Hagai 1 - Eipomek

Allah Yahweh arye, “Na si eren aik uluplobik ning ara, tuba tamubuka dopnululume,” nyabuk yupu

¹ Allah Yahweh arye, “Na si eren aik uluplobik ning ara, tuba tamubuka dopnululume,” nyapdeibuk talak ara, Raja Darius birye, ninye deiyoknye kibuka, Persia mutuku ulamik ninye nirya taleamuk talak ara, keting tamun like bitinye kibuk. Aketing tamun deice aryuk, wala ara nakub wala kibuk. Awala deice keting noutam tonok, tanggal 1 kibuk sum ara ani. Asum ara, Allah Yahweh arye, Yehuda mutuku ulamik ninye noutam arye, Gubenur kibuka taleamuknye, el si ara Sealtiel, el mi Zerubabel ap, tonda, Allah el si eren aik noutam talibuka, pil dona deiyok nang, sik imam-imam weik deiyoknye kibuka ulamukce, taleamuknye, el si ara Yosadak, el mi Yosua ap ati, “Sik dam nyalbinulyame,” nyabuka, nabi Hagai dam yanuka nyapdeibuk.

² Allah Yahweh aning-aning nirya talibuka, deice tam erebuka ululnye bira, yin talibuka unyak malaikat nirya, sik deiyoknye ulule. Allah Yahweh arye, nabi Hagai dam yanuka nyapdeibuk yupu ara ani. “Sik Babel mutuku aunyak ninye nirya arye, Allah Yahweh el si eren aik tamubuka don talak ara, min kum kibuk,” nyanyake.

³ Winyanyaka ati, Allah Yahweh el mapu koprop Israel yala ninye, sik dam Allah yupu laka nyalbana deiyoknye, el si ara, nabi Hagai dam yanuka yupu nyapdeibuk.

⁴ Se, na mapu koprop, sik un asik telebuk dobuka upnamlum talak ara, akunum upmasil do? Tonda, na si eren aik ara, kum doplumce, batakuka luba kipluma ara, yata ati aik dona ara, walwaluk upsuk do? Na si eren aik uluplobik ning ara, malye ubuka anya arye, akunum lipsisikuka donmanutum bukni, anggun asikuk tenemunce, tamubuka umunya ara, yata deiyok ati do?

⁵ Ura, anggun kayapu ati ton, anggunce tamubuka dipdemunce, kiklipdenamlulume. ‘Teleb usulul do? Malye usulul do?’ tenen, na Allah arye nyapsine.

⁶ Winipmanto ara, anggun yala ning ara, weik arye dokolulum bukni, ayala ning dokamunya ani, nong lin talak ara, mitik anunuk lilulume. Tonda, anggun din ning ara, weik ausulul bukni, adina bobuka dipmunye talak ara, mun noutamak saksilirye, kum boupsiliba, teleb kanye bobuka, kum ululume. Tonda, anggun anggur yo duk wa ara, weik welulum bukni, dakuka dilulum talak ara, kum bousulule. Atonun tonda, buppu una ati, anggun baju weik tonun ongomunya babye, anggun nong buppu kum pirisulule. Tonda, ‘Yuk nang melibuka pil dobipyeura, dekna ning arepsikiba, deibibirye, kam tuba unamabe,’ tenemunya babye, adelilulum ning nirya ara, bisik arye sakaliba, ‘Naʼ tenen, kum delilulume. Ara, anggunce nati, ‘Allah elda weik mambule’ tenen, kibuka si kum erenululume ati, anggunce, ‘Winipnamepe,’ tenelulum ning nirya ara, talyeuk ulule. Nong kum upnamle.

⁷ Ati ara, anggun winilulum ning nirya ati, anggunce tamubuka dipdemunce, kiklipdandelulume. ‘Teleb usulul do? Malye usulul do?’ tenen, na Allah arye nyapsine. Awinisulul ning ara, anggunce dilamunce, ‘E, nun unyap ning urasin ara, winisulule’ tenen, moubuka kel bikildalulum do? Aning ara, yata ning deice arye, malyeuk usulul do?

⁸ Ati ara, wini talak anggun adiparyuk, amutuku dup, amutuku dup deice welepmunce, na si eren aik dona ati, yo binuka dobuka yalulume. Abobuka yamunyopura, na si eren aik yanuka doplulume. Na si eren aik dopmunyopura, narye anyaik ati, kanye deipnirye, na mikip weik ap, dirina ap ara, anyaik noutamuk deipnamne. Deipniba, aunamle talak ara, anggun Israel ninye ap, yuk mutuku ninye ap, eipmunce, ‘Se, dipkoprob Allah, elda weik mambul ulule,’ tenepmunce, nati kibuka, si erenamlulume.

⁹ Anggun wa wilulum ning ara, ‘Nong weik upsiliba lipnamabe,’ tenelulum bukni, atenebuka wa wiamunye touk, kum lilulume. Tonda, anggun wa wiamunyak arye, nong liplipbanmamun talak ara, na Allah arye, ‘Aning nirya kum uptu’ tenen, pong nyapnyopura, kumanya atonun ubuka yalirye, bopdakuka balolamsile. Adeice, anggun lipmamunye ning nirya ara, kum usulule. Anirya kum kilosulule. Nara Yahweh, aning-aning talibuka, deice tam unirye, yin talibuka unyak malaikat nirya ara, sik deiyoknye unune. Narye asipdese. “Aikin ning aresunun ning ara, yata ning deiyok ati, narye winisunun do? Aning ara, ani. Anggunce na si eren aik ara, tamubuka kum dopnulumba, aik oldem ubuka ati, usunune. Adeice arye anggunda, anggun damnye un aik ara, pia pi deibuka, mikip arye domunce, anggun aik wekuka, mangkau kanye bobuka ululuma ati, nyapsine,” Allah arye nyabuk.

¹⁰ Nyabukce, ayupu ton dukdongobuka nyabuk. Anggunda, pia malyeuk winimunce, nati kum tenenululume. Adeiyok ati, anggun wenena ati nyapsiba, anggun wa wibuka koumunyak nirya ara, mok ton arepneba, mok ceplirye, awa win dam kum saknamle. Winipsilyopura, anggun koun ning ayala-yala nirya ara, teleb ubuka kum papnamsile.

¹¹ Tonda, anggun wenena ati, na Allah arye dou mana li arepsisiba, tuku ap, amutuku dup deice nirya ara, tuku akunum sesal sepropsuke. Ara, wini talak babye, aminyan doyanamle talak babye, anggun kouamlum yakong atonun ning, el si ara gandum, wa wimunyak ap, anggur wa win dam ap, zaitun yo duk wa win dam ap, tonda el biyuk tuku deice arye, palamle ning ayala-yala nirya ap, tonda ninye nirya ap, talye kam ulamak ning ayala-yala nirya ap, tonda ninye arye talibuka, winilamlum ning ayala-yala nirya ara, kum kipdeipnamsile. Anggun wenena ati, aning-aning nirya, malye kipdeipnamsine. Allah arye, Israel ninye ati, nyabuk.

Israel ninye sik nirya arye, Allah Yahweh nyapdeibuk yupu, moubuka talibik yupu

¹² Ara, Allah el yupu laka nyana deiyoknye, nabi Hagai dam yanuka, nyabuk yupu nirya ara, Hagai birye Zerubabel ap, Yosua ap, tonda Israel yala ninye, Babel mutuku wenenak delilbinamika ani, tamubuka yayik ninye nirya ap ati, Allah Yahweh arye, nabi Hagai dam nyabukba, nabi Hagai birye binuka, laka nyabuk yupu, sik nirya arye kekebik. Kekebikce, Allah ati ilil ubukba, ayupu uk, moubuka taleamikce, pia ulamik.

¹³ Atalak ara, Allah arye, “Israel ninye, sik dam nyapnalyame,” nyabuka, nabi Hagai dam yanuka, laka nyapdeibuk yupu deice arye, nyapdeiamuk ning ara, nabi Hagai birye, ayupu nirya ara, Israel yala ninye bulubuka wekmek noutamak, “Allah arye, ‘Winibuka melinamsine. Na ap, anggun ap, neika unamabe,’ nyapdeipsuke,” nyabuk. Nabi Hagai birye nyabukba, sik Israel ninye nirya, ayupu kekebik.

¹⁴ Allah arye, Yehuda tam ninye talina ati, deiyok kibuka taleamuk deiyoknye, Gubenur Zerubabel, el kanye talima noutamak, pil dobukba, adiparyuk, ‘Winipnamne’ tenen, kanye talima erebukce, kil-kil ubukba, pil dolamuk. Atonun tonda, Allah el si eren aik noutam talibuka, pil don nang, sik weik deiyoknye, el si ara Sealtiel, el mi Yosua, el kanye talima noutam pil dobuk. Tonda, Israel yala ninye, Babel mutuku wenenak delilbinamika ani, batakikura, tamubuka yayik ninye babye, sik kanye talima noutamak pil dobuk. Winibuka ati, sik anang nirya tabakuka, tonok kanye bobuka ulamikce, sik ni koproba Allah Yahweh, el si eren aik lipsisikuka dona ati, yanuka bulubuka, pil neika dolamik. Ara, aning-aning nirya, talibuka deice tam ulirye, im deice yin talibuka unyak malaikat nirya, sik weik deiyoknye Allah, aninye nirya arye, ‘Allah el si eren aik, tamubuka dopnuyap’ tenen, bulubuka yayik. Anyaik lilsisikna ati, pil dolamik.

¹⁵ Allah el si eren aik pil dona ati, deiyok koubik sum ara, ani. Ara, nagup wala, tanggal dua puluh empat (24), asum arye, pil deiyok koubuka dobik. Atalak ara, Persia mutuku ninye deiyok kibuka, taleamuknye bira, Raja Darius, elce amutuku taleamuk talak noutamak ara, apil deiyok koubuka dolamik.