Hakim-Hakim 10 - Eipomek

Tola biti, sekik yupu

¹ Abimelek akunum dibukopura, tonoknye el si Pua, elce deiamuknye, el si Tola birye Israel sik deiyoknye una ati tikukce, Israel nang ati, teleb kipdeibuk. Tola el apu koprop ara, Dodo, elda Isakar yalanye ulamuk. Elda Ebrahim yala nang sik talilamik mutuku bukni, iknapi tam, mutuku si Samir mutuku bukamuk. Tola bira, ‘Israel nang sik mal olan nang ati, melibuka obuka sirya daknirye, Israel nang unyak mutuku talipnamne,’ tenyamukce, yanuka melilamuk.

² Tola birye, sik Israel nang ati, keting tamun dua puluh tiga tahun (23) deice arye, ninye deiyoknye kibuka taleamuk. Talyamuka ani, Tola akunum dibukopura, Samir mutuku weibik.

Yair biti, sekik yupu

³ Tola akunum dibukopura, el pununa ati, Gilead mutukunye tonok ara, el si Yair, elce sik Israel nang ati deiyok kibuka taleamukce, keting tamun dua puluh dua (22) tahun deice arye, ninye deiyoknye kibuka ulamukce, sikti, melilamuk.

⁴ Yair elce deiamuk mapu, ara tiga puluh (30) nang deiamuk. Sik anang ara balye deice bukuka ban ning, el si keledai basam babye sik ulamik touk, yuk-yuk tiga puluh (30) ekor keledai basam balye deice bukuka balamik. Tonda mitik-mitik asik Gilead mutuku tam dolamik babye, tiga puluh asik dobuka ulamik. Adobuka ulamik mitik-mitik asik dolamika ara, wini talak babye anyasik-anyasik nirya ati, atam mutuku si ara, Hawot-Yair mutuku tuba nyanyake.

⁵ Yair babye, daulamuka ani, aminyan talak ara, el akunum dibuk. Dibukopura, tonok mutuku si, Kamon mutuku noutam weibik.

Sik Amon yala nang arye, Israel yala nang ati, sik nong deice ikin delilamik ati, sekik yupu

⁶ Aminyan talak ara, sik Israel yala nang ara, tamubuka Allah Yahweh arye, Aning ara pia malye ning anya arye, aning ara na like,’ tenelul ninguk talibuka ulamik. Ara, sik Israel nang arye, Allah Yahweh ati, tuba kum tenebikce, elti, ton tamubuka, kum si erelamik. Israel nang ara, isa si Bahal, aisa-aisa ap, tonda Asytoret isa ap, aisa uk sik si erelamik. Ara, Sidon mutuku noutam ulamik nang ap, tonda, Siria mutuku noutam ulamik nang ap, tonda, Moab mutuku noutam ulamik nang ap, tonda Amon mutuku noutam ulamik nang ap, tonda Pilistin mutuku noutam ulamik nang ap, anang-anang, sikce si erelamik isa-isa uk, Israel nang babye, aisa si erelamik.

⁷ Winilamika ati, Allah Yahweh arye Israel nang ati, yu ubukba, ‘Israel nang ara, sik wenena ati, yuk mutuku yu nang arye, ikin ning sik nong deice deipnamake,’ tenebukak arye, Allah arye Israel nang dobuka, sik Pilistin mutuku nang ap, Amon mutuku nang ap, sik taruk deice deibuk. Winibukba, sik amutuku-amutuku nang arye, Israel nang ulamik mutuku nirya yanuka, obuka sirya dakikce, ikin ning weik, sik nong deice delilamik.

⁸ Ara, aketing tamun noutam arye deiyok koubikce, sik bitinye yala nang ara, Amon yala nang ap, Pilistin yala nang ap, sikce Israel nang malye weik kibik. Ara, Yordan mek duman koubuka, otam keting panalyangan tam ulamik Israel nang atia. Amori yala nang, sik mutuku ara, Gilead mutuku noutam ulamik nang arye, Israel nang, sik mutuku kan-kan noutam ulamik nang ati ara, keting tamun delapan belas (18) tahun deice arye, pia ikin ning delilamikce, Israel nang ati, malye weik winilamik.

⁹ Tonda, aninguk kum bukni, sik Amon yala nang arye, Yordan mek koubuka keting kumulban tam biyikce, Yehuda yala nang ap, Benyamin yala nang ap, Efraim yala nang ap, mal olbiyik. Winibikce, sik Israel nang ati, sikce weik ikin ning, Israel nang nong deice deililamikba, Israel nang ara, ‘Se yata winiptibye do?’ tenen, pia malye kanye bobuka ulamik.

¹⁰ Israel nang ara, pia malye kanye bobuka ulamik ati, sikce Allah Yahweh ati nyabik. “Se, nun ni Allah, anti ton pia malye wininmabe. Deiyok ara, nunce an tonok ati, an si kum erekinyapce, an dam arye batakuka biburye, talye ning isa Bahal, ayala isa-isa ati, si eremyaba deice arye, nun akunum malye ulilanyabe,” nyabuka morobik.

^11-12 Nyabuka morobikopura, Allah Yahweh arye tamubuka nyabuk. “Min talak ara, Mesir mutuku nang ap, Amori mutuku nang ap, Amon mutuku nang ap, Pilistin mutuku nang ap, Sidon mutuku nang ap, Amalek mutuku nang ap, tonda Maon yala nang ap, sik ayala-ayala yu nang arye, anggun Israel nang taleamsikce, ikin weik ning anggun nong deice delilamsik talak ara, anggunce nati, ‘Se, nun ni melipsimince, lyepsilyame,’ nyabuka moropnulumba, lyepsise do? ‘Dauplyeʼ, nyabuka batakamsise do? Ati teneipdelulume. Anggunce awinyamsise ninguk tenipnamlulume. Anggun Israel yala nang arye, nati, ‘Se melibuka lyepsilyame,’ nyabuka morolamnulumba, narye anggunti, lyepsise.

¹³ Narye anggunti winibuka lyepdomsise bukni, aning nirya tuba tenena kumce, wini talak babye, tuba anggunce na balye tamubuka bataknulumce, isa siuk erelulume. Ati wini talak ara narye anggun kum lyepropnamsitinye.

¹⁴ Anggunce, yuk talye ning isa mer ati, ‘Nun ni yapu ani,’ nyabuka, wiplumce, si erelulum isa mer, sik dam bimunce, anggun kanye imun upmasilye ning ara, ‘Melipsilyame,’ nyabuka, aisa ati engebuka moropmunyeura, sikce melipnamsinyake,” Allah arye, Israel nang ati nyabuka wenebuk.

¹⁵ Nyabuka wenebukura, sik Israel nang arye tamubuka, Allah Yahweh ati nyabik. “Diba nyapmasilame. Nun ni Allah, an dam arye nunda akunum malye ubupe. Ati, Allah Yahweh, ance nun wenena ati ara, ‘Sik anang deice ara, aning winipnamane,’ tenepsiminye ninguk, ikin weik dauplye babye, aninguk wininamsilyame. Bukni, pia tuba moropkiyap ning ara, asum aryuk, sik ikin ning delisinyak nang talisinyak noutam ara, melibuka lyepsutume, na nie,” nyabuka morobik.

¹⁶ Ati ara, Israel nang sikce talye aisa mer, sik urasin atouk ubuka puturubuka deiamikce, si erelamik ning nirya ara, ulubuka batikik. Batakikce, Israel nang ara, Allah el siuk erebik. Winibikopura, Israel nang ikin ning delilamikba, kanye imun kanye bobuka ulamik ning ara, Allah arye aning eibuka kel bikukce, ‘Se, sik tuba ikin kanye bobuka unyaka ara, kum bataktinye, melipnamne,’ tenebukce, kanye deibuk.

¹⁷ Aminyan talak ara, sik Amon yala nang, sik yin talen nang ara, ninye olalbana ati kintinip deibikce, Allah el si erena ati, tenda bobuka, Gilead mutuku yanuka domik. Atalak uk, Israel yala nang babye, ‘Sik Amon nang ap, mal olanauk mal olanuyapʼ tenen, Mizpa mutuku uk tenda aik yanuka dopmekce unmek.

¹⁸ Amutuku uk unmeka anya arye, Israel nang ap, sik deiyok nang ap, sikce nyalanmek. “Ura, nun kan-kan arye mikipnye birye, ilil una kumce, yin doproplirye, Amon yala nang, sik yin talen nang ati, deiyok kiplirye, mal olalbinamak do?” nyabuka, asilanmek. “Winiplinye bira, elce Gilead mutuku unyap nang nirya ara, deiyok kibuka talipnamsile. El yupu dem kekebuka unamabe,” nyanmek.