Esra 9 - Eipomek

Yahudi yala nang ap, Yahudi yala kum nang ap, kil dolalamik ning ati, laka nyabikba, Esra birye nyabuk yupu

¹ Sik Israel nang arye, Allah arena ati, aning nirya akunum winibuka, seng abikopura, Israel mutuku noutam taleamik ninye deiyok-deiyok nang arye, na Esra dam yayik. Yayikopura, ayupu nyapnike. “Naio, nun Israel yala nang, talye daunyab nang ap, tonda imam-imam nang ap, tonda Lewi yala nang ap ara, nun nirya arye, malye upmabe. Ara, nun dana-dana tam unyak nang ara, Yahudi yala nang kum bukni, talye yuk yala nang, sikce talye-talye luparabuka malye wininyake. Allah arye, ‘Aning ara, na pia like, aning ara, pia kum wininamlume. Ara meme,’ nyapdeiamsuk ning bukni, nun ap, anang ap, yuk-yuk mutuku kum unyaba ati, sikce malye wininyak ning ara, nun babye, aning ton akunum wininyabe. Nun mutuku dana-dana tam wininyak nang ara, ani. Ara, Amon yala nang ap, Moab yala nang ap, Mesir mutuku nang ap, Kanaan noutam minop talak dipdongobuka wini talak tuba unyak nang ap, Het yala nang ap, Feris yala nang ap, Yebusi yala nang ap, tonda Amori yala nang ap ati nyababe. Sik amutuku nang arye, malye pil dopra unyak touk, nun babye apiluk talibuka donyabe,” nyabik.

² Aninguk kum bukni, nun Israel yala nang arye, nun dana-dana tam unyak nang, Yahudi yala kum nang bukni, nunce sik mutuku kilapu dolamupu. Atonun, sik yuk mutuku kilapu dobuka, nun mapu koproba ati, areamupuba, dolamik. Aning nirya winilamupu deice arye, Allah Yahweh, el mapu nun Israel nang, el ‘Naʼ tenen nang ap, sik yuk mutuku nang, malye unyak nang ap, ansinibuka unyabe. Winibupa deice arye, malye kililalamupu. Tonda, amalye uning minop deiyok bikik nang ara, nun Israel ninye deiyok-deiyok nang arye, deiyok kibuburye, sik talye Israel nang babye eibikce, sik babye, amalye ning winilamupu. Ati, nun nirya arye, Allah nyapdeipsuk yupu moubuka kum talibupe. Aning akunum batakuburye, yuk malye bisik akunum banmabe,” sik deiyok nang arye, na Esra ati, nyapnike.

³ Awinilamik ning nirya laka nyabikba, na Esra birye kekepsopura, adiparyuk na ikin kanye bopsirye, ‘Se, pia malye winibupa ati, yata wiripnuyap do?’ tenen, na ongolamse alip baju ap, na amu tam ongolamse baju babye, kwilikuka batakse. Tonda, aning ati, ‘Se,’ tenepsirye, imun kanye bobuka, na kisok potong ap, bam potong ap ara, kobuka batakse. Winipsirye, aning ati, na talima buluksaknukba, tukwak buknauk upse.

⁴ Adeiyok arye, ayupu laka nyapnikba, yuk nang ton kekebika ati, ninye yata barye nang do, weik tonun yanuka, na dam ton yanuka bukikce utenebik. ‘Se, Kume Israel yala nang ati, pia kalikuka melilamsuk Allah arye, ‘Aning ara wininamlume, aning ara pia kum wininamlume,’ nyapdeiamsuk yupu ara, weik mambul teleb yupu ulul bukni, Babel mutuku daulamika ani, tuba tamubuka amutuku yanganmangu nang bona utotoa talina kum noutam arye, Allah el yupu yanilamika deice arye, pia malye weik winilamika ati, ikin kanye bonmabe,’ tenenmekce, ilil weik ubuk. Ilil weik upsukba, mambul kanye bobuka unmaburye, nara, atalak nirya ara, asukumuk bukmasibuk ni, asum akunum inipnamok keting ara, ining ning opnarye, Allah ati aren ning obuka, uku dongolamak keting dam ubuk.

⁵ Ining ning obuka, Allah arena ati uku dongon talak, akunum kibukopura, na talima sukupmanuka ati bukmasak arye, na ongopmase deice baju ap, na amu ongopmase baju ap, akwilikmase ninguk ongobuka, na kutam tuku deice dipdongobuk buksirye, ‘Se, yata wiripnuyap do?’ tenen, na taruk erebuka, na ni Allah Yahweh ati moropse.

⁶ Narye nyabuka moropse. “Se, na ni Allaho. Diba na ni Allah, nara dipkoprob mambul kanye bopnarye, alye weik upmanile. An morona ati ara, na kisok erebuka an dam dina ara, na pia ilil ati, kum winiptinye. Deiyok ara, nun malye unyap ning ara, pia weik tonun tabaknin basiliba, weik tonun nepnin basilirye weik usulule. Winipmanto ara, nun malye winin ning ati, adiparyuk wenebuka opnamsutum deiyok ning ara, nun kisok bisibuka, im deice binmanto akunum ulule,’ tenepne.

⁷ Minop talak nun apu yapu arye malye weik winipnin, yangalamika ani, wini talak ara, nun wini talak unyap nang an mapu babye pia anti malye kilikinyabe. Winipmanto ara, nun malye winin ning ati, adiparyuk wenebuka opnamsutuma deiyok ning ara, pia ikin weik usulule. Nun apu yapu ap, nun ap, malye weik ulamupu ati, nun Israel nang ninye deiyok nang, Raja-Raja nang ap, nun imam-imam nang ap nirya ara, yuk mutuku ninye deiyok-deiyok Raja nang arye, mal ap, parang ya ap arye obuka sirya daksike. Ati ara, yuk mutuku ninye deiyok Raja nang arye, nun olamsikce, nunce taleamupu bona nirya ara, ubula alubuka dopromsike. Winipsikce, tonda tomopsikce, tapu koubuka, sik mutuku bobinuka wenen aik dongolbalamsike. Tonda, ninye weik tonun wekmana kan-kan arye, ‘Anang ara, nun like. Sikda mambul nang kume,’ tenebuka malye yupu weik nyalamsika ati, nun alye weik upsuka atonun, wini talak, babye tuba upmasile.

⁸ Bukni wini talak ara, nun ni Allah Yahweh, dipkoprob nun malye winin ning ati, adiparyuk opnamsutum bukni, an kanye aryuk, nunti, bico tenepsimince, teleb kibuka melipmasilame. Winipmasulumce, nun tam nang ton kanye imunak Babel mutuku ulamik talak ikin weik ulamika ani, ninye weik deiamik bukni, ance nun tam nang mitik tonun lobuka lyepropmasilamce, asukum boyanmasilamba, wini talak ara teleb kanye bobuka, nunti kintinip deipsulum mutuku yanuka unmabe. Amutuku ara ancuk wipdeiamsuluma ati, amutuku nirya ara an na tenen ning, pia telebuk ulule. Asukumuk an si erenamkiyabe. Winipsuluma deice arye, winipmanto ara nun asing kuna uk ulamsuk bukni, wini talak ara, akunum teleb kipdeipsulumba, nun asing arye dirina elinyabe.

⁹ Yuk mutuku nang arye, obuka sirya daksikce, sik mutuku bobinamsikce, ikin pil dilamsikba, tapu koun nang atonun unyap bukni, an si uk tuba erekinyaba ati, anda, nun ni Allah usilyama ati, ance pia kum bataksulume. Aning kum bukni, sik Persia tam ninye deiyok nang Raja-Raja arye dilamsik talak arye, ance nunti weik tonun bico tenelamsulumce melilamsulumba, sik Persia mutuku ninye deiyok Raja nang ton eibuka bikamike. Ance sik talima noutam pil doplumba, sikce lo arepsikce, lopdeipsikopura, amutuku tamubuka yanmabe. Ayanmaba deiyok ara, Allah anti si eren aik minop talak ulubuka atu buklomik ning ara, tuba tonap lipsisikuka donmabe. Winipmanto ara, ninye arye weik asik dopbikirye, ‘Nun mal olan nang yanuka wekikirye opsikcak’ tenen, anyaik dana-dana tam nirya cang keil poka antanapdongobuka dolamak touk, ance akunum Yehuda tam nirya ap, weik asik Yerusalem mutuku unmap nang nirya ap ati, akunum kalikuka melisilyame.

¹⁰ Bukni, wini talak ara, nun ni Allah Yahweh, aning-aning nirya ara, akunum winipmasilam bukni, nunda ance, ‘Wininamlume, aning ara, pia kum winipnamlume,’ nyapdeiamsulum yupu, kekena kumce batakupa ati, an dam yata yupu ton nyapkitibye do? Kume, nunce yupu ton, kum nyapkitibye.

¹¹ An yupu ap, aminyan winipnamuk ning ap, laka nyana deiyok nang, sik nabi-nabi nang arye nunti, akunum laka nyabuka areamsik. Sik nabi nang arye, nunti nyalamsik yupu ara, ani. “Anggun binuka wekmunce, unamlum mutuku nirya ati ara, moubuka teninamlume. Amutuku noutam unyak nang nirya ara, teleb kum unyake. Allah arye, ‘Aning ara, na like,’ tenelul ninguk, talibuka pia malye weik wininyake. Malye uk wininyaka ati, amutuku nirya, otam arye dipdongobuka, atam nirya ara, malye un ning weik winilamika deice arye, pia malye ulule.

¹² Ati ara, amutuku unyak nang ap, neika talye tabakuka kil dolana pia kume. Anggun Israel nang arye, delinamlum kilmapu ara, amutuku unyak nang arye, delinamak mapu ati, pia kum arenamlume. Tonda, anggun Israel nang arye, delinamlum mapu ara, sik amutuku unyak nang arye, delinamak kilmapu dona pia meme. Nun mapu ap, kilmapu ap, sik amutuku unyak ninye ap, dolana pia meme. Tonda, anggun Israel nang arye, ‘E, amutuku unyak nang ap, nun ap, mal olana kumce, teleb kibuka neika uptibiba, yupu nyapdatipya deice arye, nunda aminyan talak, talye kanye deibuka, telebuk ubirye, nun mikip weik nang unamabe. Winibipyopura, amutuku noutam ulye ning, libuka dinamabe,’ tenena pia kume. Tonda, anggunce, ‘Kume, sik amutuku anang ap, nun ap, teleb kibuka neika ubipyopura, amutuku noutam talinamap ning, aupsilyopura, nunce mapu deibibiba, dadeipdanin binamak nang nirya ati, aning-aning weik tonun, areptibyeba, atuku uk talipdanin banamake,’ kum teninamlume. Sik nabi-nabi nang arye, nyapdeiamsik.

¹³ Ati na nio, nunce an yupu nyapdeiamsulum yupu akunum yanibuburye, malye weik ulamupuba, ance nun wenena ati, akunum ikin ning weik nun dam deiamsulume. Bukni, nun kele nun ni Allah, nun malye winilamupu ning ara, pia weik awamuk bukni, ance ikin ning nun deice deipsulum ning ara, mitik tonun areamsulume. Nun malye weik ulamupu touk, ance pia ikin weik ning kum deipsulume. Aning kum bukni, na ni ance nun akunum lyepropsulumba, nun Israel nang ara, mitik tonun ton tuba kam unyabe.

¹⁴ Nunda mitik tonun tuba kam unyaba ati ara, nunda ance nyapdeiamsulum yupu ara, tuba tonap yaniltakana uk wininamap do? Ara, ance, ‘Aning ara, wininamlume, aning ara, pia kum wininamlume,’ nyapdeiamsulum yupu ati, tonap batakibirye, sik amutuku noutam unyak nang arye, anda ‘Na pia lik,’ tenelyam ning, malye-malye tuba unyaka ati, amutuku nang arye, delinyak kilapu doptibirye, neika teleb uptibye do? Kume, nunce aning winiptibyopura, dipkoprob ance nunti, yu weik upkutuba, wenebuka opsutumce, kum kipdeipsutume. Tonda, nun kan-kan ara, tonoknye ton bataksutumba, kam pia kum optibye. Nun nirya obuka, sirya daksutume.

¹⁵ Se, nun ni koproba, Allah Yahweh, anda pia dipkoprop, diksukum unanye ulyame. Diksukumuk uminya ati, nunda, ance ‘Naʼ tenen nang, nun Israel nang nirya ara, wenebuka kum opsulumce, mitik tonun ton lyepropsulumba, nunda amutuku noutam mitik tonun tuba kam unyabe. Ance nun aunmab nang ara, Babel mutuku arye boyanuka melipsulumba, mitik tonun ton tuba kam unamabe. Bukni, nunce nun malye winipmabye ning ara, kum duknunyabe. Nun malye wininyap ning ara, an dam yanuka, laka nyanyabe. Nun kele, malye weik winibupa ati, nunda an dam ara, pia yanuka kum tiktibye.