Habakuk 3 - Eipomek

Habakuk birye, Allah ati morobuk yupu

¹ Allah el yupu laka nyana deiyoknye, Habakuk birye, Allah ati morobuk yupu. Amorobuk ning ara, sik Ibrani nang arye, mot selamik ning, amot si ara, Sigionot nyalamik atonun nyabuk.

² Habakuk birye nyabuk. “Se, na ni Allah, ninye weik arye, an si ap, ance weik mambul pil dolamlum ning ap ara, nyalamikba, na akunum kekelamse. Tonda, an Allah Yahweh arye, weik mambul pil, minop talak dolalum ning ara, kekepse ati, ilil unulule. Aning nirya ara, keting tamun, keting tamun nirya weik, mambul pil dolamlum ati, ‘Wini talak babye, aning tuba lak kibuka, pil dopsutum’ tenen, moropkine na nio. Wini talak ara, nun Israel ninye, pia malye weik winilamupu ati, ance yu kanye bosimince, wenenamsilam bukni, wini talak noutamak ara, pia tuba bico ukilye ning ara, luba kina kume. Nun malye winina ati, adiparyuk obuka, sirya daksutum bukni, ‘Nun ti bico tenebuka melinamsilam’ tenen, moropkine na nio.” Habakuk birye, Allah Yahweh ati, nyabuka morobuk.

³ Morobukce, ayupu ton nyabukce morobuk. “Se na ni Allah, Teman mutuku arye yanuka lyepsulume. Anda, malye ning tonok ning babye, kum winilyamnye, Pia Teleb Lek Ulyame bira, Paran Mutuku arye yanuka, lyepdopsulume. Atalak ara, nun ikin ati, yanuka meilyamsuluma deice arye, an weik teleb winilyam ning ap, weik dirina ap ara, im noutamak, nirya lak ulamuk. Aning atouk, tukwak mutuku im sirya, mutuku sirya, ulamik ninye arye, an si ati, si erebuka, an si weik arye erelamikce, ‘Allah ara, pia telebe,’ nyalamik. Anda Allah atibuk, winililamkike.

⁴ Se na nio, an dirina ara, keting yangalamle talak, dirina weik ulamle touk ubukce, Allah an mikip duknulyamak arye, an taruk arye, liman ap, bebeya laklamle ning ap, dopkweteplumba, til daklamle atonun upsuke. Aning ara, Allah, an mikip atia.

⁵ Allah arye, ‘Amutuku binun’ tenen, binulumak nirya ara, weik uk dina deiyok ning arelalumba, malye ninye weik arye, uk taleamukba, diplamik. Aning atouk, an balalum mutuku noutamak nirya ara, weik kanye imun uk arelalumba, malye nang weik arye, uk dilamukba diplamik.

⁶ Na nio, an Allah arye, mutuku deice tiklumba, amutuku ara, weik arye lulukamuk. Tonda, yata mutuku ninye do nirya, ance aninye sik wenena ati, pia pirilelalum talak ara, ninye nirya elilamekce, ilil ubukba, imun kanye bolamikce, ‘Se yata wiripnamsil do?’ tenen, sirim talilamukba ulamik. Minop talak bukamuk mutuku ara, ance areplumba, weik arye lulukunmok deice arye, sakukba, kum kipdeiplume. Tonda, minop talak elilamupu mutuku dup ara, ance areplumba, ila tokna dobukce, pia kum kibuka deiplumopura, lyu weik ubuke. Na nio, ance winiminye ning nirya ara, pia aunamle.”

⁷ “Nun Israel ninye lyebuka boyanamsulum talak ara, Kusyan nang, sik cang kain bol arye, doltakne aik dolamik ning noutamak ulamikce, sik ilil weik ubuk. Aning atouk, atalak aryuk, sik Midian mutuku ulamik ninye babye, anti ilil weik ubukba, ikin kanye bolamikak, narye eipse.”

⁸ “Na ni Allah Yahweh, anda amutuku noutamak balamuk mek ati, yu upkuk do? Tonda, amutuku balamuk mek ati, yu upkukba, ‘Wenebuka kum kipdeipnamne,’ tenelalum do? Atouk, laut mekwen ati yu upkuk do? Winipkukba, amek ap, alaut mekwen ap, bokeiplumba, dana-dana tam kiprobuk. Winipmanto ara, yu upkukba, apil dolamlum talak ara, yin nang arye, sik kuda basam libuka, tuku deice balamle ning, el si kereta kuda ap, tonda sik kuda basam balye deice bukikirye, bikbik abuka bikirye, olbalamak touk, ance apil minopce, doplume na nio.

⁹ Ance tenelalum touk, yin talin nang arye, yin dobuka olyangalamik talak ara, ance, ‘Winibuka opnamake,’ tenelalum touk, sik yin dopdomikce, ninye weik olamike. Tukwak mutuku noutamak ara, ‘Yuk-yuk upnamle’ tenen, talye balamle mek ap, weik laut mekwen ap, arelalumce, mutuku-mutuku nirya noutamak arye bokuka, dana-dana tam kipdeiplumba, anoutam ara, mek balamuk. Tonda, laut mekwen ara anoutamak deibuk. Mutuku-mutuku nirya yanuka wiliproplumba, mek pu dobuka balamuk.

¹⁰ Winiplum talak ara, Allah an yalumopura, mutuku-mutuku nirya luluklamukba, amutuku arye elilamik. Tonda, tukwak mutuku balamuk mek ap, laut mekwen ap nirya ara, anti ilil ubukba, mek nirya longteng-longteng abuk. Winilamuk talak ara, mek nirya obuka balamukce, weik lelim nyabuka balamuk. Laut mekwen deice tam ara, anti dilamkukce, mekwen longteng-longteng abuka, mek keit weik arye welebuk.”

¹¹ Na nio, an Allah yangalalum talak ara, keting ap, wala ap bana kumce, tonok sukumuk tunim aprike. Winiprik talak ara, an mal doplumba, dirina weik ubuk. Tonda, ance ninye ona ati, cang yo taice doplum talak ara, ayo taice deice dirina weik ubuke.

¹² An yu ulamkuk talak ara, tukwak amutuku-amutuku noutamak arye, tuku yanibuka balamlume. Atalak ara, yu ulamkukba, amutuku ulamikce, malye-malye winilamik nang ati, yaniplobuka kama arye, ninye pia olamak touk, amutuku ninye nirya wenelalume.

¹³ Winipnin balalum talak ara, ance, ‘Na tenena ninye unamak’ tenen, wipdeiamlum nang, an mapu atibuk, ‘Lyepropnamne,’ tenelamsulumce, lyepdopsulume. Ara ance, ‘Aninye ara, na ning uka’ tenen, wibuka deiamsulum nang ati, wibuka dopropsulumce, lyepsulume. Winipmunye talak arye, sik pia malye-malye weik winilamik ninye, sik ninye deiyoknye bira, weik arye weneplume. El taleamuk ning nirya ara, uluploplumce, el taleamuk ning nirya, akunum sirya dakuka, kum kipdeiplume.

¹⁴ Aninye deiyoknye, el yin talin nang arye, nun Israel ninye ati, ‘Aninye obuka sirya daknamap’ tenen, yanganmasik talak ara, aweiknye, el ninye ona ati, cang yo taice bopmuka ara, ance el ning alubuka, elti oplume. Atalak ara, sik malye ninye, sik ninye deiyoknye birye, ‘Sik Israel nang ara, ilil ati, duknupmak bukni, narye sik ayala ninye nirya, opnirye sirya daknamne,’ tenelamukce, el bidamnye kanye talima erepdayukce, kwalibuka ulamukbuk, ance anye bira oploplume.

¹⁵ Yin talin nang arye, sik kuda basam balye deice bukikirye, laut mekwen damak yanibuka bakiba, mek silong yanuka teiklirye, bulyanmalya ani, kum danalamle touk, ance, nun mal olan nang akunum oplumce, mikip arye nun yanuka lyepsulume.

¹⁶ “Na Habakuk birye, ance nyapnulum yupu, akunum kekepna arye, kanye talima pum tam arye, duk-duk apmanile. Tonda, na ilil ati, na si bam bol dam birbir apmanile. Winipmanilarye, na yok ara, kupmititing apmanil ati, tonok sukumuk tikmana arye, sirim talipnilarye, yok kum kum dakmanile. Pia ikin kanye bobuka unman bukni, ance amambul yupu nyapmanilam ning ati ara, talye tunim abuka, dinauk unamne. Ara, nun mal olan nang arye, nun mutuku noutam yanuka opsicopura, ance ‘Winipnamne,’ nyapmasilam touk, amalye nang, sik Kasdim mutuku ninye ati, ance wenebuka opnalam talak ara, ‘Dan talak yanamle do?’ tenen, dinauk unamne.”

¹⁷ “Naio, anda nun ni koproba, Allah Yahweh ulyama ati ara, narye antibuk, dib tenebuka, talye yupu tunim abuka unamne. Ati ara, atalak ara, yo duk moulamle yo, el si ara yo kita, min kum poplya babye, narye anti, dib tenenauk unamne. Tonda, anggur tapu, anggur tapu duk min kum mouplya babye, narye anti, dib tenenauk unamne. Atouk, zaitun yo duk moulamle yo babye, duk min kum moupmalya babye, narye anti, dib tenenauk unamne. Tonda, nun din ning wa wibuka koulamap ning, nong kum uplya babye, narye antibuk, dib tenenauk unamne. Tonda, nun domba basam nirya dibikiba, domba poka dolamupu ning, talye lo uk uptua babye, ura, nun sapi basam babye nirya dibikiba, sapi basam kirikuka weinyap aik, talye lo uk uplya babye, narye anti, dib tenebuka unamne.”

¹⁸ “Aning-aning nirya, ikin kanye weik usulul ning, aupsutu babye, narye, na ni koprop Allah, an Yahweh tonok, kanye deibuka, an si diamuk erenamkine. Na ni Allah, anda lyepnulumnye ati, kanye ikin kum upnamnile. Anti ara, kanye deibuka, kel-kel kanye bobuka unamne. Anda Ninye Lyena Deiyoknye ulyama ati ara, narye an siuk erenamkine.”

¹⁹ “Na ni koproba Allah, anda aning-aning deice tam, Weik Erena Deiyoknye umince, an tenepminye touk, winilyamnye anya arye, anda Allah Yahweh ati, si erenamkine. Ance lyelonilyamce, na nong ap, na kanye talima ap ati, mikip arenilyame. Winipmanto ning ara, rusa basam yanuka, pia telebuk ulirye, mutuku konak keil si deice, talye mangkau kibuka balamle atonun, ance melipnimince, mikip weik kibuka areniminyopura, nara telebuk unune. Pia weik mutuku dup babye, welebuka bitinye.” “Ati, kanye imun ning yanilya babye, ilil kum unamnile. Na Habakuk birye, ayupu nyapne. Nun mutuku mot sena deiyoknye, el kekena ati, akunum nyapne. Amot senman talak ara, binggong lena, el urasin ara, gitar atonun ning arye, mot sepmane.” Nabi Habakuk birye nyabuk.