Hakim-Hakim 4 - EipomekDebora ap, Barak ap yupu 1 Ehud bira, minop talak Israel ninye sik yupu lipsisikuka bokolina deiyoknye ton daulamuka ani, el akunum dibukopura, Israel ninye malye weik ulamikba, Allah el si Yahweh, el kanye ara, ‘Na like,’ tenebuk. 2 Winilamika ati ara, Allah arye aninye bobuka, Kanaan mutuku talibuka, ninye deiyok ulamuknye, el si Yabin biti arebukba, Yabin birye Israel ninye malye kibukabukce aninye talilamuk. Raja Yabin el asik ara, Hasor mutuku ulamuk. Yabin el yin talin nang, sik deiyoknye el si ara, Sisera ulamuk. El asik ara mutuku si Haroset-Hagoyim mutuku dobuka ulamuk. 3 Raja Yabin ninye olbana ati, kuda basam lipdakuka, tuku deice balamak ning, kereta kuda yupa ara, sembilan ratus (900) deiamuk. Aning nirya ara, besi kat ning arye domik. Winibika ati, Raja Yabin el mikip weik ulamukce, keting tamun yupa nagup deikin dua puluh tahun (20) deice arye, Israel ninye taleamukce, sik nong deice ikin ning weik delilamukce, yu weik ulamuk. Winilamuka ati, sik Israel ninye ara, imun kanye bobuka ikin weik, ulamik. Raja Yabin ulamuk talak nirya ara, Israel ninye nirya arye malye nyalamikce, Allah el si Yahweh ati, ‘Se na nio, lyepsilyame,’ nyabuka morolamik. 4 Atalak Israel ninye, sik ninye deiyok kil, el si ara Debora birye, Israel ninye talibuka ulamukce, sik yupu lipsisikuka bokolina deiyok kil ulamuk. Tonda, Allah arye nyapdeibukba, el yupu kekebuka yuk ninye ati, laka nyalamuk kil ulamuk. Tonoknye, el akanye si Lapidot birye, akil Debora dobukce, sik neika ulamdik. 5 Israel ninye sik yu ubuka, malye kanye bobuka walalamikce, yupu deice arye yupu si dalalamik talak ara, Debora bira sik yupu lipsisikuka bokolina ati, asum-asum nirya tonok weik korma yo amu tam bukuka, sikti, yupu bokolilamukce, ‘Winipnamlulume, winipnamlulume,’ nyalamuk. Ayo si ati, Debora el korma yo nyalamik. Ayo ara, Efraim mutuku tam bukni, dana tam ara, Rama mutuku, dana tam ara, Betel mutuku, noutam aryuk bukuka yupu lipsisikuka bokolilmuk. Israel ninye nirya arye, walalamik talak nirya ara, akil dam yangalamikce, “Nun yupu kekepsilyame,” nyalamikce, sik yupu laka nyalamikba, Debora kekebuka Israel ninye ati, sik yupu lipsisikuka bokolilamuk. 6 Winilamuka ani, tonok sum ton, Debora birye tonoknye Abinoam el mi Barak biti yukubuk. Barak bira, el ulamuk talak ara, Naftali tam noutam bukni, mutuku si ara, Kedes mutuku aulamuk. Debora birye, Barak biti yukubukba, yayukopura, nyabuk, “Israel ninye ati kalikuka melilul Allah, el si Yahweh arye nyapdeipmakil ning ara ani. ‘Zebulon yala nang ap, Naftali yala nang ap, ninye yupa weik, sepuluh ribu (10.000) nang ton bobuka, mutuku si Tabor mutuku bobinamlyame. An ap, an mapu silip ap, minopce binamlulume. 7 Yuk talak ara, na Allah arye, Yabin el yin talin nang sik deiyoknye Sisera biti, yupu tenepce arye nyapniba, el mapu ap, ninye olbana ati, kuda basam tuku deice lipdakuka balamle kereta ap, mek si Kison mekin yanamake. Ara, ‘An Barak birye Yabin biti opnalam,’ tenen atia. Anang nirya ara, bobuka an taruk deice deipniba, opnamale.’ Allah arye nyapdeipmakilba, narye nyapkine,” Debora birye nyapdeibuk. 8 Nyabukopura, Barak birye Debora biti nyabuk. “An ton na ap neika binimirye, melipniminyopura, na babye an nyapnilam touk binamane. Ara, ance nati melipnutumopura, na bana telebe. Bukni an ap bana kumopura, na yuk kum binamane” Barak birye nyabuk. 9 Anyabukopura, Debora birye tamubuka nyabuk. “Telebe an nyapmanilam touk winipnaname. Na ton melipnamakin bukni, an kel biknulyame. Na ap, an ap binamana ati, Yabin mutuku nang opminyopura, yuk nang arye, anti weik si kum erepnamkiyake. Deiyok ara, Allah el si Yahweh arye, Sisera dobuka, tonok kil taruk deice oplyopura, ninye arye, ‘Tonok kil si deice arye, Sisera bira obike,’ nyanamake,” Debora birye nyabuk. Nyabukopura, Debora ap Barak ap, Kedes mutuku birik. 10 Birik talak ara, Barak birye Zebulon yala nang ap, Naftali yala nang ap, yupa ara sepuluh ribu (10.000) nang yukubukba, yayikopura, adiparyuk Barak ap, Debora ap melibikba, Tabor mutuku biyik. 11 Atalak ara, ninye si Heber, elda Keni yalanye bukni, Keni yala nang ulamikak arye, kisikdakuka, yuk mutuku binuka ulamuk. Ara, Zanaim mutuku bukni, Kedes mutuku dam binuka, el tenda cang kain aik, asuksum dopna, asukum dopna kilamuka ani, yo si tarbantin yo deiyok dam binuka deibuk. Keni yala nang ara, Musa el kil tamnye, el si ara Hobab, el ap, el yala nang ap arye delilamik ninye atia. Heber birye anang dam kisikdakuka, Kedes mutuku dam ulamuk. 12 Yuk nang arye Sisera biti, “Kume, Abinoam el mi Barak ap, tonda el yin nang ap, Tabor mutuku akunum welebuka binmake,” nyapdeibikba, Sisera kekebuk. 13 Kekebukce, adiparyuk el yin talin nang nirya yukubukba, yayikopura, sik kuda basam tuku deice lipdakuka balamik ning, besi ning arye, domik kereta ton, yupa weik sembilan ratus (900) wibuka deibukba boyayik. Sisera el mapu ap, kuda basam tuku deice lipdakuka balamik kereta bukuka, Haroset-Hagoyim mutuku arye olana ati Kison mekin biyik. 14 Biyik talak ara, Debora birye Barak biti nyabuk. “Allah el si Yahweh arye anti melipkiliba, wini talak arup arye, ance Sisera obuka sirya daknulame. Nun ni Allah, el si Yahweh arye akunum melipkilirye, menekuka banmaleba, an aminyan binamalam ning ara, moubuka kum teneipmalam do?” nyabukba, Barak birye deiyok koubukce, Tabor mutuku arye kulukuka, el mapu silip yupa weik sepuluh ribu (10.000) nang ap panabuka biyik. Tabor mutuku dam bukni, lyu uamuk mutuku binuka, olana ati koulukik. 15 Barak ap, el mapu silip ap, menekuka koulukuka biyikba, adiparyuk Allah el si Yahweh melibuka deice arye, Sisera el mapu silip ap, el kuda basam tuku deice lipdakuka balamle ning ap nirya, binuka warikika deice arye, sik parang ya arye obuka malye kibikopura, Sisera bira, ilil weik ubuk. Ilil ubukba, el kuda basam deice bukuka balamuk ning deice bukmoka ara, tukwak sakuka bikbik abuka biyuk. 16 Winibuk talak ara, Barak ap, el mapu silip ap arye, sik kuda basam libuka adeice bukuka banmek nang ati dobolbanmika, Haroset-Hagoyim mutuku nang dam biyik. Abisik banmek talak ara, sik parang ya arye, Sisera el mapu binuka obuka, sirya dakik. Tonok babye ton kum batakik. 17 Winibik bukni, Sisera bira yuk. Sisera ilil ubukba, bikbik abuka, tonok kil el si Yael el doltakna aik, tenda aik dam biyuk. Yael bira, ninye si Heber el kil ulamuk. Heber bira, Keni yalanye ulamuk. Akil Sisera doltakna asik dam biyuk deiyok ara ani. Ara, Hasor tam taleamuknye Yabin ap, Heber el yala nang, Keni yala nang ap, kanye deipdanamikce, sik yupu neika taleamika ati, akil el doltakna cang kain aik dam biyuk. 18 Sisera Yael dam yayukopura, Yael birye el dam binuka nyabuk, “Na ni anda na deiyoknye ulyame. Ance ilil una meme. Telebe yangalyame, na aik yalyame,” nyabukura, el aik biyuk. Biyukba, Yael birye cang baju dobukabukce, kalubuka duknupdeibuk. 19 Sisera birye, Yael biti nyabuk. “Mek patanmanile, mek ton arepniminyeba dipnune,” nyabuka morobuk. Mek sirika ati morobukba, akil arye, sapi basam moum yung mek kwebuka arebukba, dibukopura, asingipmok ning tuba tamubuka siknipdongobuk. 20 Winibuk talak ara, Sisera birye Yael biti, nyabuk. “Bublan dam kaliknilyame. Nati, ton ninye yuk nang arye, ‘Ninye ton an aik yanuka wekmak do?’ nyabuka asipkicopura, ance, ‘Kume,’ nyapnamalyame,” nyabuk. 21 Sisera mitang upmoka anya arye, wi pia weik talibukba, mabuk. Sisera mabuk talak ara, Yael birye, el doltakna aik kat yo tace lubuka deiamuka arye dobuka, el amul yok dam deipdongobuka potokukba, dana tam belebuka tikuk. Winibuka, akunum obukopura, adiparyuk dibuk. 22 Winibuka obukopura, mitik anun uamukbuk, aminyan talak ara, Barak bira, ‘Sisera opnun’ tenen, Yael dam yayuk. Yael dam yayukopura, Yael birye el dam binuka nyabuk. “Telebe, yaminyeba, an enmalamnye bira, laka nyapnukine,” nyabukba, sik bitinye anyaik wekuka birikce eiprik. Ara, Barak enmoknye Sisera bira, aoplopmokba dipmokak eiprik. 23 Aning nirya winibuka ati, asum aryuk Allah el si Yahweh arye, melibuka deice arye, Israel nang arye Kanaan tam talibuka ninye deiyok ulamuknye el si Yabin, el mapu weik obuka sirya dakikba, Yabin bira, alye weik ubuk. 24 Atalak arye deiyok koubuka, sik Israel nang arye, Kanaan mutuku taleamuk deiyoknye Raja Yabin ap, el yin talin nang ap, el mapu nirya ap ati, oplopnin yangalamika ani, sirya talak el ap, el tam nang nirya ap, obukabikce, sirya dakik. |
© 2023, Wycliffe Bible Translators, Inc. All rights reserved.
Wycliffe Bible Translators, Inc.