Ayub 11 - Eipomek

Zofar birye Ayub biti, nyabuk yupu

^1-2 Ura, Naama mutukunye, el si ara Zofar birye, ayupu nyabuk. “Ayub anda talye yupu ara, pia weik tonun nyalyama ati, ninye arye an nyaminye yupu nirya ati, talye kekebikirye, tunim abuka unamak do? Aning ara, sikce tamubuka kum nyanamkiak do? Dipkoprob ara, ance yupu weik nyalyama ati, nunce an nyaminye yupu ati, adiparyuk diba tenenamap do? Kume, teleb ning ara, ninye arye, “Kume, elce nyanmasil yupu deiyok ara, ani,” nyabuka nyaptingopura, ance nyapsilam yupu diba teneptibye. “Talye diba kum tenepkitibye, nyapne,” nyabuk. Nyabukce, ayupu ton dukdongobuka nyabuk.

³ Ayub, ance teniminya ara, nunti nyasilyam yupu nirya ara, ‘Yuk nang arye, kum laka nyaptinga ati, talye tunim abuka unamake,’ utenesilyam do? Tonda, ance nyaminye yupu ara, nong kum yupu nyalyama ati, talye wamlibuka nyalyama ati, nunda talye tunim abuka, kekenauk unamap do? Nunce tamubuka anti, yupu ton nyapkipyopura, anda alye kum dakdanamlam do? Utenena kume.

⁴ Aning deiyok ara ani. Ayub ance tenenimince, nyasilyam yupu ara, “Nara diba, talye yupu ton pia kum nyanune. Tonda, malye winin ning ton, pia kum wininune. Ati, nara pia malye winina kum, pia diksukumuk wininuna ati, Allah el dilul talak ara, ‘Anye bira pia telebuk ulule,’ tenenulule,” nyabuka nyasilyame.

⁵ Ancuk utenelyam bukni, Allah elcuk anti, aning atonun kum tenekulule. Nun kanye ara, ‘Se, Allah arye, an dam yanuka yupu nyapkutopura, telebe uka,’ tenenyabe. Nunda, ‘Aning ara, pia telebe,’ tenebabe.

⁶ Tonda, Allah ara, kel weiknye biti, ninye kum tenipmanto ning tenelule. Aning-aning nirya, nong noutam nirya ara, el akunum kel bikamuka ati, akunum kel bikilule. Ati an kanye moubuka unamlame. Allah el kel weik bikamuk ning ara, yala-yala nirya aupmala ati, nun tukwak nang arye, aning nirya moubuka kum kel biktibye. Ati ance aning moubuka tenipnulyame. Ance malye ulamlum ning nirya dengna ati, ikin weik dololamtum bukni, Allah arye an dengna ati, wenen ning mitik tonun arepliba, ikin yaliba dololyame.

⁷ Allah el kanye talima noutam tenilul duknun ning nirya ara, ance aning tenebuka, kel biktum do? Kume. Tonda, Allah ara, aning-aning deice tam erebuka, pia mikip weiknye ulula ati, el mikip weik sirya duknululak ara, aupmal do, kum do? Allah arye kum winipmanto ning winilul do, kum do? Elce, ‘Aning winipnamne bukni, aning ara kum winipnamne,’ tenilul ning ara, ance eibuka, kum biktume.

⁸ Allah elda, pia mikip weiknye ulula ati, elce winiptu ning ara, ance eibuka kum biktume. Ara, Allah el mikip ara, im deice tam, pia erebuka ubuk atonun ulula ati, nun tukwak nang arye, aning kum biktibye. Tonda, Allah el bikilulce, mikip weik arye pil dolul ning nirya ara, ance moubuka kum biktume. Aning nirya ara, ninye dibikirye, koulukuka wekelbanyak pum tam ara, pia kaurwe weik, duknuna uk ulula ati, nunce kum eiptibye. Bukni, aning babye mitik tonun ulule. Allah el bikin ning ara, pia amu noutam atonun, kum nukmanto ulule. Ati, dipkoprob ance Allah tenilul ning ara, dipkoprob kum biktume.

⁹ Allah el bikuk ning ara, winipmanto, tukwak mutuku nirya do, weik laut mekwen nirya do, aunyab mutuku lo weik ubuk ning ara, mutuku sirya arye, otam im sirya dam kiklipdeibibirye, ‘El cang ara aniʼ tenen, biktibyopura, aning ara, mitik tonunuk uptu bukni, el bikin ning ara, pia weik, nukman kumto ulule.

¹⁰ Allah arye tukwak mutuku nirya yalirye, ninye nirya tomobuka, el yupu bokolinak bobisuturye, dipdebuka wenen ning, nun deice deipsutue. Allah arye, ‘Winipnamsine,’ tenepsutopura, yata tonye birye Allah ati, “Aning winina ara kume, aning kum winiptume,” nyabuka, Allah ati wenebuka yupu sektu do? Kume, aning ara, pia kum winipmanto ulule.

¹¹ Aning ara talye kum nyapkine. Deiyok ara ani. Ara, Allah arye tilila yupu uk nyanyak nang ap, malyeuk wininyak nang ap, teleb ning pia kum wininyak nang ara, Allah el akunum bikamuke. Ati ara, Allah elce atonun nang ap, sikce malye unyak ning nirya ara, eiplyopura, ‘Anang ati wenenamne,’ kum tenelul do? Kume, el dinak nirya ara, pia luba kum kilule.

¹² Winipmanto ning ton nyapnukine. Ara, kel weik bikna kumce, wal-waluk ulamtunye bira, kel weik ning ara, dipkoprob pia kum biktue. Ati, winipmanto ton, bai sakamtu keledai, kil basam arye, elcuk ninye mi deiptopura, adeice arye teniptibye. Atalak aryuk, kel kum bikmanto malye ulamtunye birye, weik duknyamtinga babye, kel biktue. Bukni, keledai basam arye, ninye mi pia kum dipmanto ati, atonun pia wal-waluk ulinye birye, kel weik bikin ning, dipkoprob kum kel bikmanto ulule.

¹³ Se, Ayubo, an kanye talima noutam arye teniminye ning nirya ara, ‘Malye winina pia kumce, dipkoprob diksukum bisikuk unamne,’ teneptumopura, Allah ati, ‘Teleb ning arepnutuʼ tenen, an taruk erepmince, Allah ati moronalame.

¹⁴ Bukni nun kwit Ayubo, an kanye talima noutam arye tenelyam ning ara, pia malye winina ap, tenina ap, tuba aupmakilyopura, minopce aning nirya bataknalyame! Tonda, an kwit capu nang ap, an mapu silip ap, an tam nang ap, an ap neika unyak nang ap, anggun kan-kan arye, ton nang ara, malye ning tuba unyak nang auplyopura, adiparyuk anang wenepmince, bataknalame. Tonda, yuk nang ati, malye winilinyak nang ara, an ap neika, tonok aik una meme.

¹⁵ Ance aning nirya akunum teleb kipdeipminyopura, an urasin erepmince, alye kum dakalanalame. Ara, an talima noutam ap, an dam ap ara, malye un ning ton pia kum upnamkila ati, atalak ara, an taruk erebuka, Allah ati moronalame. Atalak ara, ance, ‘Se, yata ikin ning na dam yanamnil do?’ tenen, ilil pia kum unamkile. Atalak ara, anda mikip arye tikuka, talye mangkau banauk unamlame.

¹⁶ Tonda, malye winin ning nirya, akunum batakminyopura, atalak an ikin ning dopropmince, kanye imun ukulul ning nirya ara, tonap pia kum teninamlame. Ikin ning nirya tenina kumce, luba kipnalame. Winipmanto ara, mek onmaliba, ninye arye eibibye bukni, akunum cepdopmalirye, sisal leplyopura, otalak ton tuba ton ap kum teninamlyame. Pia lubakina uk unamlame.

¹⁷ Tonda atalak babye, an kam unamlam talak ara, keting noutam arye, keting dirina weik ulamle touk, an kam una babye, pia teleb upkilyeba, an deice ara, pia dirina weik unamkile. An talima noutam ara, mitikto ikin ning tuba aupmaliba, kunukuna uk ukilye ning nirya ara, aning babye, weik dirina atonun unamkile. Kanye deibuka unamlame. Winipmanto ara, iniplyopura kunukmalya ani, bereklyopura, beren tam keting deipliba, dirina weik ulamle touk, unamkile.

¹⁸ Tonda atalak ara, anda tunim abuka telebuk winimince, ‘Aminyan talak ara, teleb ninguk, na dam yanamlame. Aning ton, aning ton winipnamnarya,’ tenena uk unalama ati, tenina pia kum unalame. Allah arye melipkiliba, el amu tamuk unalama ati, ilil pia kum unamlame. Winimince, teleb aryuk kanye lamapdongobuka unalame.

¹⁹ Atalak ara, an tunim abuka mapminyopura, an mal pina ati, yuk-yuk ning nirya ati, ton ilil pia kum unamkile. Winipminyebuk, yuk nang nirya, yakirye, “Naio, melipsilyame!” nyabuka, an dam yanuka moropnamkiake. Tonda, anti si erepnamkiake.

²⁰ Bukni, sik malye winin ninguk talibuka, tuba malyeuk wininyak nang ara, sik deice ikin ning yalye babye, sikce, ‘Se, yata deiyok ati, aikin ning ara, yanmasil do?’ tenen, moubuka, pia kum biktinge. Ati sik anang ara, yatanye birye meliptu do? Pia kume. Tonda, sik anang, ikin ning doprobikcopura, aning batakuka, pia binmanto kum unamake. Sik anang arye teninamak ning ara, ‘Se, nunda isin tonok ton kum dasutuba, aning ara adiparyuk minop diptibye,’ tenena uk unamake.