuku tam keil uamukak ap, bai tam talye ninye binmanto kum mutuku ak, binuka ulamik.

³ Midian nang arye, Israel ninye taleamik talak noutamak nirya, Israel nang sik dina koulamik ning wa dam akunum koubuka, aik yan talak ara, sik Midian nang ap, Amalek nang ap, tonda keting yangan tam yuk yala nang nirya ap, Israel ninye sik wa wibuka koulamik ning ubula dona ati, sik mutuku-mutuku nirya bululyanuka, adiparyuk sik wa wilina nirya, ubula dalubuka dololamik.

⁴ Wekuka sik Midian nang arye, Israel ninye sik un dam yanuka, tia karin una ati, doltakna cang kain aik dobukabikce, Israel ninye sik wa wibuka koulamik ning nirya ubula dona ap, weltakana ap, winilamik. Winibuka balamikce, Gasa mutuku biyik. Sik wekuka balamik mutuku nirya ara, Israel ninye domba basam ap, sapi basam ap, tonda keledai basam ap nirya, bobuka biyik. Ton ning ara oplobik. Tonok babye ton pia kum batakik, Israel nang sik koulamik ning ap, weilamik ning ap, kum dayukba, dina ap kwaning ap, patalamuk.

⁵ Sik yuk-yuk mutuku ninye arye, Israel ninye un dam yangalamik talak ara, yupa mitik anun arye kum yanyalamik. Sikda sul kwising yupa pia weika arye yangalamak atonun, anang babye sik ninye ap, sik weilamik ning ap, pia weika arye nukmanto kum arye yangalamikce, sik doltakna aik dobuka ulamik. Ati aning ara, anang nirya ap, sik weilamik ning sapi basam ap, unta basam ap ara, kum nukmanto daklamik. Sikda, Israel nang ona ap, Israel mutuku ulamuk ning, teleb ning nirya ubula dona ap ati, ninye pia weika arye yanyalamik.

⁶ Winilamik talak ara, Israel ninye sik ning ubula dololamik ning ara, pia weik ulamuka ati, sik Israel ninye pia ikin weik ubukba, mambul kanye bobuka, ‘Allah el si Yahweh arye melibuka lyepnamsil’ tenen, Allah ati morolamik.

⁷ Israel nang adiparyuk Midian nang ati, Allah el si Yahweh ati morolamikce, ‘Se nun ni Allah lyepnamsilame,’ nyabuka morolamik.

⁸ Morolamikba, Allah el si Yahweh arye Israel nang sik noutamak arye, ‘Na yupu laka nyananye unamle’ tenen, wipdeiamukce dopkdeibukba, Israel ninye sik dam biyukce, ayupu nyabuk. Anggun Israel nang ati kalikuka melisulul Allah, el si ara Yahweh, elce anggunti nyapsile. “Anggunda Mesir mutuku nang arye anggunti, arena kum diparyuk, tapu koubuka pil dilamsik bukni, ikin kanye weik bobuka ulalum talak noutamak arye lyepromsise.

⁹ Ara, Mesir mutuku nang arye anggunti obukapsikce, mikip arye taleamsikce, malye pil dilamsikba, lyepdeiamsise. Tonda, aminyan talak Kanaan mutuku noutam bukni, yuk-yuk mutuku ninye arye, anggunti ikin ning aryansikba, aninye nirya ara, narye yakdonoksiba biyik. Bindobikopura, sik yuk mutuku ninye taleamik mutuku nirya, narye bobuka anggun Israel ninye ati areamsisiba, telebuk ulalume.”

¹⁰ “Atalak ara, narye anggunti nyalilamsise. ‘Nara Yahweh, anggun ni koproba Allah unune. Ati, anggun unamlum mutuku, Amori ninye talibuka unyak mutuku noutamak unamlum bukni, isa si erenyak ning ara, anggun babye aisa si kum erenamlulume,’ nyabuka nyalamsise. Winibuka nyalamsise bukni, anggunda na yupu kum kekelamnulume. Ati, narye arepsiba, sik Midian tam ninye arye, anggun Israel nang ati, tuba tamubuka tonap malya kipsikirye, talinamsiyake,” Allah arye nyabuk. Allah arye el nabinye biti laka nyabukba, anabinye arye, Israel ninye ati nyabuk.

¹¹ Tonok sum ton, Allah el si Yahweh, el pil donanye malaikat ara, mutuku si Ofra mutuku biyuk. Biyukce, Abieser tamnye tonok, el si ara Yoas kouamuk yo deiyok damak yanuka bukmok. Atalak ara, Yoas el mi Gideon birye, ayo dam, ‘Gandum duk dipmanto kum ning kum danamal’ tenen, gandum duk teikinmoke. Awinipmuka ara, ‘Midian nang arye eipnikirye na gandum ubula dopropnicak’ tenen, dungnuba kunusa asa arye yuk nang eipmanto kumak teikinmok. Elda, gandum duk dobuka keil pala yangaiamika pum bisik, ara anggur duk mek purulamikak pum bisik deibukce, gandum duk tekinmok.

¹² Gandum duk tekinmokba, Allah el si Yahweh, el pil donanye malaikat arye Gideon el dam yayukce, nyabuk. “Na kwito! Anda mikip weik yin talinanye ulyame. Allah el si Yahweh arye anti, teleb kibuka melikulule,” nyabuk.

¹³ Nyabukopura, Gideon birye, “Naie, ‘Allah arye na ap, nun Israel nang ap ati melisulul,’ nyapmanilam bukni, elce nun Israel nang ati meliamsutopura, mambul-mambul ning nun Israel ninye dam tuba kum ulamsutue. Nun ni yapu arye, ‘Kume, Mesir mutuku nang amu tam ulamupuba, ikin weik ulamupu talak noutamak, Allah el si Yahweh arye lyepdeiamsuke. Atalak ara, ninye kum winipmanto ning weika arye pil dolamsuk,’ nyabuka nuklamsik. Nyalamsik bukni, wini talak ara ninye kum winipmanto ning ara dan do? Yata ati Allah arye aning deice kum melisulul do? Wini talak ara, Allah el si Yahweh arye nun akunum bataksukba, Midian tam nang arye opsikce, yu weik asa arye talisinyake,” Gideon birye nyabuk.

¹⁴ Nyabuk buk, Allah el si Yahweh arye tamubuka Gideon biti nyabuk. “Wini talak wininamlyame. Atalak an mikip ubkilya deice arye bimince, Israel ninye nirya Midian mutuku nang arye talilamsik ara, ance lyepnamlyame. Narye anti wibuka dopdeipkinirye, kum melipnamkin do? Kume, weika arye melinamkine,” Allah arye nyabuk.

¹⁵ Nyabukopura, Gideon birye tamubuka nyabuk. “Naie, nyapnilam bukni, yata mikip deice arye Israel ninye lyeproptinye do? Manasye yala nang noutam ara, mikip nang weik unyak bukni, na yala nang ara, Manasye tam nang unyap bukni, nun mikip ara mitik tonunuk usulule. Ara, na apu koproba arye deiamukba dadeipdanin yangalamik nang ara, nunda mikip nang kum unyabe. Tonda na ni koproba arye deiamuk nang, nun yala nang noutamak ara, nara pia kum winipmantonye unune. Na mikip kum upmanile. Pia mikip mitik touk upnuknye bira na uka,” Gideon birye nyabuk.

¹⁶ Nyabuk buk, Allah el si Yahweh arye Gideon biti nyabuk. “Kume, narye anti melipkinyopura, dipkoprob anda Midian mutuku nang nirya ara, obuka sirya daknalame,” Allah arye nyabuk.

¹⁷ Nyabuk buk, Gideon birye tamubuka Allah ati nyabuk. “Ura, ance nati, kanye deiamniminyopura, tonok lak kining ton, na dam winipdeminyeba, eipnune. Aning eipnyopura, adeice arye, ‘E, dipkoprob Allah yayukce nyapdeipmanuke’ tenen, anti dib tenebuka kel kipnamkine,” Gideon birye nyabuk.

¹⁸ Nyabukopura, ayupu ton Allah ati nyabuk. “An anyaka uk unmaminye buk, an kibuka si eren ning ton boyanirye, yanuka arepnukine,” Gideon birye nyabuk. Nyabukopura, Allah arye, “Telebe aunmanye buk, an tamubuka yanamalame,” Gideon biti nyabuk.

¹⁹ Nyabukopura, Gideon biyukce, kambing basam obuka, Allah el arena ati kintinibuk. Tonda, gandum tepung, terigu 22 liter dobukabukce, roti dabuka kintinibuk. Aroti ara, nena deiyok ning ton kum dongopmoka arye dabukopura, kum nebuk. Aning nirya akunum winibukopura, kambing basam tup sekroba ara, tapu arye wilamak ning karanjang pum bisik libuk. Tonda kambing basam yupmok mek ara, makau pum bisik libukabukce, yo si tarbantin yo deiyok dam bukmokak boyayukce, ‘Allah si erena ati arepnun’ tenen, kintinibuk.

²⁰ Winibukopura, Allah el pil donanye malaikat arye nyabuk. “Kambing basam tup ap, nena kum roti ap, akeil pala deice deipnulame. Winipminyopura, kambing yupmamu mek ara, akeil deice dikdeipnulyame,” nyabukba, nyapmok touk winibuk.

²¹ Winibukopura, Allah el pil donanye malaikat el taruk arye talipmok kama mouse arye akambing tup ap, aroti ap binuka lukdongobukba, adiparyuk uku buk pabukce, aning nirya dibuka sirya dakuk. Atalak ara, Allah el si Yahweh, el pil donanye malaikat adiparyuk tunimabukba, Gideon birye aminyan talak tonap kum eibuk.

²² Winibukba, Gideon birye aning eibuka deice arye, moubuka bikuk. Ara, ‘E, na dam yanmonye bira, Allah el si Yahweh, el pil donanye malaikat yanmoe,’ tenebuk. Utenebukce, ilil ubukba, Gideon birye Allah Yahweh ati nyabuk. “Se, na ni koproba, anda aning-aning deice tam talibuka, Erebuka Weik Deiyoknye umince, an tenelyam touk winilyame. An pil donanye, malaikat akunum epranmanamce, el urasin eipmanu ati, na ilil upnilba, ‘Dipnun do?’ tenen, ilil upnile,” nyabuk.

²³ Nyabukba, Allah arye tamubuka Gideon biti nyabuk. “An ilil una kume, kum dipnamalama ati, teleb kanye uk bopnulyame. Teleb uk unamlyame,” nyabuk.

²⁴ Nyabukba kekebukce, Gideon adiparyuk keil pala dobukabukce, Allah el si Yahweh, el si erena ati, kam ning obuka keil duk bulubuka yangapdeibuk. Yangabuka moupreibukopura, aning ati nyabuka si dobuk. Akeil pala delinak si ara, ‘Allah arye ilil una kumce, kanye delina deiyok ning aresululnye,’ nyabuk. Atalak babye, aning deibukak ara, tuba mutuku si Ofra bukni, Abieser yala nang, sik mutuku tuba aulule.

²⁵ Asum lukunyan aryuk, Allah el si Yahweh arye Gideon biti nyabuk. “An ni koproba el sapi basam yim ning bitinye ning ara, keting tamun tekbarye kiyamlye ning dobuka kintinpnamlyame. Winipminyopura, an ni koproba arye, ‘Isa el si Bahal, si erena ati, kam ning obuka arenamne’ tenen, keil duk bulubuka yangapdeibuka ap, isa si eren aik ap, tonda anyaik dam isa kil si, Asera teneiprebuka, aisa kil el si erena ati, ikamuk ayukumna yo ara, kwenibukapmince, anyaik ap, ayo ap nirya ulubloplyame,” nyabuk.

²⁶ “Uluplopminyopura, anyaik domik sukumuk, amutuku yim deice, Allah el si Yahweh, si erena ati kam ning obuka arena ak, keil duk bulubuka yangapdeipmince, moubuka memepdeipnalyame. Winipminyopura, ance an ni koproba sapi basam bitinye ning ton, Allah ati obuka arepnulyame. Lak bikna ati nirya nyapnukine. Winipnulama ati, isa kil si tenebuka ikamik cang yo ara, ance kwinibuka bataknamlam ning ara, dobuka keil pala deice uku sekukapmince, asukumuk sapi tup dobuka dapminyeba, uku dipnamale. Ara, Allah el si erena ati, awinipnulyame,” Allah el si Yahweh arye Gideon biti nyabuk.

²⁷ Nyabukopura, Gideon birye el mapu yupa ara, tagu barye nukuka (10) wipdeibukopura, Allah el si Yahweh arye nyapdeipmok touk winibik. Aning nirya winibik bukni, Gideon bira el yala ninye ap, el mutuku ninye ap ati, ilil ubukba, apil dobuk ning ara, keting noutam talak kum dobuk. ‘Yata ati do tenepnicak’ tenen, teneipdeyukce, Allah arye nyapdeiamuk ning ara, lukunyan talak uk pil dobik.

²⁸ Winibikba, amutuku ninye mapmeka, beren tam bukuka dinmikba, sik isa Bahal el arena aik ap, tonda el si erena ap ati, keil duk bulubuka yangapdeiamikak, dalubuka daklopmik ning ara, eibik. Tonda, sik isa kil Asyera el si tenibuka, ikilamik cang ayukumna yo kwinipmek ning ap, aning nirya eibik. Tonda, Allah el si erena ati, keil pala deice uku sekuka, sapi basam dongopmikba, uku dibukabukce, sice bukuka, yok dem nyelepmokak eibik.

²⁹ Winipmokak eibikce, “Sik bidam nang aryuk yuk winipmal do?” nyabuka asilanmikce, “Aning ara yatanye birye winipmal do?” nyalanmek. Nyalanmeka ani, yuk nang arye, “Kume, Yoas el mi Gideon birye winipmale,” nyabikba akunum bikik.

³⁰ Bikikopura, sik amutuku nang arye, Yoas biti nyabik. “An kekepsilyame. An mi dobuka arepsilyame. Elce nun isa si erena ati keil duk bulubuka yangapdeibupu sukum ap, anyaik dam isa kil sisibuka cang ayukumna ikamupu yo ap, aning nirya dakuka ululopmasila ati, an mi uk boyaminba opnuyabe,” nyabik.

³¹ Nyabik bukni, Yoas birye ayu nang nirya ati nyabuk. “Anggun isa Bahal, el yupu kum nyapsutua ati, anggunce el melina ati nyapnulum do? Tonda, el si ati malye winibik ning ara, anggunce lipsisikdeiplum ati nyaplum do? ‘Isa si Bahal ati lyepropnamabe,’ nyaplum do? Yatanye do nirya, isa Bahal tam kipnuce ninye nirya ara, asum aryuk dipnamake. Aminyan talak ara, kam tuba kum unamake. Isa si Bahal, el si erena ati, kam ning obuka, keil pala yangabuka delilamak, ninye arye dalubuka daklobicopura, isa si Bahal ara, Allah mikip atonun auplyop, Bahal elcuk anang opturye, lyepdanamtue. Elda dipkoprob Allah mikip atonun kum ulamlyopura, aning kum winiptue,” nyabuk.

³² Nyabuka ati, amutuku ninye arye Gideon biti, “Wini talak ara, el si ara Yerubaal,” nyabik. Ara, isa si Bahal el si erena ati, amutuku nang arye, ‘Nun isa si Bahal ati kam ning obuka arenamap’ tenen, keil duk bulubuka yangalilamika ara, Gideon birye dalubuka daklobuka ati, sik yupu deice arye, ‘Yerubaal’ nyabuka sisibik. Ayupu deiyok ara, ‘Bahal ati yanibuknye bira, Bahal anirye anye wenebuka opnamle,’ nyalamika ati, asi nyabuka Gideon si dobik.

³³ Atalak ara, sik Midian tam ap, Amalek mutuku nang ap, tonda yuk-yuk mutuku nang, keting yangan tam ulamik nang ap bulubuka, tonok sukumuk wekikce, Yordan mek koubuka otam mutuku si Yisreel mekin binuka, sik tenda cang kain aik amutuku binuka dobik.

³⁴ Dobikopura, atalak ara Allah el si Yahweh, el Dib Kanye, Gideon nong deice yanuka melibukba, binggong nyana el si terompet deice arye nyabukce, Abieser nang ati yukubukba, kekebuka, el dam yayik.

³⁵ Tonda, Gideon birye ninye wipdeibukba, el tam yala nang, ara Manasye yala nang dam binuka, ‘Anggun yin ap, mal ap, parang ya ap kintinipmunce, Yordan mek koubuka otam yanuka melipnululume,’ nyabuka yukubukba yayik. Tonda Asyer yala nang ap, Zebulon yala nang ap, Naftali yala nang ap, yukubukba, kekebikce ayala-ayala nang nirya arye, Yordan mek koubuka otam bulubuka wekik.

³⁶ Atalak ara, Gideon birye Allah el si Yahweh ati nyabuk. “Allah ance nati, ‘Melipkineba, Israel nang lyepropnalame,’ nyapdeiamnulume. ‘Winipnamnilam do, kum do?’ tenen, kanye teniltona uk upnila ati, lak kilin ning eipnukine,” nyabuk.

³⁷ Nyabukce aning ton dukdongopbuka nyabuk. “Naie, winipnune. ‘Ance nyamnulum touk, winipnulam do kum do?’ tenen, lak kilin ning deipnukin ning ani. Ara, domba basam potong kobukapnirye, nun gandum duk tekinak, atuku deice ara, domba potong kopropmanyak, anyaka deipnebuk, ambusum mok puru apotong deice aupnamal bukni, dana-dana tam atuku deice ton, mok puru tonok babye ton kum saklyopura, adeice arye biknamane. Ara, na ni Allah, ance nati melipnimince, Israel nang lyepropnalame. Na nyapman touk uplyopura, ance nyamnulum touk dib tenen, biknamane,” nyabuk.

³⁸ Nyabukce, Gideon mapmoka ani, bukuk talak ara, elce nyapmok atonun winibuk. Ara, domba basam potong deipmokak ara, mok puru aupmok bukni, tuku dana-dana nirya ara, tonok babye kum upmok. Tuku ara, mikuka kel-kel anmok. Winibukopura, domba basam potong binuka talibuka moul weik ubuka ati, adomba potong purubukce, amek ara, makau tonok kwebuka deibuk.

³⁹ Winibukopura, Gideon birye Allah ati nyabuk. “Nai ance nati yu kanye bonina meme. Tonok ning ton moropnukine. Ati, na derenina kum bukni, anti tonap kiklilen ning deipnukine. Ance melipniminba, na bikna ati, adomba basam potong deice ara, mok puru mek kum daklirye, tuku deice uk mok puru mek weik auplyopura, adeice arye, ‘Akunuma, Allah arye nyapdeiamnuk touk winipnamle’ tenen, dib tenebuka kel biknamane,” nyabuk.

⁴⁰ Alukunyan aniryuk ara, Gideon el moropmok touk, Allah arye winibukba, mok puru ara tuku deice uk weik dupmok bukni, adomba basam potong deice ara, pia tonok babye ton kum dupmok. Mikdopmok.