Hakim-Hakim 11 - Eipomek

Yefta yala nang ap, Gilead yala nang ap ati, sekik yupu

¹ Ninye tonok el si ara Yefta, anye bira Gilead yalanye birye el deiamuk. El Yefta bira, ninye mal olalbana ati ara, mikip weik kopropnye ulamuk. Yefta el lin bira, talye-talye yolamik kil arye deiamuk. Yefta el li koprop ara, Gilead ulamuk.

² Tonda, Gilead el kil arye, mapu ton pia weik delilamuk. Akil arye deiamuk mapu akunum nebikopura, Yefta biti nyabik. “Anda, nun ni birye talibuk ning nirya ara, kum doproptume. Ara, an deipkuk kil ara, nun ni koproba arye kume, yuk mutuku kil arye deipkuka atia. Tonda, dipkoprob dona kum kil arye deipkuke. Talya kil arye deipkuka ati, nun ap neika una kume,” nyabuka, el Yefta biti, sik ulamika dam arye bai yakik.

³ Anang arye Yefta biti, nyabika ati ara, atalak aryuk Yefta bira, el kayapu nang dam arye batakukce, bikbik abuka Tub mutuku binuka ulamuk. Amutuku ulamuk talak ara, talye bai tam ulamik yu weik nang, ninye yupu kekena kum nang, weik, ‘Anye ap neika unamabe,’ tenelamikce, el dam bulubukabikce, el ulamukakuk yayikba, sik neika ulamikce, yuk nang sik ning ubula weik dolamik.

⁴ Ura atonun, pia daulamika ani, uku weik tonun ton malamika ani, aminyan talak ara, Amon yala nang arye, sik Israel nang ati mal olalyayik.

⁵ Tonda, Amon yala nang arye, ‘Israel nang yanuka opnuyapʼ tenen, yayik talak ara, sik Gilead noutam ulamikce, ninye deiyok kiyamik nang nirya arye, Tub mutuku ulamuknye Yefta, el dam biyikce, ‘Anye tamubuka boyabiba, elce melipsutuʼ tenen, elti, morolbiyik.

⁶ Sikce Yefta biti nyabuka morobik. “Wini talak ara anda, nun yin talen nang, deiyoknye kipnusilame. Winipsiminba, nun ap neika kibibirye, sik Amon yala nang ati, olalbinuyabe,” nyabuka morobik.

⁷ Nyabuka morobikba, Yefta birye tamubuka, Gilead mutuku talibuka ulamik ninye deiyok nang ati nyabuk. “Kume, Anggunda nati, ‘Elda nun likʼ tenen, yanilamnulumce, na ni koproba, el aik ulamse noutam ara, anggun anang arye walamnulumce, yakamnulume. Tonda, yata deiyok ati, kanye imun upsil talak uk, na dam yanuka moropmanulum do?” nyabuka, asipdeyuk.

⁸ Nyabukura, sik Gilead mutuku taleamika deiyok nang arye tamubuka, Yefta biti nyabik. “Diba, dipkoprob yupu nyapmasilame. Bukni, nun kwit, wini talak ara, nun anti patapmasilba yanmabe. Ati anda, nun nyapmakiyap ninguk kekebuka melipnusilyame. Tonda, atalak babye, ance Amon yala nang ati, mal pibinamalame. Winipminyopura, anda nun deiyoknye kipnamsilame. Tonda, Gilead noutam unyap nang yala-yala nirya ati, deiyok kibuka talipsiminyeura, unamsilame. Ance nyapminye yupu dem kekepnamabe,” nyabuka morobik.

⁹ Nyabikopura, Yefta birye tamubuka, sik Gilead mutuku deiyok-deiyok kibuka ulamik nang ati nyabuk. “Yo ura, wini talak ara, anggunce nati, yukupmanulum ati, tamubuka Gilead mutuku bibirye, Amon yala nang ati, Allah Yahweh arye, el mikip na deice deipniliba, binuka obuka, sirya daknyopura, anggunce na wipdeipnumumba, narye anggun deiyoknye kipnirye, talipnamsine,” nyabuk.

¹⁰ Nyabuka morobukura, sikce tamubuka nyabik, “Yo ura, nun ni koproba, Allah Yahweh kekenmasilce, dinmasilak arye, ‘Dipkoprob wininamabe,’ nyapmaba anya arye, aning kum winibipyopura, elce wenebuka opnamsile. Ati, ance nyapmasilama atouk winipnamabe,” nyabik.

¹¹ Nyabikopura, atalak aryuk, Yefta ap, Gilead mutuku talibuka ulamika deiyok nang ap, tamubuka biyik. Sik mutuku tamubuka biyikopura, Gilead mutuku ulamik nang arye, Yefta bira, sik deiyoknye una ap, tonda mal olalbana ati deiyok kina deiyoknye ap elti, webuka erepdeibik. Winibikopura, amutuku nang sikce, “Mizpa mutuku dam arye, Yefta biti, winipnamsilyame,” nyapdeibik ning nirya ap, tonda Yefta birye, “Winipnamsine,” nyabuk ning nirya ap ara, Allah kekenak arye nyabik.

Yefta ap, Amon yala nang ap ati, sekik yupu

¹² Aning nirya akunum winibikopura, Yefta bira, sik deiyoknye kibukabukce, ninye ton dopdeibukba, Amon yala nang, sik deiyoknye Raja biti nyalbiyik. “Anggun dam ara nunce yata malye ning ton winibupu ati, anggunce warikil yangasululum do? Yata deiyok ati, nun mutuku noutam arye yanuka olyangasululum do?” nyabuka, asibukba, yuk nang arye, ayupu bobuka nyalbiyik.

¹³ Nyabikura, Amon yala nang, sik deiyoknye Raja birye, sik ayupu bobanmek nang ati, tamubuka nyabuk. “Aning deiyok ara, ani. Sik Israel nang, Mesir mutuku arye batakuka, bisik yanganmek talak ara, sikce nun taleamupu mutuku nirya dopromsike. Ara, mitik tonun kuma. Ara, Yordan mek koubuka, keting panalyangan tam bukni, deiyok kouna ara, outam (ara selatan) Arnon mek biyukak arye dipdongobuka, eitam (arah utam) Yabok mek duman ap, tonda Yordan mek biyukak, keting panalyangan tam nirya ap, amutuku nirya dopropsulume. Ati ara, wini talak ara, nun ap olana kumce, anggun kanye teleb deice aryuk, tamubuka arepnamsulume,” nyapdeibuk.

¹⁴ Yefta yupu bobinmek nang ayupu nirya akunum kekebikce, tamubuka Yefta dam laka nyalbiyikba, kekebukura, Yefta birye tamubuka, ninye dopdeibukba, Amon yala nang, sik deiyoknye Raja dam bana ati nyabuk.

¹⁵ Yefta birye nyabukba, sikce nyalbiyik yupu ara ani. Na Yefta birye nyapsine. Dipkoprob Israel nang arye Amon yala nang sik taleamik mutuku ap, Moab yala nang sik taleamik mutuku ap nirya ara, tonok babye ton kum dopromsike.

¹⁶ Dipkoprob winiamik ning ara, laka nyapnusine. Minop talak Israel nang Mesir mutuku batakuka, bisik yanamika ara, weik laut mekwen binuka sekdongobukba deiamuk mekwen, el si ara Teberau arye sini mekwen dam arye ubuka, omutuku kata ara, mek kum mutuku tam kibukabikce, Kades mutuku yanuka wekamik. Amek kwen dam arye tamubuka, otam tukwak ara, mek kum mutuku tam kipdobikce, Kades mutuku yanuka wekamik.

¹⁷ Kades mutuku yanuka wekik talak ara, Israel nang arye ninye ton wipdeibikba, Edom mutuku bisik bana ati, amutuku talibuka ulamuk Raja, el dam biyikce, ‘Naie, an talibuka uminye mutuku ara, nun bisikakuk banmabirye, omutuku kirikuka bitibye do?’ nyabuka moroplulume nyabikopura, Raja Edom dam biyikce morobik bukni, Edom mutuku taleamuka deiyoknye birye, ‘Yo ur dabinamlume kum nyamuk. ‘Yo urbenulume,’ kum nyamuka ati, sikce, ‘Moab mutuku noutam bisik binuyabʼ tenen, Moab mutuku talibuka ulamuka deiyoknye biti, ‘Naie, an talibuka uminye mutuku bisik ara, banmabirye, omutuku kirikuka bitibye do?’ nyabukabikce, binuka morobikba, el anye babye atouk, ‘Telebe,’ kum nyamuk. Winyamuka ati, sik Israel nang ara, Kades mutuku uk tuba ulamik.

¹⁸ Kades mutuku uk daulamika ani, aminyan talak amutuku batakuka, bisik biyik talak ara, Edom mutuku tam ap, Moab mutuku tam ap, ubuka kum binamik bukni, kata uamuk mutuku, mek pia kum uamuk mutuku bisikuk binamikce, amutuku pia lilkwauk binamika ani, keting panalyangan tam biyikce, Moab mutuku noutam kum biyikce, Arnon mek binamuka, dam binmeka ara, Moab mutuku keting panalyangan tam, sirya mutuku tam, tenda aik domik. Bukni, amek koubuka, otam keting kumulban tam, sik Moab mutuku noutam kum binamik. Ati ara, Moab nang, sik mutuku noutam pia kum binamik.

¹⁹ Aning atouk ton, atalakuk Israel nang arye, Amori mutuku nang deiyok kibuka Esibon mutuku ulamukce amutuku taleamuk Raja, el si ara Sihon, el taleamuk mutuku bisik bana ati, ninye ton dopdeibikba, elti, morolbinmik. Ara, sik Israel nang arye, ‘Naie, nun mutuku koproba binamaba ati, ance taliplum mutuku bisikuk ubuka bitibye do? nyabuka, mororamik.

²⁰ Nyabuka morobik bukni, Raja Sihon birye, Israel nang ati, ‘Dipkoprob yupu nyanmake,’ kum tenebuk. Aning kum bukni, sikda teleb aryuk kum binamake,’ tenebukce, diba kum tenebuka anya arye, elce, ‘Yo, telebe, dabilulume,’ kum nyabuk. Utenebukce, Sihon el yin nang nirya ati, bulupdeibukba, sik adiparyuk, ‘Israel nang ap mal opdanamapʼ tenen, Yahas mutuku binamek bisik ara, sik tenda aik yanuka dobikce, Israel nang ati olalbiyik.

²¹ Winibik bukni, Israel nang sik ni koproba, Allah Yahweh arye, sikti, mikip arebukba, Sihon ap, el yin talen nang nirya ap, Israel nang taruk noutam deibukba, sikce obuka sirya dakik. Winibikce, Israel nang ara, sik Amori nang talibuka ulamik mutuku nirya ara, alubuka doprobik.

²² Amori nang arye talibuka ulamikak doprobik mutuku ara ani. Ara, outam (arah selatan) balamuk mek Arnon mek lilkwa tam arye dipdongobuka, eitam (ara utam) balamle mek, Yabok mek lilkwa utam dabu mutuku tam ap, tonda amutuku kata mek kum mutuku, keting panalyangan tam arye diprongobuka, otam Yordan mek koubuka, keting kumulbalamle tam, Yordan mek lilkwa dam, anoutam ulul mutuku nirya, alubuka doprobik.

²³ Ati ara, aning nirya nun ni koproba Allah Yahweh arye winipnin yangalamuka ara, talye kume. Israel nang nun ni koproba Allah Yahweh arye, sik Amori mutuku nang nirya yakdonokamukce, sik taleamik mutuku nirya dobukabukce, el mapu, ‘Naʼ tenen, nang, ‘Israel nang talipnamakʼ tenen, sik deiceuk areamuk. Bukni, anda, Kume, nun Amon yala nang arye, sik Israel nang punubibirye, sik taleamik mutuku alubuka dopropnamabe. Allah el ‘Naʼ tenen, nang ara, nunuk unamabe tenen, nyapmalum do?

²⁴ Ati, wini talak ara, ance, ‘Amutuku tamubuka dopropnamanʼ tenen, nyapmalam do? Ara kum winiptume. Na kanye ara, anggun si erelulum isa, el si Kamos, elce areamsuk mutuku ara, aninguk anggunce talye kanye bobuka, amutuku pia talinamlume. Teleb ning ara, aning uka. Aning atouk, nun ni koproba Allah Yahweh arye, amutuku-amutuku noutam ulamik nang malye kibukce, nun teleb ulina ati arepsuk mutuku ara, nun tibuk areamsuka ati, amutuku pia talibuka unamabe. Ati nun bataktibyeba, anggun kum doproptume. Amutuku ara, nun pia talibuka unamabe,” nyabuk.

²⁵ “Tonda, Ance tenepmalama ara, ‘Zipor birye deiamuknye, Balak Raja Moab bira, elda malinye bukni, nara telebnye tenepmalamce nyapmanilam do? Balak elce ton nun Israel nang ati, malye yupu nyabuka ikin ning ton pia kum deiamsuke. Tonda, nunti ton kum yanuka mal peiamsuke.

²⁶ Tonda, anti asipdekine. Keting tamun ara, yupa pia weik tiga ratus (300) tahun noutam nirya ara, Israel nang anggun Amon yala nang taleamlum noutam ulamupu bukni, weik asik dobuka Hesyebon mutuku ulamlumak ap, Aroer mutuku ulamlumak ap, tonda amutuku dana-dana uamuk mitik asik, dobuka ulamlumak nirya ap, tonda Arnon mek lilkwa ap ara, amutuku talibuka ulamlum bukni, nun ansinibuka amutuku-amutuku ulamupu talak ara, yata deiyok ati, atalak ara anggunce nun malye kibuka kum yakdonoksulumce, amutuku nirya ila tamubuka tuba kum dopromlum do?

²⁷ Ati, an dam ton nunce kum malye kipdeiamkupue. Anda, nun dam malye kililamsulume. Ara, an yin talen nang ap nirya ara, nunti, ‘Obuka sirya daknamapʼ tenen, olyangalamsulume. Allah Yahweh elda tukwak nang nirya ati, nun yupu bokolina deiyoknye usulula ati, arup arye Israel yala nang ap, Amon yala nang ap, nun deice aryuk winilanyap ning nirya ara, Allah aryuk ayupu nirya bokeipsilirye, teleb kipdeipnamsile.” Yefta birye, Amon yala nang, sik Raja biti nyabuk.

²⁸ Yefta birye ayupu nyapdeibukba, el tam nang arye bobikce binuka laka nyabikbuk, Amon yala nang, sik ninye deiyoknye Raja arye, ayupu kum kekebukce, yaniltakanauk ubuk. Ara, Amon mutuku deiyok kibuka taleamuknye birye, Diba nyapmasile tenen, ‘Telebe,’ kum nyabuk.

Yefta birye, “Amon yala nang ati, mal pibinamne,” nyabuka, nyalin yupu nyabukce, Allah ati, morobuk yupu

²⁹ Atalak ara, Allah el Pia Teleb, Lek Dip Kanye, Yefta el nong deice yanuka, bukukce melibuk. Winibuka arebukba, Yefta atalak Gilead tam ap, Manasye yala nang ulamik mutuku ap ati, binuka dilbiyuk. Binuka dipdeyukce, tamubuka Gilead mutuku noutam bukni, Mizpa mutuku uk yayuk. Yayukura, amutuku arye tamubuka, Amon yala nang arye, talibuka ulamik mutuku ton dilbiyuk.

³⁰ Amutuku-amutuku nirya akunum dilbiyukura, akaren aryuk, Yefta birye Allah Yahweh ati, nyalin yupu deice arye nyapdeibuk yupu ara ani. Na ni Allah Yahweh, ance, an mikip arepnimince, dipkoprob, Amon yala nang dobuka, na taruk deice arepniminyeba, obuka sirya daknamne. Winiptinyopura, narye mambul ning ton, arepnamkinca,” nyabuk.

³¹ Na tenepmana ara, Amon yala nang ati, mal pibinmanya ani, sik nirya obuka sirya daknirye, teleb aryuk tamubuka, na mutuku yanganibuk, yatanye do, nati, ‘Telebe nyapnunʼ tenen, na aik pum tam arye, minopce kutukuka yalinye bira, dipkoprob narye anye obukapnirye, Allah Yahweh an si erena ap, si kina ap ati, arepnamkine. Ara, kam ning obuka arelyangalamik touk, tonda opnarye, uku dongolamap atonun winipnamakine,” Yefta birye, Allah ati nyalin yupu deice arye nyabuk.

³² Nyabukura, akaren aryuk, Amon yala nang mal olalbana ati, Yordan mek koubuka otam biyuk. Atalak Yefta bira, Allah Yahweh el mikip melibuka deice arye, Amon yala nang pia weik tonun obuka sirya dakuk.

³³ Yefta birye, Amon yala nang weik tonun opnin banmoka ani, ninye weik obuka sirya dakuk. Ara, Aroer mutuku arye dipdongobuka, Minit mutuku, cang weik mutuku dam ara, sik weik asik dolamik ara, dua puluh kota (20) ap, tonda Abel-Keramim mutuku noutam ulamik. Amon yala nang babye, sik nirya obuka sirya dakuk. Israel nang arye, Amon yala nang nirya obikba, weik dibika deice arye, Israel nang akunum mikip weik kibikce, erebuka deice tamto ulamik bukni, sik Amon yala nang ara, ninye pia weik obuka, kum kipdeipnin balamika ati, sikda pia amu tamto ulamik.

Yefta el kilmu ati, sekik yupu

³⁴ Yefta birye, aning nirya akunum winibukopura, tamubuka, el mutuku Mizpa mutuku yayuk. El asik dam bukni, bisik tuba yanganmok talak ara, Yefta el kilmu arye el li koprop si erena ati, bung-bung nyan ning el si rebana talibukce, mot sebuka el li biti, “Telebe,” nyabukce, anyaik pum tam arye bai tam yanganmok buk, Yefta birye eibuk. Ura, Yefta el mapu ton pia kum deiamuk bukni, akilmu tonok deiamuka ati, el akilmu aryuk bisik dilbiyuk.

³⁵ Atalak ara, Yefta el kilmu arye winibuk ning eibukce, pia bico ubuk. Bico ubuk ati, el ongopmok baju kwiribuka wiliklobukce, el kilmu ati nyabuk. “Se, na kilmuo, an winipmalam deice arye, na kanye sirya opnilame. Yata deiyok ati, ance ‘Na kanye bouku sukuptuʼ tenen, winipmanilam do? Ara, narye na ni Allah Yahweh dam, ‘Aning ara winipnamne, aning ara, an si erena ati arepnamakine,’ nyabuka nyalin yupu deice arye nyapse ning ara, ila tamubuka tuba kum doproptinye. Anyapse ninguk winipnamne ati, na kanye pia sirya opnilame,” Yefta arye el kilmu biti nyabuk.

³⁶ Nyabukopura, akilmu arye tamubuka, el li koprob Yefta biti nyabuk. “Kume na nio, ance Allah Yahweh dam ara, Aning dipkoprob winipnamkine nyabuka, nyalin yupu deice arye akunum nyapmalum ning ara, Allah Yahweh akunum kekebukce, elce melipkuka deice arye, Amon yala nang ati akunum obuka sirya daklumce, sik kwang dakna ati, akunum oplumce sirya daklume. Ati, ance Allah dam nati, ‘Aning ara, dipkoprob winipnamkine,’ nyapmalum atouk winipnilyame. Ara, batakna pia kume,” nyabuk.

³⁷ Yefta el kilmu arye el li biti, tonap morobuk. “Naio, na patapmanil ning ara, tonok ton nyapnukine. Ara, wala bitinye ton, lo arepnunilyame. Winipniminba, na ka kilapu ap, nun neika mutuku tam uk, talye banamabe. Abanamap talak ara, ninye min kum dopnyeba, na wel aryuk dipnamana ati, wel ninye sik tenebikirye winilamak atouk upnin balamnya ani, ila tamubuka amutuku yanamne. ‘Winiptinyeʼ tenen, moropkine,” nyabuk.

³⁸ Yefta el kilmu nyabukba, el li birye, “Telebe, dabinamlyame,” nyabukba, awel kil ara, el ka kilapu ap neika, iknapye mutuku dam tamuk binuka ulamikce, ‘E, nun ka kil bira, wel talak aryuk dipnamlaryaʼ tenen, bukusukun kanye arebukba, engepdanuka talye balamik. Ara, sik ka kil bira, ‘Ninye dobuka, mi delina kumce, talye wel aryuk dipnamleʼ tenen, ati winilamik.

³⁹ Awala bitinye nyamuk touk akunum ubukopura, tamubuka el li Yefta dam yayuk. Yayukopura, akilmu el li birye Allah Yahweh dam ati, ‘Winipnamne,’ nyabuka, nyalin yupu deice arye nyamuk touk, akilmu dobuka, Allah el si erena ati arebuk. Ati, el akilmu ara, ninye dona kumce, wel ulamuka ani obukba dibuk. Ati ara, sik Israel mutuku noutam ulamik kilapu nirya ara, akilmu arye aning winyamuka ati, sikce aning tenipnarye, aketing tamun, aketing tamun nirya, like dumbarye sum deice arye, sik Israel kilapu, ‘Aning tupa biknamapʼ tenen, iknapi tam bai mutuku binuka engelamikce, malamik.

⁴⁰ Ara, akilmu arye winyamuka ati, sik Israel mutuku ara, ninye dona kum wel kilapu nirya ara, aketing tamun, aketing tamun nirya, like dumbarye sum deice arye, iknapye mutuku tuba-tuba bikirye, Yefta bira Gilead mutuku ulamuknye birye, deiamuk kilmu ati winyamuk ning tenepnarye, engepra ulamna ani, tamubuka sik asik yangalamik. Ara malye kanye bopnarye, balamik.