Hakim-Hakim 15 - Eipomek

Simson yu ubukba, elce Pilistin nang ati, obuk yupu

¹ Sik nirya daulamika ani, aminyan talak sik koulamik ning, gandum duk akunum nong ubukura, sekuka lipnuyik talak ara, Simson birye el kil ulamukak biyuk. Banuyuk talak ara, kambing mi ton tomobuka, el kil ati bobiyuk. El kil dam biyukopura, el kil, el li, Simson el yamal koproba ati nyabuk. “Na kil unmal aik binune,” nyabuka morobuk. Nyabuka morobuk bukni, Simson el yamal koprop arye nyabuk. “Kume an kil aik kum bitume,” nyabuk.

² Nyabukce, akil el li koproba arye Simson biti, ayupu ton dukdongobuka nyabuk. “Kume, narye anti tenepkise ning ara, ‘Anye bira, akil ati wilipdeiamuka ati ara, anye bira pia like,’ tenelula ati, ‘Tonap akil kum dolyanalame’ tenen, akil dobuka, an yalanye ati akunum arepse. Bukni, akil, el weit kil, wel kil ara, urasin pia teleb kil ulula ati, min arye domlum kil pununa ati, arepkitinye. Ance, ‘El weit kil doptinye,’ tenepminyopura, akil dona teleb uka,” nyabuk.

³ Nyabukba, Simson birye tamubuka nyabuk, “Anggunce nati, pia malye kipdeipmanulume. Ati, na Pilistin nang ati, ikin ning pia weik ning, sik nong deice deipnamne. Wini talak ara anang opnamne,” nyabuk.

⁴ Ara, utenebuka ati, ayupu nyabukce, Simson bikbik abuka biyukce, buru kam yupa weike tiga ratus (300) tomobukabukce, sik amu ansinibuka koupdongopnin biyukopura, akam amu bitinye-bitinye koupdongobukce, weisa tonok-tonok gerekdongopra biyuk.

⁵ Winibukopura, awesa uku buk dinmoka kipman, Pilistin nang sik gandum wa wiayamikba, min kum sekuka deiamikak, lopdongobukba, aburu kam balsusunmekce, awesa uku buk kwekenmekba, awa dam nirya uku dibuka, sirya dakuk. Awa wiamik ning nirya ara, tuba awamuk ning ap, sekuka koupdongobuka tikdeipmek ning ap, tonda sik anggur tapu ap, anggur duk ap, zaitun yo duk wa ap, aning-aning nirya, uku dipra banmoka ani, aning nirya dibukce, sirya dakuk.

⁶ Winibuk ning, Pilistin nang binuka eibikce, “Awinipmal ning ara, yatanye birye winipmasil do?” nyabik. Nyabik bukni, yuk nang arye nyabik. “Kume Timna mutukunye birye, el kil dobuka Simson arebuk. Akil dobuknye, Simson birye winipmasile. Deiyok ara, tilila ati kume, el doprobuk kil ara, el li koproba arye el kilmu dalubuka, yuknye, Timna mutukunye arepmokba, Simson yu upmal ati aning winipmasile,” nyabik. Nyabikopura, Pilistin nang kekebikce, adiparyuk biyikce, akil ap, akil el li koproba ap, sik aik ap nirya, uku dongobikba uku dibuka sirya dakukba, sik dibik.

⁷ Winibik talak ara, Simson birye sik Pilistin nang ati nyabuk. “Se anggunce na dopnamne tenenun kil ap, el li koproba ap opmaluma ara, anggunce nati pia malye akunum kipdeipmanulume. Ati, narye tamubuka weik arye aning ati kwang daknamsine. Pia kum bataknamne. Weik yu upnuk ning nirya, min sirya kum dakmanye talak ara, kabula. Ati ara pia onamsine,” nyabuk.

⁸ Nyabukopura, adiparyuk deiyok koubuka, Pilistin nang ati, pia kanye imun bobuka olanmek bukni, Simson birye anang ati, weika arye yok cebuka obukba, pia weik dibik. Winibukce, mutuku si Etam mutuku binuka, keil deiya pum bisik binuka wekukabukce, dungnubuk.

⁹ Tonda, sik Pilistin nang arye, Yehuda yala nang ulamik tam noutamak bukni, mutuku si Lehi mutuku binuka, tia ati sik doltakna cang kain aik, tenda aik dobik.

¹⁰ Winibikopura, sik Yehuda yala nang arye, Pilistin nang ati, nyabik. “Anggunda yata deiyok ati, nun mutuku olyanmasulum do?” nyabikba, sik Pilistin nang arye tamubuka nyabik. “Kume nunda, ‘Simson tomobuka tapu koupnuyap’ tenen, yanmabe. Tonda, ‘Elce nun tam nang ati obuka, malye kipsuka atonun, nun babye elti, opnamap’ tenen, yanmabe,” nyabik.

¹¹ Nyabikba, Yehuda yala nang kekebikopura, yupa weike tiga ribu (3.000) nang biyikce, Simson Etam mutuku keil deiya ulamukak biyikce, Simson ati nyabik. “Kao ance Pilistin nang ati, yata wiriplumba, nun mutuku yanuka opnamsiyak do? Tonda, sik Pilistin nang ara, nun deiyok nang kibuka talisinyaka ara, kum tenepmalam do? Yata ati nun dam yanuka malye kipdeipmasilam do?” Nyabikba, Simson birye tamubuka nyabuk. “Kume, sikce nati malye kipdeipnik touk, narye tamubuka sik babye narye malye kipdeipse,” nyabuk.

¹² Nyabukopura, sik Yehuda yala nang arye tamubuka Simson biti, “An tapu koupkibirye, Pilistin nang arepnamkiyabe,” nyabik. Nyabikba, Simson birye tamubuka nyabuk. “Teleb bukni, anggunce nati dipkoprob nyapnamnululume. ‘Dipkoprop, nun taruk aryuk anti, kum opnamkiyabe. Opkipyopura, Allah arye wenebuka opnamsile,’ nyabuka, nyalin yupu nyapnululume,” nyabuk.

¹³ Nyabukba, sikce tamubuka nyabik, “Anyapmasilama ara, diba. Nunda talye urdemuk tapu koupkibirye, Pilistin nang dam bobinukiyabe. Nun mamun arye ton kum opnukiyabe,” nyabik. Nyabikopura, adiparyuk weik kat tapu, winiryuk ning dobukabikce, el taruk bintinibuka tapu koubik. Winibikce tapu koubuka, akeil deiyok arye Pilistin nang mutuku bobiyik.

¹⁴ Yehuda nang arye, Simson bobuka banmeka ani, Pilistin nang unmekak, Lehi mutuku dam bobiyikopura, Pilistin nang nirya yupu weik nyanmekce, el dam bikbik abuka yanganmek. Yanganmek talak ara, Allah el Dib Kanye Simson talimak wekukce, el mikip talye karin arye arebukba, Simson el mikip weik ubuk. Winibukopura, Simson el taruk tapu koupmek tapu ara, adiparyuk mitang ubukba, el mikip arye atapu seklobukba, atapu bulukuka sakuk. Ura, atapu ara, uku arye dibuka sirya daklamle touk, mitang ubukba, el mikip arye atapu sekukba depsakuk.

¹⁵ Winibukopura, Simson dinmokba, keledai basam opmekak tonok unmokak biyukce, winiryuk uamuk keledai basam si yang yok tonok, el taruk arye dobukabukce, Pilistin nang ninye yupa weik, seribu (1.000) nang kulabuka obukba dibik.

¹⁶ Dibikopura, Simson birye mot senmokce nyabuk. “Keledai basam si kan-kanya yok dobukapsirye, Pilistin nang yupa weike seribu nang opmanue. Anang ara pia malye nang ati, ninye arye talye ning donoklamak touk, anang opsirye, sik nong ara, talye-talye donokmanue. Keledai basam si kan-kanya yok dobukapsirye, Pilistin nang yupa weike seribu nang akunum oplopmanue,” nyabuka mot senmok.

¹⁷ Aning akunum nyabukopura, keledai basam si kan-kanya yok tonok taruk arye dobukabukce, anyaka batakuk. Winibuka ati, amutuku si ara Ramat-Lehi, nyabik. (Sik Ibrani yupu deice arye ayupu Ramat-Lehi deiyok ara, ‘Keledai basam si kan-kanya yok atonun mutuku ulule,’ nyanyaka ati, asi sibik).

¹⁸ Atalak ara, Simson bira mek pia patabukba, Allah el si Yahweh ati weik arye moronmok. “Se na nio, nara an amu tam unirye, an piluk donune. Arup ara, an mikip weik arye na deice deipmanilamba, ninye weike opmanu bukni, ‘Wini talak na weik arye mek teleb ton diptinye,’ tenepmana deice arye, mitanguk upnila ati dipnaman do? Dipnyopura, sik Pilistin nang arye, na nong dopropnamniyak do? Sikda anti dib kum tenenyaka anya arye, den bol mouse sekna kum nang unyak bukni, amalye nang noutamak dipnamne do?” Simson birye nyabuk.

¹⁹ Nyabuk talak aryuk, Allah arye amutuku kon Lehi keil noutamak arye, mek pu dobuk. Winibukopura, Simson birye amek dinmok. Dinmokba, el nong nirya mikip weik kibukopura, tuba tamubuka teleb ubuk. Aning nirya winibuka ati, amek pu el si ara, ‘En-Hakure’ nyanyake. (Sik Ibrani yupu deice arye, ayupu En-Hakure deiyok ara, ‘Moronanye el mek pu’ nyanyake.) Ara Simson bira, mitang ubukba, Allah arye melibuka mek arebuka ati, amutuku si ara, En-Hakor mek pu tuba nyanyake. Amek pu ara, wini talak babye, Lehi mutuku tuba alulule.

²⁰ Aning atonun, Simson bira keting tamun yupa weike dua puluh (20) tahun deice arye, Israel nang talibukabukce, sik deiyoknye ulamukce, sik yupu bokolilamuk. Israel nang sik deiyoknye ulamuk talak noutamak ara, sik Pilistin nang ton tuba ulamik.