Hakim-Hakim 18 - Eipomek

Mikha birye, si erelamuk ning patung ara, Dan yala nang arye doprobika ati, sekik yupu

¹ Atalak nirya ara, Israel mutuku ninye deiyok kibuka Raja upman nang ton, pia kum ulamik. Tonok Rajanye babye, sik Israel nang nirya ati, ton kum taleamika arye, talye dem ulamik. Tonda, atalak babye, Dan yala nang arye pia tuba, ‘Nun mutuku eibibirye, bindobibyopura, amutuku tuba daunamapʼ tenen, pia elamik. Deiyok ara, sik Israel nang yala yuk-yuk ati, Israel deiyok nang arye, mutuku ton akunum bokuka arebikba, ayala-yala nang arye, Kanaan mutuku nang obuka sirya dakikce, amutuku dopromik bukni, sik Dan yala nang ara, ton kum dopromik. Sikce, ‘Asukumuk pia unamap,’ tenyamik mutuku ara, Kanaan nang tuba taleamika ati, Dan yala nang arye, anang obuka yakdonokikce, sik tuku ton kum dopromik.

² Ati ara, sik Dan yala nang kan-kan arye, ninye pamubarye (5) nang ton, pia teleb nang, ilil una kum nang etekdop nang wipdeibik. Apamubarye nang ara, sik yala nang bukni, sik ap neika amutuku noutam ulamik nang wipdeibuk. Ara, weik asik domikak, Zora mutuku ap, tonda Esytaol mutuku ap ulamikce, deiamik nanguk wipdeibuk. Winibikopura, sik apamubarye nang ati, “Otam mutuku nirya ara, amutuku unyak nang yata wiribuka unyak do? Tonda sikce talinyak mutuku ara, yata wiribuka unyak do? ‘Anang ara, obuka sirya daktibirye, sik mutuku nirya alubuka doproptibye do?’ tenen, dilbinamlume,” nyabik. Nyabik ati, sik apamubarye nang adiparyuk dilbiyik. Tonda, Efraim mutuku iknapye tam mutuku ton dilbiyik. Dilbinmekce, Mikha el aik ton eibikura, asukumuk binuka mabik.

³ Sik Mika aik wekelbiyikopura, anyaik pum tam unmek nang arye, nyanmek yupu kekenmek ara, welnye Lewi yalanye birye yupu nyanmok. Anyanmok yupu nirya ara, sik Dan yala nang arye, anye nyanmok yupu kamo kekemek. Ati, anang sikce el dam binuka asipdeyik. “Anda yatanye birye amutuku boyakuk do? Yata deiyok ati amutuku ulyam do? An amutuku ara yata pil talibuka domince, yupu nyalyam do?” nyabuka asipdeyik.

⁴ Asipdeyikba, awelnye birye tamubuka nyabuk. “Kume, na amutuku noutam ununa deiyok ara, Mikha elce nyapnuka deice arye unune. Mikha elce, Anye na melina ati, imam pil talibuka donamnileʼ tenen, wipdeipnuke. Tonda, elce na pil donun ning ati deken ning ara, elce arenulule,” nyabuk.

⁵ Lewi yala welnye birye nyabukura, sik Dan yala nang arye tamubuka nyabik. “Ati ara, nun yanmaba ati, ance Allah ati asipdenulyame. Dipkoprob sik anang ara, amutuku yanuka ukirye, omutuku dilbinamaka ara, nong upnamle do, kum do?’ nyabuka, Allah ati asipdenulyame,” nyabuka morobik.

⁶ Nyabuka morobikura, aimamnye birye tamubuka nyabuk. “Yo ura, telebe. Anggunda, ‘Se,’ tenena pia kume. Allah Yahweh arye, anggun banamlum ning ati, pia kalikuka dinamsile. Elcuk melisiliba, telebuk unamlume,” nyabuk.

⁷ Ati ara, apamubarye nang banmeka ani, Lais mutuku biyik. Biyikopura, amutuku noutam ulamik nang ati, moubuka dinmekce teninmek. Ara, ‘Se, sik Lais mutuku noutam unyak nang, sik nong ara, dipkoprob Sidon mutuku nang ulamik touk unyakba eipmabe,’ tenebik. Sikda, ilil kanye bona kumce, ‘Yuk mutuku nang mal olyanamsiyak do, yuk ikin ning nun deice upnamsil do?’ tenena pia kumce, talye mangkau kanye bobuka unyake. Tonda, ‘Sidon mutuku unyak nang dam, kum unyak bukni, sikce talyak bona ap, yuk teleb ning ap ara, aning yala-yala nirya weika arye, talibuka unyak anya arye, tonoknye babye, pia kum patalule. Tukwak mutuku noutam aubuk ning nirya ara, weika arye talinyake. Sikda ikin pia kum unyake. Sik unyak mutuku ara, Sidon mutuku atouk unyake. Mutuku sirika unyak bukni, aning-aning nirya sukulongona kumce, teleb aryuk unyake,’ tenebikce bikdeibik.

⁸ Lais mutuku awamuk ning nirya eibuka bikikura, ila tupto tamubuka sik mutuku ap, sik kayapu nang ap ulamik sukum, Zora mutuku ap, tonda Esytaol mutuku ap tamubuka biyik. Biyikopura, sik yala nang arye asipdeyik. “Ura, otam mutuku eipmaluma ara, yatato yupu boyanmasulum do? Yatato ning eipmaluma ati, yupu nyapnamasulum do?” nyabuka, asipdeyik.

^9-10 Asipdeyik ura, sik pamubarye nang arye nyabik. “Kume, wini talak ara, yamunyeba nun nirya adiparyuk, Lais mutuku mal pi binuyabe. Winira otam akunum binuka unamabe. Tonda amutuku ara, pia teleb mutuku eipmabe. Pala weik mutuku ap, ninye weik unyak mutuku ap, tonda aning-aning yala-yala nirya aulye mutuku eipmaba ati, amutuku ara pia teleb ulule. Ati ara, anggun aunmalum nang ara, kekenmalum do? Talya mangkau asa bukmalum do? Nun kanye ara, minopce otam mutuku bibirye, amutuku alubuka dopropnamabe. Amutuku unyak nang ara, talye kanye bobuka unyake. Anggunda, ‘Kanye mouplulume, otam nang arye mal piyanamsiyakʼ tenen, kintinipnamabe,’ kum tenenyake. Teleb kanye bobuka unyake. Ati, nun tenenyaba ara, nun ni koproba Allah, elce mikip arepsilyeba, otam nang malye kipnamabe. Allah arye amutuku noutam nirya dobukapsilirye, nun Dan yala nang ati arepnamsile,” nyabik.

¹¹ Sik anang arye nyabikura, Dan yala nang nirya arye kekebik. Akunum kekebikura, Zora mutuku ulamik nang ap, tonda Esytaol mutuku ulamik nang ap arye, sik Dan yala nang yupa ara, pia weik, enam ratus (600) nang arye, ‘Mal olalbinamap,’ tenebikce kintinibik. Ara, sik mal olan ning, yin ap, ninye on ning, yuk ning ap ara, adiparyuk kintinibuka bobikce, ‘Opdanamabʼ tenen, pi biyik.

¹² Ura adiparyuk, sikda keting kumulban tam Kiryat-Yerim mutuku tam bukni, Yehuda tam biyikce, asukumuk tenda aik dobuka unmek. Winipmeka ati, amutuku ulamik ninye arye, amutuku ati, ‘Mahaneh-Dan mutuku,’ nyalamik. Tonda, tuba ayupu sekupu talak babye, amutuku si ara, asi uk tuba nyanyake. Sik yupu deice arye, ayupu deiyok ara ani. Ara, ‘Dan yala nang arye, sik tenda aik domika aniʼ tenen, nyalamikce, tuba nyanyake.

¹³ Ura, amutuku arye pia otam mutuku adipdongobuka balamika ani, Efraim mutuku bukni, iknapye tam yayikce, Mikha el aik dam koprop panalbiyik.

¹⁴ Mikha aik dam akunum binuka unmek talak ara, sik pamubarye nang, ara Lais mutuku dilbinmek nang arye, nyabik. “Nun kayapu, anggun ton akunum bikmalum do? Anyaik noutam ton, ninye urasin ato ning patung memepdeibikce, kat ning perak arye taplak dongamik ning ap, tonda yuk talye ning si erena ati, mitik patung ton memepdeiamik ning ap ara, anyaik pum tam aulule. Aning bikilulum do? Aning atouk, tonda, Allah arye ninye ati, ‘Winipnamlume nyabuka,’ lak len ning, el si efod baju ton, anyaik pum tam aulule. Ati ara, anggunce, ‘Yata winipnamap do?’ tenen, tenipnamlulume,” nyabik.

¹⁵ Nyabika ati, sik Dan yala nang arye, atalak aryuk Mikha aik dam biyik. Anyaik noutam babye, Lewi yala welnye ton aulamuk. Ulamukba, sik apamubarye nang arye elti, “Telebe,” nyabikce yanuka, yupu talipmek.

¹⁶ Ayupu talepmik talak ara, sik Dan yala ninye yin talin nang yupa pia weik enam ratus (600) nang, sik mal olan ning yin ap, mal duk nirya kintinip deibikce, anyasik dolamikce, antapdongobuka domik keil poka dam bukni, anyasik bisik wekelbana ati, weik bublan memebuka terekamik dam binuka tikmek.

¹⁷ Abublan dam tekmik talak ara, sik apamubarye nang ara, ‘Amutuku noutam yata wirilul do?’ tenen, yanuka dinmek nang ara, anyasik noutam wekik. Wekikura, yo deiceak puturubukabikce, ninye urasin atonun memepdeiamikce, dekna weik kat ning, el si perak arye taplak deiamikce, domik patung ap, tonda yuk yala mitik patung ap, tonda kain efod ap ara, ‘Aning dopropnuyapʼ tenen, anyasik yanuka wekik. Aning nirya dolonmek talak ara, Lewi yalanye welnye bira, sik enam ratus (600) yin talen nang ap, neika weik bisik bublan dam tikmek.

¹⁸ Apamubarye nang akunum Mikha aik wekikopura, elce deiamuk efod ap, ninye urasin ato patung ap, mitik-mitik patung isa si erelamik ning ap doprobik. Winibuka doprobikura, Lewi yalanye welnye birye asipdeyuk, “Aning ara, yata deiyok ati wininmalum do?” nyabuka, asipdeyuk.

¹⁹ Nyabuka asipdeyuk buk, sikce tamubuka nyabik, “Anda yupu nyana bataklyame! Asinmasilama ara, pia meme. Nunce nyapkipye touk, melibuka nun yupu dem kekenamsilyame. Ati aminyan talak anda, nun imamnye ap tonda, nun ni koprop atonun, nun yupu nyana deiyoknye kipdeipnamkiyabe. Imam tonok mapu silip atibuk kiplum ning ara kume. Pia teleb ning ara, tonok mutuku yala nang nirya ati, yupu lilsisikina ap, imam kina ara, pia telebe!” nyabik.

²⁰ Ayupu nyanmekopura, aLewi yalanye welnye, sik anyanmek yupu pia moubuka kekemok. Kekenmoka ati, kain efod ap, tonda ninye urasin ato ning, patung-patung ap, isa si erena mitik-mitik patung ap, aning nirya ara, doprobukopura, sik ayupu nyanmek nang ap, neika biyik.

²¹ Akunum winibikopura, sik Dan yala nang nirya ara, sik min arye balamik bisikuk dukdongobuka biyik. Bisik banmek talak, sik menekuka banmek ning ara, ani. Ara, sik mapu ap, ninye arye weilamak kam ning ap, tonda sik bona yala-yala nirya ap ara, menekuka bobanmek bukni, sik yin talen nang ara, aminyan tam yanganmek.

²² Aning akunum winibuka banmeka ani, yuk sukum otam mutuku akunum biyikura, Mikha birye el ap, el kayapu nang, anyaik pum tam neika daulamik nang nirya ati, yukubukba, yayikopura, sik ap neika, ansinibuka, Dan yala nang binmek bisik dobolbiyik. Dobolbanmeka ani, sik anang dam sengnel biyik.

²³ Mikha el tam nang nirya weik yupu arye yukubik. Yukubikba, sik Dan yala nang arye tamubuka dipdeyikce, Mikha biti asipdeyik, “Anda yata ati, ninye pia weik bopmalamce nun aminyan yanganmalum do?” nyabuka asipdeyik.

²⁴ Asipdeyik buk, Mikha birye tamubuka nyabuk. “Kume, anggunda puturupdeiamse ning, isa si erena ati, ninye urasin ato ning patung-patung ap, na imamnye, Lewi yalanye welnye ap, ubula dobuka, bobinmaluma atia. Winipmanulumba, nara aning deiyok pia kum upmanila ati, anggunce, ‘Yata wiripnamal do?’ nyabuka, asipdenulum ning ara, yata deiyok ati, ayupu nyapmanulum do! Talya tunim abuka buknaman do? Kume,” nyabuk.

²⁵ Nyabukba, sik Dan yala nang arye tamubuka nyabik yupu ara ani. “Anda kanye moubuka tenipnalyame. Pia teleb ning ara, anda yupu tanabataknulyame. Ato yupu nyapminyeura, sik yu nang nun kan-kan unyak nang kekepkikcopura, an dobuka weik tonun wenepkikirye, opnamkiake. Winipsikceba, an ap, an aik ninye ap ara, dipnamlume yabik.

²⁶ Ayupu akunum nyabikopura, sik Dan yala nang nirya ara, bobuka sik balamik touk, ubuka otam mutuku biyik. Mikha birye menekmokura, banmek bukni, ‘Se, sikda mikip weik unyak bukni, na mikip ara, mitik tonunuk unulula ati, daupmalye, na bataknirye, na asik tamubuka binamane,’ tenebuk. Ati, sik Dan yala nang ara, pera otamto banmekbuk, Mikha bira mikip asa arye, el asik dam bikbik abuka bindobuk.

Sik Dan yala nang arye, Lais mutuku nang obuka, sirya dakik ati, sekik yupu

²⁷ Dan yala yin talen nang arye, Mikha birye memebuka deiamuk patung-patung ap, efod ap, dekna weik ning perak arye memamuk ning ap, tonda el melina ati Lewi yalanye welnye, imam pil dolamuknye ap nirya ara, akunum ubula dobuka bobiyik. Winibikopura, sik atalak aryuk Lais mutuku olbiyik. Ura, sik Lais mutuku ulamik nang ara, pia kanye teleb arye ulamikce, yuk mutuku nang ati, olana pia kumce, teleb kanye bobuka ulamik. Winibuka ulamikbuk, sik Dan yala nang arye, Lais mutuku nang ati mal pibiyik. Winibikce, sik asik nirya ara, uku dongobuka sirya dakik.

²⁸ Amutuku noutam ara, tonok lu pia weik mutuku ara, el si Bet-Rehob mutuku uamuk. Dan yala nang arye sik Lais mutuku nang nirya opdayik talak ara, yuk mutuku nang arye, Lais mutuku nang ati, ton yanuka kum melibika deiyok ara, sik Lais mutuku nang ara, pia bai noutam ulamik. Ulamika arye, sikda yuk mutuku nang ap yupu ton kum nyaldalamek. Sikda, pera weik mutuku, Sidon mutuku dam kum ulamik. Pera weik mutuku otam ulamik ati, yuk mutuku nang arye, sik Lais mutuku nang melina ati, ton yanuka kum melibik. Dan yala nang arye, Lais mutuku malye kibikce, sik domik asik nirya uku dongobuka, sirya dakik bukni, aminyan talak ara, sik Dan yala nang aryuk, amutuku asik nirya punubuka dobikce, amutuku talibuka ulamik.

²⁹ Amutuku ati punubikce, amutuku bukni, winiryuk si sibik mutuku ara, Dan mutuku nyabik. Asi nyabika deiyok ara, sik apu yapu arye deibikba, dadeipdanin yangalamik nang arye, nyalamik siuk dobik. Tonda, sik apu deiyoknye, el si ara, Dan nyalamik. Tonda, amutuku si Dan nyabika deiyok ara, Yakub elce deiamuk mi Dan biti, asi tenibuka si dobik. Bukni, minop talak ara, amutuku si ara, Lais mutuku nyalamik.

³⁰ Talya ning si erena ati, ninye urasin atouk ning puturubuka deibik ning ara, apatung isa mer si erelamik ning ara, Mikha aik pum tam arye ulubuka doprobikce, bobinamik patung-patung nirya ara, aning erepdeibikce, isa mer siuk erelamik. Winibikopura, Musa birye deiamuknye, el si Gersom, el anye birye deiamuknye Yonatan ap, tonda Yonatan birye deibukba, dadeipdanin yangalamik nang ap, sik Dan yala nang ati, imam atouk pil dolamik bukni, isa si erenauk ulamik. Sik adeipdanin yangalamik nang arye, imam nang kibuka deipdanin yangalamikce, isa siuk erelamik. Winibuka upnin yangalamika ani, aminyan dowinipnamuk talak ara, yuk mutuku nang yu weik nang arye, aminyan talak mal olyayikce, sik Dan yala nang ati obuka sirya dakikce, anang tomobukabikce, tapu koubuka, sik yuk mutuku bobiyik.

³¹ Tonda, Mikha elce ninye urasin atouk ubuka puturubuka deiamukce domuk ning patung ara, talye isa mer si eren ning ara, perak taplakuka memamuk ning ara, sik Dan yala nang arye alubuka doprobikce, min talak Lais mutuku nyalamik bukni, Dan mutuku nyalamik mutuku noutam deibikce, isa siuk erelamik. Amutuku ulamik talak nirya ara, Allah Yahweh el si erena aik, dipkoprob ning ara, sapi bol arye doltakna aik domik ning ara, Silo awamuk bukni, sik Dan nang arye, ‘Allah aik ara, dam aukuke,’ tenena kumce, sik isa siuk erelamik.