Ayub 15 - Eipomek

Ayub birye nyabuk yupu ati, ninye si Elifas birye, tamubuka nyabuk yupu

^1-3 Ura, Teman mutuku tam ulamuknye, el si ara Elifas birye, Ayub biti tamubuka nyabuk yupu ara ani. Ayub anda weik bikamik nang arye nyalamik yupu atonun yupu kum nyalyame. Weik bikna nang arye, talye-talye yupu pia kum nyanyak bukni, ance nyasilyam yupu ara, pia nong kum yupu, talye-talye nyasilyame. Weik bikna nang arye, ‘Sik malye kipnyak’ tenen, yupu sekelana ati nyanyak yupu, nong dipkoprob ulule. Tonda deiyok abuke. Bukni, ance aning atonun kum nyalyame. Winipmanto ara, kumanya mikip arye talye pu nyaplyeba, kum balamle touk nyalyame. Tonda, nun mutuku noutam bukni, keting panalyangan tam arye, pia buppu kumanya pu nyaplyeba, aning-aning nirya sesal seplirye, kum kidanalamle touk, nong kum upnamle yupu nyasilyame.

⁴ Weik bikamik nang arye, nong kum yupu kum nyanyak bukni, ance talye nyalyam yupu, yuk nang arye, ‘Yupu dibaʼ tenen, kekebikcopura, ninye tonoknye babye ton, Allah ati pia ilil kum tenepnamake. Tonda, Allah arye nun ninye ati, yupu nyapsilyeba, ‘Se, aning ara mambul ati, deiyok dan do?’ tenen, moubuka teninauk ulamupu bukni, ance nyapsilam yupu deice arye, moubuka bikne ning ara, yupu sekeisilyame. Aning ara, malyeuka.

⁵ Ayub an malye uminya deice arye, ance talye yupu nyalyame. Tonda, ‘Yuk nang ati, malye kilinamab’ tenen, nyanyak nang arye, tilila yupu nyalamak touk, an babye wini talak nyasilyame. Ati ara, ance atonun yupu nyaminye deice arye, malye ulyam ning ati, sikniltakalyame.

⁶ Bukni, ancuk si bam bol deice arye, talye yupu nyalyama ati, ancuk, anti malye kililalyame. Ayub anda, ance winiminye ning ara, narye, “Anda winibuka malye winilyame,” nyabuka, talye yupu deice arye kum lulupkitinye. Aning kum bukni, ancuk nyamince tamupdeipminye yupu deice arye, “Malye wininune,” nyabuka, yupu bokolilamlyame. Ancuk nyaminye yupu arye, malye winiminye ning ara, akunum lak kipkile.

⁷ Ayub, ance, ‘Nara mambul weiknye unune,’ tenepdalum do? Ara, ance, ‘Tukwak mutuku noutam nirya ara, yuk nang kum deiamik talak arye, nara min akunum deiamniknye unune,’ tenelyam do? Tonda, ‘Allah arye atukwak bukuk mutuku kon nirya kum kwepdeiamuk talak arye, nara min kwepdeiamnuk ati, nara mambul weiknye unune,’ tenelyam do?

⁸ Ayub anda, im deice Allah ap, malaikat nirya ap, wekmekak arye, ‘Aning-aning nirya ara, winipnamabe, winipnamabe,’ nyabuka, yupu talepmik talak ara, an ton kekebuka, yupu neika taleamlum do? Tonda, Ayub ance, ‘Tukwak mutuku aunyak nang kan-kan noutam arye, weik biknanye bira, na tonoka,’ tenelamlyam do?

⁹ Ayub ance aning-aning yuk-yuk nirya biklum ning ara, nun babye ton, kum bikupu do? Tonda, ance aning-aning nirya tenibuka biklumunce, ‘Nong noutam deiyok ning ara, ani,’ tenelyam ning ara, nun babye tenebuka kum bikupu do? Kume, aning nirya ara, nun babye akunum bikupu.

¹⁰ Na kanye ara, abikupu ning ara, nun unyaba kan-kan ara, akunum min arye nebuka, wisi danamikce, kul potong tikamuk nang ton aulamikce bikamike. Nun babye atonun tenenyabe. Tonda Ayub, an kabul talak ara, an ni koproba kum ulamuk talak, sik akunum ulamikce bikamike. Ati, nun tenenyap touk, nun tam nang ara, weik aunyab bukni, ance tenepminye ning ara, an tonoka.

¹¹ Allah arye nun deice nyapliba melilyeba, kekebibirye, anti lak nyabibiyeba, an dam pin-pin kilisulul ning ara, anda yata deiyok ati, kum dololyam do? Allah el si deice arye arepsilyeba, talima lamapdongobuka ubirye, nunce yupu namin arye, anti lak nyakiyap yupu ara, yata ati kum dololyam do?

¹² Bukni, yata deiyok ati, ‘Deiyok dan do?’ tenena kumce, anda moubuka tenina kum arye, adiparyuk yu upkilye ati, wasilyam do? Ance yu teneminya ati, asing ining bi ukilya ara, yata ati do?

¹³ Winibuka teneminyopura, an kanye talima noutam arye Allah ati yu upkilye uplyeba, uaplirye, elti, ance malye yupu nyalyam do? An si bam bol arye, pia malye yupu nyabuka, Allah ati, malye kibuka, elce nyalul yupu nirya ara, yaniltaknauk ulyame. Aning nirya ara, yata ati do?

¹⁴ Anda moubuka tenipnalyame. Ance, ‘Nara, malye pia kum upse. Diksukum unanye unune,’ tenepdalum bukni, aning ara winipmanto. Kume, nun tukwak unyap nang tonoknye babye, malye kum wininyak do? Tonda Allah el dam yanuka, el si erena ati ara, talye nang arye deiamsik nang unyap nang arye, el dam talye lukdanuka yatibye do? Atonun, tukwak mutuku kilapu arye deilinsik nang unyaba ati, Allah arye, “Aning wininamlume, aning ara, pia kum wininamlume,” nyapdeiamsuk yupu ara, malye winina pia kum arye, diksukumuk wininyap do? Kume, nunce kum winiptibye. Ati, nun nirya arye, “Nunda teleb nang unyabe,” nyapmanto kume.

¹⁵ Na kanye ara ani. Ara, Allah arye amu tam bukni, im deice el pil don nang, sik malaikat ati, ‘Sik nirya ara, pia dipkoprob, teleb piluk donyaka,’ diba kum tenelule. Tonda, im deice ulye ning nirya ati ara, Allah arye, ‘Aning nirya ara, malye winina pia kumce, dipkoprob pia telebuk ulula ati, na dam yangana telebe,’ kum tenesilul.

¹⁶ Malaikat babye, pia telebuk, lek nang kum unyaka ati, dipkoprob nun ninye koproba ara, Allah elce elisulula ara, ‘Sikda, pia diksukum teleb nang unyake,’ kum tenesulule. Tonda, kum winipnyabe. Malye winin ninguk wininyabe. Deiyok ara, nun ninye ara, malye winin nang unyabe. Tonda, nun ninye malye wininyap nang ara, winipmanto ara, talye mek kwebuka dilamak touk, malye winin ning ap, tenen ap ara, adiparyuk talye lubakibuka wininyabe. Anda atonun ulyama ati, nyapkine.

¹⁷ Ati ara, Ayub anda moubuka biknilyame. Bikniminyeba, na Elifas birye, an winiminye ning, akunum bikse ning ara, nuknamakine. Narye aning nirya lak nyabuka benbenepkiniba, anda adiparyuk moubuka biknilyame.

¹⁸ Ara, naryuk kum tenepse. Aning kum bukni, nun punun nang arye, weik bikamik nang, nunti nyapdeiamsikba, sik anang arye, na ni yapu koproba ap, na Elifas dam nyapdeipnikba, kekepse yupu ara, an Ayub dam ati nyapnukine. Tonda, nun punun nang arye, ayupu kum duknyamik. Nun punun nang arye deibikba, dukdongobuka nun apu yapu ton deibikba, deipdanin yangalamik nang nirya ap, nun atam unyap nang ap ati, lak nyapdeiamsik ning ara, anti lak nyapnukine.

¹⁹ Min talak ara, Allah arye amutuku dobuka, nun apu yapu ati arebuka ati, sikce amutuku taleamik. Amutuku noutam ara, yuk ninye asik nang ton yanuka, sik neika pia kum ulamik ati, sik ninye asik nang arye, malye winilamik ning ara, nun apu yapu arye eibuka kum bikamik. Ati, sik ninye asik nang, Allah diba kum tenelamik nang arye, nun apu yapu ati, tilila yupu nyabuka, Allah dam arye, nun apu yapu nang bobuka, yuk bisik leibuka kum bolamaka ati, Allah kum yanilamik.

Elifas birye, sik malye wininyak nang ati, nyabuk yupu

²⁰ Aning ara, na akunum bikamse. Sik malye un ninguk talibuka wininyak nang ara, kanye ikin ninguk bobuka, yuk nang deice deilinyake. Bukni, sik kam unyak talak nirya ara, ‘Se, aminyan talak yata wiripnamsil do?’ tenen, teniltonauk ukirye, ilil weik unyake. Anggunce, yuk nang ati, bico tenena pia kumce, anggun nong deice, teleb ning ton kum deilinyake. Ato nang ara, sik kam unyak talak ara, ‘Se, yata wiriptinye do?’ tenen, kanye bokoltonauk unyake.

²¹ Malye ning wininyak nang ara, sik kanye talima noutam ara, pia ilil weik lelim nyaplyeba, anggun amul bisik arye kekepmunye ning ara, weik ilil usululule. Sik ato unyak nang ara, ‘Ura, bona talin nang akunum unyaba ati, talye tunim abuka mangkau unmaba’ tenen, unmace talak aryuk, sik mal olan nang yakirye, obuka sice buklopnamake.

²² Sik amalye unyak nang ara, ‘Se, nun kuna noutam arye unyaba ati, nunti lyebuka dopropnamsilnye bira, pia kum yanamle. Asukumuk pia unamap’ tenen, pia tenenibikce, ilil ulule. Tonda, Allah arye, ‘Sik malye unyak nang, sik dekna ati ara, yu nang arye yanuka opnamak’ tenen, ‘Lo arepnyeba, dipkoprob anang ati olyanamake,’ tenesulul, tenenyake. Tonda, ‘Se, Allah arye nunti, aning akunum kintinip deipsuk ati, dipkoprob winipnamsil,’ tenenibirye, kanye imun bonyake.

²³ Tonda, sik amalye unyak nang ara, ‘Se, nun dipnamap talak ara, yata talak do?’ tenenyake. Tonda, ‘Se, yu nang arye, parang ya arye opsikceba, dibibyeura, talye bai im tam lakuka balamle maka arye, akunum kintinibuka disulula ati, opsikceura, nun dibibyeba, amaka arye dipnamsil’ tenen, ilil weik usulule. Akunum kintinibuka disinyake. Diba, amalye wininyak nang ara, ‘Se, dipkoprob pia kuna upnamsile. Ara, kanye imun nun dam yanuka upsilyeura, ikin weik unamabe!’ teninauk unyake.

²⁴ Ati ara, winipmanto ara, ninye deiyoknye, el ap, el yin talin nang ap, mikip weik ukirye, yuk mutuku nang ati, ‘Anang ara, obuka sirya daknamap’ tenen, kintinibikirye, yuk mutuku nang dam yanura, amutuku nang arye, pia kanye imun kanye bobuka, lukdanuka ilil weik unyak touk, sik malye-malye unyak nang babye, atonun teninyake. Ara, ‘Se, dipkoprob aminyan talak ara, kanye imun nun dam yanamsile!’ tenen, ilil weik unyake.

^25-26 Ura, aning nirya ara, talye ati kume. Deiyok ara ani. Sik malye ninguk talibuka unyak nang ara, Allah arye, ‘Aning wininamlume, aning ara pia kum wininamlume,’ nyapdeipsuk yupu, yaninauk ukirye, ‘Allah ara nun lik,’ tenenyake ati, Allah arye anang ati, weik wenepnamle. Anang ara, sik ilil tenena kum, malyeukirye, Allah Yahweh ara, aning-aning talibuka, Pia Mikip Weik Deiyoknye ulula ati, ‘Malye kibikirye, el batakuka, nun yuk unamabe’ tenen, Allah yaninauk unyake. Winipmanto ara, yin talinnye birye, el nong lelin ning, el si ara perisai, pia kat ning bopnirye, na mal olan nang, mikip weik uptinga babye, narye anang adiparyuk optinye,’ tenelul touk, pia walwal wininyake.

²⁷ Amalye unyak nang ara, pil dona kumce, bona talibuka ukirye, din weik dikirye, sik urasin ap, nong ap ara, nong weik nenyake.

²⁸ Winibuka ukirye, sik amalye unyak nang ara, weik asik mutuku noutam unyake. Bukni, anyasik ara, min talak Allah arye amutuku nang wenena ati, akunum wipdeibuk nang yanuka, amutuku nang akunum obuka, sice buklobikura, aik ola dem ubuka ati, teleb nang nirya ara, anyaik noutam kum uptinge. Bukni, sik amalye unyak nang ara, asukumuk tuba unyake. Allah arye tenyamuk touk, aminyan talak ara, anyasik-anyasik nirya ara, ulubuka sirya opnamake.

²⁹ Sik anang ara, bona weik talikirye, tuba bona talin nang kum unamake. Anggun talibuka ululum bona yala-yala nirya ara, adiparyuk kum danamle. Winiplyeba, asukum arye dila ton pia kum upnamle. Aning ap, anggun nong kurya babye, tukwak mutuku noutam, pia kum upnamle. Ding nyanauk upnamake.

³⁰ Dipkoproba, sik amalye unyak nang nirya ara, dipnamake. Dibikcopura, min diplamik nang unyakak ara, kunukak arye kisadakuka, pia yukak kum binmanto unamake. Tonda, winipmanto, weik uku dilamlirye, yo ap, ayo yating ap ara, uku arye pia diplyeba, kum danalamle touk, anang ap, sikce deiamik mapu ap, sik mapu silip nirya ap ara, uku buk arye dibuka, sirya daknamle. Ara, Allah arye sik wenena ati, el si mikip arye, sik anang nirya ara, kum kipdeipnalame.

³¹ Sik amalye unyak nang ara, ‘Nunda weik bona talibuka ubibirye, deiyok-deiyok nang unamabe’ tenen, tilila yupu nyana ap, duknubuka malye una ap arye ulamik bukni, aning nirya ara, dipkoprob nong pia kum upnamle ning ati, diba tenelamik. Ati ara, aminyan talak ara, sik dekna dopropkamak ning babye, nong pia kum upnamle ninguk dopropnamake.

³² Sik anang ara, dibin talak kum upmalyebuk, sikda min adiparyuk dipnamake. Winipmanto ara, yo taruk lekuka balamle bukni, bok kum ulamle touk upnamle. Tuba tonap, ibik kum upnamle. Atonun, anang babye, kanye arye tonap, kam kum upnamake.

³³ Winipmanto ning ton, sik amalye unyak nang ara, anggur yo duk mouamya ani, kum wisipmalye aryuk, dakalsaklamle touk upnamake. Tonda, Zaitun yo el kita moulamle, duk kum moupmalyecuk, dakalsaklamle touk upnamake. Sik ap, anggun mapu silip nirya ap ara, pia kum upnamake.

³⁴ Diba, sik malye un ning talibuka unyak nang ara, Allah ati, ‘Nun lik. Elce nyalul yupu nirya ara, pia kum kekenamabe,’ tenenyak nang ap, tonda anggun tam kipdopnamsiak nang ara, sikce mapu ton kum deilinamake. Tonda, sik tam kipdopnamak nang arye, mapu tonap, pia kum deipdanin binamake. Winibikcopura, sik anang akunum aik dobuka ulamikak nirya ara, uku arye dibuka sirya daknamle. Deiyok ara, anggun anang arye, sik yuk nang ati, “Moul yo bok weik tonun arepsulumba, nun tenenyap ning winipnamabe,” nyabuka, malye bobuka, morolamikba, arelamik yo bok arye domik asik nirya ara, uku arye dipnamle. Aning nirya ara, Allah!

³⁵ Winipmanto ara, kilapu arye, mi bomikca ani, sirya ara mi deililamak touk, sik amalye winin nang arye, sik kanye talima pum tam arye, ‘Nunda malye winin ninguk unamabe,’ tenepnikirye, malye ninguk wininyake. Sik kanye talima pum tam ara, malye un ninguk tenenyake ati, malye winin ninguk unyake.