Hakim-Hakim 13 - Eipomek

Simson deibik yupu

¹ Atalak ara tonap tuba, Israel ninye arye Allah dinak tuba malyeuk winilamikba, Allah el si Yahweh arye, ‘Na like,’ tenelamuk. Winilamikba, Allah arye tamubuka arebukba, yuk yala ninye, sik si Pilistin ninye malye kibikce, keting tamun yupa tonok kepdopnye koklom dikin (40) tahun deice arye, Israel ninye sik nong deice ikin ning weik delilamikba, malye kanye bobuka ulamik.

² Atalak ara, ninye tonoknye el si ara Manoa ulamuk. Manoa el mutuku ara, Sora mutukunye ulamuk. Manoa el yala ara, Dan yalanye ulamuk. Atalak ara, Manoa el kil, mi kum bolamuka anya arye, sik mapu kum delilamdik.

³ Winibuka daulamdika ani, tonok sum ara, Allah el pil donanye malaikat akil dam yayukce nyabuk. “Allah arye nyapmakile. ‘Uku daupra yangaminye talak nirya ara, mi kum bomince, mi kum delilyam bukni, wini talak ara, an mi bominya ani, sal mi deipnalame.’ Allah arye nyapmakile,” nyabuk.

⁴ Nyabukce ayupu ton nyabuk. “Ati ara, ami bominye talak ara, moubuka kalikdamince unalyame. Ara, anggur mek ninye kanye wangalamak mek ap, yuk yala mek ninye kanye wangalamak mek nirya ap, pia kum dinalyame. Tonda, minop talak ara, Allah arye Musa biti, ‘Israel ninye ara ‘Naʼ tenen, ninye ati, ayala ning dina ap, dina nirya ara, dina meme,’ nyapdeibuk. Aning atonun, wini talak arye dipdongobuka aminyan yanamle talak noutamak ara, Allah arye mem yupu deice nyapsuk din ning yala nirya ara, anda pia kum dinamlyame.

⁵ Deiyok ara, mi bominya ani, aminyan talak ance sal mi deipnalama atia. Ami akunum deipminyeba, kam unamle talak nirya ara, ance do, el damnye arye do, yuk nang arye do, pisau dobuka el potong tuba-tuba pia kum konamlulume. Deiyok ara ani. Ami an mi mun pum tam tuba unamle talak ara, Allah arye ami ati, akunum wipdeipnamle. Wipdeipliba, yuk nang nirya arye elti, ‘Elda Allah el tenenanye ulula anya arye, elda Nasaretnye unamle,’ nyabuka kel biknamake. Aminyan talak ara, Allah arye elti, melipliba, anye birye Israel ninye ara, Pilistin nang arye talibikba, sik amu tam unyaka ara, dalubuka dopropnamle. Israel ninye sik melibuka lyena ati, deiyok kinanye bira, ami uka.” Allah el pil donanye Malaikat arye, Manoa el kil ati nyabuk.

⁶ Nyabukopura, Manoa el kil arye tamubuka el akanye dam yanuka nyabuk. “Sal ton Allah arye wipdeipmaunye, na dam yanmoe. Anye el urasin ara, malaikat Allah dam unyakce, pil donyak nang atonye yanmoba, eipmanu ara, elda weik mambul ning winipmauba, na ilil weik upmanue. Tonda narye anye biti, ‘Anda dan mutuku arye yanmalam do?’ nyabuka kum asipdenmane. Tonda, el si ara nati kum nyapmanilce, el si kum si sipdanmale.

⁷ Bukni, elce nyapmanue. ‘Ura minop talak nirya ara, mi kum bomince, mi kum delilyam bukni, wini talak ara, an mi bominya ani, sal mi deipnalame. Ati ara, ami bominye talak ara, moubuka kalikdamince, unalyame. Ara, anggur mek ninye kanye wangalamak ning ap, yuk yala mek kanye ninye kanye wangalamak mek nirya ap, pia kum dinamlyame. Tonda, Allah arye Musa biti, ‘Ayala din ning ara dina meme,’ nyabuka mem yupu deice nyapsuk din ning yala nirya ara, pia kum dinamlyame. Deiyok ara, aminyan talak sal mi deipnalam mi ara, Allah arye ami ati akunum wipdeibuka anya arye, akunum deipminyeba, kam unamle talak nirya ara, elda Allah el pil donanye, el na tenenanye pia unamle. Unamle ati, ami ara Nasaretnye unamle. Nasaretnye pia daulamlya ani, aminyan talak dipnamle.’ Allah pil donanye Malaikat arye nyapmanue,” Manoa el kil arye, nyabuk.

⁸ Nyabukopura, Manoa bira, Allah el si Yahweh ati morobuk. “Na ni Allah, pia patapmanilba, pi deibuka moropmakine. Ance dopdeipsulum malaikat, an pil donanye bira, tuba tamubuka tonap dopdeipsiminba, nun dam yalyopura, elce tuba peterepnamasile. Ara, ance wipdeipsulum mi, na kil arye sal mi akunum deiplyopura, an pil donanye dopdeipsutumba, elce peterepsutu ura, kel biktinimirye, nun deipnanam sal mi melilamsiminya ani, ami teleb kibuka nepnamle.” Nyabuka Manoa birye morobuk.

⁹ Morobukopura, Allah arye Manoa birye nyabuk yupu kekebuk. Kekebukce, Allah pil donanye amalaikat tuba tamubuka tonap dopdeibukba, akil bai tam wa win dam unmokak yayuk. Malaikat arye akil dam yayuk bukni, asukum ara, el akanye babye neika kum unmarek ati, el akanye birye amalaikat kum eibuk.

¹⁰ Ati, akil adiparyuk bikbik abuka el akanye dam biyukce, “Naio, min sum yanmok Allah pil donanye, malaikat ara, arup like bitinye sum akunum tamubuka na dam yanmale,” nyabuka, laka nyabuk.

¹¹ Anyabuk yupu, Manoa kekebuka tikukabukce, el kil ap neika birikce, amalaikat dam birik. Anye tekmukak birikopura, Manoa birye anye biti nyabuk. “Naie na kil ati yupu nyapmalumnye bira, ance do, yuknye birye do?” nyabuka asipdeyuk. Nyabuka asipdeyukura, anye birye nyabuk, “Yo, an kil ati, yupu nyapmasinye bira, natia,” nyabuk.

¹² Nyabukopura, Manoa birye tamubuka, elti, asipdeyuk. “Ance, nyapmasilam yupu akunum winipsilyopura, na kil arye ami akunum deipnamle talak ara, ami yata pil donamle do? Tonda ami el kam unamle talak ara, ‘Ami ara, Allah tenelye touk teleb ubuka unamle’ tenen, nunce, ‘Wininamlyame, aning ara ton kum wininamlyame,’ nyabuka, yata mem yupu nyabuka ami ati peterenanam do?” nyabuk.

¹³ Nyabukba, Allah el si Yahweh arye, dopdeipmok malaikat arye tamubuka Manoa biti nyabuk. “Narye an kil ati nyapmanu yupu atonun moubuka kalikdanuka unamlule. Narye, ‘Wininalyame, aning ara ton kum wininalyame,’ nyapmanu touk aninguk wininamle.

¹⁴ Ara, an kil arye anggur yo duk ap, anggur duk mek ap, aning nirya ara, pia dina kume. Anggur mek kanye wangalamak mek ap, yuk yala mek kanye wangalamak mek ap, tonda, Allah arye, ‘Aning dina meme,’ nyalamuk yala ning nirya ara, pia dina meme. Narye, ‘Wininamlyame,’ nyapmanu ning ara, pia tenebuka wininamle.” Malaikat arye Manoa biti nyabuk.

¹⁵ Nyabukba, Manoa bira talye kanye bobuka, ‘Anye bira, Allah el si Yahweh arye dopdeibuk malaikat atia,’ kum tenebukce, amalaikat ati nyabuk. “Naie, na kwit tenilana ati, asukumuk unmaminye buk, nunce kambing mi tonok obuka, anti kwalipnukiname. Akambing dipminyopura, binamalame,” nyabuk.

¹⁶ Nyabukba, Yahweh arye dopreibuk Malaikat arye tamubuka Manoa biti nyabuk. “Ance nati anyaka kaipnimince an ning obuka kwalipdeipnimnyopura, anggunce kwalipmarumunye ning kum diptinye. Nyapmakin bukni, yuk sum ance kam ning opmince, ‘Uku dapnune,’ tenepminyopura, nati arena kume. Aning ara, Allah el si Yahweh ak, el si erena ati, uku dapnalyame,” nyabuk.

¹⁷ Nyabukopura, Manoa birye Allah el si Yahweh, el pil donanye malaikat ati nyabuk. “An si kel bikibirye, aminyan talak ance, ‘Winipnamle,’ nyapmalam ning, dipkoprob akunum winiplyopura, anti si erepnamabe. Ara, ‘Anye birye nyapdeiamuk touk, dipkoprob winipmasile’ tenen, ‘Anye bira mambul weike,’ nyabuka, an uk si erepnamabe,” Manoa birye nyabuk.

¹⁸ Nyabuk bukni, Allah elce dopdeibuk malaikat arye tamubuka nyabuk. “Ance yata ati na si asipdenmanilam do? Na si ara, ninye arye kel kum bikmantonye unun ati, ‘Deiyok ani,’ kum teneptinge. Ati na si weik mambul kume, pia talye tukwak nang ara, kum biknitinge,” nyabuk.

¹⁹ Malaikat arye ayupu akunum nyabukopura, Manoa birye weilamuk kambing mi ap, jagung wa wibuka kouamuk ning ap, dobukabukce, keil pala yangapdeibukce, Allah el arena ati, uku sekuka aning dobuka, uku dabuk. Dabukopura, Manoa ap, el kil ap arye, aning dinmarik. Dinmarikba, Allah arye ninye winipmanto kum ning, mambul weik pil dobuk.

²⁰ Ara, dinmarikba, akeil duk yangabuka delinak deice, uku buk dinmokak arye, uku buk im deice welenmok talak ara, amalaikat babye auku buk welenmok noutamakuk, im deice welebuk. Winibukopura, Manoa ap, el kil ap, awinipmuk ning eipdikce, ‘Se’ tenebuka, adiparyuk sik bitinye tuku deice sakuka kanupdongobuka mapmarikce, im deice tam dina kumce, Allah ati si ereprik.

²¹ Allah el si Yahweh arye dopdeibuk malaikat, im deice welebuk talak arye, Manoa ap, el kil ap arye, malaikat sik dam ton pia kum elilalamik ati, atunim abuka deice arye Manoa kel kibukce, ‘E, ayanmonye bira, el urasin ara, Allah pil donanye malaikat atonun bukni, dipkoprob ara, Allah el si Yahweh arye, elce dopdeipmokba yanmoke,’ tenebuk.

²² Akunum tenebuka, kel kibukopura, Manoa birye el kil ati nyabuk. “Se akilo tuba, nunce Allah el nong eipmanama ati, wini talak dipkoprob dipnaname,” nyabuk.

²³ Bukni, Manoa el kil arye nyabuk. “Kume, Allah arye, ‘Anang bitinye opnamane,’ tenepmatopura, nunce el si erena ati, kambing obuka uku dapmanam ning ap, jagung ap arepmanam ning ara, kum doproptue. Elce akunum adiparyuk opmasutue. Bukni, nunce arepmanam ning akunum dopropmasila ati, ‘Allah arye kum opnamasile,’ tenepne. Tonda elce mambul pil dopmal ning ap, tonda elce nyapmasil yupu nirya ara, kum nyapdeipsuturye, ton kum arepsutue. Bukni, elce aning nirya akunum lak nyabuka arepmasila ati, na kanye ara, Allah arye kum opnamsile,” nyabuk.

²⁴ Sik bitinye daunmarika ani, aminyan talak ara, Manoa el kil sal mi deibuk. Deibukopura, “Ami el si ara Simson,” nyabuka si dobuk. Ami akunum nepnin balamuk talak ara, Allah arye meliamuka deice arye, teleb ubuka nepnin balamuk.

²⁵ Simson akunum nebukopura, Allah el Dib Kanye Simson biti meliamukba, mikip weik kipnin balamuk. Atalak noutamak ara, Dan yala ninye ulamik mutuku si Mahane-Dan noutamak, Simson ton asukumuk ulamuk. Mahane-Dan mutuku ara, atam ara mutuku si Sora mutuku, otam Estaol mutuku bukamuk bukni, noutam sukumak ulamuk.