Hakim-Hakim 12 - Eipomek

Yefta ap, Efraim yala nang ap, unamik mutuku ati, sekik yupu

¹ Atalak aryuk, Efraim yala nang nirya arye, ‘Mal olalbinamapʼ tenen, kintinibik. Winibikopura, adiparyuk kintinibuka, Yordan mek koubuka, keting panalyangan tam, Zafon mutuku biyik. Biyikopura, sik anang arye, Yefta biti nyabik. “Yata deiyok ati, anda nun ton kum laka nyapmasilamce, Amon yala nang ati olbinmamu do? Nun ak laka nyapmasutumba, nun neika an ap, ansinibuka binmatibye. Ati wini talak ara, nunce an asik uku dongopnukiyabe. Uku arye an asik dipnamle talak babye, an nong ap, an ap, neika ansinibuka ululum nang ap, anggun nirya ara, uku arye dipnamsile,” nyabik.

² Bukni, Yefta birye tamubuka nyabuk, “Deiyok ara ani. Nun Gilead yala nang ap, Amon yala nang ap, mal olanmabu ara, pia mambul weik ning ati opdayupe. Nunce, ‘Winipnuyabe, Amon tam nang mal olbinuyabe,’ tenebupu talak ara, narye, ‘Anango, sikce na melipnikiba, ‘Sik Amon yala nang nirya obuka sirya daknamapʼ tenen, akunum yukupsise. Bukni, anggunce na tam nang ati kum meliamnulume. Anggunce, sik Amon yala anang anggun taruk deice yanuka, kum alupdomlumce, nun ikin deiamsik noutam arye, kum lyepromsulume.

³ Ati ara, narye anggunti tenepsise ning ara, ‘Sikce yanuka kum melipnamaniyake,’ tenipsise. Ati, sik Amon yala nang arye, nati opnikcopura, ‘Teleb uka,’ tenepsirye, na nong nirya ara, arepse. Utenepsirye, sik Amon yala nang ati mal pibise. Winipsirye, Na tonok ara, dadipnune,’ tenepse. Utenepse bukni, Allah Yahweh arye, nati melipnukba, narye sik Amon yala nang obuka sirya dakse. Ati ara, wini talak anggunda, yata deiyok ati nati malye yupu nyapmanulumce, olyanmanulum do?” Yefta birye, sik Efraim yala nang ati nyabuk.

⁴ Nyalameka ani, Yefta birye sik Gilead mutuku ulamik nang nirya ati, yukubukba bulubuka yayik. Bulubuka yayikopura, olanmeka ani, Efraim yala nang nirya ara, obuka sirya dakik. Ura, sik Gilead mutuku ulamik nang arye, Efraim yala nang ati, olbinmeka deiyok ara, ani. Ara, sik Efraim yala nang arye, sik Gilead mutuku ulamik nang ati nyabik. “Anggunda pia malye deiyok koupdeipsulume. Anggun Gilead mutuku ululum nang arye, minop talak ara, dipkoprob nun Efraim yala nang kan-kan ulamlum bukni, nunti bataksulum talak arye, nun Efraim yala nang unyap ak, atam ap, otam ap ara, sik Manasye yala nang arye unyakak, danoutam ululum mutuku, anggunce anggun asik dopdeiamlume,” nyabik. Sik Efraim yala nang arye, sik Gilead mutuku ulamik nang ati, nyabika ati, yu ubukba, derelanmekce, olanmek.

⁵ Minop talak ara, sik Gilead mutuku ulamik nang arye, Yordan mek koubuka, keting kumulban tam arye, sik bisik binaman ati, Yordan mek koulamik noutam uamuk keil deice yanibuka balamikbuk, akeil dopropbikce, pia kaliklamik. Kaliklamik talak ara, yatanye do nirya, Efraim yala nang bukni, Gilead mutuku tiya ati ulamik nang arye, ‘Otam keting kumulban tam, Efraim nang unyakak tamubuka binamapʼ tenen, yanganmek ninye ara, sik Gilead mutuku nang arye asilenmek. Ara, sik Gilead mutuku nang ara, Yordan mek koulamika damuk binuka bukmekce, kalikmeka ani, sik Efraim yala nang ton, “Yordan mek koubuka otam binuyabe,” nyabikce, yanuka morobik buk, sik Gilead mutuku nang arye, “Anda dipkoprob Efraim yalanye ulyam do?” nyabuka, asibikba, “Dipkoprob nara Efraim yalanye kume,” nyabukura, sikce tamubuka nyabik.

⁶ Sikce abisik yangalamik nang ati, asilelamik. Asipnarye ayupu nyalamik. “Ati anda ayupu ‘Syiboletʼ nyaplyame,” nyalamikba, sik Efraim yala nang arye, ayupu ‘Syiboletʼ kum nyapnarye, sikce, ‘Siboletʼ dem nyalamik. Yordan mek koulamika dam yangalamik nang arye, kanye tenenilina kumce, talye ‘Siboletʼ dem nyapnopura, adiparyuk sik Gilead mutuku nang arye, anang ati sekdongobuka tomolamik. Tomolamikce, omutuku banak ara, Yordan mek koulamik sukumak olamik. Winibuka olamik talak ara, sik Gilead mutuku ulamik nang arye, Efraim yala nang yupa pia weik, nukmanto kum, empat puluh dua ribu nang (42.000) olamik.

⁷ Keting tamun (6) tahun ara, Yefta elce ninye deiyoknye kiamukce, sik Israel yala nang nirya taleamukce ulamuk. Winibuka taleamukba, daulamika ani, el akunum dibukopura, el weipnamika ara, el mutuku koproba deiamik mutuku, Mizpa mutuku bukni, Gilead mutuku noutamuk weibik.

Ebsan ap, Elon ap, tonda Abdon ap ati, sekik yupu

⁸ Yefta akunum dibukopura, Betlehem mutuku nang arye deiamiknye Ebsan birye, ninye deiyok kibukabukce, Israel nang taleamuk. Elce Yefta punubukce, ninye deiyok kibuka ulamuk.

⁹ Ebsan el ninye deiyoknye kibuka tikamuk talak ara, sal dem tiga puluh (30) nang deiamuk. Aning atouk, kilapu babye tiga puluh kilapu deiamuk. Elce deiamuk kilmapu nirya ati ara, elce, ‘Yuk mutuku yala nang arye dopnamakʼ tenebukce, akilmapu nirya dobuka yuk yala nang ati areamukba dolamik. Winibuka dolamik ning pununa ati ara, yuk yala kilapu ton, tiga puluh wel kilapu, yuk yala kilapu dobuka, el mapu tiga puluh nang arena ati dobuka boyayuk. Winibukopura, Ebsan elce ninye deiyoknye kibuka tikamukce, sik Israel yala nang taleamuk keting tamun yupa ara, tekbarye (7) keting tamun deice taleamukce, ulamuk.

¹⁰ Winilamuka ani, aminyan talak ara, Ebsan el akunum dibukopura, el tam nang arye, el nong dobuka adiparyuk, el mutuku Betlehem mutuku noutamuk, binuka weibik.

¹¹ Ebsan el akunum dibukopura, Zebulon yalanye, el si Elon birye sik Israel nang taleamukce, ulamuk. Sik Israel yala nang melibuka taleamukce, yupu lipsisikna ati, ninye deiyoknye tikukce, yupu nyalamuk talak ara, keting tamun takubarye (10) tahun deice arye taleamukce ulamuk.

¹² Winilamuka ani, aminyan talak ara, Zebulon mutukunye Elon akunum dibukopura, Zebulon mutuku noutam bukni, Ayalon mutuku uk, binuka weibik.

¹³ Atonun ton, Elon akunum dibukopura, ninye si Hilel, elce deiamuknye, el si Abdon, elda Piraton mutukunye, elce sik Israel yala nang melibuka talibukce, yupu lilsisikina ati, elda ninye deiyoknye tikukce ulamuk.

¹⁴ Anye tikamuk talak ara, el mapu ara, empat puluh (40) ton deiamuk. Tonda, el mapu arye deiamik mapu nirya ara, tiga puluh (30) nang deiamik. Sik adeiamik nang nirya ara, tujuhpuluh (70) keledai basam yuk-yuk bisik bukuka bana ati kintinip deiamik. Atalak ara, Abdon el pil dona ati, ninye deiyok kibuka ulamuk talak ara, el mapu koproba sik Israel nang ati, keting tamun ara, pinbarye (8) tahun deice arye, ninye deiyoknye kibuka tikamukce ulamuk.

¹⁵ Winilamika ani, Hilel el mi Abdon, Piratot mutukunye akunum dibukopura, Efraim yala nang ulamik mutuku bukni, asik dolamika el si ara, Piratot mutuku nyabik. Ara, Amalek yala nang sik ulamik mutuku bukni, iknapye tam lilunuk binuka weibik.