Galatia 6 - Eipomek

“Yuk ninye nirya ati, telebuk kilanamlulume,” nyabuk yupu

¹ Winira yuk yupu ton nyapnusine. Na weit yapu atonun ninye, anggun kayapu arye malye winibica, eipmunyopura, Allah El Dib Kanye arye, anggun talima talisilye ninye umunya anya arye, anggun namin asa arye malye winipmace ninye ati wenepmunce, lipsisikuka peterenamlulume. Yu upu deice arye kum wenenamlulume. Malye wininyak ninye ati, namin asa arye wenenamlum bukni, anggun bidamang talima noutamak malye ning lilosululba, ‘Malye winibibyak’ tenen, anggun babye, anggun bidamang ati, pia moubuka kalekelanamlulume.

² Anggun ikin usilye ning ara, anggunce, anggun kayapu nang ati, neika talibuka melilanamlulume. Yuk ninye ikin uplye talak ara, anggunce melipnamlulume. Winipmunyopura, adeice Kristus arye, “Wininamlulume, yuk ninye ati bico tenebuka melinamlulume,” nyapdeipsuk yupu atonun dipkoprop wininamlulume.

³ Yatanye do nirya, el sisinanye kibuka kum ulul talak bukni, el babye el bidamang ati, ‘Nara, weiknye unune,’ teneplinye bira, el bidamnye ati tilila yupu nyapdalirye, tilila yupu uk diba tenelule. Dipkoprop elda talinyeuk ulule.

⁴ Anggun nirya, yuk-yuk bukni, anggun bidamang winilulum ning ara, ‘Teleb wininun do, malye wininun do?’ tenen, asilanamlulume. Winipmunyopura, anggun bidamnye arye winimunce, anggun teleb un ning ati, ‘Aning teleb’ tenen, kanye deipnamlulume. Ara yuk nang, sik wininyak ning dipdebuka, ‘Aning telebe, aning malye. Aning ara na unye touk winipmoe. Aning ara, na ning atonun kum bukni, elda pia yuk winipmale,’ tenena kum aryuk, anggun bidamnye arye, anggun winin ning atibuk, dipdandemunce, moubuka unamlulume.

⁵ Anyapmasin yupu deiyok ara ani. Anggun nirya yuk-yuk bukni, anggun bidamang piluk dobuka teleb unamlulume. Yuk nang deiceuk una kume.

⁶ Tonda, yata nang do nirya, yuk nang arye Allah yupu peterebikiba, kekeplirye, kel bikilulnye bira, apeteren nang arye, pil donyaka deice arye, aning kel bikilula anya arye, elce el talilul ning noutam bokuka, el peterena deiyok nang ati, teleb ning melibuka arenamle. Aning atonun, anggun nirya arye, anggun peterena deiyok nang ati, teleb ning mlibuka arenamlulume.

⁷ Tilila yupu kekebuka, diba kum tenenamlume. Allah arye aning-aning nirya disululnye anya arye, ‘Eipsilirye, wenepsilyak’ tenen, kum duknuptibye. “Yala arye dokikiba, aninguk dokmalyopura, lilamake,” nyalamak touk, anggun koupmunye ning atonun, aminyan talak ayalauk, nong upnin banamsile. Malye winipmunyopura, malyeuk upnin banamsile. Teleb winipmunyopura, aminyan talak telebuk upnin banamsile.

⁸ Anyapmasin yupu ara ani. Yatanye do nirya, el kanye talima noutam malye winilye ninguk tenebuka, pil dopnin balamlyopura, aminyan talak Allah arye anye biti, weneplirye, oplopnamle. El talima noutam ara, malye ninguk ulamliba, malye unauk winilamlye deice arye, aminyan talak babye, wenen ninguk dopropnamle. Bukni, yatanye do nirya, ‘Allah El Dib Kanye arye kanye deipnamnil’ tenen, Allah El Dib Kanye arye nyalul yupu uk kekebuka, pil dopnin balamlinye bira, aminyan talak ara, kam una deiyok ning doproplirye, pia kam unamle. Ara, Allah El Dib Kanye arye, kam pia un ning arepliba, pia kam unamle.

⁹ Nun nirya arye, ‘Kume, diksukum una ap, yuk ninye ati teleb kibuka melilana ap ara, nun like’ tenen, kum batakanamabe. Teleb una ara kum batakanamabe. Teleb una ara, walwal upsilyeba, ‘Nun like’ tenen, kum batakibirye, pia telebuk winibibyopura, aminyan talak ara, Allah el tenyamlye talak akunum uplyopura, aning nirya nong upnamla ati, kum batakanamabe. Allah arye kitinamsukce arenamsil ning aminyan talak ara, dopropnamabe.

¹⁰ Aning ara, lo tuba upmasilye talak ara, yuk nang sik patan ning do, ikin uplye talak do, eibibyopura, aninye ati bico tenebuka melinamabe. Ninye nirya ati bico tenebuka melinamap bukni, pia weika arye bico tenebuka melinamap ninye ara, Yesus ati diba tenenyak ara, nun du weit atonun kipdeipsuk ninye ati, bico tenebuka melinamabe.

“Weik mambul ning ara, Allah arye winiryuk kanye talima arisilya deice arye, diksukum unyabe, aninguka,” nyabuk yupu

¹¹ Ura, anggun nirya asurat deice dipdelulume. Paulus na taruk arye, asurat sekeipmasina anya arye, huruf weik ning arye sekmasine.

¹² Sik yuk nang arye, “Kume, anggun den bola mouse ning ara, adiparyuk sekmunyeba, adeice arye, Allah arye, kanye deipnamsile,” nyabuka peteresikce ninye ara, sik nong bol deice ninguk tenekirye nyanyake. Aning ara utenenyake. ‘Den bola mouse ning sekeipyopura, yuk nang arye, anang ara teleb nang, tenenamsiyak’ tenen, ayupu peterenyake. Den bola mouse ning sekenyaka deiyok ara, tonokuk ulule. Ara ani. “Kume, Yesus Kristus wanwanun yo deice obikura, dipsuka deice aryuk, diba tenebibiba, Allah arye lyepnamsile,” nyabuka peterebibyopura, ‘Sik Yahudi yala deiyok nang arye wenepsikirye, nun nong deice ikin ning deipsicak’ tenen, wininyake. Aning ati, “Den bola mouse ning sekna ara, mambul tuba,” nyanyake.

¹³ Nyanyak bukni, aning ton teneipdelulume. Sik den bola mouse ning akunum sekik nang babye, Musa sekamuk yupu, mem yupu ton tabakuka sekamuk ning ara, ayupu nirya talibuka kum dobolbanyake. Ayupu nirya talibuka kum dobolbanyak bukni, anang arye anggun Galatia mutuku nang ati, “Anggun den bola mouse ning, adiparyuk seklulume,” nyasinyake. Ayupu nyasinyaka deiyok ara, anggun nong bol deice pil dopmunyeura, anggun tam kibicopura, adeice arye sik Galatia mutuku ninye ati, kanye deibuka kim-kimipdakirye, kwalinamake. Ati, ayupu nyasinyake. Deiyok yuk ati kume.

¹⁴ Narye yata ning do nirya, kanye deipnirye merkapang kum donamne. Bukni, tonok ning atibuk, si erebuka kanye deipnirye, merkapang donamne. Ara, nun Deiyoknye Yesus Kristus wanwanun yo deice obikura, nun lyena ati dipsuk ning ati, kanye deibuka, pin-pin asa arye merkapang donamne. Yuk ning nirya ara, pia kume. Yesus Kristus wanwanun yo deice obikba, nati dipnuk ara, na ap dukdongopnukce, na malye ulamse ning pununa ati dipnuke. Na lyena ati akunum dibuka anya arye, adeice arye na kanye ara ani. ‘Tukwak mutuku ulul ning, malye ning nirya ara, nati ara, aning nirya akunum kum danmala anya arye, na talima lipropnuturye, malye kum kipdeipnutue,’ tenenune. Tonda, ‘Na tenenuna ara, tukwak ulul ning, malye ning nirya ara, pia kum patanamnile’ tenen, unune. Nara, akunum dibikce ninye nirya kum patalamle atonun unune.

¹⁵ Ura, tuba tonap nyapnusine. Den bola mouse ning sekenyaka babye, kum sekenyak ning babye, mambule pia kume. Aning ara talye ninguk ulula anya arye, nong kum upnamle. Weik mambul ulul ning ara tonokuka. Ara, Allah el kanye ara, elce winiryuk kanye tenen ning ap, winiryuk talima ap arisulul ati, diksukum unyap ning ara, aninguk mambul ulule. Akunuma. Yuk ton kume.

¹⁶ Ayupu nyapmasin touk, diba tenebuka dobolbanamak ninye ara, ‘Allah arye aninye ati, kanye teniltona kumce, pia kanye deibuka teleb una ap, nun malye wininyap touk, adiparyuk wenebuka kum osulul bukni, bico tenesilirye, el kanye aniryuk melisilye ning ap arenamsile’ tenen, anggunti Allah morosunune. Tonda, Allah arye, ‘Aninye nirya ara, na wiyamse ninye Israel ninye atonun unyake,’ tenesilye ninye nirya ati, ‘El kanye aniryuk melisilye ninguk arenamsile’ tenen, anggunti Allah moronune.

¹⁷ Ura, asurat sirya dakna ati nyapne. Yesus el kai teleb yupu, ninye lyena yupu peterelamsiba, malye nang arye, ‘Ayupu ara nun like’ tenen, kulabuka olamnikopura, na nong bol deice ara, dila weik tuba upnuka anya arye, yuk nang arye nati, ‘Elda talinye’ tenen, na nong deice ikin ning delina kume.

¹⁸ Ura, nun Deiyoknye Yesus Kristus arye, bico tenebuka el kanye aniryuk melisulul ati, ‘Anggun kanye talima nirya teleb kipdeipnamsil’ tenen, anggunti Allah morosunune. Ati na weit yapu atonun ninyeo, ‘Anyapmasin yupu dipkoprop unamle’ tenen, na Paulus birye “Amin,” nyapsine. Telebe akunuma, asukumuk deipne.