Ayub 25 - Eipomek

Bildad birye, tonap tamubuka Ayub biti, nyabuk yupu

^1-2 Ninye el si Bildad, elce tonap tamubuka Ayub biti nyabuk. Allah ara, weik tonun erebuka deice tam ulirye, aning-aning nirya talibuka, mikip weiknye ulule. Ati ara, nun tukwak mutuku unyap ninye nirya arye elti, ilil weik unamsile. Allah el mikip weik ati, elce talibuka ululak, im deice tam babye, pia tunim abuka teleb un ning ati kwelilula ati, aning nirya ara, telebuk ulule.

³ Allah el dam melibuka unyakce, el yin talin malaikat nirya ara, yupa pia weik, kum nukmanto unyake. Yatanye birye nuktuba, ‘Sik yupa ara, winibuka unyake,’ nyabuka laka nyapsutu do? Tonda, im sirya, mutuku sirya nirya talilula ati, dan tam mutuku ton, Allah el dirina kum ulul do?

⁴ Allah ara, pia mambul weiknye ulula ati, nun talye tukwak mutuku ninye adeksuka nirya ara, Allah el dam tikibirye, “Anggunda pia dipkoprob, pia teleb nanguk ululume. Narye nyasunun yupu nirya, moubuka talipmunce, dobolbanauk ululume,” nyapsutu do? Tukwak kilapu arye delinyak mapu unyaba ati, yatanye malye winina kumce, teleb leknye upturye, Allah el dam talye parapkapturye binuka uptu do? Kume, nun nirya ara, malye winina kum, pia diksukum ubuka, teleb ninguk kum unyabe. Nunda malye winin ninguk wininyabe.

^5-6 Allah el kanye ara, ‘Narye kwepdeiamse wala, el dirina ara, mitik tonunuk ulule. Tonda, narye kwepdeiamse kurya babye, sik dirina ara, mitik kunukunauk ulule,’ tenelule. Adirina nirya ati, Allah arye, ‘Sik dirina ara, pia teleb kume. Tonda aning nirya ara, pia teleb, lek ning kum ulule,’ tenelula ati, el dam ara, aning nirya kum yanuka uptue. Ati ara, nun talye tukwak unyap ninye ara, malye ning winina kum, pia teleb lek nang kum unyaba ati, el dam binuka kum uptibye. Kume, na kanye ara, tukwak mutuku kilapu arye delinyak ninye nirya ara, malye winina kum, pia teleb lek nang ton kum unyake. Sikda talye ku ap, tonda kuluma ap unmake,’ tenesulule, tenepne. Allah elce tenesilya ara, dipkoprob un ning ton pia kum unyabe. Bildad elce ayupu nyabuk.