Ayub 30 - Eipomek

Ayub birye dukdongobuka, nyabuk yupu

¹ Bukni wini talak ara, amutuku unyak wel nang arye, nati nalibuka akutunikyake. Min talak ara, narye sik ni yapu ati, dipdesirye, ‘Kume, sikda pia malye nang unyaka ati, sikda na domba basam wein dam ara, kam ap neika kum uptinge,’ tenelamse.

² Sik ni yapu nirya ara, sik mikip akunum kum dayuka ati, narye, ‘Anggunda, mikip kum nang ati, yata wiribuka anang arye melipsiting do? Kume, sik taruk ara, min arye mikip ton kum ulamika ati, sik dauplye,’ tenelamsirye, anang ara bataklamse.

³ Anang ara, sik din patalamukba, pia kanye imun deiceuk ulamik ati, ninye pia kum ulamikce, din bulung ulamikba, tukwak mutuku ulamikce, sik din pulpula nirya ara koulubuka, sisal sepdomokba, mitik yatinguk dobuka dilamik.

⁴ Sik mikip kum nang ara, pata mutuku, palamuk ninguk winibuka, aning ap, apalamuk ning koproba uk dilamik. Tonda, aning koulubuk yating babye, dilamik. Tonda, ‘Moul upsilyakʼ tenen, aning bulubuka, uku sekmana, damuk bulamik.

⁵ Sik ato nang nirya ara, ‘Yuk teleb nang ap, neika una kumeʼ tenen, yakuka donoklamik. Winipmanto ara, teleb unyak nang arye, ubula don nang ati, sik mutuku noutam arye, yakuka yukak donoklamak touk ulamik.

⁶ Sik ato unyak nang ara, Allah arye, ‘Sik unamakak ara, keil deiya pum tamuk unamake,’ tenelule. Tonda, sik anang aik ara, mutuku pum tamuk, sik aik kibuka unamake.

⁷ Sik ulamik mutuku ara, bai tam ulamikce, talye kam ulamle ning arye, malye nyabuka ngaluklamaka atonun ulamik. Sikda, tuku deice dola tiklamle ning kan-kan uk bulamikce, kong kibuka, bai tam daulamik.

⁸ Sik anang ara, ninye ton, ‘Aunyake,’ tenen, si kel bikina kum nang ulamik. Tonda sik anang ara, mambul nang kum ati, amutuku nang nirya arye, sikti, ‘Se, sikda talye nang uka,’ tenelamikce, sik anang ulamik mutuku arye, yakdonokamik.

⁹ Bukni, atalak ara, sik aunyak nang arye, na dam yakirye, nati nalibuka akutunikyake. Sikce nati ara, nalibuka malye kinikirye, akutuninyake.

¹⁰ Wini talak ara, narye sik dinye talak ara, sikce nati, yu uplirye, ‘Elda malye tonye biti, malye ulule,’ nyaninyake. Utenekinirye, na eipnikce talak ara, talye lubakibuka, na asok deice maka tuluninyake.

¹¹ Deiyok ara, Allah elce nati, mikip kum kipdeipnukba, pia mitang kipnuke. Winipnukba sik anang arye, na dam talye lubakibuka, olyanganinyake. Sikce, ‘Anye biti winipnuyabe,’ tenenyak ninguk, talye lubakibuka winininyake.

¹² Na diksukum babye, sik malye winin nang ara, yupa weik tikilyakirye, olyanganinyake. Sik amalye nang arye, na opnikceba, sakuka poulbanak babye, ‘Anye yatu obibyeba, asukum poulbinamale,’ tenepmakirye, nyapmace sukumuk, sakuka poulbalule.

¹³ ‘Sik anang arye, nati opnikcakʼ tenen, ‘Binamne,’ tenepse bisik babye, abanmanye bisik yanuka eipnikirye, sekdongobuka opmanto uninyake. Sik anang arye, na dam yakirye, warikdongobuka opnunikce talak ara, yuk nang arye, ton kum yupu sekeninyake.

¹⁴ Sik anang ara, mek opnin yangalamle touk, ubuka yakirye, na kalikna ati, cang keil poka domse ning ara, yanuka daklopnik. Winibikirye, sik anang nirya, abisik wekelyakirye, sikce na nong deice yan yanibuka, darap dongonamak talak ara, kil-kil kanye bobuka uninyake.

¹⁵ Ikin weik, na deice yanuka, darapdongopnuke. Na ulamsebuk, si erelamnik ning ara, kum yalirye, mok purye sakuka, maning deice dupmaliba, bobalamle touk uninyake. Tonda, na kanye teleb taleamse ning ara, dua bum atonun yangalya ani, adiparyuk tunim alamle touk ubuka, kum dandopnuke.

¹⁶ Wini talak ara, na dipna dam akunum upnuke. Kanye imun ning, na deice akunum yanukba, na kanye talima noutam ara, kum upmanto unune. Ikin weik akunum dopropse ning ara, pia min kum winipmanto upnuke.

¹⁷ Lukunyan talak nirya ara, na yok ara, pia uk weik dinulule. Na nong luknilyeba, uk dinulul ning ara, min kum winipmanto unulule. Pia kum tunim apnamle.

¹⁸ Allah el taruk kala arye, na taplakamnuk baju dam arye, yanuka kwiliplopnuke. Winipnukba, na baju kinikamse ning ara, na ngan dam baju bol ara, na nong deiceuk pakupdongobuka palepnuk.

¹⁹ Allah el mikip arye na dobuka, donoknukba, bental pum bisik wekse. Nara talye bama bataklamaka atonun winipnuke! Tuba buta ap, uku sice buta ap, batanyaka atonun, akunum winipnuke!

²⁰ Se, na ni Allah ance, “Melipnilyame,” nyabuka morokinye bukni, ance na morokinye ning ara, tamubuka yupu kum nyanilyame. Tonda, narye anti, ‘Morokununʼ ning, an dam tikne talak ara, ance moubuka kum kekenilyame.

²¹ Allah ance nati, tuba kum bico tenenilyame. An weik tonun yu upkilyeba, an taruk mikip arye, na deice ikin weik ninguk delinilyame.

²² Winipmanto ara, ance kum ati bikminyeba, na dam yalirye, bobanulule. Weik tonun pu alamle kum yangalamle touk ubuka yamince, na bobuka, otam mutuku bobinmanto unilyame.

²³ Na kele. Ance na bobinuka dibin nang unyakak bobinamnilama atia. Kam unyak nang nirya dibikceba, ance bobinuka deililbalyamak uk, na babye bobinamnilame.

²⁴ Bukni, malye un ning ton kum ululnye birye, bai sakuka balirye, kanye imun uplyopura, Allah anti, “Melipnilyame,” nyabuka morokululnye bira, ance yata ati bico tenebuka kum melilyam do?

²⁵ Tonda, na winilamse ning ati tenipnilyame. Nara kanye imun uplyeba, engelulnye ap, neika bukuka kum engenyama ati do? Tonda, narye aning yala-yala nirya, kum uplyeba, kanye imun kanye bobuka ululnye biti, bico upnilyeba, kum melinuna ati do?

²⁶ Winibuka teleb ulamik bukni, nara, ‘Kanye teleb upnamnile, tonda na deice ara, dirina ninguk unamnile,’ tenyamse. Bukni, na dam ara, kanye imun ninguk yanganulule.

²⁷ Na kanye talima noutam tenipnirye, na talima ara, yatunulule. Se, yata ning ati, na deice ara asum-asum nirya, ikin ninguk yalyeba dolonun do? Utenepnirye, pia kanye imun unulule.

²⁸ Nara, dirina ton una kumak, pia kunuknakuk binuka, yanuka kinune. Wininirye, nara ninye weik wekmacak tiknirye, “Na ton melipnululume!” nyabuka, moronune.

²⁹ ‘Melipnitingʼ tenen, na weik tonun, bico asa upnirye, na talima lukuniliba, na yupu engebuka nyanun lelim ara, bai tam ulirye, yu ulye kam ning arye, malye nyanmalirye, ngaluklamle touk unune. Tonda, lyei maka arye, malye nyabuka ngaluklamle touk, nyapnirye, malye nyanune.

³⁰ Na nong bol deice ara, keting buppu weik dinulul deice arye, na nong bol ara miripnuke. Winipnuka arye, na nong nirya ara, talin nakina dipnuka deice arye, uku diplirye, bol kurulamle atonun upnuke.

³¹ Tonda, na min talak ara, kitar atonun ning, el si ara kecapi, nyapne ninguk lelim kekepnarye, kanye teleb ulamnuke. Bukni, wini talak ara, na melipmanto ning ara, ton kum ati, malye kanye bobuka engenauk unune. Ayub birye, ayupu nirya nyabuk.