Daniel 10 - Eipomek

Daniel bira, Tigris mekin unmok talak, lengdar deice mabukce winipmokba, eibuk ning ati, nyabuk yupu

¹ Raja Kores birye, Persia mutuku talibuka ulamuka ani, keting tamun winilye noutam arye daulamukba, atalak ara, Daniel el bidamnye si ton ara, Beltsasar nyalamik. El anye deice, Allah el dipkoprob yupu yanuka nyapdeibuk. Ayanuka yupu nyapdeibuk ning ara, Daniel lukunyan lengdar mabuka deice arye, yanuka laka nyapdeibuk. Ati Daniel birye, ‘Aning ara, moubuka kel biktinyeʼ tenen, piripdeyukce, ayupu ara, kanye imun olan ning ati eibukce, ayupu ap, lukunyan lengdar mabuka deice eibuk ning ap bikukce, ‘Nong ara, ani,’ tenebuk. Aning nirya ara, Daniel birye nyabuk yupu ara, ani.

² Atalak noutam ara, na Daniel bira, minggu winilye nirya ara, imun kanyeuk bobuka ulamsa ani, engenauk ulamse.

³ Awinilye minggu noutam nirya ara, teleb din ning ap, tup ning ap, ton kum dilamsirye, si tebuka, din bulung ulamse. Tonda, anggur mek ton kum dilamse. Tonda, atalak ara, na kisok potong deice, ‘Nintong teleb upnamleʼ tenen, nintong teleb mek ton, na kisok deice kum likilamsirye, na potong kum leleklamse. Talye urdemuk ulamse.

⁴ Winibuka daulamsa ani, atalak noutam bukni, wala tonok sum ara, tanggal dua puluh empat (24) akunum ubukopura, weik mek, el si ara Tigris, mek lilun damuk, binuka tikmase.

⁵ Atikmase talak ara, na urasin erebuka eitam dinmasebuk, mambul weiknye tonok eipse. Anye bira, kurun baju, el si ara kain lenan, pia namin baju ongopmokba eipse. Tonda, deiyatinga delina ati, el si ikat pinggang ara, dekna weik kat ning, el si ara emas, pia teleb ning deipmokba eipse.

⁶ Anye el nong deice ara, pia dekna weik keil, bol teleb keil arye, mil dang-dang alamle touk, unmok. Tonda, el asok deice ara, mil dang-dang alamle touk, unmok. Tonda, el asing ara, uku buk dilamle touk, upmok. Anye el taruk ap, el yan ap ara, dekna weik kat ning, el si ara tembaga, urasin pia teleb ulamle touk, upmokba eipse. Anye birye, el yupu nyabukba kekepmasa ara, ninye pia weik tonun, tonok talak aryuk, lunman arye, yupu weik tonun nyalamak touk, nyabukba kekepse.

⁷ Alaka winibuk ning ara, narye eipmase bukni, na ap, amek dam neika tikmapu nang, sik yuk nang ap ara, aning nirya ton kum eibikce, kum bikik. Bukni, na Daniel bira, eibuka bikse. Na ap neika unmapu nang ara, sik kum eibuka bikik bukni, sikda ilil weik ubukba, ‘Yata wiripnusil do?’ tenen, bai sakikce, bikbik abuka duknulbiyik.

⁸ Sik anang ara, bai sakuka biyikce, bataknikopura, asukum ara, na yuk tikmase. Winipmasirye, talye karin arye, alak upmokba eipmase ning ati, ‘Se, yata wiripmal do?’ tenen, dinauk unmase. Dinauk unmase talak ara, na babye, mikip ton kum upnukba, mitang pia upnuka deice arye, na urasin babye, ninye dipmanto ubikiba, urasin mitik tonun kurun ulamle touk, upnuke.

⁹ Atalak aryuk, anye birye yupu tonok nyabukba kekepsirye, adiparyuk na nong nirya, lalakmanto upseba, lokuka na urasin ara, tuku deice amubuka poulbise.

¹⁰ Tukwak lokuka malbisopura, taruk tonok ton yayukce, na nong bol deice, yanuka bol pipnukba, na tamubuka bukukapsirye, ataruk arye talipmanukba, na kutam deice tuku dipdongobuka bukse bukni, tuba yok birbir anmanuke.

¹¹ Winipsopura, na dam yanmoknye birye, nati nyapnuke. “Danielo, Allah arye anti, pia bico tenekulula ati, elce nati, ‘Daniel dam minop bimince, ayupu nyapnulyame,’ nyapdeipnue. Ati, an tikmalamak arye, na nyapnukin yupu ara, moubuka kekepnulyame. Nara, an dam laka nyana ati, akunum dopdeipmanilba yanmane,” nyabuka, elce nati ayupu nyapdeipnukba, kekepse talak ara, ilil upmanuka arye, yok birbir anmanuka deice aryuk, tikmase.

¹² Tikmasopura, na dam yanmoknye birye, nati nyapnuk. “Danielo, an ilil una kume. Alengdar mapmomce, eipmalam ning deiyok koun talak ara, Daniel ance, ‘Kel bikilin ning ton arepnutue,’ tenepmalamce, kanye lamapdongobuka, Allah ati moroplum ning ara, Allah akunum kekepkuke. Ati, na an dam yanmana ara, ance Allah ati moroplum ning ati, nong laka nyalyakine.

¹³ Ara, Persia mutuku kalikuka talilul isa ara, (roh jahat) elce, arup weik, dua puluh satu sum (21) deice arye, ‘Anye Daniel dam kum binuleʼ tenen, ‘Na ti malye kiptinyeʼ tenen, wininmanua arye, min yanmanto kum upmase bukni, sirya ara, im deice malaikat nirya, sik deiyoknye, el si Mikhael, na dam yanuka melipmanu deice arye, lyepmanuba, nara an dam kunum yanuka, laka nyalyanmakine. Bukni, tia talak ara, Persia mutuku talibuka ulul isa ati, tuba olanmanu bukni, an dam akunum yanmane.

¹⁴ Ati, na an dam yanamna deiyok ara, ani. Ara, sirya talak, an mutuku nang, sik Israel nang ara, sik dam winipnamle ning ati, laka nyapkinyeba, moubuka kel biknamlama atia. Ara talye ati kume, anda lengdar mapmoma deice arye eipmalam ning ara, atalak winipnamal ning ati kume. Aning nirya ara, aminyan talak, sirya daknamle talak yanamle ning ati, aning tukwak upmauba, lengdar deice arye eipmalame,” nyabuka, malaikat deiyoknye Mikhael birye, nyapnuke.

¹⁵ Atalak ara, elce ayupu yanuka nyapnukba, kekepsopura, narye tamubuka, yupu ton kum nyapsirye, kanulongonauk upse. Tukwak deice sakuka, poulbinuka mapmasirye, yupu tonok babye, ton nyapmanto kum upse.

¹⁶ Winipse ati, ninye bol atouk kibuka, yanmok malaikat arye, el taruk boyanuka, na si bambol deice, yanuka bol pipnukba, narye elti, nyapse. “Se, na nio, lengdar mapmanubuk winibukba, eipsa deice arye, kanye imun upnukba, na mikip babye, kum upmanile. Pia mitang upmanila ati, yupu ton kum nyaptinye.

¹⁷ Ati ara, nara an amu tam talye pil melibuka donanye ununa ati, nara yata ton unye ulamtinya deice arye, na ni an dam yupu ton nyapkitinye do? Na mikip ara, kum upmanilba, na isin babye, kum danmanto upmanila ati, yupu nyapmanto kum upmanila ati, yata wiribuka yupu nyapkitinye do?” nyapse.

¹⁸ Nyapsopura, el amalaikat, ninye urasin atonunye birye tamubuka, na nong yanuka, bol pipnukba, na mikip tamubuka, yanuka deice arye, tuba na mikip teleb upnuke.

¹⁹ Elce nyapnuk, “Allah arye anti, weik tonun bico tenekilirye, ‘Anye bira, mambul weiknye ulule,’ tenekulule. Ati Daniel, an ilil una meme. Ilil upmakilce, mitang upmakil ning ara, bataknulyame. An adiparyuk mikip kipnulyame. Tonda, ‘Allah arye dipkoprob kalikuka melipnamkilʼ tenen, ilil una kum bukni, malye kibuka, telebuk unamlame,” nyapnuke. Elce ayupu nyapnuk talak ara, na mikip tamubuka yanuke. Yanukba, narye elti, nyapse, “Na nio, winira ance mikip kipdeipmanilama ati, yupu nyapdeipnilyame,” nyapse.

^20-21 Nyapsiba, elce tamubuka nyapnuk, “Nara, yata deiyok ati, an dam yanman do? An tenepmalamce, bikmalam do? Na yanmana deiyok ara, Allah el dipkoprob, buku noutam sekdeibuk ning ara, ‘Nong noutam ning biknalamʼ tenen, an dam laka nyalyanmakine. Bukni, wini talak nara tamubuka binirnye, Persia mutuku ap, amutuku unyak nang ap, talilul isa ara, narye obuka, sirya daknune. Aisa obuka sirya daknyopura, Yunani mutuku ap, Yunani nang ap, talilul isa ton yanamlarya. Atalak ara, yuk nang arye nati, ton kum melipnamniake. Bukni, malaikat Mikhael, an mutuku nang, Israel nang melilulnye, el tonok aryuk nati melinamnile,” nyabuka, amalaikat arye, na Daniel biti laka nyapnuke.