Hakim-Hakim 5 - Eipomek

Allah ak telebe nyana ati, Debora ap, Abinoam el mi Barak ap arye, mot nyaprik yupu

¹ Asum uk Debora ap, Abinoam el mi Barak ap, Allah telebe nyana ati mot seprik. Sik seprik mot ara ani.

² “Israel ninye sik mal deiyok nang arye kintinipna arye, minopce deiyok kibikirye, ninye mal olbinamak talak babye, tonda Israel ninye nirya ara, ‘Allah nyasilye touk winipnuyabe. Tonda, nun mal olan nang ati olbinuyabe’ tenen, kanye teniltona kum diparyuk, pil domice talak babye, mambul kanye bobuka, Allah el si Yahweh ati, el si erenamabe.”

³ Anggun ninye deiyok nang nirya, yuk yala nang talimunce, yuk-yuk mutuku noutamak unyak deiyok nang nirya ara, nun nyapnamap yupu kekepnamake. Anggun nirya kekeplulume. Tonda, anggun Raja nang nirya ara, nun nyapnuyap yupu kekeplulume. Anggun ton kekeplulume. Nunce nun ni koproba Allah el si Yahweh ati, mot sepnuyabe. Dipkoprop mot sepnuyabe. Israel ninye ati pia kalikuka melilul Allah ati, nunce nun ni koproba Allah el si Yahweh ati, mot sena deice arye si erenamabe.

⁴ “Nun ni koproba Allah, Anda Yahweh arye, minop talak nunti lyepdomsulum talak ara, nun Israel ninye bobuka ninye ap mek ap kum mutuku noutamak boyanamsulume. Aminyan talak ara, nun mal olan nang ona ati, Seir mutuku arye bilum talak ap, Edom mutuku arye bilum talak ap ara, mutuku im sirya, mutuku sirya nirya lulukamuk. Tonda winiplum talak ara, im laka kibukba, mok weik cebuk. Tonda dua weik kunukukba, mok weika arye celamuk.

⁵ Israel ninye sik ni koproba Yahweh arye, Sinai mutuku dam ninye kum winipmanto pil dololamuknye bira, yayukba, mutuku-mutuku nirya weik arye lulukamuk. Ara, Israel ninye ati pia kalikuka melilul Allah, el si Yahweh yayuk talak ara, im sirya, mutuku sirya nirya lulukamuk.

⁶ Anat el mi Samgar ap, tonda akil Yael ap, ulamdik talak ara, Israel ninye nirya, ‘Yuk mutuku bitibye,’ tenelamik. Bukni, atalak ara, weik karayong bisik ara, talye mangkau asa kum balamik. Aning kum bukni, ‘Nun mal olan nang, yu nang eipsikirye opsikcak’ tenen, ilil weik ulamukba, bai kwanim bisikuk duknubuka balamik.

⁷ Atalak noutamak ara, Israel ninye nirya minop talak mangkau kanye bobuka, sik aik domik noutam teleb kibuka ulamik touk, pia kum ulamik. Amutuku-amutuku ulamik nang nirya ara, ilil weik ulamukba, sik mutuku koproba batakuka yuk mutuku duknulbinamikce, amutuku ninye nirya ara, ilil weik asa ulamik. Mangkau kanye bobuka kum balamik. Winilamika ani, malye kanye bobuka ulamikba, tonok kil el si Debora tikamuk talak ara, ‘Israel ninye melibuka lyepnamne’ tenen, Israel nang tamubuka mikip kepreipsuke.”

⁸ Israel ninye arye, Allah si batakuka, isa si erelamik bukni, amutuku noutam nirya ara, mal olana deiyok kouamikba, sirya ara sik aik dana-dana poka bublan dam, sik mal olan nang ton kum yangalamik. Atalak noutamak ara, Israel nang yupa ara empat puluh ribu (40.000) nang ulamik bukni, tonoknye babye yin ap, mal ap, ting ap, kum talibuka ulamik. ‘Yu nang arye opsicak’ tenen, ati mangkau asa ulamik.

⁹ Sik anang ara winilamik bukni, Israel sik ninye deiyok nang ap, tonda talye nang ap arye, ‘Nun olyangasinyak ninye olbinuyap’ tenen, bulubik. Bulubukabikce, malye kibuka olanmekce, sik mal olan nang ati malye kibik. Winibikopura, sik olbanmekce, malye kibik nang ati, nun kanye weik arye deipsiyabe. Nunce anggunti, ‘Anggunda pia telebe,’ nyapsiyabe. Nun ni koproba Allah ati, el siuk erenyabe!

¹⁰ Dan mutuku ninye deiyok nang nirya do. Amapo! Anggun mambul weik nang nirya, selimut dobuka, anggun kurun keledai basam balye deice deipmunce, bukuka balaluma deiyok ning ap, tonda tuku bisik talye balalum deiyok ning ap, mutuku-mutuku nirya, ninye talibuka ulalum deiyok nang nirya ara, ‘Teneipdelulume,’ nyapsiyabe. Aobuka sirya dakupu ning ara, ninye bukicak nuknamak yupu ati, teneipdelulume.

¹¹ Ara, bisik noutamak, mekwen dam nirya mot sebikce ninye nyanyak yupu ara, kekepdenamlulume. Anang babye, mot senyake. Malye nang arye, ikin weik ning nun nong deice delilamsik bukni, nun ni koproba Allah el si Yahweh arye, el pia teleb, diksukum ulamukce lyepsuk ning ati, tenenyakce mot senyake. Tonda, Allah el mapu, Israel ninye sik yin talibuka olbalamik nang winilamik ning ati, tenenyakce mot senyake. Mot senyaka deice arye, ‘Allah arye dipkoprob nunti melibuka lyepsuk ning ani. Nun mal olan nang ati obuka sirya dakuk ning ara ani,’ nyabuka si erenyake. Amot sebuka si erenyak ning ara, anggun ton moubuka kekenamlulume. Ara, Allah el si Yahweh, el amu tam ulamik ninye arye, sik aik dana-dana antanapdongobuka, poka domik bublan dam biyikce, nyabik.

¹² “Deborao, kintiniplyame! Allah el si erena ati, mot weika arye nyapnamlyame. Tonda Barako, kintiniplyame! An teklumce, nun mal olan nang obuka sirya daklum nang ara, amalye nang bobuka wenena aik deiplum nang ara, dopmince, ninye urasin dam bobiminyeba, eibikcopura, ‘E amalye nang akunum malye kibupe’ tenen, kel kipnamake. Ninye si Abinoam mi Barako, nun mal olan nang, yu nang akunum obuka sirya daklum nang ara, tapu koubuka bulubuka wenena aik pum bisik akunum dongoplum nang ara, anang nirya dobuka, laka deipsiminyeba dinamabe,” nyapkiyabe. Anang eibibirye, ‘E, anang ara Barak ap, Debora ap arye, akunum obuka sirya dakrik nang atia’ tenen, kel kipnamabe.

¹³ Amutuku tuba daulamik nang, luba kiyamik nang, sik deiyok nang dam kintinibuka yayik. Allah el si Yahweh arye wipdeiamuk ninye ara, sik mikip nang dam yanuka bulubik. Ara, ‘Nun mal olan nang olbinuyap’ tenen, bulubuka yayik.

¹⁴ Ton nang ara, Efraim yala nang, sik mutuku ara Amalek ninye ulamik mutuku arye lyu mutuku panabuka yayik. Yayikopura, sik menekuka yayikba, Benyamin yala ninye ton, aminyan yanganmeka ani, epdayikce neika yayik. Epdayikce aminyan talak ara, Makir mutuku nang, sik yin talina deiyok nang ap, sik yin nang ap, ‘Olbinuyap’ tenen, yanuka bulubik. Atalak babye Zebulon yala nang bukni, yin talin nang, sik weik deiyok nang ap, sik yin talin nang ap, ‘Olbinuyap’ tenen, bulubuka yayik.

¹⁵ Isakar yala nang, sik weik deiyok nang ap, sik mapu ap, Debora ap, neika sik mal olan nang ati olbiyik. Dipkoprop, winibik talak ara, Isakar yala nang ap, Barak ap yayikba, ‘Malye nang olbinuyap’ tenen, sik nirya Tabor mutuku deice arye, lyu mutuku neika bikbik abuka koulukik. Bukni, Ruben yala nang ara, ‘Yuk nang arye akunum olbinmak bukni, nunda, ansinibuka olbinuyap do, kum do?’ tenen, tenilona uk ulanmeka ati, sik ton kum melibik.

¹⁶ Anggun nirya ara, yata deiyok ati, anggunda doltakna aik dam, uku peikuka talye urdemuk ululum do? Ara, ‘Domba basam wein nang arye, sik domba basam yukubikiba kekeptibye’ tenen, nun batakuka talye dikdik sebuka daulamlum do? Dipkoprop Ruben yala nang ulamik tam nirya ara, sik teniltona deice kum melibuka yayik.

¹⁷ Aning atonun, Gilead yala ninye ara talye mangkau asa unmekce, Yordan mek koubuka otam, keting panalyangalamle tam talye urdemuk unmekce, sik ap neika kum olbiyik. Nun mal olan nang olbana ati, nunti kum yanuka melipsike. Tonda, Dan yala nang ara, yata deiyok ati, mekwen deice kapal dam anyuk unmekce, nun mal olan nang olbana ati, kum yanuka melipsik do? Atonun ton sik Asyer yala nang ara, weik laut mekwen kup-kup deice kapal delilamakak uk tuba daunmekce, sik ton kum yanuka melipsike. Nun ap neika kum olbipu.

¹⁸ Ayala-ayala nang ara, nun mal olan nang olbana ati kum melipsik bukni, Zebulon yala nang ara, ilil kum asa yayikce, olan talak melipsika deice, yu nang arye sikti, mal opmanto ubika anya arye, sik mambule. Sik winibik atonun, Naftali yala nang babye ilil kum diparyuk, nun olana nang olalamupu mutuku yanuka melipsike.

¹⁹ Atalak ara, Kanaan mutuku weik deiyok nang yayikce opmandasike. Sik Kanaan mutuku weik deiyok nang ara, Taanak mutuku yanuka opmandasike. Ara, Megido mek puak anyuk mal olalamik bukni, ‘Kat ning perak ap, anang talinyak ning, dekna weik ning dalubuka dopropnamap’ tenen, yangalamikce opmandasike bukni, obuka sirya kum daksikce, tonok ning babye ton kum dalubuka dololamik.

²⁰ Sik opmandasike sum ara, kurya im deice ubuk ning nirya babye, weiknye Sisera el ona ati, long-long abikce, Sisera el ona ati melipsike.

²¹ Winibikopura, mek si, Kison mek pu tam arye mek deibuka obukba, bental weik ubuka arye, sik kuda basam arye lipdakuka tuku deice balamuk ning ara, kum binmanto ubuka ati, anang obuka sirya dakik. Aning ati, nun kanye talima ara, ilil una kum diparyuk, mikip arye, ‘Nun mal olan nang ati dobolbinamabe,’ tenelamuburye, anang nirya dobolbinuka obuka sirya dakupu.

²² Atalak ara, amalye nang, sik kuda basam balye deice bukuka banmek bukni, akuda basam mikip weik asa banmekce, lelim weik lenmok.

²³ Allah el si Yahweh el pil donanye malaikat arye, Meros mutuku ulamik ninye nirya ati, ‘Malye ikin ning anggun nong deice deipnamsine,’ nyapdeibuk. Deiyok ara, Allah el si Yahweh, el mapu Israel ninye mal olalbiyik talak ara, Meros mutuku nang arye, yanuka kum meilyamika atia. Sik Kanaan tam nang ara, mikip weik nang olamsik bukni, Allah melipsuka deice arye, nunce anang olbipu talak ara, Meros nang arye, yanuka kum meilyamsik ati, Allah arye anang ati, ikin ning sik nong deice deibukce supdongobuk.

²⁴ Amutuku-amutuku noutamak ara, doltakna aik, tenda cang kain aik ulamik kilapu weik aulamik bukni, sik aulamik kilapu nirya kum bukni, Heber el kil Yael, elda Keni yala kil ara, Allah arye melipliba, akil ara pia telebuk unamle. Deiyok ara, Allah arye Sisera biti, ‘Winibuka opnamne,’ tenyamuk touk, akil arye Sisera obuka atia.

²⁵ Sisera birye mek sirika morobuk bukni, sapi basam moum yung mek susu kwebuka arebukba dibuk. Yael birye weik nanguk dilamak makau atonun makau dobuka, sapi basam moum yung dikdongobuka arebuk.

²⁶ Arebukopura, mabuk talak ara, Yael birye el doltakna aik, cang kain aik bibikna ati, tace yo dobukabukce, el sirik taruk arye, martalok dopdobuk. Yo ap, martalok ap dobukabukce, Sisera el amul dam yo tace deibukce, martalok arye yo taice deice sipdongobukba, dan tam belebukabukce, tikuk. Winibukopura, Sisera kisok yok botobukopura, dibuk.

²⁷ Yael birye Sisera obukba, el yan dam poulbiyukce, asukumuk poubuk. El sakmokak asukumuk mabukba, obukopura, dibuk. Akunum amapmok sukumuk obukba dibuk.

²⁸ Ura yukak ara, Sisera el lin jendela bisik dinmokba, jendela lelipdongopmik ning amu tam arye, “Se, yata deiyok ati, Sisera el kuda basam tuku deice lipdakuka balamle ning, min kum yanmal do?” nyanmok. Tonda, “Se, Sisera el kuda basam tuku deice lipdakuka balamle ning, lelim ton yanuka kum lenmale, yata deiyok arye do? Yata deiyok ati nimalye aryuk yanganmal do?” nyanmokce, malye kanye bobuka engenmok.

²⁹ Nyanmokce, Sisera el lin, el kanye pum tam arye tenebuka ayupu tenenmok. Tonda, elda weik kil anya arye, el un sukum pil dolamik kilapu, weik kel kilapu arye nyabik. “Kume ilil una kume. Nimalya arye yanamakca,” nyabik.

³⁰ Sisera el lin, el kanye pum tam tenebuk ning ap, tonda el melin kilapu arye, elti, aning ton nyabik. “Kume, Sisera ap, el mapu ap, nimalye arye yanamaka deiyok ara ani. Ara, sikce Israel ninye obikce, sik taleamik ning ubula dobukabakce, bokonmaka ati, min kum yanamake. Wini talak ara, ayin talin nang nirya arye, ‘Akilapu ara, dona kum bukni, nun pil talye donamak’ tenen, kam kilapu, ton nang ara kilapu bitinye dopraka, ton nang ara tonok dopraka kinmek. Tonda, Sisera birye Israel ninye obuka sirya dakukce, el dalubuka dopropmok ning bokonamalce, kintinipmale. Tonda, aunmek talak ara, Sisera birye urasin pia teleb baju, kain atonun pia teleb ning doprobuka anya arye, aning akunum kintiniplyopura, yanamal atia. Abaju ara, dobuka boyalirye, nara el lin biti, na un dam delilyanamanila ati, nimalye aryuk yanamal atia,” nyabuka Sisera el lin ap, sik yuk kilapu arye nyapdayik. Nyapdayik bukni, Sisera ara, akil Yael birye obuka anya arye, el mutuku tamubuka kum yayuke.

³¹ Nun ni Allah, yuk talak ara, Allah an si Yahweh ati yu tenekinyak nang ara, Sisera ap, el mapu silip ap dibik atonun winipnamak. Bukni, anti diba tenyamkikirye, anti kanye delilamak ninye ara, keting yalirye, mutuku nirya deibuka bereklamla atonun, mikip weik unamake. Sik Debora ap, Abinoam el mi Barak ap, mot dobuka seprik. Ura, Sisera akunum obikopura, keting tamun yupa dumbarye deice ara, Israel ninye olana kum diparyuk, kanye deibuka telebuk ulamik.