Hakim-Hakim 1 - Eipomek

Yehuda yala nang ap, Simeon yala nang ap, sikce Raja Adonia-Bezek tomobik yupu

¹ Yosua akunum dibuka ati, Israel ninye nirya arye, sik ni koproba Allah ati, “Nun Israel yala ninye kan-kan arye, yata yala nang arye, minopce menekuka bikirye, Kanaan mutuku unyak nang ara olbinamap do?” nyabuka, Allah Yahweh ati asipdeyik.

² Asipdeyik ati, Allah Yahweh arye nyabuk, “Yehuda yala nang arye, minopce menekuka olbinunyake. Ara, Kanaan mutuku tam nirya ara, narye Yehuda yala nang ati, akunum arepnamna ati, amutuku noutam unyak nang nirya ati obuka sirya daknamake. Tonda, amutuku nirya ara, sik dem dopropnamake,” nyabuk.

³ Nyabukura, Yehuda yala nang arye, sik kayapu nang, Simeon yala nang ati, “Amapo, anggunce melipsumunyeba, neika bibirye, Kanaan mutuku unyak nang binuka obuka sirya dakibirye, Allah arye nunti, ‘Amutuku ara, anggun dopropnamlume,’ nyapdeiamsuk mutuku ara dopropnamabe. Anggunce nunti melipsumunyopura, dotalak Allah arye anggunti kintinip deipsuk mutuku nirya ara, dopropnamluma ati, amutuku ulamice nang olbinumunye talak ara, nunce anggun melipnamsiyabe,” nyabik. Nyabikura, Simeon yala nang arye, sik Yehuda yala nang ati melibik.

⁴ Melibikura, Yehuda yala nang, sik ap neika ansinibuka olbinuyik talak ara, Allah Yahweh arye, sik neika olbinuyik nang deice mikip arebukba, Kanaan mutuku ap, Feris mutuku ap, ulamik nang nirya olbiyik. Ara, sik yin bon nang ara, yupa pia weik, Bezek mutuku dam binuka olanmeka deice arye, yupa pia weik, sepuluh ribu nang (10.000) binuka obik.

⁵ Bezek mutuku dam arye, olanmeka ani, amutuku ninye deiyok kibuka taleamuknye, Adonia-Bezek bira, sik Yehuda yala nang ap, Simeon yala nang ap, sikce Bezek mutuku dam arye anye eibikce, ‘Opnuyabʼ tenen, biyik. Binuka opnin banmeka ani, sik Kanaan mutuku nang ap, Feris mutuku nang ap ati, obuka sirya dakik.

⁶ Winibuka obikce, sirya dakik talak ara, ninye deiyoknye, Adonia-Bezek bira, ‘Opnikcakʼ tenen, ilil ubuka ati, adiparyuk bai sakuka biyukba, Yehuda yala nang ap, Simeon yala nang ap, sikce aminyan dobolbiyikce, binuka tomobik. Tomobikopura, anye el pamu taruk duk ap, yan duk pamu ning ap, binuka sekrobik.

⁷ Winibik talak ara, anye Adonia-Bezek birye nyabuk. “Kume, min talak ara, narye ninye deiyok kibuka ulamik nang ara, tujuhpuluh (70) nang babye, tomobuka sik taruk duk, pamu ning ap, yan duk pamu ning ap, sekuka batakamsiba, ulamikce, na meja deice bukuka, din dinmanbuk, adin sung-sunga sakanman ning ara, sik anang arye bulubuka dilamik. Sik anang ati, winilamse ning ara, Allah arye tuba tenyamnuka anya arye, aning ati, kwang daknile,” nyabuk. Nyabukopura, Adonia-Bezek adiparyuk bobukabikce, Yerusalem mutuku delilbiyik. Binuka deiamikba, daulamika ani, aminyan talak amutuku arye dibuk.

Yehuda yala nang arye, Yerusalem mutuku ulamik nang ap, Ebron mutuku ulamik nang ap, obuka sirya dakik yupu

⁸ Yehuda yala nang arye, Yerusalem mutuku ulamik nang yanuka obikce, amutuku nirya alubuka doprobik. Doprobikce, amutuku sik asik dobuka ulamik sukum nirya ara, uku dongobik.

⁹ Amutuku akunum winibikopura, aminyan talak, sik Yehuda yala nang anya arye, outam weik mutuku kon uamukak binmek. Ara, Kanaan mutuku noutam bukni, utam (arah selatan) dabu mutuku, mek pia kum mutuku noutam, amutuku si, Negeb mutuku dam tam, aulamik nang ap, tonda amutuku lilun tam bukni, otam keting kumubalamle tam, mutuku kon deice asik dobuka ulamik nang ap, obuka sirya dakik.

¹⁰ Tonda, Ebron mutuku bukni, minop talak ara, amutuku bukni, mutuku si Kiryat-Arba nyalamik mutuku ulamik. Kanaan mutuku nang ati, binuka obikce, sirya dakik. Amutuku mal olalbiyikce, ninye deiyok nang, sik si ara, ani. Ara, Raja Sesai ap, Ahiman ap, Talmai ap, adeiyok-deiyok nang, sik yin bon nang nirya mal olalbinmekce, obuka sirya dakik. ARaja nang ap, sik taleamik nang ap ara, Yehuda yala nang arye binuka, obikce sirya dakik.

Yehuda yalanye Otniel birye, Debir mutuku ulamik nang binuka, obukce sirya dakuk yupu

¹¹ Ebron mutuku akunum obukabikce, sik Yehuda yala nang ara binukabikce, Debir mutuku ulamik nang ati, binuka obikce sirya dakik. Amutuku atibuk, min talak ara, el si Kiryat-Sefer mutuku nyalamik.

¹² Yehuda yalanye tonok, el si Kalep birye nyabuk. “Yatanye bilirye, Kiryat-Sefer mutuku unyak nang binuka obukaplirye, amutuku alubuka doproplinye bira, na kilmu Akhsa bira, el anye arepnyopura, dopnamle,” nyabuk.

¹³ Nyabukura, tonoknye ton, el si Kenas, elce deiamuknye Otniel, amutuku alubuka doprobuk. Otniel bira, Kalep, el weit koproba ulamuk. Otniel birye, Kiryat-Sefer mutuku nang binuka obukabukce, amutuku nirya alubuka doprobuk. Winibuk ati, Kalep birye, el kilmu Akhsa bira dobuka, Otniel biti arebukba, Otniel birye dobuk.

¹⁴ Otniel ap, Akhsa ap, dopdarik talak ara, Akhsa birye Otniel biti, nyabuk. “Anda, na ni dam bitumce, ‘Wa win tuku ton arepnutume,’ nyabuka moropsutume,” nyabuk. Atalak aryuk, Akhsa keledai basam balye deice bukuka banmoka ani, el li koprop Kalep, dam koulukuka biyukce, yayuk. Yayukura, el li Kalep birye, “Anda, yata ning pantanmakila ati, na dam tamubuka yalam do?” nyabuka asibuk.

¹⁵ Nyabuka asibuk ati, Akhsa birye, el li Kalep biti nyabuk. “Na nio, ance na unamnak ati, pia kata mutuku buk, keil weik ulamuk arye, mek kum mutuku, Negeb mutuku noutamak arye deipnulum bukni, teleb tuku ton, amutuku si ara, Gulot-Mayim, Aning atonun, tuku ton patanmanilba yanmana anya arye, ‘Atuku arepnutumʼ tenen, moropkine,” nyabukce, yanuka morobukura, el li Kalep birye, mek pu tam ap, mek dara tam ap, tonda, Gulot mutuku itam ap, mek dara tam ap ara, pia teleb mek pu uamuk tam, Gulot mutuku noutam dipdongobuka, utam nirya ara, el kilmu ati arebuk.

Yehuda yala nang ap, Benyamin yala nang ap, sikce Kanaan mutuku nang obuka, sirya dakika ati, sekik yupu

¹⁶ Musa el kil, el li Obab bira, Keni mutukunye ulamuk. Elce deiamukba, deipdanin yangalamik nang ara, sik ap, Yehuda yala nang ap, Yeriko mutuku ara batakuka, yuk mutuku neika biyik. Yeriko mutuku ara, kurma yo duk weik awamuka ati, anyaka dolamik asik si ara, ‘Kurma asik,’ nyabuka si domik. Yeriko mutuku batakuka, outam binuka, bisik banmeka ani, biyikce, utam mutuku (arah selatan), Yehuda yala nang arye dolamik mutuku noutam biyik. Amutuku ara, mok pia kum celamuka arye, tuku mikuka sisal sepromukak ara, amutuku si Negeb mutuku bukni, Arad mutuku ton nyalamik. Amutuku noutam yayikce, amutuku ulamik nang kan-kan yanuka ulamik.

¹⁷ Ulamik talak ara, Simeon yala nang ap, Yehuda yala nang ap, Kanaan mutuku tam bukni, Zefat mutuku ulamik nang olbayik talak ara, sik ap neika melibukba biyikce, Zefat nang obuka, sirya dakik. Obikce, amutuku ulamik ninye ap, anyasik dolamik ning ap ati, malye yupu nyabuka, sik deice deibuka, binuka subdongbik. ‘Amutuku ap, aninye ap, nun ni Allah arena ati, sik nirya obuka sirya daknamabeʼ tenebikce, obuka sirya dakikce, amutuku ninye nirya kum daneibik. Winibika ati, amutuku si ara, Horma mutuku nyabik.

¹⁸ Tonda, Yehuda yala nang arye, weik asik dolamikak ara, weik tonun alubuka doprobik. Ara, Gasa mutuku ap, Askelon mutuku ap, Ekron mutuku ap, tonda amutuku noutam ulamik ninye ap, amutuku tam mitik-mitik asik dobuka ulamikce, awamuk ning nirya ara, obuka sirya dakikce, amutuku ton alubuka doprobik.

¹⁹ Atalak nirya ara, Allah Yahweh arye, Yehuda yala nang ati melibukba, iknapye mutuku tam nang nirya ara, obuka sirya dakikce, amutuku alubuka doprobik. Bukni, anyapce ubuka, outam mutuku lu tam ulamik nang ara, obuka sirya kum dakik. Sik mutuku alubuka kum doprobik. Tonda, aKanaan tam nang ara, amutuku noutam arye, kum yakdonokik. Deiyok ara, sik lu tam ulamik ninye, Kanaan nang arye, ninye olbana ati, kereta perang, kat ning si besi arye moupdeiamik ning ton taleamika ati, amutuku ulamik nang ara, Israel yala nang, sik Yehuda tam nang arye obuka, sirya dakik bukni, kum yakdonokik.

²⁰ Tonda, Ebron mutuku ara, Kalep ati arebik. Ara, minop talak Musa birye, “Amutuku ara, Kalep arepnamlyame,” nyapdeiamuka ati, anyapdeiamuk touk, Kalep ati arebik. Arebikura, Kalep birye, min talak Enak yalanye birye deiamuk nang, winilye nang amutuku talibuka ulamik buk, Kalep birye anang obuka, bataklamuk.

²¹ Winilamuk bukni, sik Benyamin yala nang arye, Kanaan tam nang, Yebus yala nang ara, Yerusalem mutuku ulamik buk, ‘Obinuka obibirye kum daneipnamap,’ tenebik bukni, Yebus yala nang ara, kum yakdonokamik. Ati, Benyamin yala nang ap, Yebus yala nang ap, sik neika Yerusalem mutuku ansinibuka ulamik. Tonda, ayupu sekupu talak babye, tuba aunyake.

Yusuf birye deiamukba, dadeipdanin yangalamik nang arye, Betel mutuku nang obuka, sirya dakik yupu

²² Yusuf birye deiamukba, dadeipdanin yangalamik nang arye, Betel mutuku weik asik dobuka ulamikak, biyikce obuka sirya dakik. Atalak nirya ara, Allah Yahweh arye, sik Yusuf yala nang ati, meliamuka deice arye, ayala nang nirya, malye kibuka obuka sirya dakik.

²³ Yusuf birye deiamukba, dadeipdanin yangalamik nang ara, Ebrahim yala nang ap, Manasye yala nang ap, ton ulamik. Sik ayala nang arye, ansinibukabikce, weik asik Betel mutuku dobuka ulamik ninye dam binuka, obuka sirya dakik. Aobuka sirya dakik mutuku si ara, Lus mutuku nyalamik. Amutuku ulamik ninye ap tonda, amutuku uamuk ning dilbana ap ati, dopdeibik nang ara, Allah Yahweh arye melibukba, teleb aryuk amutuku urasin ati, dilbiyik.

²⁴ Anang amutuku dilbana ati, bisik banmek talak ara, tonoknye ton Betel mutuku noutam arye yangayukba, sik ap epdayik. Epdayikce, sik amaka meilbana ati banmek nang arye, el anye biti nyabik, “Ance nun melipsutumce, ‘Amutuku wekelban ati, teleb bisik ara ani,’ nyapsutumce, melipsutumopura, nunce aweik asik dobuka unyak mutuku wekibirye, aninye obipyopura, nunce anti melipkibirye, ‘Anda nun kwit koprobaʼ tenen, teleb kipdeipnamkiyabe,” nyabik.

²⁵ Nyabikura, anye birye nyabuk. “Yo ura, aweik asik dobuka unyak mutuku noutam, wekelbana ara, abisik arye wekuka binamalume,” nyabuka kapdeibuk. Elce bisik peterepmokba, sik Manasye yala nang ap, Ebrahim yala nang ap, abisik wekuka biyikce, amutuku ulamik nang nirya binuka, parang ya arye sekuka, obuka sirya dakik. Bukni, sik bisik nukmoknye ap, el mapu silip ap, sik nirya ara, ona kumce, batakdongobikba bindobik.

²⁶ Kum obikika ati, anye bira, Betel mutuku arye batakuka, otam Het yala nang mutuku binuka ulamuk. Ulamukce, weik asik ton dobuk. Amutuku si ara, “Lus mutuku,” nyabuk. Nyabuka, si dobuk mutuku ara, wini talak babye, abuku sekupu talak babye, asi tuba si nyake.

Israel yala nang arye, Kanaan mutuku tam ulamik nang kum yakdonokik ati, sekik yupu

²⁷ Manasye yala nang arye, Kanaan mutuku malye kibukabikce, amutuku alubuka doprobik talak ara, Kanaan mutuku minop ulamik nang ara, kum yakdonokamik. Amutuku noutam arye, kum yakdonokamik nang ara, sik si ara, ani. Bet-Sean mutuku ulamik nang ap, Taanak mutuku ulamik nang ap, Dor mutuku ulamik nang ap, Yibleam mutuku ulamik nang ap, Megido mutuku ulamik nang ap, tonda aweik asik nirya dobuka ulamik dam ara, mitik-mitik asik dobuka ulamik nang nirya babye, kum yakdonokamik. Ati ara, Kanaan mutuku noutam ulamik nang ara, kat kanye bobuka, ‘Amutuku uk unamapʼ tenen, ulamika arye, kum yakdonokika ati, Manasye yala nang arye, alubuka dopromik mutuku uk, tuba ansinibuka aulamik.

²⁸ Israel nang nirya, daulamika ani, aminyan talak, sik mikip weik upnin bayukopura, Kanaan mutuku ulamik nang ati, “Anggunda, nun piluk donamsulume,” nyabuka, ikin pil dilamikba, dolamik. Winilamik bukni, Israel nang arye, minop talak Kanaan mutuku nang, sik kan-kan ulamik nang ara, kum yakdonokamikce, batakamikba, tuba amutuku ansinibuka ulamik.

²⁹ Aning atouk ton, Ebrahim yala nang arye, minop talak Kanaan mutuku ulamik nang arye, Geser mutuku weik asik dobuka ulamik nang ara, anang ati, malye kibik bukni, sikce anang ati, kum yakdonokamika ati ara, amutuku noutam babye, sik Kanaan mutuku nang ap, Ebrahim yala nang ap, sik neika ulamik.

³⁰ Aning atouk ton, Kanaan mutuku nang ap, Kidron mutuku weik asik dolamik nang ap, Nahalol mutuku weik asik dolamik nang ap ara, sik Israel yala nang bukni, Zebulon yala nang arye, anyasik-anyasik nang ara, kum yakdonokamik. Winilamikce, Kanaan mutuku nang ap, Zebulon yala nang ap, sik neika ulamik. Winibuka ulamik bukni, Zebulon yala nang arye, sik Kanaan mutuku nang ati, “Nun piluk donamsulume,” nyabuka, ikin pil dilamikba, apiluk dolamik.

³¹ Aning atonun, Asyer yala nang arye, Kanaan mutuku ulamik nang kum yakdonokamik. Ara, Kanaan mutuku nang ara, Ako mutuku ap, Sidon mutuku ap, Ahlab mutuku ap, Akhzib mutuku ap, Helba mutuku ap, Afek mutuku ap, tonda Rehob mutuku ap, anyasik-anyasik nirya dobuka ulamik nang ara, Asyer yala nang arye, kum yakdonokamik.

³² Kum yakamika ati, min arye Kanaan mutuku ulamik nang ara, tuba amutuku ulamikbuk, Asyer yala nang ap, sik neika tonok ulamik. Deiyok ara, Asyer yala nang arye, sik Kanaan yala nang ati, kum yakdonokamika ati, tupa neika ulamik.

³³ Aning atouk ton, Naftali yala nang arye, Kanaan mutuku min arye ulamik nang ton, kum yakdonokamik. Ara, Bet-Semes asik ap, Bet-Anat asik dobuka ulamik nang ara, kum yakdonokamika ati, Naftali yala nang ap, sik tonok neika amutuku ulamik. Winibuka ulamika ani, sik Naftali yala nang arye, Kanaan mutuku min arye ulamik nang, sik Bet-Semes mutuku ap, Bet-Anat mutuku ap, ulamik nang ati, “Nun piluk donamsulume,” nyabuka, ikin pil dilamikba dolamik.

^34-35 Kanaan mutuku min arye ulamik nang, sik Amori yala nang, sik ulamik mutuku asik si ara, ani. Ara, Ayalon mutuku ap, Salbim mutuku ap, tonda Heres mutuku ap, asik dobuka ulamik. Sik Amori yala nang ara, amutuku noutam ulamik nang arye, sik Israel yala nang ap, Dan yala nang ap ati nyabik. “Anggunda, bindoplulume. Anggunda, asukum lu tam ton yangana kume,” nyabuka, yupu seklamikce, yakdonokikba, Dan yala nang ara, mutuku taram tamuk, binuka ulamik. Winilamik bukni, Amori yala nang ara, Yusuf birye deiamukba, dadeipdanin yangalamik nang arye, sik Amori nang deice, ikin ning weik delilamik. Ara, Efraim yala nang ap, Manasye yala nang ap, sikce, sik Amori yala nang ati nyabik. “Ura, nun pil ara, pia pi dobuka donamsulume,” nyabuka, ikin pil dilamikba, pil dolamik. Winibuka, sik abitinye yala nang arye, Amori yala nang ati, ikin pil dilamikba dolamik.

³⁶ Amori yala nang, sik ulamik mutuku ara, Akrabim mutuku welebanak arye, dipdongobuka, keting kumulban tam (ara barat) obinamuka ani, Zela asik dolamikak bisibuka, otam ton binamukce, otam mutuku kon bukamukak binuka deiamik.