Hakim-Hakim 14 - Eipomek

Simson birye, Timna mutuku kil dobuk yupu

¹ Tonok talak ara, Simson birye Timna mutuku biyukce dinmokba, Pilistin yala ninye arye deiamik kil, wel kil tonok eibukce, akil ati kanye deibuk.

² Eibukopura, tuba tamubuka yayukce, el li ap el lin ap, sik dam biyukce nyabuk. “Na Timna mutuku binmanurye, Pilistin yala kil ton eipmance, na kanye talima se tenepmana ati, anggun birumunce akil anyuk morobuka boyanurumnyeba, akil anyuk dopnamne,” nyabuk.

³ Nyabuk bukni, el lin ap, el li ap arye nyapdik, “Yata ati an Timna mutuku binmomce, Pilistin yala kil eibuka, ‘Akil anyuk dolbinurume,’ nyapmasilam do? Aninye ara, Allah arye, ‘Den bam bol mouse sekenamlulume,’ nyapdeiamsuk ning ara, sik kum wininyake. Tonda, anang ara, Allah arye, ‘Wininamlulume,’ nyapdeiamsuk yupu ara, sik Pilistin ninye ara kum kekenyake. Sikda, nun yala nang kume. Nun yala ninye noutamak ara, urasin teleb kil tonok babye ton kum unyaka ati, ‘Kum doptinye,’ tenepmalamce, nyapmalam do? Tonda, nun Israel ninye noutamak teleb kil tonok babye ton kum unyaka ati nyapmalam do? Tonok kil babye kum upliba, kum doproptum do?” nyabuka weneprik. Nyaprik bukni, Simson birye tamubuka el li koproba ati, “Kume, ‘Akil ara na doptinye’ tenen, pia se tenenuna ati, morolbimince, nati boyanamnilyame, na nio,” nyabuk.

⁴ Atalak noutam nirya, Israel ninye ara, Pilistin yala nang arye taleamikba, sik amu tam ulamika ati, Allah arye, ‘Yata wiriptinye deice arye, lo arepnutuba, Pilistin ninye wenebuka opnamne do? Tonda, dan talak arye, Pilistin ninye malye kipnamne do,’ tenelamuk. Allah arye winibuka tenelamuk bukni, Simson el li ap, el lin ap arye, aning nirya kum tenyamdikce, kel kum bikamdik. Ara, Allah arye, ‘Simson bira akil doptue deice arye, Pilistin ninye opnamne,’ tenyamuka ara, kum bikamdik.

⁵ Atalak ara, Simson ap, el li ap, el lin ap nirya, ‘Timna mutuku neika binuyap’ tenen, bisik banmek. Banmik ani, abisik noutam ara, Timna ninye anggur wa wiamikak yanganmekba, talye karin arye, bai kam atonun ning ara, singa kam tonok, ‘Anye bira obuka dipnun’ tenen, el weik yupu ngalukukabukce, Simson dam bikbik abuka yayukba, Simson birye eibuk.

⁶ Atalak aryuk, Allah el Dib Kanye talye karin arye Simson el nong wekukce, el mikip weik arebukba, Simson birye asinga kam banmok dam binuka, el taruk arye talibuka bulaklobuk. Winibuk ning ara, kanam asa aryuk winibuk. Ara, talye kambing oltaklamak atonun, aweik singa buru kam talibuka oplobuk. Awinibuk ning ara, Simson el lin ap, el li ap ara kum eipdik. Tonda, Simson birye sik kekenak, ‘Winipmane,’ nyabuka laka kum nyabukba, sik bitinye kum bikdik.

⁷ Winibukopura, Simson akil ulamukak biyukce, ‘Akil dopnamne,’ tenebukce, akil ap, Simson ap eipdarikce, talye-talye yupu nyanmarikba, Simson birye akil ati weik kanye deibuk. Kanye deibukce, tuba tamubuka el mutuku koproba biyuk.

⁸ Like mitik tonun tonap makmikce, daunmeka ani, yuk-yuk unmek bukni, aminyan talak ara, Simson birye, ‘Wini talak akil dopnune,’ tenebukce, akil dam biyuk. Banmoka ani, bisik noutamak arye binuka dinmokba, singa kam min arye oplomukak ara, singa kam nong pum bisik ara, madu mong weik amulamukak, eibuk. Winilamukba, anyaka biyukce dinmokba, aning lyulamuk pum bisik ara, madu mong ap, mong mek ap uamuk.

⁹ Auamuk ning ara, el taruk arye torokukabukce, among mek dobuka bobukce, dipnin banmok. Dipnin banmoka ani, el li ap, el lin ap dam yayukopura, among mek sik ton, dana tam bokuka arebukba diprik. Bukni, elce sikti, “Among mek ara, singa opsakarye, nong lyulamuka pum bisik arye, na taruk arye torokuka dopropmanue,” nyabuka laka kum nyabuk.

¹⁰ Winibukopura, Simson el li birye, ‘Na mi arye kanye deibuk kil ara, na asing eipnamne’ tenen, akam kil el mutuku dilbiyuk. El dilbiyuk talak ara, Simson bira amutuku biyukce, sik amutuku ninye winilamik touk, weik kwalina binuka kwalibuk. Ara, amutuku nang arye, kil donamne talak ara, aning winilamika ati, Simson babye atonun kwalina kwalibuk.

¹¹ Winibukopura, Pilistin nang dam biyukce, Pilistin nang arye, el pil melibuka dona ap, neika una ap ati, kam nang yupa tonok kepdopnye pamubarye (30) nang wipdeibikba, el dam yayik.

¹² Yayikopura, Simson birye ayupa winilye nang ati domon yupu atonun nyabuk. Elce nyabuk, “Yata nang arye do, narye nuknusin ning, ‘Deiyok ara ani,’ tenebuka kel bikmunce, deiyok ani, nyabuka laka nyapnumunyopura, teleb ning arepnamsine. Ara, minop arye anggunce nyamnutumopura, anggunce dopropnamlume. Asum arye nukuka tekbarye sum nukunmanya ani, tekbarye sum min kum kipmalye talak arye nyapnamnulume. Ara, akwalina dipnamap talak noutam ati nyapne. Kumopura, kum doptume. Bukni, ‘Deiyok ani,’ nyabuka laka nyapnutumopura, narye anggunti pia teleb, dekna weik baju yupa winilye (30) ap, tonda yuk yala bukni, ongona teleb baju ton yupa winilye (30) ap, yuk-yuk arepnamne. Ati, narye anggunti lo arepsiniba, tekbarye sum deice arye kil donamne kwalina dinamlulume,” nyabuk.

¹³ Nyabukce, ayupu ton nyabuk, “Bukni, anggunce na nyapnusin yupu, ‘Deiyok ani,’ tenen, kum nyapnumunyeura, anggunce nati pia teleb, dekna weik baju yupa winilye ap, tonda yuk yala bukni, ongona teleb baju ton yupa winilye ap, yuk-yuk arepnamnulume.” Nyabukba, sik Pilistin nang nirya arye, elti, “Yo, anyapmasilam touk winipnamkiyabe. Ati an upmakil domon yupu atonun ara, nyapnusilyame,” nyabik.

¹⁴ Nyabikopura, Simson birye adomon yupu atonun tonap nyabuk. “Din dilul ning pum bisik arye, dipmanto ning doproptume. Weik mikip ulul ning pum bisik arye, din ningto weik ning doproptume.” Simson birye nyabuk. Simson birye nyabukba, kekebikce, like winilye sum arye, ‘Aning ati nyapmasile, deiyok ani,’ tenebuka, kum bikmek ati, yupu tamupdeipmanto kum unmek.

¹⁵ Wininmikba, like dumbarye sum arye, kel kum bikmanto ubik ati, sikce Simson el kil ak binuka nyabik. “Anggun dano? ‘Amutuku dilyalulume,’ nyapmasuruma deiyok ara, ‘Anang sik ning ubula dopropnanam’ tenen, nyapmasurum do? Ance, an akanye biti, teleb yupu nyapminya deice arye, elce nyapmasil yupu domon yupu ara, ‘Deiyok ani,’ nyabuka laka nyapkiliba, ance laka nyalyanamsilame. Kumopura, nunce an ap, an dam ninye ap, an ni el aik ap, el aik unyak ninye nirya ap, anggun aik pum delinyak ning nirya ara, uku dongopnamabe. Oplopnamsiyabe,” nyabik.

¹⁶ Nyabik ati, Simson el kil arye Simson dam binuka, engenmokce nyabuk. “Se, ance nati wilipdeipmanilame. Ance nati bico kum tenepmanilam do? Nati, lik tenepmanilam do? Ance na makal nang ati, yupu domon nyapmumce, sikti, ‘Deiyok ani, nyapnamnululume,’ nyaplum bukni, nara, ayupu deiyok ton kum laka nyapmanume. Aning ara yata ati do? Ayupu deiyok laka nyapniminba kel biktinye. Ati laka nyapnilyame,” nyabuk. Nyabuk buk, Simon birye tamubuka nyabuk. “Yupu domon aupmale bukni, ayupu deiyok ara, na ni ap, na nin koprop ap ara, sikti, ton laka kum nyapsiba, sik babye kum bikrike. Ati yata deiyok ati, narye, anti laka nyapkitinye do? Aning kum nyapnukine,” nyabuk.

¹⁷ Simson birye, nyabuka ati, el kil arye, kwalina kwalilamik karin ara, tekbarye sum noutamak nirya arye, pia bukuka engena uk unmok. Tek barye sum deice arye tuba moronauk ulamukce, engenauk unmoka ati, like tekbarye sum arye, Simson lik ubukba, el kil ati adomon yupu deiyok laka nyabukba, bikuk. Bikukce, adiparyuk aning bobuka, akil arye el makal nang ap, el tam nang ap ati, laka nyalbiyukba, sik nirya babye, kel bikik.

¹⁸ Ati, tekbarye sum noutam aryuk, keting min kum wekelbinmok talak ara, amutuku nang nirya arye, Simson biti nyabik. “Madu mong mek ara, to pia weik anya arye, yata ning arye to weik nyaptu do? Tonda singa kam ara, mikip weik ning anya arye, yata tonye birye, malye kibuka singa kam optu do?” nyabik. Nyabikopura, Simson birye domon yupu deice arye, tamubuka nyabuk. “Anggunce, nati sapi basam kil dobuka, abasam mikip arye wa tuku kum palipmunyopura, narye yupu domon nyapse deiyok ara, laka kum nyaptume,” nyabuk.

¹⁹ Nyabuk talak uk, talye karin arye Allah el Dib Kanye mikip weik Simson talimak wekukba, adiparyuk Pilistin nang mutuku noutam bukni, mining dam mutuku Askelon mutuku biyukce, ninye yupa winilye tiga puluh (30) nang binuka obuk. Obukopura, sik taleamik ning nirya doprobukce, sik teleb baju ongolamik ning nirya dalubuka doprobuk. Doprobukce, tuba tamubuka Timna mutuku yayukce, asum oplopmok nang baju dopropmok ning ara, Timna nang yupa winilye 30 nang ati arebuk. Ara, elce yupu domon nyapmok ning deiyok laka nyabik nang ati arebuk. Arebukba, yu weik ubuk. Yu ubuk ning ara, uku buk dilamle touk unmokba, el dobuk kil asukumuk batakukce, el li asik ap, tonda el mutuku koproba tamubuka biyuk.

²⁰ Tonda Simson biyukba, el winiryuk dopmok kil ara, Simson el li kobrba arye akil dobuka, Simson el kwit ati arebuk. Akil arebukba, doprobuknye bira, ara Simson kil dona ati kwalina kwalinmek talak noutam, Simson melipmoknye birye, Simson el kil doprobuk.