Hakim-Hakim 21 - Eipomek

Wel kilapu nirya ara, Benyamin yala nang, sik dopnamik kilapu kintinip deibika ati, sekik yupu

¹ Min talak noutam ara, Israel yala nang nirya bulubkabikce, Mizpa mutuku noutam yanuka wekikce, Allah Yahweh el kekenak ati nyabik. Ara, “Tonoknye ton, sik Benyamin yala nang ati, nunce delinyap wel kilapu ton, pia kum arenamabe. Sik Benyamin yala nang arye, “Nun tam kilapu kum donamake,” nyabuka, nyalin yupu deice arye, Israel nang arye nyapdayik.

² Nyabik bukni, sik Israel yala nang nirya, tamubuka Betel mutuku biyik. Tonda, Allah Yahweh el si eremeka dam biyikce, pia kutam tuku dipdongobuka, sik kanye pum tam ikin kanye bobukabikce bukmeka ani, lukunyan kibuk. Sik Israel yala nang nirya arye, bulubuka wekikce, engebukabikce nyanmek.

³ “Se Allah Yahweh, anda dipkoprob nun Israel nang, nun ni koproba Allah ulyame. An siuk erenyabe. Deiyok yata ati aning nirya ara, akunum upmal do? Benyamin yala nang ara, nun Israel nang kan-kan unyaka anya arye, nun yala weik ara tonoka. Unyak bukni, sik patalul ning ara, kum dopropmanto unyaka anya arye, kanye ikin kanye bobuka unyake. Nun babye atouk tenenyabe,” nyabik.

⁴ Ati, sik mapmeka ambusumto ara, beren tam talak aryuk, sik Israel nang ara, Betel mutuku adiparyuk Allah arena ati, domba totoa opnarye, uku dongonak, atalak el si mesba dobuka deibik. Aning akunum winibikopura, adiparyuk Allah Yahweh elti, si erena ap, el si kina ap ati, domba ato ning obuka boyayikce, uku dongobik. Tonda, ‘Allah ap, nun ap, teleb kibuka neika elana ap, teleb una ap unamapʼ tenen ati, ton teleb ning ap, yuk kambing ato ning ap, obuka kintinibikce, Allah Yahweh ati arebik.

⁵ Aning nirya akunum winibikopura, ‘Sik Israel yala nang, atalak aryuk ninye ayala-ayala yuk-yuk, Israel mutuku ulamik nang yala yuk-yuk, daulamik nang ap nirya ati, ton bulubuka Allah Yahweh el si renmeck bukni, Mizpa mutuku kum bulubuka wekmek nang ara, yata barye nang do?’ tenen, wipdayik. (Awinibik ning deiyok ara, ani. Min talak noutam ara, sikce nyapdayikce, nyalin yupu deibik. Ara, ‘Nunda dipkoprob nyababe. Ninye ton, ‘Allah Yahweh el si erena ati, Mizpa mutuku bulubuka yalulume,’ nyabuka yukupmaki bukni, kekebuka Mizpa mutuku noutam kum yanmakce nang do, kum yanmalinye tonok do, anang ati atalak aryuk ikin ning deibibirye, obibyopura, dadipnamake,’ nyabuka, akunum nyalin yupu deice arye nyabik.)

⁶ Nyabik bukni, Allah el ‘Naʼ tenen, nang Israel yala nang arye, sik kayapu nang Benyamin yala nang nirya ati bico ubuk. Bico ubukura, atalak ara sik Israel yala nang arye nyabik, “Kume asum ara, nun Israel yala nang weik aunyab bukni, nun yala nang, tonok mutuku noutam unyak yala nang ton, akunum wangapdanmake. Sikda akunum kum danmanto unyaka anya arye, “Se, nun ikin kanye bopmabe,” nyabik.

⁷ Nyabikce, ayupu ton dukdongobuka nyabik. “Ura, dipkoprob, min talak ara, Allah Yahweh el kekenak arye, nun nirya arye nyalin yupu deice arye nyapdeipdanamupue. Ara, “Nunce nun kayapu nang, sik Benyamin yala nang mitik tonun aunamak nang bukni, nunce delinamap kilapu dobuka, sik kil dona ati, ton pia kum arepnamabe,” nyabupe. Nyabupu bukni, wini talak ara, sik Benyamin yala nang arye, sik kil dona ati ara, nun tam kilapu ton pia kum donamak do? Yata wiriptibyeura, sik Benyamin yala nang arye kilapu ton dopting do?” nyabuka, nyapdayikce yupu talibik.

⁸ Ati sik adiparyuk bulubuka wekikce, pia moubuka tenipdeyikce, wibuka Israel yala nang tonok ton, Mizpa mutuku noutam yupu bulubuka weken talak ara, kum bulubuka binmek nang ton tenebikce bikik. Ara, “Yata winibik deice arye do?” nyabuka wekenmek. Nyabuka kanye tininmekce wekenmek talak ara, sik Israel yala nang noutam bukni, Gilead mutuku noutam ulamik nang, amutuku si ara Yabesh mutuku ulamik nang ara, Mizpa mutuku kum yanmek ati, akunum bikik.

⁹ Ara, Mizpa mutuku unmek talak, ‘Yata yala nang bulubuka yanmangu do?’ tenen, Israel nang ayala-ayala nirya, sik si yuk-yuk nyanmeka ani, sik Yabes-Gilead mutuku nang kan-kan, pia tonoknye babye ton, Mizpa mutuku kum bululbinmek ati, kum kel bikik. Sik Yabesh mutuku nang, tonoknye babye ton, si kum upmokba eibik.

¹⁰ Ati ara, Israel mutuku tam ulamik nang arye, sik amutuku-amutuku noutam arye, yukubikba, bulubuka wekelyanmek yin talin nang, sik yupa ara pia weik dua belas ribu nang (12.000), sik dopkwetebikce nyabik. “Anggunda otam Yabesh mutuku dam bimunce, sik amutuku unyak nang bukni, Yabesh mutuku nang olalbinamalume. Ara, wisi nang ap, wel nang ap, ninye akunum domik kilapu ap, sik mapu nirya ap, anang nirya ara, anggun parang ya arye olbimunce, sirya daknamlume,” nyapdeibikce, dopkwetebik.

¹¹ Aning dopkwetebikura, sikce Israel yala deiyok nang arye ayupu ton nyabik, “Yabes-Gilead mutuku noutam unyak ninye nirya opnamlulume. Tonda, ninye akunum domikiba, sik neika ulamikce kilapu nirya ap, akilapu nirya obuka sirya daknamalume. Sik nang nirya ara, Allah Yahweh el si erena atonun ning, ‘Ton bataknamapʼ tenena kume, anang nirya opmunce, tonok babye pia kam kum unamake,” nyabik.

¹² Nyapdeibikba, sik Israel tam yin nang arye anyabik touk binuka winibik. Bukni, anang olbinmek talak ara, Yabesh mutuku noutam ulamik wel kilapu ara, yupa weik empat ratus (400) eibik. Ara ninye dona kumce, ninye ap neika ton una kum kilapu weik tonun eibikce, tongobuka bobiyik. Sik awel kilapu nirya ara bobuka, Kanaan mutuku noutam bukni, mutuku si ara, Silo mutuku dam dobuka, Israel nang ulamik asik noutamuk bobiyik.

¹³ Aning akunum winibikopura, sik Israel yala nang, amutuku noutam ulamik nang, wibukabikce dopdeibikba, Benyamin yala nang ara, keil si uamuk mutuku bukni, amutuku si ara Rimon nyalamik mutuku noutam ulamik Benyamin yala nang, sik dam binuka, “Amapo, nun Israel nang ap, anggun amutuku noutam tuba kam ululum Benyamin yala nang ap, ansinibibirye, teleb kanye bopdabirye, mal olana pia kum, teleb ubuka neika unamabe,” nyabuka, nyalin yupu deice arye nyabik.

¹⁴ Ati ara, sik Benyamin yala nang, yupa weik enam ratus (600) nang nirya ara tamubuka, Israel nang ulamik sukum tamubuka yayik. Winibikba sik Israel yala nang, sikce ninye dona kumce, talye Yabes-Gilead mutuku ulamik wel kilapu ara, dobuka sik Benyamin yala nang, ara ninye kum opmek nang tuba aunmek nang ati arebikba, sik kilapu ati domik. Ura, awel kilapu nirya ara, yupa 400 uk ulamik bukni, sik Benyamin yala nang ara, yupa 600 unmeka ati ara, kil sukuk. Ton nang ara, wel kilapu sukuka ati, ton nang ara kum dobik.

¹⁵ Sik Israel tam nang arye, sik kayapu nang Benyamin yala nang ati, ‘Se, sikda kil ton kum doptinge. Yata wiriptingba, sik yala nang tunim abicak do?’ tenen, bico ubuk. Deiyok ara, Allah Yahweh arye mikip weik arebukba, Israel tam nang arye, sik kayapu nang, Benyamin yala nang ati, akunum malye kibikce, obuka sirya dakmanto akunum ubuk ati, Israel yala nang kan-kan noutam ara, lo weik ton auamuk.

¹⁶ Ati ara, sik Israel tam ninye deiyok kibuka ulamik nang nirya, Betel mutuku noutam bulubuka wekik nang arye nyabik, “Benyamin yala nang, sik ulamik mutuku ara, wel kilapu mitik tonun ton tuba kam unyake. Kilapu weik kum ati, yata upnamak do? Sik yala kum danamak do, kum do?

¹⁷ Ati ara, nunce yata ubuka winiptibyeba, sik Benyamin yala nang arye kilapu ton dopting do? Sikce akilapu ton kum doptingce, mapu deipdanin bakirye, yal dakdanin ban ning kum dala atia. Sik dam pia dadeipdanin banamak mapu kum dacopura, nun Israel nang kan-kan noutam arye, sik Benyamin yala dipkoprob kum danamle.

¹⁸ Sik yala ara, kum danana ara, nun like. Aning malye bukni, nun Israel yala nang arye, nun wel kilmapu ara, nunce ‘Telebe,’ nyaptibiba, sik Benyamin yala nang arye, nun kilmapu ara, pia kum dopsitinge. Deiyok ara, nun tam nang, Israel yala nang nirya ara, nun deiyoknye Allah kekebukak arye, ‘Sik Benyamin yala nang ara, nun kilmapu pia kum dopnamnyake. Yatanye do nirya, el kilmapu dobuka, sik Benyamin yala nang ati kalbikcopura, Allah arye anye biti supnamle,’ nyabuka, nyalin yupu deice arye kunum nyabupue!

¹⁹ Ati ara, tonok bisik ton aunmal ning ara, ani. Aketing tamun noutam ara, Allah Yahweh el si erena ap, si erebuka kina ap ati, weik kwalinyap ning ara, aketing tamun Silo mutuku aupmale. Ura, Betel mutuku atam bukni, eitam, (ara utara nyalamake) otam keting panalyangan tam ara, Silo weik asik ton domikba aubuk ati, weik sum uplyeba weik kwalina kintipnamake. Tonda, Silo mutuku aubuka ara, Betel mutuku arye Sikhem mutuku bisik bana ati, balamak bisik bukni, keting panalyangan tam ulule. Libanon mutuku ara, eitam, iknapye tam ulul bukni, asukum arye diprongobuka utam ara Silo mutuku ara (arah selatan) otam ubuk.

²⁰ Silo mutuku ara, sik Kanaan yala nang arye, weik kwalina kwalipnamaka ati, atalak ara, anggun Benyamin yala nang mitik tuba aunmalum nang nirya ara, adiparyuk, Silo mutuku dam bimunce, anoutam ara, sik anggur tapu duk wiamika noutam ara, duknulbinamlulume.

²¹ Akunum duknupmunyopura, amutuku noutam moubuka kalikinamlume. Atalak ara, Kanaan mutuku kilapu bukni, sik Silo mutuku wel kilapu arye, weik sum ap, weik kwalina ap ati, aketing tamun noutam kwalina ati, kanye deibuka yakirye, mot senamak talak ara, anggun talye karin arye anggur wa wiamikcak, duknupmamunye sukumuk kutukuka minopce yanamlume. Winipmunyopura, anggun Benyamin yala nang arye, sik Silo mutuku wel kilapu yuk-yuk bikbik abuka yamunce, adiparyuk tongopnamlume. Tonda, winipmunyopura, adiparyuk bobuka, Benyamin mutuku noutamuk bobimunce, anggunce akilapu dopropnamlulume.

²² Aning winipmunyeura, awel kilapu, sik ni yapu do, sik witcape arye do, nun dam yakirye, “Nun wel kilapu ubula dopropluma ara, yata deiyok ati do? Anggun tamubuka areplulume,” nyabuka moropsikcopura, nunce nyapnamabe. “Kume, dipkoprob nyababe, anggun kilmapu, otam Benyamin yala nang arye dopropmaka ara, adiparyuk ‘Telebe teneptumopura, sik Benyamin yala nang ati teleb kipdeipnamlume. Tonda, awel kilapu ara, sik Benyamin yala nang arye mal olanmek talak arye kum alubuka doprobik. Tonda, anggun Silo mutuku ululum nang arye, anggun kanye aryuk, akilmapu dobuka sik Benyamin yala nang ati kum arepluma anya arye, anggun ton malye kum uplume. Min arye, ‘Nun kilmapu ara, sik Benyamin yala nang ati pia kum arepnamabe,’ nyamlum yupu ara, kum yanipmalume. Aning kum bukni, sik Benyamin yala nang arye, anggun kilmapu ubula doprobika anya arye, anggun Silo mutuku nang arye, malye pia kum winipmalume. Ati ara, daupmalye,” nyabik.

²³ Israel tam nang arye, sik Benyamin yala nang ati nyabikopura, Benyamin yala nang arye, Dib winipnamabe,’ tenebikce, sik Israel yala nang arye nyapdeiamik touk winibik. Sik Benyamin yala nang nirya ara, awel kilapu ap, sal ap, tonok-tonok neika ansinibuka yuk-yuk, Silo mutuku noutam mot senak bindobik. Winibikopura, sik adiparyuk awel kilapu tamubuka Benyamin mutuku, sik mutuku uk biyik. Tonda, abiyik mutuku noutam nirya ara, mal olan talak uku dibuk asik dolamika nirya ara, ila tamubuka ton ap winiryuk asik dobikce, asukumuk ulamik. Winibikce, Benyamin yala nang nirya ara, amutuku talibuka ulamik.

²⁴ Tonda, sik Israel nang, ayala-yala nirya ap, ayala nirya bukni, ninye ap, sik mapu ap, sik kilapu ap yuk-yuk bukni, anang nirya babye, adiparyuk sik mutuku koproba, yuk-yuk binuka ulamik. Sik tamubuka sik mutuku koproba ara, amutuku cang nirya ara, yuk-yuk binuka talibuka ulamik. Ara, sik yala-yala yuk-yuk ap, tonda amutuku-amutuku yuk-yuk ap, amutuku noutamuk talibuka ulamik.

²⁵ Ura, asekmap yupu uamuk talak noutam ara, sik Israel yala nang talibuka una ati, ninye deiyok nang Raja ton pia kum ulamik. Amutuku noutam ulamik nang arye, sik kanye aryuk, ‘Aning ara pia teleb ning ani,’ tenepne touk winilamik.