Ayub 1 - Eipomek

Ayub birye Allah ati, dib tenyamuk ati, isa mer nirya, sik deiyoknye, el si Isa Mutuku Dongonye arye, Ayub biti winildelamuk ati, sekik yupu

¹ Ninye tonok Us mutuku ulamuknye, el si ara, Ayub nyalamiknye bira, Allah ati, ‘Elda weik mambulnye’ tenen, Allah el siuk erelamukce, Allah nyapdeiamuk ninguk talibuka ulamukce, el tibuk moubuka tenelamukce, malye un ning dam arye batakuka, pia diksukumuk ulamuk.

² Winilamukce, Ayub el mapu ara, sal mapu tekbarye ap, kilmapu winilye ap deiamuk.

³ Tonda, el pil don nang babye pia weik ulamik. Ulamikce, domba basam yupa tujuh ribu (7.000) ap, unta basam yupa tiga ribu (3.000) ap, tonda keledai basam yupa ara, pamubarye ratus (500) ap, sapi basam yupa ara seribu (1.000) ap, aning nirya talibuka weilamik. Winilamikbuk, sik keting yangan tam ulamik ninye noutamak bona weik nang ton aulamik bukni, el Ayub bira pia weik sisinanye ap, pia telebnye bira, el tonok ulamuk. El atonunye ton kum ulamuk.

⁴ Winibuka ulamukce, atalak-atalak nirya, el mapu tekbarye nang sik ulamik ning ara, tonye aik bulubuka kwalibuka dinmana, ton sum ara, kisikdakuka, tonye aik binuka kwalibuka dilamik. Winilamik talak ara, sik makal kilapu, winilye nirya ara, ‘Yanamalulume,’ nyabuka yukupnopura, sik adiparyuk yanopura, sik neika bulubuka wekna arye din ap, mek ap neika dilamik.

⁵ Akunum kwalibuka dipdopneura, Ayub mapmana beren tam arye bukdopna arye, el mapu sik yuk-yuk ati nukuka, domba basam opnarye, Allah morona ati memepdeiamukak, bobuka uku dalbalamuk. Winilamukce, sik ni Ayub birye tenelamuk ning ara, ‘Na mapu sik mangkau arye malye upmak do? Tonda sik kanye talima noutamak arye, ‘Allah ati mambul kume,’ tenepmak do?’ tenen, amalye winipmanto ning, ‘Winipmak do?’ tenen, aning pununa ati, kam ning obuka, Allah ati arelamuk. Aning ati ara, ‘Narye Allah moropneba, sik Allah dam malye wininyak ning nirya lyepnamle’ tenen, winilamuk.

Isa Mutuku Dongonye arye, Ayub biti, like tonok talak winildena ati, winibuk yupu

⁶ Ayub diksukumuk ulamuk bukni, Allah el pil dona nang malaikat dilamikce, ‘Nun ni koprop Allah damak unamap’ tenen, biyik talak ara, isa sik deiyoknye Isa Mutuku Dongonye babye, sik neika biyik.

⁷ Sik neika akunum biyikura, Allah Yahweh arye isa sik deiyoknye Isa Mutuku Dongonye biti, “Anda, dan mutuku arye tekilyalam do?” nyabuka asibuk. Nyabuka asibukba, Isa Mutuku Dongonye arye Yahweh ati tamubuka nyabuk. “Nara tukwak mutuku im sirya, mutuku sirya banirye, ninye mutuku-mutuku nirya unyak ning ati, dipra banune.”

⁸ Nyabukopura, Allah el si Yahweh arye tamubuka Isa Mutuku Dongonye ati nyabuk. “Anda na amu tam pil donanye Ayub bira elilyam do? Anyapkenanye bira, talye ati kum nyapkine. Ninye mutuku-mutuku nirya unyak nang ara, el Ayub atonun kum unyake. Na pil donanye Ayub pung telebuk ulul atonun ton kum unyake. Elda na siuk erenilirye, malye un ning tonok ning babye pia kum winilule,” Allah arye nyabuk.

⁹ Nyabuk bukni, Isa Mutuku Dongonye arye tamubuka nyabuk. “Ayub tenelul ning ara, ‘Allah arye melinamnil’ tenen, an yupu kekebuka ukulule.

¹⁰ Tonda, an pil donanye, Ayub el winilul ning ara, talye ati kume. El talilul ning nirya ap, tonda el pil dolul ning nirya ara, ance moubuka kalikimince, aning-aning nirya yamubuka areminyeba talilule. Tonda, el weilul ning weik arye areminyeba, el ulul mutuku nirya langdilule.

¹¹ Bukni, winipmanto ara, ance arelyam ning nirya obuka sirya dakminyopura, el tonap an si kum erepnamkile. Tamubuka an dam malye yupu yanuka nyapkute,” Isa Mutuku Dongonye arye Allah ati nyabuk.

¹² Ayupu nirya akunum nyabukopura, Allah el si Yahweh arye, aisa deiyoknye Isa Mutuku Dongonye ati nyabuk. “Na damak arye tamubuka, Ayub dam bimince, el talibuk ning nirya ara, an deice deipkiniba, an tenepmalam touk, kum kipdeipnamlyame. Bukni, Ayub el nong deice tonok ara, ikin ning ton kum deipnamlyame,” Allah arye nyabuk. Nyabukopura, Isa Mutuku Dongonye adiparyuk, Yahweh el dam batakuka, Ayub un dam biyuk.

¹³ Binuka unmokce dinmokba, tonok sum ton, Ayub el mapu ap, el kilmapu ap nirya bulubuka, sikda el aik uk wekmekce, din ap, anggur mek ap, neika dinmek. Ayub el yuk unmok.

¹⁴ Atalak ara, tonoknye ton, Ayub dam yayukce nyabuk. “Naio an wa wena ati, an pil don nang arye, sapi basam tapu kirikuka libanmakba, sapi arye tuku palipnin banmak talak ara, an keledai basam ara, mutmuta otam binuka unmakce dinamake.

¹⁵ Abinuka unmak talak ara, Syeba mutuku nang yanmamce, an basam wein nang nirya, parang ya arye sirya opmakce, aweinmak ning nirya ara bobinmake. Bukni, na tonok bai tam sakuka yandopna arye nyapkine,” nyabuk.

¹⁶ Minop laka yupu nyalyanmoknye, tuba yanuka yupu nyanmok talak uk, yuknye ton yayukce nyabuk. “Nai Ayubo, an domba basam wein nang ap, an domba basam ap nirya ara, Allah im deice arye, uku buk dopkwetemalba, saklarye, obuka sirya dakmale. Bukni, na tonok bataknilba, yandopna arye nyapkine,” nyabuk.

¹⁷ Bitinye anye babye yupu nyabuka, kum sirya dakabuk buk, ton winilinye yayukce, “Na ni koprop Ayubo, Kasdim mutuku nang yupa winilye yayakce, an unta basam wein ati, pil don nang ap, an unta basam ap nirya obakce, na tonok batakneyakba, na ni, anti lake nyalyakine,” nyabuk.

¹⁸ Dumbarye anye bira, tuba yanuka sisikinmok buk, tonye ton, aminyan yayukce, nyabuk. “Naio an mapu ap, kilmapu ap nirya ara, sik du aik uk bulubuka wekmakce, kwaning ap, anggur mek ap, neika dinmake.

¹⁹ Awininmak bukni, talye karin arye, mok ap, mek ap kum ati, buppu weik arye ninye kum ulamik mutuku tam arye, weik kumanya ton yanmokce, anyaik dana-dana nirya yanuka donmalce ulupmalce, an mapu ap, kilmapu ap nirya, teikuka obuka sirya dakmale. Winipmalarye, na tonok batakmanilba, na ni anti nyalyakine,” nyabuk.

²⁰ Aning nirya akunum nyabikba, Ayub kekebukopura, el adiparyuk tikdobukce, weik imun kanye bopmuka ati, el cang baju ongopmok ning kwiribuka, kwiliklobuk. Tonda, el kisok potong lyeklobuk. Aning deiyok ara, ‘Yata deiyok ati, aikin kanye bon ning upmanil do?’ tenebukce, winibuk. Winibukopura, ‘Allah moropnun’ tenen, Ayub adiparyuk kanupdongobuka, gutam tuku dipdongobuka, Allah el si erebukce yupu nyabuk.

²¹ Kanupdongobuka bukukce, ayupu nyabuk. “Na nin birye deipkwetepnuk talak ara, baju ton kum ongopsirye, tonda bona ton talibuka kum yanamse. Atonun dipnirye, im deice binamne talak babye, baju ongopnirye, bona ton kum bobinamne. Aning ati ara, Allah Yahweh aryuk, aning-aning nirya arelamnuk touk, el Yahweh aryuk tamubuka dopropmanile. Ati, na ni Allah Yahweh ati, telebe nyapkine. Tonda, ‘Ninye mutuku-mutuku nirya Yahweh an si erenamkiyake’ tenen, telebe nyapkine.” Ayub birye Allah ati nyabuk.

²² Ayub weik ikin ning el deice yangalamuk talak nirya ara, “Allah arye malye kilinulule,” nyabuka, Ayub malye kum winilamuk. Tonda, Allah ati malye yupu ton kum nyalamuk.