Biblia Todo Logo
線上聖經

- 廣告 -

Bilangan 7 - Eipomek


Israel ninye bukni, ninye deiyok nang kibuka ulamik nang arye, Allah ati arebik yupu

1 Musa birye, Allah Yahweh ap, ninye ap eldana ati, dolamak tenda aik akunum kintinip deibukce, sirya dakuk talak ara, anyaik ap, anyaik noutam uamuk ning ap, pil don ning nirya ara, siltong teleb minyak mek arye, aning deice nirya likilina ati, pil dobuk. Tonda kam ning oyakceba, uku dongona ati, kintinip deibik ning, el si mesba deice ap, amesba deice deilin ning nirya ara, teleb mek minyak arye likdeibukce, apil nirya dobuk. Apil dobuka deiyok ara, Aik ap, aning-aning nirya ara, Allah el ninguk pia unamleʼ tenen, apil dobuk.

2 Winibukopura, asum aryuk, Israel ninye sik deiyok kibuka taleamik nang arye, Allah el si erena ati, teleb ning ton boyanuka arebik. Adeiyok nang sik apu yapu arye deiamikba, dadeipdanin, yangalamik touk, ayala yuk-yuk ati, Israel ninye sik si sekik ninye nirya ara, sik pununa ati, arin ning boyanuka Allah ati arebik.

3 Winibik talak ara, ‘Nun ni Allah eiplirye, kanye deipnamsil tenen, el dam boyanuka arebik. ‘Allah ati aripnuyab tenen, kintinip deibik ning nirya ara, tapu arye yim sapi koupdongobikba, asapi basam ara tuku deice balamuk ning, el si pedati, libuka boyayik. Atuku deice sapi basam arye libalamuk ning pedati ara, el aik aruma atonun dona ati ara, kat kain arye singipdongobik. Bukni, aning el nong pum ara, sik Allah ati aripnuyik ning nirya boyayikce dongobikba, aning pedati odikin kintinibikba, asapi basam obarye dua belas ara, apedati libuka boyayuk. Ara, sik Israel ninye talibuka ulamik deiyok nang ara, 12 aulamik bukni, yuk-yuk bitinye kibuka nukikce, sik aren ning lina ati, tuku deice ban ning pedati tonok uk talibik. Ati, atuku deice ban ning ati pedati ara, obarye kintinibik. Adeiyok nang 12 ati ara, sapi basam yim tonok nukuka arebik. Allah ati aren ning ap, asapi basam yim 12 ap, apedati obarye nirya ara, ayala-ayala deiyok nang arye talibuka ulamik touk, aning nirya Allah el si eren aik dam boyanuka deibik.

4 Aning nirya akunum winibikopura, Allah Yahweh arye Musa biti yanuka nyabuk.

5 “Ayanuka arepmak ning nirya ara, Musa ance dopnalyame. Aning ara, na ap, ninye ap eldana ati, dolamik aik dopmakca ani, anyaik pum pil donamak talak ap, anyaik ulubuka, yukak ban talak bobana ati, yanuka arepmake. Ati, aning nirya dopminyopura, ance sik Lewi yala nang ati, sik dam binuka arepnulyame. Ara, ‘Sik Lewi yala nang bukni, ayala noutam ara, yala yuk-yuk ati, pil yuk-yuk bokeipse, ‘Winipnamakeʼ, nyapdeipse touk, apil yuk-yuk donamakʼ tenen, aning nirya akunum memebuka deipluma ati, sik Lewi yala nang deice binuka arepnulyame.” Allah arye Musa biti nyabuk.

6 Nyabukopura, Musa birye atuku deice ban ning, el si pedati-pedati obarye ap, asapi basam yim 12 nirya ap ara, dobukabukce, Allah arye nyabuk touk, Lewi yala nang ati, arebuk.

7 Winibuka arebuk. Ara, pedati bitinye ap, sapi yim dumbarye ap ara, dobukabukce, sik Gerson yala nang ati, arebuk. Ara, Allah arye, “Gerson yala nang arye apil donamake,” nyapdeibuk touk, Musa birye aning bokuka, Gerson yala nang ati arebuk.

8 Aning atonun bukni, mitik weik yala, sik Merari yala nang ati, pedati dumbarye ap, sapi basam yim pinbarye ap ara, dobukabukce, Merari yala nang ati arebuk. Ara, Allah arye, “Merari nang arye pil donamake,” nyapdeibuk touk, Musa birye aning bokuka Merari yala nang ati arebuk. Sik Merari yala nang arye pil dolamik talak nirya ara, sik deiyok kibuka taleamuknye bira, Harun el mi Itamar birye deiyok kiamukba, pil talibuka dolamik.

9 Bukni, Kehat yala nang ara, sik Israel ninye weik deiyok nang arye ayanuka arebik pedati ap, sapi basam yim ap nirya ara, sik anang ati ton, Musa birye aning bokuka kum arebuk. Kum arebuka deiyok ara, Allah arye nyabuk touk, Allah el si eren aik pum tam delilamik ning, Allah el kanye deilin ning, pia lek teleb ning nirya ara, sik ayala nang aryuk talibuka, pil donamika ati, aning ara bokuka kum arebuk. Ara, sik ayala nang arye, bisik ban talak ara, Allah si eren aik pum tam uamuk lek teleb ning nirya ara, tongobuka sik takunya deice deipnarye, bobanamika ati, anang ara, pedati ap, sapi yim ap, ton bokuka kum arebuk.

10 Israel yala ninye ati, deiyok kibuka taleamik nang arye, Allah el si erena ati, yuk ning ton arelyayik. Aning ara, ‘Israel ninye arye kam ning nirya boyakiba, imam nang arye aning obukabikirye, uku dongonamakʼ tenen, dobuka kintinip deiamik ning, el si mesba, aning deice ara, teleb mek minyak likin pil don sum winina ati, pia teleb ning arena ati yanuka bulubuka arebik. Apil don sum winina ati, kintinip deipmakce ning nirya boyanuka, mesba dam dobuka yanuka deibik. Aning nirya arelyayika deiyok ara, ‘Amesba ara, nun ni Allah, el ninguk kipnamleʼ tenen, arebik.

11 Winibikopura, Allah Yahweh arye Musa biti, nyapdeibuk. “Ance, sik anang dam binukapmince nyapnalyame. ‘Ara, sik dua belas yala nang ati, deiyok kibikce, talibuka unyak touk, tonok sum arye dipdongobuka, dua belas kipnamle sum ara, adeiyok nang tonok-tonok arye asum-asum yuk-yuk bukni, aren ning boyanuka arelyangalamikiba, mesba deice teleb mek minyak likin pil dolamikca ani, sirya daknamlume, nyapdeipmasile,’ nyabuka, sik anang kekenak binuka nyapnalyame.” Allah arye nyabuk.

12 Sik yala yuk-yuk, unyak touk ubuka arelyanamak bukni, min yuma ara, el mapu ap, el deiyok kounanye ap, min yuma boyanuka arelyanamake. Anyubuka anoutam ara, tonye el deiyok koubuka arepmakca ani, tuba, tonye el deiyok koubuka aremangu, atonun upnin banmaca ani, sirya daknunyake. Ati, min yuma arelyayuknye bira ani. Yehuda yala nang ara, Aminadab el mi Nahason birye deiyok kobuka ati, elce deiyok kobukce, yanuka arebuk.

13 Nahason birye arebuk ning ara ani. Urasin pia teleb namin ning, dekna weik ning, el si perak arye puturubuka deibik piring, el ikin ara 1.5 kilo gram arebuk. Tonda teleb ning perak aryuk memebik baskom ton dobuka deiamuk makau, el ikin ara 800 gram ning ap, boyanuka arebuk. Aperak ikin nukik ning ara, min arye Allah ap, ninye ap el dan aik taleamika deiyok nang arye, “Dekna weik ning ara, perak do, emas do, tonok syikal, el ikin ara, dipkoprob winibuka boyanamake,” nyabuka min arye yanuka nyapdeiamikce, aninguk boyanuka arebik. Tonda apiring ap, abaskom ap kintinibik ning pum ara, gandum tikinmakiba, pia teleb roti kwaning deiyok ning, el si ara tepung ap, minyak mek anyapce tabakuka, delilamak ninguk, langdibuka deibik.

14 Tonda, kat dekna weik ning, el si emas arye piring ton kintinibik ning, el ikin ara 110 gram kibuk ning ara, el pum ara, siltong teleb ning, si ara duba dongobukce, boyanuka arebuk.

15 Tonda, sapi basam yim winiryuk nepmalye ning tonok ap, domba basam yim tonok ap, tonda yim domba mi keting tamun tonok kiamuk ning ap, kintinibuk. Akam ning nirya ara, ‘Allah si erepnun tenen, aning nirya boyanuka arebukba, imam nang arye uku dabik.

16 Tonda, Na malye unye ning, Allah arye kiliplirye, kum daneipmanilʼ tenen, kambing basam yim tonok, ara, bol malye pia kum uamuk ning, teleb ninguk boyanuka arebuk.

17 Tonda, ‘Allah arye melinilyeba, na ap, na wininamne ning nirya ara, telebuk unamleʼ tenen, sapi basam bitinye ap, domba basam yim pamubarye ap, kambing basam yim pamubarye ap, tonda, yim domba mi keting tamun tonok kiamuk ning pamubarye ap, aning-aning nirya boyanuka arebuk. Aning-aning nirya ara, Aminadab el mi Nahason birye yanuka arebuk.

18 Like bitinye sum arye, Isakar yala nang ati arelyayuknye bira, Zuar el mi Netanel, elda deiyok kibuka, Isakar yala nang ati taleamuk. Like bitinye sum ara, elce deiyok koubukabukce, yanuka arebuk.

19 Netanel birye arebuk ning ara ani. Urasin teleb namin ning, dekna weik ning, el si perak arye puturubuka deibik piring, el ikin ara 1.5 kilo gram arebuk. Tonda, teleb ning perak aryuk membik baskom ton dobuka deiamuk makau, el ikin ara 800 gram ning ap, boyanuka arebuk. Aperak ikin nukik ning, ara min arye Allah ap, ninye ap el dan aik taleamika deiyok nang arye, “Dekna weik ning ara, perak do, emas do, tonok syikal, el ikin ara, dipkoprob winibuka boyanamake,” nyabuka min arye nyapdeiamikba, aninguk boyanuka arebik. Tonda apiring ap, abaskom ap kintinibuk ning pum ara, gandum tikinmakiba, pia teleb roti kwaning deiyok ning, el si ara tepung ap, minyak mek anyapce tabakuka, delilamak ninguk, langdibuka deibuk.

20 Tonda, kat dekna weik ning, el si emas arye piring ton kintinibik ning, el ikin ara 110 gram kibuk ara, el pum ara, siltong teleb ning, si ara duba dongobukabikce boyanuka arebuk.

21 Tonda, sapi basam yim winiryuk nepmok ning tonok ap, domba basam yim tonok ap, tonda yim domba mi keting tamun tonok kipmok ning ap, kintinibuk. Akam ning nirya ara, ‘Allah si erepnunʼ tenen, aning nirya boyanuka arebukba, imam nang arye uku dabik.

22 Tonda, Na malye unye ning, Allah arye namin kipnilirye, kum daneipmanilʼ tenen, kambing basam yim tonok ara, bol malye pia kum uamuk ning, teleb ninguk boyanuka arebuk.

23 Tonda, ‘Allah arye melinilyeba, na ap, na wininamne ning nirya ara, telebuk unamleʼ tenen, sapi basam bitinye ap, domba basam yim pamubarye ap, kambing basam yim pamubarye ap, tonda, yim domba mi keting tamun tonok kipmok ning pamubarye ap, aning-aning nirya boyanuka arebuk. Aning-aning nirya ara, Zuar el mi Nataniel arye yanuka arebuk.

24 Ura, like winilye sum ara, Zebulon yala nang ara, Helon el mi Eliab birye deiyok koubuka ati, elce deiyok kibukce, yanuka arebuk.

25 Eliab birye arebuk ning ara ani. Urasin pia teleb namin ning, dekna weik ning, el si perak arye puturubuka deibik piring, el ikin ara 1.5 kilogram arebuk. Tonda teleb ning perak aryuk memebik baskom ton dobuka deiamuk makau, el ikin ara 800 gram ning ap, boyanuka arebuk. Aperak nukik ning, ikin ara min arye Allah ap, ninye ap eldana aik taleamika deiyok nang arye, “Dekna weik ning ara, perak do, emas do, tonok syikal, el ikin ara, dipkoprob winibuka boyanamake,” nyabuka min arye nyapdeiamikba, aninguk boyanuka arebik. Tonda apiring ap, abaskom ap kintinibuk ning pum ara, gandum tikinmakiba, pia teleb roti kwaning deiyok ning, el si ara tepung ap, minyak mek anyapce tabakuka delilamak ninguk, langdibuka deibuk.

26 Tonda, kat dekna weik ning, el si emas arye piring ton kintinibik ning, el ikin ara 110 gram kibuk ning, el pum ara, siltong teleb ning, el si ara duba dongobukce, boyanuka arebuk.

27 Tonda, sapi basam yim winiryuk nepmalye ning tonok ap, domba basam yim tonok ap, tonda yim domba mi keting tamun tonok kipmok ning ap, kintinibuk. Akam ning nirya ara, ‘Allah si erepnun tenen, aning nirya boyanuka arebukba, imam nang arye uku dongobik.

28 Tonda, Na malye unye ning, Allah arye namin kipnilirye, kum daneipmanilʼ tenen, kambing basam yim tonok, ara bol malye pia kum uamuk ning, teleb ninguk boyanuka arebuk.

29 Tonda, ‘Allah arye melinilyeba, na ap, na wininamne ning nirya ara, telebuk unamleʼ tenen, sapi basam bitinye ap, domba basam yim pamubarye ap, kambing basam yim pamubarye ap, tonda, yim domba mi keting tamun tonok kipmok ning pamubarye ap, aning-aning nirya, boyanuka arebuk. Aning-aning nirya ara, Helon el mi Eliab birye yanuka arebuk.

30 Like, dumbarye sum ara, Ruben yala nang ati, Syedeur el mi Eliusur birye, deiyok kobuka, yanuka arebuk.

31 Eliusur birye arebuk ning ara ani. Urasin pia teleb namin ning, dekna weik ning, el si perak arye puturubuka deibik piring, el ikin ara 1.5 kilogram arebuk. Tonda ateleb ning perak aryuk membik baskom ton memebuka deimuk makau, el ikin ara 800 gram ning ap, boyanuka arebuk. Aperak nukik ning, ikin ara min arye Allah ap, ninye ap, el dan aik taleamika deiyok nang arye, “Dekna weik ning ara, perak do, emas do, tonok syikal, el ikin ara, dipkoprob winibuka boyanamake,” nyabuka, min arye nyapdeiamikba, aninguk boyanuka arebik. Tonda apiring ap, abaskom ap, kintinibuk ning pum ara, gandum tikinmakiba, pia teleb roti kwaning deiyok ning, el si ara tepung ap, minyak mek anyapce tabakuka delilamak ninguk, langdibuk.

32 Tonda, kat dekna weik ning, el si emas arye piring ton kintinibik ning, el ikin ara, 110 gram kibuk ning ara, el pum ara, siltong teleb ning, el si ara duba dongobukabikce boyanuka arebuk.

33 Tonda, sapi basam yim winiryuk nemuk ning tonok ap, domba basam yim tonok ap, tonda yim domba basam mi keting tamun tonok kiamuk ning, kintinibuk. Akam ning nirya ara, ‘Allah si erepnunʼ tenen, aning nirya bobinuka arebukba, imam nang arye uku dabik.

34 Tonda, Na malye unye ning ati, Allah arye namin kipnilirye, kum daneipmanilʼ tenen, kambing basam yim tonok ara, bol malye pia kum uamuk ning, teleb ninguk boyanuka arebuk.

35 Tonda, ‘Allah arye melinilyeba, na ap, na wininamne ning nirya ara, telebuk unamleʼ tenen, sapi basam bitinye ap, domba basam yim pamubarye ap, yim kambing basam yim pamubarye ap, tonda, domba basam mi keting tamun tonok kiamuk ning pamubarye ap, aning-aning nirya boyanuka arebuk. Aning-aning nirya ara, Syedeur el mi Eliusur birye yanuka arebuk.

36 Like pamubarye sum ara, Simeon yala nang ara, Zurisadai el mi Selemiael birye, deiyok koubuka boyanuka arebuk.

37 Selemiael birye arebuk ning ara ani. Urasin pia teleb namin ning, dekna weik ning, el si perak arye puturubuka deibik piring, el ikin ara 1.5 kilo gram arebuk. Tonda ateleb ning perak aryuk memebik baskom ton boyanuka deiamuk makau, el ikin ara 800 gram ning ap, boyanuka arebuk. Aperak nukik ning ikin ara, min arye Allah ap, ninye ap el dan aik taleamik deiyok nang arye, “Dekna weik ning ara, perak do, emas do, tonok syikal, el ikin ara, dipkoprob winibuka boyanamake,” nyabuka min arye nyapdeiamikba, aninguk boyanuka arebik. Tonda apiring ap, abaskom ap, kintinibuk ning pum ara, gandum tikinmakiba, pia teleb roti kwaning deiyok ning, el si ara tepung ap, minyak mek anyapce tabakuka delilamak ninguk, langdibuk.

38 Tonda, dekna weik kat ning, el si emas arye piring ton kintinibik ning, el ikin ara 110 gram kibuk ning ara, el pum ara, siltong teleb ning, el si ara duba dongobuka boyanuka arebuk.

39 Tonda, sapi basam yim winiryuk nemuk ning tonok ap, domba basam yim tonok ap, tonda domba basam mi keting tamun tonok kiamuk ning ap, kintinibuk. Akam ning nirya ara, ‘Allah si erepnunʼ tenen, aning nirya boyanuka arebukba, imam nang arye uku dongobik.

40 Tonda, ‘Na malye unye ning, Allah arye namin kibuka, kum daneipmanilʼ tenen, kambing basam yim tonok, ara, malye un ning nirya kum uamuk ning, pia bol teleb ninguk boyanuka arebuk.

41 Tonda, ‘Allah arye melinilyeba, na ap, na wininamne ning nirya ara, telebuk unamleʼ tenen, sapi basam bitinye ap, domba basam yim pamubarye ap, kambing basam yim pamubarye ap, tonda, domba basam mi keting tamun tonok nemuk ning pamubarye ap, aning-aning nirya boyanuka arebuk. Aning-aning nirya ara, Syedeur el mi Selemiael birye boyanuka arebuk.

42 Like nakub barye sum ara, Gad yala nang ara, Rehuel el mi Elyasap birye, deiyok koubuka ati, elce minop boyanuka arebuk.

43 Elyasap birye arebuk ning ara ani. Urasin pia teleb namin ning, dekna weik ning, el si perak arye puturubuka deibik piring, el ikin ara 1.5 kilo gram arebuk. Tonda ateleb ning perak aryuk memebik baskom ton boyanuka deiamuk makau, el ikin ara 800 gram ning ap, boyanuka arebuk. Aperak nukik ning ikin ara min arye Allah ap, ninye ap, el dan aik taleamik deiyok nang arye, “Dekna weik ning ara, perak do, emas do, tonok syikal, el ikin ara, dipkoprob winibuka boyanamake,” nyabuka min arye nyapdeiamikba, aninguk boyanuka arebik. Tonda apiring ap, abaskom ap kintinibuk ning pum ara, gandum tikinmakiba, pia teleb roti kwaning deiyok ning, el si ara tepung ap, minyak mek anyapce tabakuka, delilamak ninguk, langdibuk.

44 Tonda, dekna weik kat ning, el si emas arye puturubuka piring ton kintinibik ning, el ikin ara, 110 gram kibuk ning ara, el pum ara, siltong teleb ning, el si ara duba dongobukabukce, boyanuka arebuk.

45 Tonda, sapi basam yim winiryuk nepmok ning tonok ap, domba basam yim tonok ap, tonda domba basam mi keting tamun tonok kipmok ning ap, kintinibuk. Akam ning ara, ‘Allah si erepnunʼ tenen, aning nirya boyanuka arebukba, imam nang arye uku dabik.

46 Tonda, ‘Na malye unye ning, Allah arye namin kipnilirye, kum daneipnamnilʼ tenen, kambing basam yim tonok ara, bol malye pia kum uamuk ning, teleb ninguk boyanuka arebuk.

47 Tonda, ‘Allah arye melinilyeba, na ap, na wininamne ning nirya ara, telebuk unamleʼ tenen, sapi basam bitinye ap, domba basam yim pamubarye ap, kambing basam yim pamubarye ap, tonda, domba basam mi keting tamun tonok kiamuk ning pamubarye ap, aning-aning nirya boyanuka arebuk. Aning-aning nirya ara, Rehuel el mi Elyasap birye boyanuka arebuk.

48 Like tekbarye sum ara, Efraim yala nang ara, Amihut el mi Elisama birye, deiyok koubuka, boyanuka arebuk.

49 Elisama birye, arebuk ning ara ani. Urasin pia teleb namin ning, dekna weik ning, el si perak arye puturubuka deibik piring, el ikin ara 1.5 kilo gram arebuk. Tonda ateleb ning perak aryuk membik baskom ton boyanuka deiamuk makau, el ikin ara 800 gram ning ap, boyanuka arebuk. Aperak nukik ning ikin ara min arye Allah ap, ninye ap el dan aik taleamika deiyok nang arye, “Dekna weik ning ara, perak do, emas do, tonok syikal, el ikin ara, dipkoprob winibuka boyanamake,” nyabuka min arye nyapdeiamikba, aninguk boyanuka arebik. Tonda, apiring ap, abaskom ap kintinibuk ning pum ara, gandum tikinmakiba, pia teleb roti kwaning deiyok ning, si ara tepung ap, minyak mek anyapce tabakuka, delilamak ninguk, langdibuk.

50 Tonda, dekna weik kat ning, el si emas arye puturubuka, piring ton kintinibik ning ton, el ikin ara 110 gram kibuk ning ara, el pum tam, siltong teleb ning, el si ara duba, dongobukce, boyanuka arebuk.

51 Tonda, sapi basam yim winiryuk nepmalye ning tonok ap, domba basam yim tonok ap, tonda domba basam mi keting tamun tonok kipmok ning ap, kintinibuk. Akam ning nirya ara, ‘Allah si erepnunʼ tenen, aning nirya boyanuka arebukba, imam nang arye uku dabik.

52 Tonda, ‘Na malye unye ning ara, Allah arye namin kipnilirye, kum daneipmanilʼ tenen, kambing basam yim tonok ara, bol malye pia kum uamuk ning, teleb ninguk boyanuka arebuk.

53 Tonda, ‘Allah arye melinilyeba, na ap, na wininamne ning nirya ap, telebuk unamleʼ tenen, sapi basam bitinye ap, domba basam yim pamubarye ap, kambing basam yim pamubarye ap, tonda, domba basam mi keting tamun tonok nemuk ning pamubarye ap, aning-aning nirya boyanuka, arebuk. Aning-aning nirya ara, Amihut el mi Elisama birye, boyanuka arebuk.

54 Like pinbarye sum ara, Efraim yala nang ap, Manasye yala nang ap ara, Pedasur el mi Gamaliel birye, deiyok kibukabukce, boyanuka arebuk.

55 Gamaliel birye arebuk ning ara ani. Urasin pia namin teleb ning, dekna weik ning, el si perak arye puturubuka deibik piring, el ikin ara 1.5 kilo gram arebuk. Tonda, ateleb ning perak aryuk, memebik baskom ton boyanuka deiamuk makau, el ikin ara, 800 gram ning ap, boyanuka arebuk. Aperak nukik ning, ikin ara, min arye Allah ap, ninye ap, el dan aik taleamika deiyok nang arye, “Dekna weik ning ara, perak do, emas do, tonok syikal, el ikin ara, dipkoprob winibuka boyanamake,” nyabuka, min arye nyapdeiamikba, aninguk boyanuka arebik. Tonda apiring ap, abaskom ap kintinibuk ning pum ara, gandum tikinmakiba, pia teleb roti kwaning deiyok ning, el si ara tepung ap, minyak mek anyapce, tabakuka delilamak ninguk, langdibuk.

56 Tonda, dekna weik kat ning, el si emas arye puturubuka, piring ton kintinibik ning, el ikin 110 gram kibuk ning ara, el pum ara, siltong teleb ning, el si ara duba dongobukce, boyanuka arebuk.

57 Tonda, sapi basam yim winiryuk nepmok ning tonok ap, domba basam yim tonok ap, tonda domba basam mi keting tamun tonok kipmok ning ap, kintinibuk. Akam ning nirya ara, ‘Allah si erepnunʼ tenen, aning nirya boyanuka arebukba, imam nang arye uku dongobik.

58 Tonda, ‘Na malye unye ning, Allah arye namin kipnilirye, kum daneipnamnilʼ tenen, kambing basam yim tonok, bol malye pia kum uamuk ning, bol teleb ninguk boyanuka arebuk.

59 Tonda, ‘Allah arye melinilyeba, na ap, na wininamne ning nirya ara, telebuk unamleʼ tenen, sapi basam bitinye ap, domba basam yim pamubarye ap, kambing basam yim pamubarye ap, tonda domba basam mi keting tamun tonok kiamok ning pamubarye ap, aning-aning nirya boyanuka arebuk. Aning-aning nirya ara, Pedasur el mi Gamaliel birye boyanuka arebuk.

60 Like toupne barye sum ara, Benyamin yala nang ara, Gideoni el mi Abidan birye, deiyoknye kibukabukce, boyanuka arebuk.

61 Abidan birye arebuk ning ara ani. Urasin pia namin teleb ning, dekna weik ning, el si perak arye puturubuka deibik piring, el ikin ara 1.5 kilo gram arebuk. Tonda, teleb ning perak aryuk memebik baskom ton boyanuka deiamuk makau, el ikin ara 800 gram ning ap, boyanuka arebuk. Aperak nukik ning, ikin ara min arye Allah ap, ninye ap el dan aik taleamika deiyok nang arye, “Dekna weik ning ara, perak do, emas do, tonok syikal, el ikin ara, dipkoprob winibuka boyanamake,” nyabuka, min arye nyapdeiamuk, ninguk boyanuka arebik. Tonda apiring ap, abaskom ap kintinibuk ning pum ara, gandum tikinmakiba, pia teleb roti kwaning deiyok ning, el si ara tepung ap, minyak mek anyapce tabakuka, delilamak ninguk, langdibuk.

62 Tonda, dekna weik kat ning, el si emas arye puturubuka piring ton kintinibik ning, el ikin 110 gram kibuk ara, el pum ara, siltong teleb ning, el si ara duba dongobukce, boyanuka arebuk.

63 Tonda, sapi basam yim winiryuk nepmok ning tonok ap, domba basam yim tonok ap, tonda domba basam mi keting tamun tonok kipmok ning ap, kintinibuk. Akam ning nirya ara, ‘Allah si erepnunʼ tenen, aning nirya boyanuka arebukba, imam nang arye uku dongobik.

64 Tonda, ‘Na malye unye ning, Allah arye namin kipnilirye, kum daneipmanilʼ tenen, kambing basam yim tonok, ara, bol malye pia kum uamuk ning, bol teleb ninguk boyanuka, arebuk.

65 Tonda, ‘Allah arye melinilyeba, na ap, na unamne ning ap nirya ara, telebuk unamleʼ tenen, sapi basam bitinye ap, domba basam yim pamubarye ap, kambing basam yim pamubarye ap, tonda, domba basam mi keting tamun tonok kiamuk ning, pamubarye ap, aning-aning nirya boyanuka arebuk. Aning-aning nirya ara, Gideoni el mi Abidan birye, yanuka arebuk.

66 Like takubarye sum ara, Dan yala nang ara, Amisyadai el mi Aheizer birye deiyok kibukabukce, yanuka arebuk.

67 Aheizer birye arebuk ning ara ani. Urasin pia namin teleb ning, dekna weik ning el si perak arye, puturubuka deibik piring, el ikin ara 1.5 kilo gram arebuk. Tonda teleb ning, perak aryuk memebik baskom ton boyanuka deiamuk makau, el ikin ara, 800 gram ning ap, boyanuka arebuk. Aperak nukik ning ikin ara, min arye Allah ap, ninye ap el dan aik taleamika deiyok nang arye, “Dekna weik ning ara, perak do, emas do, tonok syikal, el ikin ara, dipkoprob winibuka boyanamake,” nyabuka, min arye nyapdeiamik, ninguk boyanuka arebik. Tonda apiring ap, abaskom ap kintinibuk ning pum ara, gandum tikinmakiba, pia teleb roti kwaning deiyok ning, el si ara tepung ap, minyak mek anyapce, tabakuka delilamak ninguk, langdibuk.

68 Tonda, dekna weik kat ning, el si emas arye puturubuka, piring ton kintinibik ning, el ikin 110 gram kibuk ning el pum ara, siltong teleb ning, el si ara duba dongobuka, boyanuka arebuk.

69 Tonda, sapi basam yim winiryuk nepmok ning tonok ap, domba basam yim tonok ap, tonda domba basam mi keting tamun tonok kipmok ning ap, kintinibuk. Akam ning nirya ara, ‘Allah si erepnunʼ tenen, aning nirya boyanuka arebukba, imam nang arye uku dongobik.

70 Tonda, ‘Na malye unye ning, Allah arye namin kipnilirye, kum daneipmanilʼ tenen, kambing basam yim tonok ara, bol malye pia kum uamuk ning, bol teleb ninguk boyanuka arebuk.

71 Tonda, ‘Allah arye melinilyeba, na ap, na wininamne ning nirya ara, telebuk unamleʼ tenen, sapi basam bitinye ap, domba basam yim pamubarye ap, kambing basam yim pamubarye ap, tonda, domba basam mi keting tamun tonok kipmok ning pamubarye ap, aning-aning nirya, boyanuka arebuk. Aning-aning nirya ara, Amisyadai el mi Aheizer birye, boyanuka arebuk.

72 Like koklombarye sum ara, Asher yala nang ara, Okran el mi Pagiel birye, deiyok kibukabukce, boyanuka arebuk.

73 Pagiel birye arebuk ning ara ani. Urasin pia namin teleb ning, dekna weik ning, el si perak arye puturubuka deibik piring, el ikin ara 1.5 kilogram arebuk. Tonda, teleb ning, perak aryuk memebik baskom ton boyanuka deiamuk makau, el ikin ara, 800 gram ning ap, boyanuka arebuk. Aperak nukik ning ikin ara, min arye Allah ap, ninye ap, el dan aik taleamika deiyok nang arye, “Dekna weik ning ara, perak do, emas do, tonok syikal, el ikin ara, dipkoprob winibuka boyanamake,” nyabuka, min arye nyapdeiamuk ninguk, boyanuka arebik. Tonda apiring ap, abaskom ap kintinibuk ning pum ara, gandum tikinmakiba, pia teleb roti kwaning deiyok ning, el si ara tepung ap, minyak mek anyapce, tabakuka delilamak ninguk, langdibuk.

74 Tonda, dekna weik kat ning, el si emas arye puturubuka, piring ton kintinibik ning, el ikin ara, 110 gram kibuk ning ara, el pum ara, siltong teleb ning, el si ara duba dongobukce, boyanuka arebuk.

75 Tonda, sapi basam yim winiryuk nepmok ning tonok ap, domba basam yim tonok ap, tonda domba basam mi keting tamun tonok kipmok ning ap, kintinibuk. Akam ning nirya ara, ‘Allah si erepnunʼ tenen, aning nirya boyanuka arebukba, imam nang arye uku dongobik.

76 Tonda, ‘Na malye unye ning, Allah arye namin kipnilirye, kum daneipmanilʼ tenen, kambing basam yim tonok ara, bol malye pia kum uamuk ning, bol teleb bomuk ninguk, boyanuka arebuk.

77 Tonda, ‘Allah arye melinilyeba, na ap, na wininamne ning nirya ara, telebuk unamleʼ tenen, sapi basam bitinye ap, domba basam yim pamubarye ap, kambing basam yim pamubarye ap, tonda, domba basam mi keting tamun tonok kipmok ning pamubarye ap, aning-aning nirya boyanuka arebuk. Aning-aning nirya ara, Okran el mi Pagiel birye, boyanuka arebuk.

78 Like obarye sum ara, Naftali yala nang ara, Enan el mi Ahira birye, deiyok kibukabukce, boyanuka arebuk.

79 Ahira birye arebuk ning ara, ani. Urasin pia mitang teleb ning, dekna weik ning, el si perak arye puturubuka deibik piring, el ikin ara 1.5 kilogram arebuk. Tonda, teleb ning perak aryuk memebik baskom ton, boyanuka deiamuk makau, el ikin ara, 800 gram ning ap, boyanuka arebuk. Aperak nukik ning, ikin ara min arye Allah ap, ninye ap, el dan aik taleamik deiyok nang arye, “Dekna weik ning ara, perak do, emas do, tonok syikal, el ikin ara, dipkoprob winibuka boyanamake,” nyabuka, min arye nyapdeiamuk ninguk, boyanuka arebik. Tonda apiring ap, abaskom ap kintinibuk ning pum ara, gandum tikinmakiba, pia teleb roti kwaning deiyok ning, el si ara tepung ap, minyak mek ap, tabakuka delilamak ninguk, langdibuk.

80 Tonda, dekna weik kat ning, el si emas arye puturubuka, piring ton kintinibik ning, el ikin ara, 110 gram kibuk ning ara, el pum ara, siltong teleb ning, el si ara duba dongobukce, boyanuka arebuk.

81 Tonda, sapi basam yim winiryuk nepmok ning tonok ap, domba basam yim tonok ap, tonda domba basam mi keting tamun tonok kipmok ning ap, kintinibuk. Akam ning nirya ara, ‘Allah si erepnunʼ tenen, aning nirya boyanuka arebukba, imam nang arye, uku dongobik.

82 Tonda, ‘Na malye unye ning, Allah arye namin kipnilirye, kum daneipmanilʼ tenen, kambing basam yim tonok, ara, bol malye pia kum uamuk ning, bol teleb bomuk ninguk, boyanuka arebuk.

83 Tonda, ‘Allah arye melinilyeba, na ap, na wininamne ning nirya ara, telebuk unamleʼ tenen, sapi basam bitinye ap, domba basam yim pamubarye ap, kambing basam yim pamubarye ap, tonda, domba basam mi keting tamun tonok kiamuk ning pamubarye ap, aning-aning nirya, boyanuka arebuk. Aning-aning nirya ara, Enan el mi Ahira birye, boyanuka arebuk.

84 Israel yala ninye nirya, sik ninye deiyok nang arye, yala yuk-yuk arye, asum-asum yuk-yuk boyanuka, arelyangalamik bukni, sik dua belas nang deiyok kibuka taleamikce, deiyok kiamikba, kam ning obuka, Israel ninye sik imam nang arye, uku dongolyangana ati, kintinip deiamik ning, el si mesba deice, minyak mek arye likdeipnarye, pil don talak aren ning ati, yala yuk-yuk bulubuka boyanamikce, arelamik ning ara, ani. Urasin pia teleb dekna weik ning, el si perak arye memebik piring ap, perak arye kintinip deibikce, mek dikilongon makau, el si baskom 12 ap, tonda, urasin pia teleb dekna weik ning, el si emas arye memebik piring ap bulubuka, boyanarye arelamik.

85 Perak arye memebik piring yuk-yuk bukni, el ikin ara, seratus tiga puluh syikal, ara 1.5 kilogram uamuk. Perak arye memebik baskom ara, yuk-yuk bukni, el ikin ara, tujuhpuluh syikal, ara 800 gram uamuk. Ati ara, apiring ap, abaskom boyanuka deiamik ning nirya ap, tabakuka nukik ning ara, el ikin ara, dua ribu empat ratus (2.400) syikal uamuk. Ara, aperak nirya nukikba, el ikin ara, 27.6 kilogram uamuk. Ara, min arye Allah ap, ninye ap el dan aik deiyok nang arye, “Perak do, emas do, aning el ikin ara, winibuka-winibuka boyanganamlume,” nyabuka, min arye nyapdeiamuk ninguk nukikce, aning el ikin ara, kel kibik.

86 Tonda, dekna weik kat ning, emas arye memebik pum uamukak ara, ‘Uku dabikiba, uku dipnamleʼ tenen, siltong teleb ning, el si duba deibukce, apiring nirya langdibuk. Tonda, aning emas arye memebik piring ara, nukikba, yuk-yuk bukni, el ikin ara, 10 syikal kibuk. Ara, el ikin yuk-yuk ara, 110 gram kibuk. Aning emas arye memebik piring nirya dukdongobuka deibuk ning, el ikin ara, seratus dua puluh syikal uamuk. Ara 1,4 kilogram uamuk.

87 Tonda, ‘Kam ning obuka, uku dabikca deice arye, Allah ati arepnamakʼ tenen, kam ning arelyangalamik ning ara, sapi basam yim 12 ap, kambing basam yim 12 ap, domba basam mi winiryuk nepnin baliba, keting tamun tonok kiamuk ning ap, gandum atonun yala ning ap, roti kwaning ap, arelyangalamik. Tonda, ‘Allah arye nun malye ning namin kibuka, kum daneipnamsilʼ tenen, kambing basam yim 12 arelyangalamik.

88 Aning atonun ton, ‘Allah arye melipsiliba, nun ap, nun wininamap ning nirya ara, telebuk unamleʼ tenen, sapi basam nirya nukikce, 24 uamuk. Domba basam yim ara, enam puluh (60) uamuk. Tonda, kambing basam yim ara, enam puluh (60) uamuk. Tonda, domba basam mi, winiryuk nepnin baliba, keting tamun tonok kiamne ning ap, arelyangalamik. Aning-aning nirya ara, Allah el si erena ati, kam ning obuka, sik imam nang arye, uku dalyanganamakʼ tenen ati, memebuka deiamik ning, el si mesba ‘Amesba ara, Allah el ninguk unamleʼ tenen, amesba deice, minyak mek arye likdeibik ning ara, atalak aryuk, kam ning nirya boyanuka arelyangalamik.

89 Ura, Allah Yahweh arye, Musa biti, “Asum-asum nirya ara, na dam yaminyeba, narye yupu nyapnamkine,” nyapdeiamuk touk, asum akunum kibukopura, Musa bira, Allah Yahweh ap, ninye ap el dan ati, dolamik aik pum tam wekelbalamukce, Allah Yahweh ap, sik neika yupu sisiklamdik. Atalak nirya ara, Musa birye, Allah el nong kum elilamuk bukni, Allah Yahweh arye, yupu nyanman ning ara, Musa adiparyuk kekelamuk. Ara, Allah anyaik pum tam yupu nyalilamuka ara, Allah el yupu nyapdeipnaba, Musa birye kekelamuk. Ayupu kekelamuka ara, min talak Allah arye, “Aning ara wininamlyame, aning ara pia kum wininamlyame,” nyabukabukce, keil pala deice sekuka, Musa biti arebukba, Musa birye akeil bitinye boyanuka, lideiamik marikna pum tam, Amarikna deice ara, malaikat urasin atonun, el si Kerub bitinye puturubuka deiamikce deice tam arye, Allah arye nyalilamuk yupu nyalamukba, Musa birye kekelamuk. Tonda, amarikna yo, el deice tam bublan ara, Israel ninye ara, ‘Allah arye nun malye unyap ning ati, wenepsilirye adiparyuk opsutu bukni, aning kumce, nunti pia bico tenesilirye, nun malye un ning kum daneipsilirye, teleb winilisulula ara, ani,’ tenebuka nyalamik.

© 2023, Wycliffe Bible Translators, Inc. All rights reserved.

Wycliffe Bible Translators, Inc.
跟著我們:



廣告