Hakim-Hakim 17 - Eipomek

Mikha birye, ninye urasin atonun ning, patungak, si erelamuk yupu

¹ Ninye tonoknye el si Mikha. Elda Efraim mutuku iknapye tam bukni, lilun tam daulamuk.

² Tonok sum ara, Mikha birye el lin bak nyabuk. “Nongo, an keil uang dekna weik ning, perak seribu seratus (1.100) wangamtuma anyak, na kekenak arye, ubula dopmatunye biti, an nin birye supmakua ara, na ton kekepse. Bukni, nongo atia. Nongo, an keil uang dekna weik ning, perak ara, narye an keil uang dekna weik ning perak, ubula dopropmakunu ning ara, tamubuka arepkine,” nyabuk. Nyabukopura, Mikha el lin birye tamubuka nyabuk. “Kume, ubula dopropnulum bukni, ila tamubuka arepmanilama ati ara, na mi anda ‘Nun ni koproba Allah Yahweh arye, pia teleb updeipkiliba, pia telebuk unamlameʼ tenen, Allah moronamkine,” nyabuk.

³ Mikha birye el lin dekna weik ning perak ara, tamubuka arebuk. Arebukura, el lin birye tamubuka nyabuk,” Dipkoprob anda na mi, narye ubula dopromuknye biti sikti, nyamse yupu ara, dipkoprob akunum luba kipne. An deice kum upnamkile. Ati ara, na Allah Yahweh si erena ati, na dekna weik kat ning, perak arepne. Aning arepnyopura, aperak deice ak, na mi ance, ninye urasin ato ubuka, patung memepnamlyame. Sik patung memen nang arye, perak taplakalinamake. Ati, akeil uang, perak ara, anti tamubuka arepkine,” nyabuk.

⁴ Ura, dekna weik ning, keil uang perak ara, Mikha birye el lin tamubuka arebukopura, el lin birye uang weik tonun ton, dua ratus (200) keil uang perak taplakukabukce, memepdeibuk. Tonda, auang dobuka, ninye tonoknye birye, perak puturuna kel weiknye bak arebuk. Winibukopura, elce anye biti, “Ninye urasin ato ning memepmince, patung tonok dopnalam ning ara, adekna weik ning perak dobuka, aning deice taplak deipmince dopnalame. Winiminyopura, amemep deipminye patung, ninye urasin ato ning ara, na mi Mikha el aik pum tamuk deipnalyame,” nyabuk.

⁵ Ura, Mikha bira, el min arye isa si erelamikak ati, el aik pum tonok akunum memepdeiamuk. Akunum memepdeiamuka ati ara, yata barye patung nirya, yuk mikip ning ap, isa si eren ning ap, delilamukak awamuk. Tonda, Mikha birye baju tonok kintinip deibuk. Ara, sik imam nang arye, ‘Nun walwal upsilye talak ara, Allah arye, ‘Wininamlume,’ nyabuka laka nyan ning bikina ati, aning eibibirye kel biknamapʼ tenen, kain deice, kain efod ato ning, Mikha birye kintinip deiamuk. Tonda, talye ning si erena ati, ninye urasin ato ning, patung ton memepdeiamukce, elce deiamuk mi tonok wipdeibukce, “Anda na melina ati, imam nang dolamak pil talibuka donamnilame,” nyabuka, el mi tonok eredeibukba, apil talibuka dolamuk.

⁶ Anoutam ara, sik Israel yala nang, sik ninye deiyok nang, Raja nang ton kum ulamika ati, amutuku-amutuku nirya ara, yupu talibuka kum lipsisiklamik. Israel nang ara, talye dem ulamik. Winibuka ulamik talak nirya ara, yatanye do nirya, sik yuk-yuk bukni, sik dem kanye tenepropne touk, ‘Aning ara dipkoprob ning,’ tenepnopura, aninguk winilamik.

⁷ Dawinibuka ulamik talak nirya ara, ninye kamnye tonok, elda Lewi yalanye ulamuk. Minop talak elda pala weik mutuku tam, Yehuda mutuku bukni, anoutam mitik asik dolamikak ara, Betlehem mutuku binuka ulamuk.

⁸ Bukni, atalak ara, el anye adiparyuk Betlehem-Yehuda mutuku batakukce, ‘Yuk mutuku ak binuka unamneʼ tenen, epnin balamuk. Epnin balamuka ani, Mikha Efraim mutuku iknapye tam ulamukak binuka eibuk.

⁹ Biyukopura, Mikha birye aLewi yalanye biti asipdeyuk, “Na kwit, anda dan mutukunye do?” nyabukura, anye birye tamubuka nyabuk. “Kume, nara Lewi yalanye, Yehuda mutuku bukni, mitik asik Betlehem mutukunye unune. Bukni, wini talak ara, ‘Dan mutuku binuka unaman doʼ tenen, na unamnak ati, amutuku-amutuku nirya epnin banune,” nyabuk.

¹⁰ Nyabukura, Mikha birye anye biti nyabuk, na ap, neika asukumuk unaname. Ulamnimirye, anda na ninye deiyok yupu lipsisikuka nyananye ap, imam pil dona ap ati unamnilame. Aning winipminyopura, narye anti keil uang, dekna weik ning, takubarye (10) perak, aketing tamun, aketing tamun nirya ara, pia arenamkine. Tonda, an ongopnalam baju ap, an patapnamkil din ning ap nirya ara, naryuk arenamkine,” nyabuka morobuk.

¹¹ Nyabukura, kamnye aLewi yalanye birye, “Yo ura, telebe, anyapmanilam touk wininamname,” nyabuk. Nyabukura, el ap neika Mikha aik ulamukce, awelnye bira Mikha, el mi koproba atonun kibuka ulamuk.

¹² Winibuka ulamdika ani, Mikha birye awelnye bira dobuka, ‘Imam pil donamleʼ tenen, imamnye kipdeibuk. Mikha aik deiamuk mi, imam pil dolamukce, anyaikuk neika ulamdik.

¹³ Winibuka neika ulamdika ati, Mikha birye nyabuk. “Diba, wini talak ara narye tenipne. Na kanye ara, Allah Yahweh arye pia teleb ulinamkile. Ara, Lewi yalanye tonok wipdeipsiba, elce nati akunuma, imam pil donamnile,” nyabuk.