Ayub 23 - Eipomek

Ayub birye, ‘Na teninun ning ara, Allah dam nyapnuneʼ tenen, nyabuk yupu

^1-2 Elias birye Ayub biti nyabukopura, Ayub birye tamubuka, el kwit capu winilye ati, nyabuk. “Bukni, atalak ara, na ikin weik upniliba, na kanye pum tam arye, ‘Se, Allah arye winipnutue,’ tenenun ning ara, Allah el kekenak nyapnune. Na ikin upnilyeba imun kanye bobuka, engepnirye ngalukunun bukni, winipnilya babye, Allah arye ikin weik ning dobuka, na nong deice tuba delinulule.

³ Se, ‘Allah el ululak ara dan do?’ tenen, na kel bikamtinye toura, na kanye deipnutue. Tonda, ‘Na adiparyuk el ululak kel biktinirye, el dam bitiniba epdatinimnye,’ tenenune. Utenenuna deice arye, elti, weik tonun patanulule.

⁴ Neika epdanimirye, na unun ning ap, na teninun ning nirya ara, Allah el dam binuka, laka nyaptinye. Nara el dam bitinirye, na si bambol deice arye, “Naio, nara malye kum wininune,” nyabuka, yupu weik nyaptinye deice arye, Allah ati asinibuka laka nyaptinye.

⁵ Aning nirya laka nyaptinyopura, Allah elcuk nati, tamubuka nyapnutu yupu uk, moubuka kekeptinirye, ‘E, nyapnilʼ tenen, kekebuka kel biktinye. Allah arye na dam yata yupu tamubuka nyapnutu yupu ara, ‘E, ayupu nong ara, anyeʼ tenen, na kekepnirye, ‘Deiyok ara, anyapmanileʼ tenen, biktinye.

⁶ Yata ati, Allah el mikip weik arye nati, “Anda malye ulyam ning ara ani, ani,” nyabuka, wenen yupu uk nyapnamnilam do? Aning ara, kume! Na kanye ara, ‘Allah arye bico tenepnuturye, dipkoprob na nyaptinye yupu nirya ara, Allah elce moubuka kekepnutue,’ tenepne.

⁷ Nara, malye winin ning ton talibuka, kum wininun ati, Allah el dam ara, na tenenye yupu laka nyaptiniba kekepnutue. Winibuka anyaptinya deice arye, na deice ara, ikin ning tonap, kum yanutuba, tamubuka pia kum dolonamne. Na yupu bokolina deiyoknye, Allah arye nati, teleb kibuka yupu bokeipnutuba, ‘Akunuma,’ teneptinye. Ati ara, aminyan talak ara, yuk deiyok nang arye, tonap, yupu pia kum bokeipnitinge.

^8-9 Narye, ‘Allah elda, dan sukum ulul do?’ tenen, el bitinye bukni, elti, keting panalyangan tam babye, keting kumulban tam babye, outam babye, eitam babye elbinamne bukni, kum elbitinye. Na urasin tamuk dipdetinye bukni, atam kum uplyeba, kum elinune. Aning atonun, na tam dipdetinye bukni, atam kum uplyeba, kum elinune. Bukni, atam-atam nirya babye, Allah ara, asukum kum ulule. Ati ara, narye Allah aunmatua babye, narye elti, kum eiptinye.

¹⁰ Bukni, Allah elda, na banun bisik nirya ap, tonda, na yanibuka banun sukum nirya ara, Allah el akunum bikilule. Allah arye nati, ‘Teleb upnamle do, malyeuk unamle do? Tonda, ‘Anye bira, el talima noutam ara, yata ulul do?’ tenen, dinulule. Akunum dipdenilyopura, pia teleb, diksukumuk unamne. Winipmanto ara, ninye arye dengna weik ning, el si emas ara, malye ning taplakamlyeba, aning nirya dobuka, uku dongobikceba, uku arye amalye ning nirya akunum dibuka sirya daklyopura, emas pia teleb ninguk memelamak touk, nati Allah arye dipdenilyopura, malye ning ton kum upmanilya ati, tuba kum eipnamle.

¹¹ Nara, Allah arye nyalul yupu moubuka talipnirye, pia kum batakanune. Allah elce, “Abisikuk binamlume,” nyapdeipsuk bisik ara, narye batakuka, yuk kwalin bisik kum banune.

¹² Aning atonun, Allah elce, “Aning ara wininamlume, aning ara, pia kum wininamlume,” nyapdeipsuk yupu ara, narye ayupu moubuka talipsirye, tuba dobolbanauk unune. Na kanye aryuk, ‘Aning winiptinye tenepnye ninguk, kum wininune. Tonda, Allah arye nyapsuk yupu moubuka tenipnirye, na kanye talima noutamuk bolonune. Ayupu ara, pia mambul,’ tenenune.

¹³ Allah arye, ‘Winipnamne,’ tenelye ning ara, pia kum batakalulnye ulula ati, aninguk dipkoprob ulule. ‘Yatanye birye, el yupu nyaptua deice arye, Allah ati ton, kum malye kiptue. Ninye arye sik yupu nyalamtinga babye, adeice arye Allah el kanye yuk, kum tenenamle. Allah elce ‘Aning winipnamne,’ tenelul ning ara, kum batakalule. Elce ateneplye touk winilule.

¹⁴ Aning atonun ton, Allah arye nati, ‘Anye biti aning winipnamne. Narye melipnyeba, anye birye wininamleʼ tenen, akunum kintinipnuk ning ara, dipkoprob aninguk, elce na deice wininulule. Aninguk kum bukni, Allah elce na deice ati, ‘Aning winiptinye, aning winipnamne,’ tenelul ning ara, pia weik ulule.

¹⁵ Ati ara, Allah ati, ‘Elda pia mikip weik ap, mambul weik ap ululnye,’ tenepnyopura, yok sirim talipniliba, pia ilil unulule. El ulye ning nirya ati, bita biknirye, na ilil pia weik unulule.

¹⁶ Allah elda pia erebuka deice tam ulirye, aning-aning talibuka, mikip weiknye ulula ati, aning moubuka tenipnirye, na kanye talima noutam ara, ilil weik unulule. Nara Allah ati, tenipnyopura, na kisok birbir nyaniliba, na talima ara, mitang unulule.

¹⁷ Ilil weik unulula ati, nara kunukuk noutam binuka duknuptinyopura, tuba ilil kum unamnile. Diba, pia kunukukak wektinyeba, na urasin nirya lelipnutuba, narye Allah tuba kum elinamne ati, ilil kum unamnile. Ayupu ara, Ayub birye, el kwit capu sik winilye nang ati, nyabuk.