Ayub 14 - Eipomek

“Akunum dibipyopura, ‘Aning ton tamubuka winiptinye’ tenen, kum putasulule,” nyabuka, Ayub birye nyabuk yupu

¹ Ayub birye Allah ati, nyabuka morobuk yupu ara, ani. Nun nin yapu arye, deipsice talak arye diprongobuka dotalak babye, mikip kum usulule. Tonda, ouku mitik tonun dem unamap talak ara, kanye ikin weik ning unmasilye diparyuk, minopce dibinyabe. Keting tamun pia weik arye kum unyabe. Tonda, kam unyap talak noutamak nirya ara, ikin ninguk yangasulule.

² Tonda, yo keta mopmalye like tonokuk, akalsakalule atonun, ninye dib kanye ara, keting donokliba, kanya kinim-kinim anmalya ani, keting akuplye talak ara, tunim alamle atonun, nun tukwak ninye ara, aning atonun unyabe. Winipmanto ning ara, keting deipliba, kanya lakak uaplya ani, minopce tunim alamle atonun unyabe.

³ Na ni Allah, ato ninye ati, moubuka disulul do? Nara ninye sirika ununa anya arye, na ni Allah ance yata deiyok ati, ‘Anye biti wenebuka yupu bokeipnamne’ tenen, an yupu bokolinak dobuka bobinutum do? Tonda, yata deiyok ati, ance na tonye dobuka, ninye yupu bokolina dam bobinuka deipnutum do?

⁴ Ninye malye wininyak nang arye, teleb winin ning ton winipting do? Aning ara, tonoknye babye ton kum winiptinge. Malye un ning noutamak ara, yatanye birye, pia teleb ning doproptu do? Aning ara, kum winipmanto.

⁵ Na ni Allah, ancuk ninye kam unamak talak babye, wala babye kintinibuka delisilyame. Aning atonun tonda, ‘Tukwak ninye ara, kam unamak talak winibuka unamak,’ tenelalum touk unyake. Ton kum bisilule.

⁶ Winipmanto ning ara, sik bona weik talinyak nang arye, yuk talye nang doprobikirye, ikin pil dibikiba, anang arye ikin pil donmaca ani, sirye ara, uang yo bok dolonyake. Atalye pil don nang ara, sik deiyok nang arye, akunum tenepmakce talak, pil donyak talak noutamak ara, ‘Pil dadonamake’ tenen, apil dona nang ati, moubuka kum dilinyake. Pil dina deiyok nang arye, sik amu tam pil don nang ati, namin kilinyake. Aning atonun, na ni Allah, ance nati, ‘Daunamle’ tenen, namin kiyamnutume. ‘Na dam asilen ning arena kumce, namin kipdeipniminba, talye kanye bobuka unmanya ani, aminyan talak dadiptini’ tenen, moropkine na nio.

⁷ Tonda, winipmanto ning ara, yo wemica, sirika deice arye, kwapu silikliba, taruk lekelule. Taruk kwa leklirye, weik ulule. Bukni, ninye tonok ara, dibipyopura, akunum dibinyabe. Tuba tonap tamubuka kam kum uptibye.

^8-9 Yo wibicopura, yating tuku pum tam binamlye ning ara, koulubuka lyulule. Tonda, ayo sirika ara, tuku pum tam pun danuka lyupnamle. Bukni, tukwak binamlye yo, yating mek bolpiplyopura, tuba tamubuka kwapu silikilule. Winiplirye, winiryuk ning palamle atonun, ubuka palule.

¹⁰ Bukni, ninye tonok ara, dibibiyeba weibicopura, tonap tamubuka kum kam bunyake. Tonda, ninye akunum dibicopura, sik isin tuba kum welelule. Atalak sik dib kanye ara, dan mutuku banyak do? Nun kum elinyabe, talye tunim abuka unyake.

¹¹ Winipmanto ara, keting deiplirye, laut mekwen deice donokliba, buppu piriplirye, el mikip welelamle tonun, ninye ara dibicopura, tuba tamubuka kam kum buktinge. Adiparyuk kum unyake. Aning atonun, weik dou maplirye, mitik mek balamlya nirya, celolamle touk, ninye dibipyopura, kum dananyabe.

¹² Nun ninye dibinyaba ara, atonun unyabe. Ara, dibipyopura, tuba tamubuka kam kum buktibye. Im tuba upnamle talak ara, akunum dipmakce nang ati, yuk nang arye tamubuka tonap kum elinamake. Im noutamak ulul ning nirya, kum uplyopura, diamikce ninye tamubuka kam buknamak bukni, aning min kum winipmalye talak ara, pia mabuka tunimanauk unamake.

¹³ Ati ara, na ni ance na dobuka, ninye dibikiba, tuku palilamak ninye, balamakak dungnubuka deipniminba, an yu teneniminye ning kum upkiliba, tuba tamubuka tenenamnilame. Winibuka ancuk kalikuka dilamnimin bukni, an yu kum upkiliba, ance tenepnulum talak akunum uplyopura, tuba tonap nati tenenamnilame.

¹⁴ Na nio, na walwale. Ninye akunum dipmakceura, sik tamubuka kam bukting do? Ance tamubuka kam bukeipnamsilam do? Kam bukeipsutum toura, aning biktinyeura, na tuba-tuba ikin unilye talak noutam ara, ‘Aminyan dipnyopura, Allah tenepnilye talak, tuba tonap tamubuka kam bukeipnamnil’ tenen, pia teninauk uptinye.

¹⁵ Ati, ance na nyapniminyeura, ‘Na aunune,’ nyapnamnarya. Aning ara, nara ancuk kintinibuka deiamnuluma anya arye, ance bico tenepnimince, ‘Elda na ap neika unaname’ tenen, patapnamkil talak ara, nati yukupniminba, tamubuka kam bukuka yatinye.

¹⁶ Winipnimince, na banamne sukum nirya ara, ance kalikuka melinamnilyame. Bukni, ance na malye wininye ning ati ara, namin kipnimince, lyepropnamnilame. Na malye unye ning nirya ara, nukmince, tuba kum tenenamnilame.

¹⁷ Aning kum bukni, minop talak malye winipnin yangalamse ning ap, wini talak malye wininye ning ap babye, ance aning namin kibuka lyepropnimince, amalye ning yukak donoknalame. Winipmanto ning ara, ninye arye malye ning karung pum bisik dongobikirye, tuku palibuka singnildongolamak tonun, na malye winin ning ati ara, namin kipnimince, lyepropnamnilamca.

¹⁸ Tukwak ninye nirya arye, ‘Se, aning winiptibye’ tenen, pia kanye deibuka, dinauk unyak ning nirya ara, ance aning nirya, kum kilisilyame. Winipmanto ara, weik mok ceplirye, tokna pakuka balamle touk, tonda, mutuku lulukna luluklirye, keil lukuka saklamliba, amutuku mitik kipnin balamle touk, tukwak ninye arye, ‘Se, aning winiptibye,’ tenenyak ning ara, ance kum kilisilyame.

¹⁹ Aning atonun, mek tuba-tuba balirye, keilak ngiklamliba, korokolsaklamlya ani, mitik kililamle ning ap, weik mok ceplye talak, mek oplirye, tuku nirya bobuka balolamle atonun ning ap, ninye arye, ‘Se, aning winiptibye,’ tenenyak ning ara, ance kum kilisilyame.

²⁰ Aning ara, ance ninye ati nun mikip ap, nong ap, pia kum kipdeipsiminba, tuba tamubuka kam kum buktinge. Tonda, ninye dipnamapye talak, nun urasin yuk updeipsiminba, ‘Anggun dabilulume,’ nyapsiminba, banamabe.

²¹ Ninye akunum dipmakce nang ara, sik mapu nebikiba, ninye arye, si eren nang unamak babye, kum biktinge. Aning atouk, sik mapu ati, amu tam pil don nang kipdeiptingba, yuk nang eiptingce, sik ni yapu diamting nang ati, yanuka laka nyaptinge. ‘Nun mapu ara, aminyan talak weik nang unamak do? Talye bona utotoa talina kum ninye uk, unamak do?’ tenen, dibipyopura, aning nirya kum kel biktibye.

²² Ninye ton dipnamace talak ara, sik bidamnye nong deice ikin ning dopropmace ning atibuk tenenyake. Tonda, sik bidamnye ikin ning dopropmace ning atibuk, tuba tenebikirye, yuk nang ati ton, kum tenenyake.