Hakim-Hakim 19 - Eipomek

Ninye tonok Lewi yalanye ap, el neika mana ati, kil ubula dopromuk ning ati, sekik yupu

¹ Atalak nirya ara, Israel nang deiyoknye kibuka Raja kinang ton, pia kum ulamik. Tonok Raja babye, sik Israel nang ati, ton kum taleamukba talye urdem ulamik. Sik aninye niryada, sik kanye tenena deice arye, malye weik ulamik. Ninye deiyoknye Raja ton kum wipdeiamik talak ara, ninye tonok Lewi yalanye, talye bai mutuku daulamuk. Elda Efraim mutuku bukni, iknapye tam ulamuk. Amutuku ara, ninye weik ton kum ulamik. Mitik tonunuk daulamik. Anye ulamukce, elce wel kil tonok, Yehuda mutuku bukni, Betlehem mutuku ulamuk wel kil, dipkoprob dona kum bukni, talye yona ati, akil ubula dobuk.

² Winiryuk neika unmarik, bukni el awel kil arye, elti, wabukce, yuk nang ap neika malamik. Winilamukce, aLewi yalanye biti wabuk ati, anye batakukce, tamubuka el li koproba, el asik Yehuda tam bukni, Betlehem mutuku biyuk. Biyukce, el li dam ulamuk talak ara, wala dumbarye binuka daulamuk.

³ Binuka daulamuka ani, el domuknye, aLewi yalanye aminyan yayuk. Ura, elce akil yukupnirye, ‘Na aik boyanamneʼ tenen, biyuk. Abiyuk talak ara, elce ninye tonok, el pil melinanye ap, bobiyuk. Tonda, keledai basam bitinye ap bobiyuk. Amutuku noutam akunum biyukopura, akil arye bobuka, el li aik dam bobiyuk. Bobiyukopura, akil el li birye anye akunum eibuk. Eibukura, el li adiparyuk anye biti, kanye deibukce, talibuka kibuk.

⁴ Tonda, akil el libirye, Kume anye biti, el mutuku ara tamubuka kum binamarake,’ tenebuk. Ati ara, like winilye anyuk unmek. Tonda, din ning dina ap, mek dina ap, mana ap nirya ara, el kil ubula domuk kil ap, neika el li aik anyuk ulamik.

⁵ Like dumbarye akunum ubukopura, beren tam ara, sikce, ‘Arup binamapʼ tenen, kitinibik. Bukni, akil el li birye aLewi yalanye biti nyabuk. “Din dibipyeura, mikip upsilibuk, anggun binamarume,” nyabuk.

⁶ Nyabukopura, el Lewi yalanye ap, akil el li koproba ap abukmekce, sik anang nirya ap, neika kwaning ap, mek ap, dinmek talak ara, anyaikuk unmek. Bukni, el adiparyuk tikukce, ‘Binune,’ tenebuk. Utenebuk buk, akil el li birye, “Balona ara kume,” nyabuka yukubuk. “An kanye ara, pia teleb kanye uk bopmince binamlyame,” nyabuk. “Tonda arup ara, anyuk mapnamabe,” nyabuk.” Nyabukopura, Lewi yalanye aunmoka ani, lukunyan ton amabik.

⁷ Aning atouk, sik damapmeka ani, bereknamok talak arye, ‘Atalak binamapʼ tenen, kintinibuk. Bukni, akil el li birye, Lewi yalanye biti nyabuk. “Arup ara, anyuk mapnamabe,” nyabuk.” Nyabukopura, Lewi yalanye aumuka ani, lukunyan tonok ton amabik.

⁸ Aning atouk, like pamubarye sum ara, pia beren tam koprop arye, aLewi yalanye birye, ‘Nara binamne,’ tenebuk. Utenebuk bukni, atouk akil el li birye nyabuk, “Ura, din dibibirye, aminyan ara binnamdurume,” nyabuk. Nyabukura, sik bitinye nirya, nemalyap arye adinmek talak aryuk keting akunum kum ubuk.

⁹ Winibukopura, Lewi yalanye ap, el kil ubula domukce domuk kil ap, tonda el pil melinanye ap arye, ‘Nun binuyabʼ tenen, kintinibik bukni, akil el li birye nyabuk, “Kao, arup ara akunum inipnamale. Ati kuna daknule. Teleb ning ara, nun kanye pia teleb aryuk amapnuyabe. Mapmapya ani, ambusum beren tam koprop arye, bukmunce, anggun asik tamubuka binamalume,” nyabuk.

¹⁰ Bukni, aLewi yalanye elda, ‘Asukum mana na lik,’ tenebuk. El ap, el kil ubula domukce domuk kil ap ara birik. Tonda, el pil melinanye ap, keledai basam bitinye ap, kintinip deibuk. Ura, sik akeledai basam balye deice, el ngang dam deibik ning, ninye bukuka ban ning, el si pelana, aning deice bukuka, sik nirya neika biyik.

¹¹ Abanmek bukni, akunum ipnamok talak dam ubuk. Ara, Yebus nyalamik mutuku dam biyik. (Ura, amutuku si ati nyalamika ara, Yerusalem mutuku ton nyalamik). Amutuku biyikopura, anye el pil melinanye birye, el deiyoknye biti nyabuk. “Naio, nunda tia ati, Yebus yala nang, sik mutuku anyuk maptibye do?” nyabuk.

¹² Nyabuk bukni, el deiyoknye birye tamubuka nyabuk, “Kume, nunda amutuku ara, sik Israel yala nang ton kum unyake. Yuk yala nang dem unyakak ati, amutuku noutam ara, nun dikdik kum sepnuyabe.

¹³ Ati, nun tonap mitik tonun dukdongobuka banmapya ani, otam Gibea mutuku dam do, Rama mutuku dam do, binuka mapnuyabe,” nyabuk.

¹⁴ Ati ara, sik adiparyuk dukdongobuka banmeka ani, Yebus mutuku dikdik, ton kum sebik. Abanauk unmeka ani, Gibea mutuku bukni, sik Benyamin yala nang ulamik mutuku noutam banmek talak ara, keting adiparyuk akunum kumubukce inibuk.

¹⁵ Ati, sik amutuku noutam biyikopura, ‘Nunda tiya ati amutuku binuka mapnuyabe,’ tenebik. Utenibikce, anyasik dolamik noutam binuka wekikce, pala weik tuku arye kintinip deibikak, ninye bukukapnarye yupu sisiklamika dam biyikce, amutuku aik dam tuku deice binuka bukmek. Abukmek talak ara, ninye ton amutuku nang kan-kan arye, tonoknye babye ton, yanuka neika mana ati, ton yukubuka sik aik kum bobinmek. Talye batakmekba, asukumuk bukmek.

¹⁶ Abukmek bukni, inibuk talak ara, sik amutuku asik dam lilun tam tuba bukmek. Abukmek bukni, wisinye tonok, el wa wilamukak arye, wa winmoka ani yayuk. Dipkoprob el deilin mutuku ara, iknapye tam bukni, Efraim mutuku noutam deiamik. Bukni atalak ara, tiya ati Gibea mutuku noutam ulamuk. (Atalak ara, Gibea mutuku noutam ulamik nang ara, sik Benyamin yala deiyok nanguk ulamik.)

¹⁷ Awisinye yayukopura, dinmokbuk, elce aLewi yalanye amutuku noutam asik damuk binuka bukmokak yanuka eibuk. Eibukce asipdeyuk, “Amio, an dan mutukunye do? Tonda, an dan mutuku binamlam do?” nyabuka, asipdeyuk.

¹⁸ Nyabukba, Lewi yalanye birye tamubuka nyabuk. “Nunda winiryuk Yehuda mutuku noutam bukni, Betlehem mutuku arye yanganmabe. Tonda, winira nun asik, ‘Na mutuku koproba tamubuka binamapʼ tenen, onirye banmabe. Ara, nun mutuku mitik asik ara, iknapye tam bukni, Efraim mutuku binamabe. Ati na deipnik mutuku ara, Efraim mutuku arye deipniknye unune. Ati nun amutuku noutam, abukmap bukni, amutuku nang arye, nun ton kum yukupmasiyakce, ‘Nun asik neika mapnuyabe,’ kum nyapmasiyaka ati ara, talye abukmabe.

¹⁹ Tonda, nun yuk-yuk ning ton pia kum patanmasila ati, kum moropnamsiyabe. Nun din kwal ara, nunda atuba lipmabe. Tonda, nun keledai basam manak ara, kel-kel abuk dilamik manmaning ap, sik din ning yala-yala nirya ap ara, akunum lipmabe. Atonun na ap, na kil ap, tonda na pil melinanye ap, nun din ara, roti kwaning ap, anggur mek ap akunum libube. Bukni, ‘Aikuk maptibyeʼ tenen, patapmasilba, abukmabe,” nyabuk.

²⁰ Nyabukopura, awisinye birye tamubuka nyabuk, “an ilil una meme. Narye melipnamakine. Amutuku noutam asik dokirye, asik dam batakmasiak ara, mana meme. Na aikuk neika mapnuyabe,” nyabuk.

²¹ Nyabukce, adiparyuk anang nirya dobuka, el aik bobiyukopura, anang sik keledai basam nirya ara, din arebukba dibik. Tonda, el aik yanmek ninye asik nang, sik yan nirya ara yan mek likeibukce, din arebukba, sik nirya neika din dinmek.

Sik Gibea mutuku nang arye, pia malye winibik ning ati, sekik yupu

²² Sik anang nirya kanye deibuka anyaik noutam bublan tirikdongobuka wekik talak ara, amutuku noutam ulamik nang, yuk nang sik yu weik nang bikna kum talak arye yayikce, anyaik nirya warikuka aknapdongobik. Ayu nang mikip arye anyaik bublan yanuka lourum-lourum anmekce, anyaik wisinye biti nyanmek, “Ance an aik bobuka binmalamnye bira, pola dobuka, nun arepsilyame,” nyabuka moronmek. Arepsiminyopura, nunce anye nun tenepmap touk, pia malye kipdeipnamabe. Ara nun saluk unmabakuk bukni, anye ap neika mapnamabe,” nyanmek.

²³ Awisinye bublan kukuka bai tam yayukce, sik anang ati nyabuk, “Se na kayapu anang, anggunce, ‘Winipnamabe,’ tenepnalum ning ara, pia meme! Anggun nirya ati, narye dipkoprob nyapsine. Pia malye un ning yala nirya ap, tonda ninye arye tenena kum ning nirya ap ara, pia winina meme. Ati ara, anye elda ninye asik nang, na aik yanmaka ati, el dobuka anggunti kum arepsitinye,” nyabuk.

²⁴ Nyabukce, ayupu ton dukdongobuka nyabuk. “Bukni, anggun yakana ati ara, anye birye doprobukce domuk kil, narye akil dobuka talye arepnamasine. Tonda, narye deipse wel kil, ninye dona kum kil ara, el ap sik bitinye kilmapu uk arepnamasine. Anggun awekmalum nang arye, ‘Winipnamabe,’ tenepmalum ning ara, atenepmalum touk akilapu bitinye ati, winipnamalume. Bukni, anggunda ninye asik ninye, na aik yanmaka ati ara, ‘Malye kipdeiptibye,’ tenepmalum ning ara, pia kum winipnamalume. Aning ara, pia meme,” nyabuk.

²⁵ Bukni, aning ara sik yu nang arye awisinye nyanmok yupu nirya pia moubuka kum kekebik. Winibika ati, el Lewi yalanye el ubula doprobukce, domuk kiluk dobuka, bublan kukuka, sik amalye nang wekmekce moronmekak dopkwetebuk. Dopkwetebukopura, sik ayu nang nirya arye, sik dikdik sena kumce, alukunyan noutam nirya, pia malye weik unmekce, akil yobuka, malye kinmeka ani, berekuk.

²⁶ Akunum berekukopura, beren tam talak aryuk awel kil tamubuka, el domuknye unmokak biyuk. Biyuk bukni, awisinye el bisik bublan dam ara, el domuknye babye anyaik unmokak binuka daksakuka poulbiyuk. Anyaik damuk upmoka ani, berekukopura, beren tam talak babye, pia asukumuk upmok.

²⁷ Aberen tam talak ara, el akanye ubula dopromuknye bira, bukuk. Tonda, el aik pum arye bukuka binuyuka ati, anyaik bublan kukukce, el kil ubula arye dobuka domuk kil, anyaik bisik bublan damuk, wirikuka mapmokce, akil el taruk ara, bisik bublan talipdongopmokak eibuk.

²⁸ Eibukopura, adiparyuk el kil ati nyabuk, “Wini talak ara, nun binunama ati, bukmince, tiklyame,” nyabuk. Nyabuk bukni, el kil ubula arye dobuka domuk kil ara, akunum dipmoka ati ara, yupu ton tamubuka kum nyabuk. Winipmoka ati, anye birye atalak ara, el kil dipmoka nong tomobuka, keledai basam balye deice deibukce, koupdongobuk. Winibukopura, el Lewi yalanye adiparyuk bobuka, sik asik tamubuka bobiyuk.

²⁹ Akunum sik asik bobiyukopura, el Lewi yalanye sik aik pum tam wekukabukce, parang ya boyayukopura, el kil ubula arye dobuka domuk kil dipmoka, el nong sekuka kaliplobuk. Ya arye akil nong sekuka kalibuk ning ara, 12 kalibukce sekuka deibuk. Aning akunum winibukopura, el Lewi yalanye birye el kil kalipdoba, nirya ara, bokukabukce 12 aupmok touk, sik Israel yala nang ulamik mutuku 12 uamuka ati ara, kalipdoba 12 dopkwetebuk. Amutuku-amutuku yuk-yuk bukni, amutuku nirya kalipdoba, yuk-yuk tonok-tonok, sik dam dopkwetebuk. Tonda, akil el nong sekdoba ap, yupu ap dopkwetebuk talak ara, aning arelbana ati ara, ninye ton wibuka dopdeibukce, ‘Ayupu nyalbanamlume,’ nyabuk yupu ara, ani. ‘Nun Israel yala nang, Mesir mutuku noutam arye, bobuka yangalamupu talak arye diprongobuka, daulamupu ani, aunmab sum babye, apia malye weik ning atonun ning ton, pia kum winilamukba, kum elilamupu,’ nyabuka nyapnin banmamunce, asekdoba ara, Israel yala nang nirya unyakak arelbinamlulume,” nyabuk.

³⁰ Winibuka arelbanmek talak ara, amutuku-amutuku ulamik Israel nang nirya ara, aning eibikce nyabik, “Se anango, aning ara, nun dam ato ning ton pia kum usulule. Aning atouk ton pia kum elilamupu. Nun, Israel yala nang Mesir mutuku noutam arye, yangalamupu talak arye diprongobuka, anoutam talak babye, arup babye, apia malye ning ton kum winilamukba, pia kum elilamupu. Ati ara, nun Israel yala nang nirya ara, mangkau asa kum unamabe. Nunda pia yupu moubuka nyana ap, tonda ‘Aning ara yata ati upmal do?’ nyabukabibirye, nunce, ‘Aning winibuka ati ara, yata winipnamap do?’ tenen, yupu talipnamabe!” nyabik.