Galatia 5 - Eipomek

“Yesus arye lyepsuk ning ara, batakuka yuk mem ning talibuka una meme,” nyabuk yupu

¹ Tapu kouamsuk ning noutamak arye, Kristus lyepsukce lopdeipsuke. Lyepsuka deiyok ara, ‘Musa sekamuk yupu mem yupu amu tam bukikirye, ayupu uk talibuka pia dobolbanamak’ tenen, kum lyepsuke. Aning kum bukni, ara, ‘Lyepnirye, mem pil dona kum arye, talye kanye bobuka diksukumuk unamak’ tenen, Kristus arye lyepsuke. Aning ati ara, yuk-yuk ning, mem yupu atonun ning tabakuka winina kum arye, dakeiyam asa mikip arye unamlulume. Yuk nang arye, “Aning-aning pil dopmunya deice aryuk, Allah el kanye deipnamsile,” nyasinyak yupu ara, kekena kume. Ara, ‘Tapu koubuka delilamaka atonun winisikirye, nun nong deice ikin ning tabakalinamsiyak’ tenen, moubuka kalikinamlulume. Ayupu atonun yupu ara kekebuka dobolbana meme.

² Na Paulus birye nyapnusin yupu ara, moubuka kekeplulume. Yuk nang arye nyapsikce deice arye, ‘Den bola mouse ning sekesinyak deice aryuk, Allah el kanye deipsilirye, lyepnamsile’ tenen, diba tenepmunyopura, anggun den bola mouse ning seksikcopura, Kristus arye lyepsuka ara, sikti, nong kum unamle. Talyauk uptue. Ara, ‘Den bola mouse ning sekna deice arye lyepsutue,’ teneluluma ati nyapsine.

³ Tonda, ayupu ton nyapsine. Yatanye do nirya, Musa sekamuk yupu, mem yupu deice nyasilye touk, ‘Den bola mouse ning sekna deice arye, Allah lyepnamnile’ tenen, diba teneplirye, aning deiceuk el kanye delilulnye bira, adiparyuk Musa sekamuk yupu nirya talibuka dobolbanamle. Amem yupu nirya talibuka dobolbanamle. Ton yupu talibuka, ton yupu ara batakuka kum uptue.

⁴ Sikda, ‘Musa sekamuk yupu dobolbanyap deice aryuk, Allah arye nunti, “Anggunda diksukum un ninye,” nyabuka, teleb ulinamsile’ tenen, ululume. Aning tenena deice arye, anggunda, ‘Kristus arye pil dopsuka ara daupmalye’ tenen, bataklamak ninye winilamak touk, akunum winilulume. Anggunda pia yuk winilulume. Winimunya deice arye, Kristus el kanye aryuk bico tenepsukce, lyepsuka ara, akunum bataklumce, urasin tamubuka, yuk bisik akunum banmalume.

⁵ Anggunce winibuka wininmalum bukni, nunda aning kum wininyabe. Nunda, Allah El Dib Kanye mikip arye melisilyeba, Yesus ati diba tenenyaba deice arye, ‘Allah arye nunti, “Sikda diksukum ninye unyake,” nyabuka teleb kipdeipnamsil’ tenen, diba tenenyabe. ‘Winibuka dipkoprop unamsile’ tenen, diba tenebibirye, ‘Diksukum kipdeipnamsil ning ara, dan talak winipnamsil do?’ tenen, kanye deibuka pia dinauk unyabe.

⁶ Yesus Kristus ap talima dukdongobuka neika unyaba noutam ara, Allah eipsilirye, el kanye ara, ‘Den bola mouse ning sekna babye, sekna kum babye, mambule pia kume. Aning babye, aning babye nong kum danamle ning atia,’ tenelule. Allah eipsilirye, kanye delinamsil ning ara, tonok ninguk ulule. Ara ani. Yesus ati diba tenenyaba deice arye, yuk ninye ati, ‘Bico’ tenen, melinauk winibibibuk, Allah eipsilirye, a deiceuk kanye delisulule. Mambul ning ara, anyuka. Yuk ning ton kume.

⁷ Ura bik-bik alamak nang arye, ‘Menekbisibuka minpola bik-bikapnarye, dekna ning arepnusiak’ tenen, yuk ning tenena kumce, mikip asa arye, bik-bik abuka balamak atonun, minop talak ara anggunce Allah el dipkoprop yupu kekebuka, teleb kipre balamlum bukni, wini talak ara, yata nang arye yuk yupu peterepsika deice arye, ayupu sekdongopsik do? Anggunda, Allah ati diba tenyamlum ning ara, yata ati batakmalum do?

⁸ “Mem yupu talina ap, den bola mouse ning sekna ap ara, pia mambule,” nyabuka peterenyak yupu atonun ara, pia yuk ulule. Ayupu ara, Allah arye, ‘Anang lyepnamne’ tenen, yukupsuknye arye nyapdeibukba, kum peteresinyake. Ayupu ara, Allah arye kum nyasulule. Kume, yuk tilila yupu nyakce ninye arye, sik kanye aryuk ayupu peterenyake.

⁹ Ayupu tabakuka peteresiceba, ‘Malye winipmunyak’ tenen, adomon yupu tonap nyapsine. Luba kina meme. Roti nena deiyok ning, el si ara ragi, mitik tonun roti bun pum bisik dongopmakce bukni, nepnin banmalya ani, aminyan ara, aroti bun noutamak nirya bilyopura, weika arye pala kilule.

¹⁰ Ura, nun Deiyoknye Yesus ap talima dukdongobuka unyaba anya arye, narye, ‘Malye yupu mitik tonun peterepsica babye, nirya malye winilisulule,’ tenenune. Utenen nye touk, na kanye bokoltona kum arye, ‘Anggun Galatia mutuku ninye babye, atonun tenenamake,’ tenesunune. Tonda, malye yupu nyasilinye bira, na walwal bukni, na kanye ara, aning peteresilyeba, kanye walwal una ap, kanye teniltona ap kilinamasilnye bira, Allah arye wenepnamle. Elce peteresilye yupu deice arye, kanye teniltonauk usilya ati ara, Allah arye anye biti aminyan weneplirye, dopkwetepliba, ikin unamle.

¹¹ Na kayapu, anggun ton teneipdelulume. “Den bola mouse ning sekna deice aryuk, Allah arye kanye deibuka lyepnamsile,” nyabuka, tuba peterelamtinyetoura, yata ati, aning diba tenebuka talinyak nang arye, ikin ning na nong deice tuba delininyak do? Sik nyace yupu atonun nyalamtinyopura, ikin ning na nong deice kum deipnitinge. Aning ara bataktinge. Bukni, narye, “Yesus wanwanun yo deice obikba, dipsuka deice aryuk lyesulule,” nyabuka peterenya deiyok ati, anang arye yu upliba, na nong deice ikin ning delininyaka anya arye, ayupu batakuka den bola mouse ning sekna yupu dobuka petereptinyopura, yu ulula deiyok ning kum uptue. Deiyok kum uptopura, na nong deice ikin ning delininyak ning babye, kum uamtue. Bukni, tuba malye winilinyaka anya arye, ‘Den bola mouse ning sekna yupu kum peterelule’ tenen, kel kinululume.

¹² Ati, narye ayupu kum peterenun bukni, yuk nang arye anggun Galatia mutuku ninye ati, ayupu peteresice deice arye, kanye walwal kina ap, koulana ap kilisinyake. Aninye ati ara, ayupu ton yu arye nyapnusine. Na kanye ara, sikce, “Den bola mouse ning sekna ara mambule,” nyabuka peterenyaka anya arye, den bola mouse ninguk kum bukni, sik bidamang ati, deiyok tam nirya sekdatingopura, na kanye deiptinye.

“Allah El Dib Kanye mikip deice melisiliba, diksukumuk unamlulume,” nyabuk yupu

¹³ Ura, na weit yapu atonun ninyeo, Allah arye nyapsuka deiyok ara, ‘Tapu kouamuk ning lopdeipniba, mem pil dona kum arye, talye kanye bobuka diksukumuk unamak’ tenen, lobuka lyepsuke. ‘Wininamak’ tenen, lobuka lyepsuk bukni, anyapnusin yupu atonun kum tenenamlume. Ara, ‘E, winira Yesus arye akunum lyepsuka anya arye, nun kanye aryuk tenenyap ning ap, nun nong patasilye ning ap, aninguk tenebuka talya luparabuka malye unamap’ tenen, kum wininamlulume. Aning pia kum bukni, anggun nirya arye, yuk ninye nirya ati, bico tenepdamunce, melilanauk unamlulume.

¹⁴ Musa sekamuk yupu, mem yupu weik aupmal bukni, ayupu nirya dukdongobuka, weik mambul deiyok ara tonok ninguk ulule. Allah arye amambul yupu nyapdeipsuk ning ara ani. ‘Anggun bidamnye arye, anggun patan ning ati, ‘Aning ara mambule’ tenen, winimunye touk, anggun ap neika ululum ninye nirya ati, bico tenebuka melilanauk unamlulume.’ (Imamat 19:18)

¹⁵ Kanye moupnamlulume. Wini talak wininmalum touk, kanye yuk-yuk tenepmunce, yu upliba, yupu deice arye walana weik tuba-tuba winipmunyopura, anggun bidamnye arye, anggun bidamnang ati, pia malye ulildanamlume. Ati, amalye wininmalum ning nirya ara, bataknamlulume.

“Allah El Dib Kanye mikip arisilya deice arye, diksukumuk unamabe,” nyabuk yupu

¹⁶ ‘Anggun bidamnye arye, anggun bidamnang ati malye kipdeipdamunyak’ tenen, ayupu ton nyapnusine. Allah El Dib Kanye melisilya deice arye, el mikip arisiliba, adeice arye winipmunyopura, tukwak ninye ubirye, nun kanye talima noutamak malye ning ulye akarye, kanye talima lilosululba, malye ning patasulul ning aupmalya babye, aning kekebuka kum wininamlulume.

¹⁷ Nunda ninye tukwak ninyeuk unyaba anya arye, nun kanye talima noutamak malye ning aupmasilya arye, talima lilosululba, malye ning patasilye ning ara, pia yuke. Allah El Dib Kanye arye, nun talima talisiliba, teleb ninguk patasilye ning ara pia yuke. Apatan ning pia yuk-yuk ati, nun ninye kanye talima ap, Allah El Dib Kanye ap, olana atonun updikcopura, nun kanye tenenarye, ‘Se, teleb winin ning winiptinye’ tenen, patalamsil ning ara, dipkoprop kum uptibye.

¹⁸ Bukni, yata nang do nirya, Allah El Dib Kanye el mikip arye talilulba, teleb unyak ninye ara, Musa el sekamuk yupu, mem yupu amu tam bukuka kum unyake.

¹⁹ Ura, nun nirya kele. Nun ninye tukwak ninye ubirye, nun kanye talima noutamak malye ning aupmasilya arye, talima lilosululba, malye winilamap ning ara lakak kisulule. Amalye winin ning ara ani. Talye-talye yolana ap, malye winin ning patalyeba tenena ap, talima malye upliba, pia malye-malye winina ap,

²⁰ Yuk talye ning ati, ‘Nun Ni kopropa’ tenen, Isa Mutuku Dongonye si ap, isa mer si erena ap, yuk nang ati derena ap, yu upliba, yuk nang ati, ‘Nun pia like,’ tenena ap, kanye yuk-yuk tenekirye, yu kilana ap, ‘Na ka winilye ning ara, na babye winiptinye’ tenena ap, yu weik upliba yupu weik arye walana ap, ‘Nauk weiknye ereipnitingura, weiknye uptinye’ tenen, patana ap, deiyok nang arye, “Wininamabe,” nyabikce yupu yanibuka, “Aning ara kume. Nun yuk unamabe,” nyabuka una ap, talima wililanyakce, ‘Sik yuk, nun yuk’ tenen, yuk-yuk una ap,

²¹ tonda, ‘Se, na kwit talilye ning ara, na babye taliptinye’ tenena ap, patana ap, yu mek weika arye dinyakba, kanye wangalamak ning winina ap, ninye weik bulubikirye, talye-talye yolalamak ning ap, anyapmasin ning atonun winin ning nirya ara, aupmale. Na kayapu, min arye, “Kanye mouplulume, winina meme,” nyabuka wenelamsise touk, tuba tonap wenepsine. Anyapmasin ning wininyak ninye ara, Allah arye nunti lyebuka talinamsil ning ap, atalak arenamsil ning ap, dipkoprop kum dopropnamake. Winibuka malye-malye tuba wininyak ninye ara, Allah arye kum talinamle.

“Allah El Dib Kanye arisiliba, teleb winin ning ara ani,” nyabuk yupu

²² Ura, amalye-malye winina kum bukni, teleb yo arye, teleb yo duk moulamle touk, Allah El Dib Kanye, el mikip arye melisilyeba, wininamap ning ara nyapnusine. Ateleb winin ning ara, ani. Ara yuk nang ati bico tenebuka melilana ap, kanye deibuka pin-pin asa una ap, kanye teniltona kumce, kanye deibuka una ap, yuk nang arye nunti malye updeipsica babye, talima namin asa arye una ap, yuk nang pataplye ning ati melina ap, diksukum una ap, ikin upsilya babye pil batakna kumce, pi dobuka pia pil dona ap,

²³ Yuk nang ati, ‘Se, tenebicak’ tenen, namin asa arye teleb yupu nyana ap, ‘Malye winipyak’ tenen, talima kalikdanuka una ap, aning-aning nirya ara, Allah El Dib Kanye el mikip arye melisilyeba, telebuk unyabe. Awinin ning nirya ati ara, pia teleb un ning anya arye, ‘Ninye im sirya, mutuku sirya nirya arye, winibicak’ tenen, ninye nirya arye yupu kum sekenyake. ‘Winina ara telebuka,’ tenenyake.

²⁴ Yesus Kristus ati diba tenebibirye, el ap talima dukdongobuka ubibyeura, elce nun talima talisulul ninye ara, wininyabe. Talye tukwak ninye ubirye, nun kanye talima noutam malye ning ulye akarye, talima lilosululba, malye ning patasilye ning ara, aupmal bukni, amalye winin ning kum wininyabe. Deiyok ara, Yesus Kristus wanwanun yo deice dibuk talak ara, nun ap dukdongopsuk anya arye, el dibuka deice arye, nun ton dibupu. Ara, nun ap, Yesus ap talima dukdongopsuk deice arye, nun malye ning patasilye ara obuka, yaniltana atonun unyabe.

²⁵ Nun diba tenenyap ninye ara, Allah El Dib Kanye melisilya deice arye unyaba anya arye, Allah El Dib Kanye arye diksukum uliba, nunda dobolbanauk unamabe. El ulul touk, nun babye atonun unamabe.

²⁶ Nunda, kanye talima erebibirye, ‘Nunda pia teleb ninye’ tenena ap, ‘Na ka talilye ning ara, na ton taliptinye’ tenena ap, yu upsilyeba, malye winililana ap kum unamabe.